ማ̈ቶ̈ሳ 15
15
ባ̈ቢንታ̇ን ዎጋ
ማ̈ርቆ̈ሳ 7፡1-13
1ኢናፖ̇ ፔቲ̇ ፔቲ̇ ፋራሳ̈ዋንኬ ሙ̈ሳ ሂጋ̇ ታማርሲዛን ዬሩሳ̈ላማፖ̇ ዬ̈ሪ ዬሱ̈ሳኮ፥ 2“ኔ ታማ̈ራን ፌ ኩሽ ሜ̈ጫካይዶ̈ር ፊ̈ሺ ሙዪሙታ̇ ቲ̈ኖ ባ̈ቢንታ̇ን ዎጊን ኣባብ ኢ̈ሲ̇̈ራ?” ጌይዴ።
3ዬሱ̈ሳር ኢንታ̇ኮ “ዪንታ̇ሬ ዪንታ̇ ዎጊን ና̈ጋንዳ̇ቦ ጋ̈ሪ ጾ̈ሳ̇̇ ኪ̈ቲ̇ን ኦ̈ንዳብ ኣባብ ኢጺ̇̈ራ? 4ጾ̈ሳ̇̇̈ዲ ‘ኔ ባ̈ባኬ ኔ ኢንዲ̇ክ ቦንቻ̇ቤ’ ማ ‘ፌ ባ̈ባ ዎይ ፌ ኢንዶ̇ ቆ̈ዝ ኣሲ ዓይቆ’ ጋ̈ሪ ኪ̈ቲ̇ኔ። 5ዪንቲ̇ ጌይርዶሪ ፔቲ̇ ኣሲ ፌ ባ̈ባኬ ፌ ኢንዲክ ማ̈ዳ̇ዚን ኣሻ̇ሪ ‘ቴ ኢንታ̇ብ ኢማ̇ዝ ባዚን ጾ̈ሳ̇̇̈ብ ዣርሻ ኢሚ̇ኔ’ ጌዬጌዪን፥ 6‘ና̈ሳ ዪ ዎሃቦ ፌ ባ̈ባ ዎይ ፌ ኢንዲ̇ን ቦንቻ̇ንዳብ ኮሺ̇ባ̈ሴ’ ጌይሬ። ዪንቲ̇ ዪንዲስቲ̇ሙታ̇ ዪንታ̇ ዎጊን ሚ̈ንንዳ̇ቦ ጋ̈ሪ ጾ̈ሳ̇̇ ሂጊ̇ን ኢ̈ሲ̇̈ሬ። 7ዪንቲ̇ ኣሳ ቲ̈ን ጺላ̇ ማይጺዝ ኢ̈ት ኣሳን! ኢሳ̈ሲ ዪንታ̇ ባዝ ካ̈ዪ̈ርዶሪ፥
8‘ዓ ዎርዣ ፌ ኖ̈ናባር ሙታ̇ ታ̈ና ቦንቺ̇̈ሬ፥
ፌ ቡ̈ዳባራ ቴ ጋልዳፖ ጎታ̇ር ዎ።
9ኣሲ ኬ̈ሲ̇ኖ ዎጋ ሂጋ̇ ማሃሪ ታማ̈ርሲሙ̈ታ̇፥
ሜላ̇ ዓሪ ታ̈ብ ጎሽቲ̈ሬ’ ጌይኖን ኪን” ጌይዴ።
ኣስ ቄ̈ዝ ባዝ
ማ̈ርቆ̈ሳ 7፡14-23
10ዬሱ̈ሲ ዎርዣ ፌ̈ክ ጼይጋሪ ኢንታ̇ኮ “ሲስኪ̇ብቴ̇! ቆፒ̇ብቴ̇! 11ኣስ ቄዛ̈ዲ ኣሳ ኖ̈ና ጋርታ̇ፖ̇ ኬስኪ̇ዝ ኢ̈ታ̇ ባዝዶኬ ኣሳ ኖ̈ኒታ̇ ጌሊዝ ባዚ ኣስ ቄባ̈ሴ” ጌይዴ።
12ኢናፖ̇ ኢ ታማ̈ራን ኢ̈ክ ዬ̈ሪ “ፋራሳ̈ዋን ኔ ጌይኖን ሲስካ̇ሪ ጎይሊኖን ኔ ኤሪና?” ጋ̈ር ኢያ ኦይጪ̇ዴ።
13ኢ ኢንታ̇ኮ “ቴ ባ̈ባ ኣፎ̈ዲ ቶካካ̇ዮ ዱጫ ሚዲንቲ̇̈ሬ። 14ኢንታ̇ ኣሺ̇ብቴ፤ ኢንቲ̇ ኣ̈ፍ ዎባ̇ን ቲ̈ኒዝ ኣ̈ፊ ዎባ̇ን፤ ኣ̈ፊ ዎቢ̇ ኣ̈ፊ ዎቢ̇ኖ ኣስ ቲ̈ኔጌይን ናምኣን ዎል ኤካ̇ር ጋጋ ሉኪ̇̈ሬ” ጌይዴ።
15ጴ̈ጥሮ̈ሳር ኢ̈ኮ “ዪና̇ ሚሳ̇ሊን ቢርሺቺ̇ን ኑ̈ብ ሶ̈ላቤ” ጌይዴ።
