Niji auritai o ilpu Apostolo 1
1
Nuarin-tas alupas 1.
1AK Diofilus, kis upyi hup ainyak um aged nitasvitai iyehki va niji itai asega is atupun a Iesu um ago um esege,
2um yetpan u nadiat iyehki eris imyiaridjai yin, ja is upyi hup aien, um tas alep irai Nesgan Upene ehele ilpu apostolo iji eigki is ehtai ra aien:
3is wat ti pan itac nohocred o un, is nusjai aien, um ehcohos ehele ra, um lep ehvaig niji itai asjaaicnaig inivaijec is ahinag, eris ecet yin ara ira adiat is forte, is tas ehele ra aien va niji itai an nelcau o Atua:
4is tas ehele ra aien ira asjapicnaig ura, um, ika, Akumu amen Jerusalem aijaua um jim efi atga unyimia, jam aitgaig intas iyehki is upyi asaig a Etmak, akis ahgei ehelek aijaua:
5is idim baptiso ira atimi a Joanes an wai; ja uhpu baptiso iramia an Nesgan Upene, et wit ti pan itac nadiat inyi ti elpat.
6Eris wat asjapicnaig ara, eris ahodai yin ara, um ika. Ak Natimarid, napu lep atceijaig inpece o nupu Isreel imi ra aiek an naopan ineig, ka oʼo?
7Is um ika ehele ra aien. Et eti upene vai caua natovaig naopan iyehki, im nadiat iyehki, is ati a Etmak an nemda o un:
8ja akupu leh nemda aijaua, et wit yetpam iramia a Nesgan Upene: akupu atimi asuptecnaig nyak aijaua Jerusalem, im Jutaia asega, im Samerya, im lep irai iji pece asega an nobohtan.
9Is asan tas iji eigki aien; eris wat aes yin ara, eris imyiaridjai yin; is um leh yin nepeig an nuhup u nesganimtara.
10Eris wat anani nesganimtara ara an naridjai o un an nohatag, erus um aiji ubutpotet ehele ra natimi is ero, is ahi napelumai ira rau;
11erus ika arau. Ak nupu Calili, eka auri aijaua par easji pan an nohatag? Iesu meigki eh mun imyiaridjai yin an nohatag, etpu ham aien et idivaig napan o un ineig an nohatag eka mun almoi aijaua.
12Eris ahes an nedoon ara, nidan Olivet, um lep apan Jerusalem, et: tup idivaig natga o atimi an nadiat atumop mahes Jerusalem.
13Eris wat apan ara anliin neom is ethi, eris aridjai an nuarin-neom ijinies ara, is amen eahki a Pitrus, im Jakobus, im Joanes, im Antrius, im Filipus, im Tomas, im Bardolomius, im Madius, im Jakobus; inhal o Alfius, im Saimona natimi leh imi ilpu Silotai, im Jutas etoai Jakobus.
14Eris emda ara asega, is tup i ethi ache inliinmopura ara, um alaigaheni, um ugni itai, im lep ilpu takata, im Mere risi Iesu, im ilpu etoan.
15IS atidai a Pitrus an naopan iyehki an nuhup o ilpu atimi alaigaheni, (eris wat esvi ra eahki is idivaig is wun huntret im twente nidara,) um ika,
16Ak ilpu etoak, Eris idim ika uhpu ehneijid intas ineig o Nesgan Upene eris aged, is upyi asaig a Tevit vai Jutas, natimi iyehki is atau irai ra sji ehki aien eris arop irai Iesu ara:
17eris esvi pan yin irama, is apol pan an nuarin nauritai ineigki aien: [
18Is auanimtan nuarin-nobohtan a natimi ineigki an nimtan nedo has o un; ja is par etjo aien, is ahpati nipjinetgan, um elel nauintin asega:
19eris ato nitai iji eigki ara asega eris amen Jerusalem ara; va nitai ineigki, er anvi nidan nuarin-nobohtan iyehki par ika Akeltama, an tas ura, nesgan tas ineigki, nuarin-nobohtan ja.]
20Eris aged an nitasvitai Ohranitai, um ika, “Etmu ahoai lelcai nimnim o un,” etmu ti amen iran tah: “etmu esjipigmoig yin intak atimi par auritai:”
21eris idim ika eri ati natimi et ethi ira ra eris ahced caija ara irai iji adiat an namen o Iesu Natimarid eheleija,
22an nahes u nabaptiso o Joanes, um yetpan an nadiat iyehki eris leh yin eheleija um imyiaridjai yin, mika yi atau imi caija aien, um asuptecnaig inusjai o un.
23Eris aniv natimi is ero ara, Josef, tak idan Barsabas, eris lep anvi nidan par ika Justus, im lep Matdaias.
24Eris alaigaheni ara, um ika, Ak Natimarid, na ato inliinmopoi atimi asega aiek, namu asuptecnaig aiek natimi ineig ira rau, nai merit vai yin aiek,
25mika yi imtaam apol an nuarin nauritai ineigki o ilpu apostolo aien, is ude a Jutas va nedo has o un, mika yi apan an nuarin o un.
26Eris ikni itai asjaaicnaig ira rau ara; is etjo nitai asjaaicnaig imi Matdaias; eris esvi pan yin irai ilpu apostolo is eleven.
Currently Selected:
Niji auritai o ilpu Apostolo 1: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
