Lukas 4

Satanas Nafaskud Isus

Mt 4:1-11; Mk 1:12,13

1At Masine fag Falad nu ntayuk sas Isus, Isus nalao wan siginans Liskung Urdan. Ay at Masine fag Falad nataban anya sas talun at yud e taw. 2Isus nu sanya ufatk safuluk menit, ay Satanas gfaskud anya. Kadugenya, Isus wa batang gfangon, ay maksvn nu kalunus. 3Ay Satanas nalong sas Isus te, “Nu Dius tuo at Baguama, longi stae fag gang te, ‘Akawati sik fakonun.’ ”

4Ay Isus nabalus te, “Duan. Dius at Longan at marirukan nalong wa te, ‘Sik taw nu gleleg, bundi lang siginans fakonun.’ ”#4:4 Deuterunumyu 8:3.

5Sanya ginan, Satanas nataban Isus sa sik buknga tangabat fia, ay kaduge sik liplip mata, nafabanawan anya sa sangay fagfagtainanan sas fagdaul daga. 6Ay Satanas nalong sas Isus te, “Gfon kwan sa emu fagmabalyananun ay fagmasineun laman nangagbilug ngay fagfagtainanan, aroro nafatigwanan wan sa angku kanya fagayu, ay e fagmabalyananun au gfon sas nusnga sinu ku fakaylatun ku fagfonan. 7Nu gseg tuo angku, o ban tagagbilug fagayu tuy.”

8Ay Isus nabalus te, “Dius at Longan at marirukan nalong wa te,

‘Segi am Fun, am Dius, ay sia yakman lang am fagfaningan.’ ”#4:8 Deuterunumyu 6:13.

9Ay Satanas nataban Isus sas Erusalem, ay nafalindug anya sas Dius at bale sat tiba tungud fag afud. Ay Satanas glong yangay fia sas Isus te, “Nu Dius tuo at Baguama, tosi ste ginan, 10aroro anriruk wan sas Dius at Longan te,

‘Kanya sumugu at ngay tagbarita laman ggubuk emu,

11laman at daluap gurug emu,

laman am darafa di katuktuk sas gang.’ ”#4:11 Alubad 91:11,12.

12Ay Isus nabalus te, “Dius nalong yangay te, ‘Lag gfaskud am Dius am Fun.’ ”#4:12 Deuterunumyu 6:16.

13Ay Satanas nu nalong wan fagayu at famaskud, nalo wan, laman namanya tibak menit.

Isus Gfasigad at Fakamulun sis Talun Galilea

Mt 4:12; Mk 1:14,15

14Isus anfoli wan sas talun Galilea ay at Masine fag Falad at fagmabalyananun si wa anya. Ay fagayu taw tagbanwan sit ligung fag ngay talun nadungug Isus at fakamulun. 15Ay Isus gfoyung sas taw Udyu at ngay bale fakafulan, ay fagayu taw naseg anya.

Taw Nasaret Kauri Isus

Mt 13:53-58; Mk 6:1-6

16Sanya ginan, Isus noli wan sas furuan Nasaret sat talun ebi gina munama yay, ay nasakbo sas bale fakafulan sis Famiangalay fag Menit, kata at ugali. Ay Isus namalindug, laman gtap Dius at Rirukan. 17Ay tagalaga nafon sas Isus, Isayas at nariruk fag fagtapan. Ay Isus nalugde, ay nu nalag at fagrvbvyun fag afud, kanya natap. Katatuy at nalong:

18“Dius at Falad si wa angku,

aroro Dius nafili angku laman namoyung au at Masine fag Barita sa sangay taw at yud e kwa.

Kanya nasugu angku laman namoyung au sat maubungan te, e gfalfas ban ayu,

ay laman namoyung au sas taw at yud glag te, glag ban am;

ay laman namalfas au at ngay taginkidapan,

19ay laman namoyung au te, andasug wan at buknga tam Fun nu gfalangfe taw.”#4:19 Isayas 67:1,2.

20Isus nu ntabu wan nu gtap, nafalut ay nafafoli sa tagalaga, ay kanya namalunggung. Ay fagayu taw sis bale fakafulan gdama anya. 21Ay Isus gfasigad gfoyung te, “Katsi fag menit, anfasludan wan ste fag afud rirukan kaduge am gdungugan.”

22Ay fagayu taw kaylat Isus ay andulo aroro at ngay foyungan masine, ay kanya fagayu gidgintoan te, “O nunda kanya bunwa Use at baguama?”