16ኢያር ኢንታ̇ኮ “ዓኖ̇ ዬላ̇ር ዪንታ̇ብ ጌላካ̇ይ ዎ? 17ኣሳ ኖ̈ኒታ̇ ጌሊዝ ባዚ ዎይ ሚል ጋርታ̇ ጌላሪ ኢናፖ̇ ዛ̈ና ኬስካ̇ዚን ዪንቲ̇ ኤሪባ̈ሳ? 18ኣሳ ኖ̈ና ጋርታ̇ፖ ኬስኪ̇ዝ ባዚ ቡ̈ዳ ጋርታ̇ፖ ኬስኪ̈ሬ፤ ኣስ ቄዚንዳሬ ዪና̇ ኢዞ። 19ኣሳ ቡ̈ዳ ጋርታ̇ፖ̇ ኢ̈ታ ቆፊ፣ ኣስ ዎ፣ ኣሳ ማጫ̇ባር ሱርስ፣ ኦሎላ ጋዲ፣ ዉስ̇፣ ዎርዳ ማርኪቲ፣ ቆ̈ሳ ዪን ፌ̈ኖ ባዛን ኬስኪ̇̈ሬ። 20ኣስ ቄዛን ዪንፌ̈ኖ ባዛንዶኬ ኩሽ ሜ̈ጫካ̇ይ ሙይዛ̈ዲ ኣስ ቄባ̈ሴ” ጌይዴ።
ካና̈ና ጋዶ̇ ኣሲን ኣማ̇ና
ማ̈ርቆ̈ሳ 7፡24-30
21ዬሱ̈ሲ ኢናፖ̇ ኬስካ̇ሪ ጢሮ̈ሳኬ ሲዶ̈ና ካታማን ላፍ ዎ ቤሳ̇ን ጋርታ̇ ሉኪ̇ዴ። 22ኢናፖ̇ ፔቲ̇ ካና̈ና#15፡22 ካና̈ና ኣሳን ሚን ኢስሬ̈ላን ኢንታ̇ ዳካ̇ሪ ኢንታ̇ ጋዲን ኤኪ̇ኖ ኬል̇ባራ ዓይቃካ̇ይ ቡ̈ቲ̇ኖን ቤሲ̇ን ኢዝ ጋልዳ ሺ̈ቃር ዎ ኣሳንጋዶ̇ ማጭዶ̈ራ ዬሱ̈ሳክ ዬ̈ራ “ዳ̈ዊታ ናኣ ቴ ጎዳ̈ዶ! ቴ ናኢን ኢ̈ታ̇ ኣያ̇ናባር ኤ̈ንታ̇ር ቢጻ ቤቃ̇̈ሬ ኔ ታ̈ብ ሚጪንቲ̇ሼ ዋ̈ዴ” ጋ̈ር ዉይሳዴ።
23ዎቲናካር ኢ ፔቲ̇ ባዛር ኢዝቦ ሶ̈ሊ ማሃካ̇ይ ኣቲ̇ዴ። ዪና̇ ኢዝባራ ኢ ታማራን ኢ̈ክ ዬ̈ሪ “ዓና̇ ኣሲን ኑ ዎሂን ዬ̇ሙታ̇ ዉይሲዛኮታ̇ቦ ዋ̈ዴ ኔ ኢዞ ሚሺሼ” ጋ̈ሪ ኢያ ጌሺዴ። 24ኢያሬ ኢንታ̈ኮ “ጾ̈ሲ̇ ታ̈ና ዪኖ ዶሪፌ̈ን ማ̈ቂ̇ኖ ኢስሬ̈ላ ዜርንቦ ሙታ̇ ኪ̈ቲ̇ ሚሺኔ” ጋ̈ር ማ̈ሂዴ።
25ኣሲን ኢ̈ክ ዬ̈ያ ኢ ቶ̈ሂን ጻና ቡ̈ቂንታራ “ጎዳ̈ዶ! ኔ ታ̈ና ማ̈ዲ̇ሼ ዋ̈ዴ!” ጋ̈ዴ።
26ዬሱ̈ሳር ኢዝኮ “ና̈ኣን ፊ̈ሺን ኤካ̇ሪ ካናብ ቶጛንዳብ ኮሺ̇ባ̈ሴ” ጌይዴ።
27ኢዛር ኢ̈ኮ “ጎዳ̈ዶ! ዪና̇ ኪን፥ ዎቲናካሬ ካናንሬ ፌ ላ̈ ሌ̈ማታ ጋልዳፖ̇ ኬዲ̇ኖ ሱ̈ፓ̇ ማጺ ሙይሬ” ጋ̈ዴ።
28ኢናፖ̇ ዬሱ̈ሲ ኣሲንኮ “ኣ̈ሼ! ኔ ኣማ̇ኒን ሚ̈ን፤ ኔ ኮዪኖንዲፌ̈ን ኔ̈ብ ማ̈ቆ̇ጋ̈ቤ” ጌይዴ። ኣሲን ናኢንዳ̇ር ዪና̇ ኢዝባራ ፋጻዴ።
