Fakasigadan 17
17
Nu Gfae Fakatoglagan Famasaful Nasadian
1Abram at banwa gina siamk safulu e siam, Yawi ansure sa anya ay glong te, “Au wan at mabalyanan fag Dius. Glong au te, faningi tua gugat angku ay ugalii at yud e kalong. 2Namafasludan kban ku nasadian sa emu; namayu kyangay ban anggan am ngay kasugfunanan.” 3Ay Abram natudan namalub laman gfababaun sis Yawi at daga salubangan. Ay Yawi nalong anya te, 4“Ay katatuy ku nasadian sa emu: O ban ngayuk gaban taw at mama.#17:4 ngayuk gaban taw at mama: at masuad, mama sas fagafanudun. Galasya 3:29. 5Ay siginan ban katsi, bunwa ban Abram ya am ngayan, nu bunway Abrayam#17:5 Abrayam: at masuad, Ngayuk taw at mama. tua ban aroro nafili emu ngayuk gaban taw at mama. 6Ay gfayu kban am ngay kasugfunanan, ay siginan ban emu ngayuk gaban taw, ay kanya ban tiba nangasik ngay fun. 7Ay gfafasludan kban ku nasadian sa emu ay sa am ngay kasugfunanan te, au tua ban gugat at Dius. Ay gfataglayun kban ku nasadian kabavn. 8Katsi sik ngay betaw wayam sis talun Kanaan, ay dewa katanya, namagbilug kban kabavn sa emu ay anggan sam ngay kasugfunanan tuy fag talun, ay au tua ban gugat ay Dius.” 9Ay Yawi nadog yay fia nalong sas Abrayam te, “Bakvdi tua gugat ku nasadian sa emu. Ay fakatanyai yangay am ngay kasugfunanan at fakamulun sas fagunan. 10Ay sabaliwa ku nasadian sa ayu, tuy ban ay fagnamaningun: fae fakatoglagani fagayu mangama, 11laman sik fagtoglagan ku nasadian sa emu. 12-13Siginan katsi ay anggan ban sa am ngay kasugfunanan, fagayu munama kinsalug, fae fakatoglagani tua nu ndasug sis fawaluk menit siginan nu kasalug. Fagayu mangama si ay mesa talanan fae fakatoglagani, anggan ay ngay fagsuguan mangama at kinsalug sim fagbanwanan, ay anggan ay nabul fag ngay fagsuguan siginan tibak talun. Katanya at fagtoglagan tagfatuyan te, ku nasadian sa ayu gtaglayun tua ban kabavn. 14Nusnga sinu fag mangama at yud kaylat gfae fakatoglagan, lag am gtuyan ya anya te, ay ibama, aroro kanya nafae yud e masuad ku nasadian.”
15Yawi gdog yay nalong sas Abrayam te, “Wa ban o gngayan ya am mangena te, Saray, nu bunway nu guro ban o anya Sara#17:15 Sara: at masuad, Fun at baguina. wan. 16Gfadante kban anya ay gfon kban emu sik sisian siginan anya. Ay sia ban ngayuk gaban taw at mina ay tiba ban at kasugfunanan sik ngay fun.”
17Abrayam nu nadungug takatanya anlub ay naase. Ay namatangan te, “O nunda gsisian kyay ban, ku banwa dewa sadik sandan wan? Ay o nunda Sara gfafion yay ban at banwa dewa siam wak safulu?” 18Ay Abrayam nalong sas Dius te, “Nu masine, Ismael yakman am fagfadanteun.”
19Dius nabalus te, “Katatuy tua at matuyan: am bubay Sara gfasalug ban sik munama ay fangayani ban anya te, Isak.#17:19 Isak: at masuad, Kase. Namataglayun kban ku nasadian sa emu anggan sa am ngay kasugfunanan kabavn ban. 20Ay nadungug au am fagetun sabaliwas Ismael. Namadante au anya ay gfon kyangay ban anya ngayuk kasugfunanan. Kanya ban labi duak fun at mama ay at ngay kasugfunanan ban sik ngay talun ban at mabalyanan. 21Dewa katanya, namafasludan kban ku nasadian sas Isak. Ay Sara gfasalug ban Isak kata katsi fag buknga, fadogan ban fag banwa.” 22Dius nalo wan nu nafakamatoan wan Abrayam.
23Ginanya fag menit, Abrayam nafafasludan Dius at longan. Ay nafae fakatoglagan at sisian Ismael ay fagayu at ngay kaibaman mangama, ay at ngay fagsuguan mangama at kinsalug sit fagbanwanan ay anggan at nabul fag ngay fagsuguan. 24Abrayam at banwa siamk safulu e siam gina gfae fakatoglagan anya, 25ay at baguama Ismael labi tuluk banwa gina gfae fakatoglagan. 26-27Ay ginanya yangay fag menit, Abrayam ay Ismael anke fakatoglagan, anggan Abrayam at ngay fagsuguan at kinsalug sit bale ay anggan yangay at nabul fag ngay fagsuguan siginan tibak talun.
Currently Selected:
Fakasigadan 17: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
