ማ̈ርቆ̈ሳ 2

ዬሱ̈ሲ ና̈ሳ ዎባ̇ ፋዴ

ማ̈ቶ̈ሳ 9፡2-8፤ ሉቃ̈ሳ 5፡18-26

1ጊላ̇ ቃማ̇ፖ ዓኒ ዬሱ̈ሲ ቂፊርና̈ሆ̈ም ካታማ ማ̈ቂ̇ ዬ̈ሪ ኣ̈ል ጌሊኖን ዎርዣ ሲስኪዴ። 2ዪ̈ኮታ̇ቦ ዎይሊን ኣሲ ዬ̈ር ኬ̈ባር ኩማሪ ካራ ጋልዳር ቤሲ̇ ዪዝ ዲራ̈ስ ሺ̈ቂዴ። ኢያሬ ጾ̈ሳ̇̇ ቃ̈ላ ኢንታ ታማ̈ርሲዴ። ኢ ቃ̈ላ ታማ̈ርሳምባራ፥ 3ኦይዲ̇ ኣሳን ዎልማ̈ቃ̇ር ፔቲ̇ ዎብ̇ ኣስ ቶ̈ካ̇ር ኢ̈ክ ኤሄይዴ። 4ዎርዣ ዎይሊኖኮታ̇ቦ ዬሱ̈ሲ ዎ ቤሲ̇ን ዬልንዳብ ኢንታ ጋሚን ኣፎ ኬ̈ን ሾክ ዎቲ ዴንሪ ዎባ̇ ኢ ሱርቂ̇ኖን ኣርሲንባር ዎልኣ ኢዝባር ሶ̈ቢሲዴ። 5ዬሱ̈ሳር ኢንታ ኣማ̇ኒን ቤቃ̇ሪ ዎባ̇ኮ “ቴ ኢሻ̈ዶ! ኔ ናጋራ ኔ̈ብ ኣቶ̇ ጌዪንቲ̇ኔ” ጌይዴ።

6-7ዪና̇ ኢዝባራ ሙ̈ሳ ሂጋ̇ ታማ̈ርሲዝ ኣሳን ኢና ዶኢንዶ̈ሪ ፌ ቡ̈ዳ ጋርታ “ና̈ሳ ዓ̈ ኣባብ ጾ̈ሳ̇̇ ጋልዳ ዪዲፌ̈ኖ ቆ̈ሳ ሶ̈ሊራ? ጾ̈ሳ̇̇ ፔታ̇ናፖ̇ ኣቲ̇ን ኣሳ ናጋራ ኣቶ̇ ጋ̈ንዳ̇ብ ዳንዳኢዛ ኦ̈ኖ?” ዪዝ ጋ̈ር ቆፒ̇ዴ።

8ኢንቲ̇ ፌ ቡ̈ዳ ጋርታ ቆፒ̇ኖን ዬሱ̈ሲ ፌ ኣያ̇ናባር ኤሊ̇ር ኤራሪ ኢንታ̇ኮ “ዪንቲ̇ ዪንታ̇ ቡ̈ዳ ጋርታ ኣባብ ዪፌ̈ን ቆፒ̇̈ራ? 9ዎባ̇̈ኮ ‘ኔ ናጋራ ኔ̈ብ ኣቶ̇ ጌይንቲ̇ኔ’ ጋ̈ዚምፔኬ ‘ኔ ኣርሲን ቶ̈ካ̇ር ሉካ̇ቤ’ ጋ̈ዚምፖ̇ ዎና̇ ዴ̈ጻ̇̈ራ? 10ቴ ዪንታ̇ብ ሶ̈ሎ፥ ታ̈ቦ ኣሳ ናኣ̈ቦ ሳ̈ዝ ጋልዳ ናጋራ ኣቶ̇ ጋ̈ንዳ̇ቦ ዎልቃ̇ ዎን ዪንቲ ኤራምፔ̈ኒ” ጋ̈ሪ ዎባ̇̈ኮ 11“ዲንዳ̇ራ ኔ ኣርሲን ቶ̈ካ̇ር ኔ ኣ̈ል ሉካ̇ቤ ጋ̈ር ቴ ኔ̈ብ ሶ̈ላሬ” ጌይዴ። 12ዎባ̇̈ዳር ዲንዳ̇ሪ ኣሳ ዎይ ኢያ ቤቃ̇ምባራ ፌ ኣርሲን ቶ̈ካ̇ር ሉኪ̇ዴ። ኢና ዎ ኣሳ ዎይ ጋራ̇ሚንታሪ “ዓ ፌ̈ኖ ባዝ ኑ ዉርሲ ቤቃ̇ራር ኤራካ̇ዬ” ጋ̈ሪ ጾ̈ሳ̇̇̈ቦ ጋላታ ሺ̈ሺ̇ዴ።

