Fakasigadan 27
27
Isak Nafadante Akub
1Isak mafufuama wan ay arvs wa glag ya. Sik menit, nauro Isaw te, “Faglon.”
Ay Isaw nabalus te, “Nataw, ste au mama.”
2Isak nalong te, “Mafufuama kwan ay wa glugo ya, kabul kwan. 3Namul o am godun, ay loi sas talun ay nanggamat o sik mangilafang laman sa angku. 4Ay fatamai kata ku fakaylatun nu mafataman, ay bubai wa vtv stae laman kon au. Nu ntabu kro kon, gfadante au emu aroro wa ban glugo ya nu gleleg au.”
5Gina Isak gfakamatoan Isaw, Rebeka gdungugan. Ay Isaw nu nalo wan laman nanggamat sik mangilafang, 6Rebeka nalong sat baguama Akub te, “Nadungug au am mama nu glong sam kaka Isaw te, 7‘Bubai sa angku sik mangilafang ay fatamai wa vtv kata ku fakaylatun nu mafataman. Ay nu naon kro, gfadante au emu sis Yawi at daga salubangan gina kyay gleleg.’ 8Nu katanya, faningi ku suguan emu. 9Loi sa tam ngay fagbaugun ay namul o duak kambing riangan at mataglu, ay namatama kro kata am mama at fakaylatun. 10Ay bubai ro sa mama, ay nu naon ro, kanya gfadante emu gina yay gleleg.”
11Ay Akub nalong sat mina te, “Nasaful wo, ku kaka sik tagasigyuun tua ay au, duan. 12Ku mama ro nu nated angku sumaful ro te, gdaya kway anya, ay kauri way ro angku abat ngate, gfadante angku.”
13Ay Rebeka nabalus te, “Ngenge, angku wa ro at fagfauriun nu kauri way ro emu, ku fakaylatun faningi ku suguan emu. Loi wan ay bubai sa angku sik kambing.”
14Akub nabul duak kambing at mataglu ay nabuba sat mina, ay Rebeka nafatama kata Isak at fakaylatun. 15Nu nafalganan wan fagayu, Rebeka nabul Isaw at lanbung at masine ay nafasulun sas Akub. 16Nafasa yays Akub at take ay anggan sat liug balat kambing, aroro sanya we sigyu. 17Sanya ginan, Rebeka nafon sas Akub at nafatama fag fakonun ay tinapay.
18Ay Akub nabuba sat mama kafag ngay fakonun ay nalong te, “Mama.”
Isak nalong te, “Ay sinu o ku baguama?”
19Ay Akub nabalus te, “Au Isaw am faglon. Nafakamulun kwan am suguan angku. Malunggungi wan ay oni wan ku nagamat fag mangilafang ay nu ntabu ro wo kon, fadantei wa ro angku.”
20Isak nalong te, “At kasakit nu ggamat o tuy.”
Ay Akub nabalus te, “Yawi am Dius nagubuk angku.”
21Ay Isak nalong yay fia te, “Akbangi fia stae, gted au emu laman sumaful au te, o wan Isaw.”
22Nu katanya, Akub ankakbang, ay at mama nated anya ay glong te, “Am aringang kata ways Akub, ay nute am kabilugan kata wa fias Isaw tagasigyuun.” 23Isak wa nasaful te, kanya mangaro Akub aroro at kabilugan gasigyuun kata Isaw.
Ay nu namadante wan, 24Isak nainto yay fia te, “O anud o wan Isaw?”
Ay Akub gbalus te, “Sabv, au wan.”
25Isak nalong te, “Kin, agvd, bubai stae am nagamat ay am nafatama fag fakonun, ay nu ntabu kwa ro gfangon gfadante kwan emu.”
Nu katanya, Akub nafon at ba fakonun ay at ba fanginum at malangu ay Isak nafangon wan ay nainum. 26Ay nu ntabu, Isak nalong anya te, “Wainyayo, akbangi sa angku ay ugwani angku.”
27Akub ankakbang ay naugwan at mama, ay Isak nu nayuk Akub at lanbung, gfadante wa vtv anya ay glong te,
“Ku baguama nu kayuk
kata yay Yawi at nafadante fag gamasun.