ዬሱ̈ሲ ማኖ ዎይሊን ኣስ ፋዴ
29ዬሱ̈ሲ ኢናፖ̇ ዲንዳሪ ጋሊላ ባሃ̈ሪን ላፍ ዬይዴ። ፉዳ ኢንዳ̇ ጋልዳ ኬስካሪ ኢና ዶኢዴ። 30ዎይሊን ኣሳንሬ ኢ̈ኮ ቶሂ ሜቂ̇ኖን፣ ኩሺ ዎባ̇ን፣ ኣ̈ፊ ዎባን፣ ኖ̈ና ሙ̈ማንኬ ሜላንር ማዛን ኤካ̇ር ዬ̈ሪ ኢ ቶሂን ጻና ጋዲ̇ዴ፤ ኢያር ኢንታ̇ ፋዴ። 31ዎርዣ̈ዳር ኖ̈ና ሙ̈ማን ሶ̈ሊኖን፣ ቶህ ሜቂንኬ ዬ̇ኖን፣ ኩሽ ዎቢ̇ኖንር ፋጺኖን፣ ኣ̈ፊ ዎባ̇ን ቤቂ̇ኖን ቤቂ̇ ጋራ̇ሚንታ̇ሪ ኢስሬ̈ላ ጾ̈ሳ̇̇ ጋላቲዴ።
ዬሱ̈ሲ ኦይዲ̇ ሙኩላ ኣሳን ፊ̈ሺ ሙሲዴ
ማ̈ርቆ̈ሳ 8፡1-10
32ዬሱ̈ሲ ፌ ታማራን ጼይጋሪ ኢንታ̇ኮ “ኣሳን ዓን ታባር ዓይዚ̇ ቃም̇ ዶኢኔ፤ ኢንታ̇ብ ሙይዝ ባዚ ባዮኮታ̇ቦ ኢንታ̇ ባዚ ታና ሚቺ̇̈ሬ። ኢንቲ̇ ሉኪ̈ርዶሪ ጎይም ጋልዳ ዳ̈ቡራሪ ኬዳካ̇ይፌ̈ኒ ኢንቲ̇ ኣባክ ሞ̈ካ̇ይዶን ቴ ኢንታ̇ ሚሻንዳብ ኮያባሴ” ጌይዴ።
33ኢ ታማ̈ራን ኢ̈ኮ “ዓት ዪ̈ዶኮ ዓ ኣሳ ዎይ̈ቦ ጊዲዝ ፊ̈ሺ ዓና̇ ባራሂን ጋርታ̇ ዎይዲፖ̇ ኑ ዲጚ̈ራ?” ጌይዴ። 34ዬሱ̈ሳሬ ኢንታ̇ኮ “ኣ̈ፊን ሶ̈ላ̇ ዪንታ̇ክ ዎ?” ጋ̈ሪ ኦይጪ̇ን ኢንታ̇ሬ ኢ̈ኮ፥
“ታብዛ ሶ̈ላ̇ኬ ኢሺታ̇ ሞላ ሙቃ̇ክ ዎ” ጌይዴ።
35ኢናፖ̇ ዬሱ̈ሲ ዎርዣ ሳ̈ዳ̇ ዶኣምፔ̈ን ኪ̈ቲ̇ዴ። 36ታብዛ ሶ̈ላ̇ንኬ ሞላን ዲን ኤካ̇ሪ ጾ̈ሳ̇̇ ጋላቲኖፖ̇ ዓኒ ዳርሲ̇ ዳርሳ̇ሪ ፌ ታማ̈ራንቦ ኢሚ̇ዴ። ኢ ታማ̈ራንሬ ዎርዣ ቃጊ̇ዴ። 37ዎይን ሞ̈ር ሚሽኪ̇ዴ፤ ሺኖ ዶካ̇ ኢ ታማ̈ራን ሺ̈ሻ̇ሪ ታብዛ ሌ̈ማታ ኩም ዲንዴ። 38ሙይኖ ኣሳን ማጫ̇ኬ ናኢኬ ፋይዳካ̇ይዶ̈ን ኣቲና ሙታ̇ ኦይዲ̇ ሙኩላ ኣሴ።
39ዬሱ̈ሲ ዎርዣ ኣ̈ል ሚሺኖፖ̇ ዎሃ ጎጛ ጋርታ̇ ጌላሪ ማጊዶ̈ና ጌይዝ ቤስ̇ ሉኪ̇ዴ።
Currently Selected:
ማ̈ቶ̈ሳ 15: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