23Ay Isus nalong te, “Matuyan, lumong am sa angku te, ‘Tagfafia, fafiai am sadili,’ at masuad te, ‘Fakamuluni yangay ste sim furuan, kata em nadungug am nafakamulun sis furuan Kapernaum.’ ”

24Ay Isus nalong yangay fia te, “Matuyan nu glong au ayu te, ngay taw wa gdungugan Dius at taglong sit sadili furuan. 25Ay anud nu glong au te, kaduge Elyas gleleg, ngayuk fagbubayun sis talun Israel. Ay tuluk banwa ay unumk magdanun wa batang karak, ay andasug sik maksvn fag fanlunus sanya fag talun, 26dewa katanya, Dius wa nasugu Elyas sa sangay fagbubayun tagsis Israel, nu bunway sa way sik fagbubayun tagsis Sarefat sis Sidun fag talun. 27Ay kaduge Elisyu gleleg, ngayuk tagabangbang#4:27 bangbang: sik fakasaitun sis balat tagfatoglag te, kafag taw wa masine ya magamut sas fagngayuan. sis talun Israel, ay we nfia, sangay Naaman tagsiginans talun Sirya.”

28Fagayu taw sis bale fakafulan ankuri nu nadungug Isus at longan. 29Nu katanya, kafag ngay taw namalindug, ay naiyan Isus siginans furuan, ay nataban sa sik tangrawan, munakbang sit furuan, laman namatong. 30Dewa katanya, Isus nadalan sa kafag ngay taw at wabilug, ay nalao wan.

Sik Mangama at ke Mauri fag Falad

Mk 1:21-28

31Sanya ginan, Isus nalao sas furuan Kapernaum, sis talun Galilea. Ay sis Famiangalay fag Menit, kanya gfoyung sa sangay taw. 32Ay sanya fag ngay taw andulo nu nadungug Isus at foyungan, aroro Isus nu gfoyung, kata tua sik fun. 33Ay sis bale fakafulan e sik mangama at kintayuk sik mauri fag falad, ay kanya nauro te, 34“Isus fag taw Nasaret, nataw am fagyafakamulunun sa emi? O am algan namalyam wo em fagmabalyananun? Saful au te, o wan Dius at nasugu at Yud e Malong.”

35Ay Isus maksvn nu gsalag te, “Lag garingang. Ubuni wan kanya fag taw.” Ay kafag mauri fag falad nu nafatong kafag taw sas wabilug fagngayuan taw, naubun wan, ay kafag taw di e natarasan.

36Ay fagayu taw andulo ay gidgintoan te, “Nataw tuy fag foyungan? Aroro kanya kata sik fun, ay e fagmabalyananun gaiyan at mauri fag ngay falad, ay kanya fag ngay falad gfaning.” 37Nu katanya, sanya fag talun anfagdaul barita sabaliwas Isus.

Isus Nafafia Ngayuk Taw

Mt 8:14-17; Mk 1:29-34

38Isus namalindug ay nalo wan sanya ginan fag bale fakafulan, ay nasakbo sas Simun at bale. Ay ginanya, Simun at nugangina garagnat, ay tibak taw gfainfanyuan sas Isus te, “Fafiai anya.” 39Ay Isus ankakbang sanya fag mangena at day tigyangan ay nalong te, “Afiai,” ay anfia wan. Ay arodi vtv kanya fag mangena nlindug ay nafalganan sik fakonun laman sas Isus ay at ngay ufud.

40Ay gina menit gakafalyuun, ngay taw nabuba sas Isus at ngay ke fakasaitun, ay Isus nafatayuk at daluap sa anya fagayu, ay anfia wan. 41Ay Isus naiyan yangay at mauri fag ngay falad siginan ngayuk taw. Ay kafag ngay falad gina gduksun, guro sas Isus te, “O wan Dius at Baguama!” Dewa katanya, Isus nasalag laman wa garingang, aroro kafag ngay falad saful te, Isus, Dius at nafili fag Fun.#4:41 Dius at nafili fag Fun: sas Griegu, Kristu.

Isus Nalo wan laman Nanfamoyung

Mk 1:35-39

42Ay balabag di sdaga kamenit, Isus nalo wan ay andasug sa sik talun at yud e taw. Ay sanya fag furuan at ngay taw grvbvy Isus, ay kanya fagayu nu nalag, gfainfanyuan te, “Lag yap glao siginan em furuan.”

43Ay Isus nabalus te, “Masine nu namoyung kyangay at Masine fag Barita sabaliwas Dius nu gfagtainan nusnga nday fag furuan, aroro katanya at fagnasuguun angku.” 44Ay Isus gfataglayun nu gfoyung sa sangay bale fakafulan sis talun Udea.

Currently Selected:

Lukas 4: OCCT

Highlight

Copy