ዬሱ̈ሲ ሌ̈ዊ ጌይዝ ና̈ሳ ጼይጊዴ

ማ̈ቶ̈ሳ 9፡9-13፤ ሉቃ̈ሳ 5፡27-32

13ዬሱ̈ሲ ማ̈ቃ̇ር ባሃ̈ሪን ላፍ ሉኪ̇ዴ። ዎይሊን ዎርዣ ኢ̈ክ ዬይን ኢ ኢንታ ታማ̈ርሲዴ። 14ኢ ባሃሪን ላፊንባር ኣ̈̇ምባር ኢልፎ̈ሳ ናኣ ሌ̈ዊ#2፡14 ሌ̈ዊ ጌይዝ ና̈ሳ̈ብ ናምኢ ሱም ዎ። ኢ ሱም ፔታ̇ና̈ዲ ማ̈ቶ̈ሳ። ጌይዛ ቃራጻኣ ቃጺሲዝ ቤሳ̇ ጋልዳ ዶኢንዶ̈ን ቤቃ̇ሪ “ቴ ዎሂን ዬ̈ቤ” ጌይን ኢ ዲንዳር ኢ ዎሂን ሉኪ̇ዴ።

15ዬሱ̈ሲ ቡና ኡሽካ̇ንዳብ ሌ̈ዊ ኣ̈ል ጌሊንዶ̇ን ዎይሊን ቃራጻ ቃጺሲዛንኬ ናጋራንቻ̇ን ኢ ዎሂን ሉካ̇ሪ ኢያኬ ኢ ታማ̈ራንባር ዎልኣ ሙንት ኤ̈̇ዴ። 16ዬሱ̈ሲ ናጋራንቻ̇ንባርኬ ቃራጻ ቃጺ̇ዛንባር ዎልኣ ሞ̈ምባ̇ር ቤ̈ቃ̇ሪ ሙ̈ሳ ሂጋ̇ ታማ̈ርሲዛንኬ ፋራሳ̈ዋን “ኢ ኣባቦ ናጋራንቻ̇ንባርኬ ቃራጻ ቃጺሲዛንባር ዎልኣ ሙይራ?” ዪዝ ጋ̈ር ኢ ታማ̈ራን ኦይጪ̇ዴ።

17ዬሱ̈ሳር ኢንቲ ሶ̈ላዚን ሲስካሪ “ማኖንቦዶኬ ማካ̇ዮንቦ ኣኪማ ኮሽባ̈ሴ፤ ታ̈ናሬ ናጋራንቻ̇ን ታ̈ክ ጼይጋንዳብ ዬ̈ዶ̇ኬ ጺላ̇ን ጼይጋንዳብ ዬ̈ካ̇ዬ” ጌይዴ።

ጾ̈ማ ጎይ ኦይጪ̇ኖ ኦይች

ማ̈ቶ̈ሳ 9፡14-17፤ ሉቃ̈ሳ 5፡33-39

18ዋ̈ኒ̇ሳ ታማ̈ራንኬ ፋራሳ̈ዋን ጾ̈ሚርዶ̈ኒ፥ ፔቲ̇ ፔቲ̇ ኣሳን ዬሱ̈ሳክ ዬ̈ሪ “ዋ̈ኒ̇ሳ ታማ̈ራንኬ ፋራሳ̈ዋን ጾ̈ሚርዶ̈ን፥ ኔ ታማ̈ራን ኣባብ ጾ̈ሚባ̈ሳ” ጌይዴ። 19ዬሱ̈ሳር ኢንታኮ “ኢሳ̇ ኢንታባር ዶኣምባ̇ራ ቱሪን ኣሲ ጾ̈ማንዳብ ኮሺ̈ራ? ዪዝ ጊዳካ̇ዬ፥ ኢሳ̇ ኢንታባር ዶኣምባ̇ራ ኢንቲ ጾ̈ማንዳብ ኮሺ̇ባ̈ሴ። 20ኢሳ̇ ኢንታ ጋልዳፖ ሉኪ̇ዝ ኬሊ̇ ዬይሬ፥ ዪና̇ ኢዝ ኬሊ̇ንባራ ኢንቲ ጾ̈ሚሬ።