28Dius ban nangus gfon emu tagsiginans banwa fag damug
laman ban am gutluan ngayu tua gugat,
ay laman ban kasakan am fakonun ay am fanginum.
29Ay gfagsuguan ban o nangus ngayuk gaban taw
ay kanya ban nangus fagayu gfaning emu.
Gfunan ban o nangus am ngay kalongan
ay kanya ban fagayu tumoglag emu.
Nusnga sinu ban at nafauri emu e gfauri yangay ban anya,
ay at nafadante emu e gfadante yangay ban.”
30Ay Isak nu nafadante wan, Akub nalo wa vtv. Ay Isaw andasug siginan at fagnanlafatan. 31Ay kanya nafatama yangay at mataba fag fakonun ay nabuba sat mama ay nalong te, “Mama malunggungi wan ay oni ku nafatama ku nagamat ay fadantei ro angku.”
32Isak nainto te, “Sinu o?”
Ay Isaw gbalus te, “Au am faglon Isaw.”
33Isak nu nadungug, nafatadtaruyan glong te, “Sinu way manga aro at nagamat ay at nabuba sa angku fakonun? Nafangon kwan aro gina o gakadasugun. Ay nafadante kwan anya ay kwa mabul ya.”
34Ay Isaw nu nadungug takatanya, maksvn nu gwayway ay nalong te, “Mama, fadantei yap anggan angku.”
35Nu katanya, Isak nabalus te, “Am arian nadaya angku ay nabul wan ku famadante laman sa emu.”
36Ay Isaw nalong te, “Katsi at fadua ginan wa gdaya angku. Katanya wan fagnafangayanun anya te, Akub.#27:36 Akub: at masuad, Gted sungkulan, tagfandaya. Nabul wan ku fagmakakaun ay nabul yangay at famadante laman sa angku.” Sanya ginan, nainto te, “Mama, o wa gayvd e sawad ya am famadante laman sa angku?”
37Ay Isak nabalus te, “Nafili kwan anya laman am tagfayafun, ay nafili kyangay anya laman namagsuguan fagayu at kalongan. Nafon kwa anya ngayuk fakonun ay fanginum. Nu katanya, nataw yaro ku fon emu, faglon?”
38Isaw nafainfanyuan yay at mama te, “O wa gayvd e sawad ya dewa sadik famadante? Fadantei yap angku.” Ay kanya gfataglayun nu gwayway.
39Isak nalong anya te,
“Am fagbanwanan ban wa ngayu am gutluan,
ay kabavn ban ngayayu o siginans damug tagsiginans banwa.
40Ay gfawayan way ban o gugat,
ay gafagsuguanan ban o gugat am faduksay.
Dewa katanya, nu kauri way ban o gafagsuguanan,
makalfas wayo siginan at fagmabalyananun.”
41Isaw maksvn nu kadotama Akub aroro siginan at mama at nafadantean Akub. Nu katanya, Isaw gamatangan te, “Ku mama gakabulun wan; ay gina ban anbul, namabul kwan ku arian Akub.”
42Dewa katanya, Rebeka nasaful Isaw at algan, nu katanya, nafauro Akub ay nalong te, “Am kaka Isaw e algan namabul emu laman kalyam at dotama. 43Nu katanya, dungugani ku longan emu. Loi masakit sas talun Karan, sa ku faduksay Laban. 44Sanyai yap ban o yakmay ban am kaka at dotama nalyam. 45Ay am kaka ban at dotama sa emu nu nalyam wan ay nu ddi ban gamatang ya am nafakamulun sa anya, namafablang kyay ban emu sanya ginan fag talun. Aroro kwa kaylat nu gasfuan am kalyam siginan angku, siginan nu gfadfabulan am.”
Isak Nasugu Akub sas Laban
46Ay Rebeka nalong sas Isak te, “Kwa kaylat ya gleleg aroro Isaw at ngay namangena ngay taw Ket way. Akub ban at mangena nu ste ginan yangay at masine ngap kabul kwan.”
Currently Selected:
Fakasigadan 27: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