21“ሲላ ኣፊላ ጋልዳ ኦራ ጫርቃ ጋዳ̇ር ኪቢዝ ኣሲ ዎ? ዪዝ ዎቴ̈ጌንዶ፥ ጫርቂን ኦራንዳ ኣፊሊን ሲሊን ዳርሳ̇ራ ቲ̈ኖምፖ̇ ዉ̈ርሳ ኢ̈ሳ̇ር ኣሻ̇̈ሬ። 22ዪና̇ ኢዝፌ̈ኒ ቢርት ኤ̈ሲ̇ኖ ኤ̈ስ̇ ሲላ ኦካራ ጋርታ̇ ጋዲ̇ዝ ኣሲ ባዬ̇። ዪኖ̇ ዎቴጌይንዶ̇ ኤ̈ሲ̇ንዳ ኦካሪን ዳርሳ̇̈ሬ፤ ኢናፖ̇ ኤ̈ሲ̇ን ዉልኢንታ̈ሪ ኦካሪንዳር ሜላ̇ ኣታ̇ሬ። ዪ̈ኮታ̇ቦ ቢርት ኤ̈ሲ̇ኖ ኤ̈ስ ኦራ ኦካራ ጋርታ̇ ጋዳ̇ንዳ̇ብ ኮሺ̈ሬ” ጌይዴ።

ዬሱ̈ሲ ሳምባታብ ላ̈

ማ̈ቶ̈ሳ 12፡1-8፤ ሉቃ̈ሳ 6፡1-5

23ፔታ̇̈ብ ሳ̈ዚ ሳምባታ ቃምዶ̈ን፥ ዬሱ̈ሲ ጎስ̇ ቲሽ ጋርሳባር ኣ̈̇ምባር ኢ ታማ̈ራን ጎስ ቲሽ ዱ̈ሪ ሺጪ̇ ሙንት ኤ̈̇ዴ። 24ፋራሳ̈ዋን ኢ̈ኮ “ኔ ታማ̈ራን ሳምባታ ጋላስ ካዪንቲ̇ኖ ባዝ ኣባብ ዎቲ̈ራ?” ጋ̈ር ኦይጪ̇ዴ።

25ዬሱ̈ሳር ኢንታኮ “ዳ̈ዊቲ ፔታ̇ብ ኢ̈ት ጋፊ ኢያ ዎን ፌባር ዎ ኣሳንባር ዎል ማ̈ቃ̇ሪ ዎቲኖ ባዚን ዪንቲ ናባ̇ቢ ቤቃ̇ካ̇ያ? 26ቄ̈ሳ ኣላቃንቦ ኣላቃ ኣባ̈ታር ኬል̇ባራ ኢ ጾ̈ሳ̇̇ ኬ ጋርታ̇ ጌላሪ ቄ̈ሳንፖ̇ ኣቲ̇ን ሜላ ኣስ ሞ̈ካ̇ይፌ̈ን ካዪንቲ̇ኖ ጾ̈ሳ̇̇̈ቦ ዣ̈ርሺንቲኖ ሶ̈ሊ̇ን ሙይዴ። ፌባር ዎ ኣሳንባር ኢሚ̇ዴ” ጌይዴ።

27ዬሱ̈ሲ ማ̈ቃ̇ር ኢንታኮ “ሳምባታ ኣሳብ ኮቺ̇ንቲንዶኬ ኣሲ ሳምባታብ ኮቺ̇ንታካ̇ዬ። 28ዪ̈ኮታ̇ቦ ታ̈ኒ ኣሳ ናኣ̈ዲ ሳምባታብ ላ̈” ጌይዴ።

Currently Selected:

ማ̈ርቆ̈ሳ 2: ኦጫ̈ቃማ

Highlight

Copy