Niji auritai o ilpu Apostolo 4
4
Nuarin-tas alupas 4.
1ERUS wat tas arau ehele atimi, eris apan ehele rau a ilpu atimi ahlap, im natimi alupas an neom ahlap, im ilpu Satusi,
2eris taigtaig ara va nedo urau, nikavaig, erus esege imi atimi arau, um asuptecnaig inusjai o atimi vai inmas ura vai Iesu.
3Eris arop ira rau ara, um ati rau anliin neom ipjin um yetpan an tak apnyin: va nitai ineig is mun jupura.
4Ja eris imyiisjis ninivaijec natimi is ahinag ira ra eris atahaijeg intas ara; eris wat esvi atimi iji eigki eris idivaig eris faiv dausant ara.
5¶ Is wat lahlah an tak apnyin eris asjapicnaig Jerusalem a ilpu atimi alupas ura, im ilpu atimi tas alep, im ilpu atimi esege,
6im Annas natimi esjilid an nahlap, im Keafas, im Joanes, im Aleksanter, im lep ra asega ilpu atimi ehpan irai natimi esjilid an nahlap.
7Eris ati rau an nuhup ura ara, um ahodai rau, um ika, Erau mun ago nitai ineigki aijaurau va nemda u di, im nidai di?
8Is amen alupas ehele Pitrus a Nesgan Upene, is um ika ehele ra aien, Ak ilpu atimi alupas an pece, im ilpu atimi tas alep u nupu Isreel,
9el eka ahodai cumrau aijaua va nedo upene ineig eh mun ago irai natimi areci ineigki, um ika, er ago cehcehe yin, um uauo;
10akumu ato aijaua asega, im lep nupu Isreel asega, nikavaig, et atidai a natimi ineigki um umoh an nuhup unyimia va nidai Iesu Kristo nup an Nasared, aien aigki akis atgei yin aijaua an nauincai atgeig, ja is imyinusjai yin a Atua vai inmas o un:
11et hat ineigki aien akis esjum vaig aijaua, ak ilpu atimi acta neom; et idim hat esjilid ineigki an nesvi va neom:
12et eti ahes nimyiatamaig caija ehele tak atimi: eris eti lep aniv tah ira atimi an nobohtan ineigki, eris idim ika uhpu imyiatamaig caija vai yin.
13¶ Eris wat almoi nemda o Pitrus im Joanes ara intasvaig, um ato, nikavaig, erus tup atimi arau, um eti atimi esege, eris imyiali ara; eris lep imyiehva ara, nikavaig, erus amen ehele Iesu arau.
14Eris wat almoi natimi iyehki ara, eris ago cehcehe yin, naijivaig ehele rau, is ehka vai ra inlep asaigvaig tah nitai.
15Eris ika ehele rau ara, eru ude sjak nasjapicnaig arau, um alau ijo; ja eris tas jipe ara,
16um ika, Inti ago inhe akaija irai natimi iraigki? era idim ato natimi asega amen Jerusalem, nikavaig, erau mun ago nauritai ehka esjilid ineig arau; et ehka vai caija naterivaig:
17jai intumu acaiji emda rau akaija, mika eru jim lep tas ehelen tah natimi arau an nidan ineigki, va yi jim apaahni nitai ineigki ehele atimi.
18Eris lep ahlaig vai rau ara, um acaiji rau, mika eru jim lep tas an tah intas arau ka esege an nidai Iesu.
19Ja erus tas a Pitrus im Joanes, um ika ehele ra, Eka ikha aijaua, et upene an nuhup o Atua nimyiaijivaig intas unyimia, ka nimyiaijivaig intas o Atua?
20et ehka vai cumrau naterivaig nitai iji eigki ecrus almoi aijumrau um atahaijeg.
21Eris lep acaiji rau ara, um atceijai rau, va nedo o atimi, eris eti ecetai tah nitai ineig ara ehele rau uhpu aru vaig: eris imyiahpas Atua natimi asega va nitai ineigki erus mun ago arau.
22Is forte um eled inmesese irai natimi iyehki eris ago nauritai ehka iran, um ago cehcehe yin.
23¶ Eris wat atceijai rau ara, erus apan arau ehele ilpu etoara, um asuptecnaig intas asega eris asaig ehele rau a ilpu atimi ahlap esjilid, im ilpu atimi tas alep.
24Eris wat atahaijeg ara, eris ebras ahlaig vai Atua ara, um ika, Ak Natimarid, na Atua aiek, as ago nohatag aiek, im nobohtan, im injop, im niji itai asega amen iran:
25as tas aiek an nipjineucse Tevit naheca unyum, um ika, “Era auri a ilpu atimi aupat par atavaitap? era auri natimi par aktaktai intakitai?
26eris atidai a ilpu atimarid an nobohtan, eris lep ehras asjapicnaig a ilpu atimi alupas vai Ihova, im lep vai Kristo o un.”
27Et inivaijec ineig, nikavaig, eris ehras asjapicnaig a Herot, im Ponjus Pailet, im ilpu atimi aupat, im nupu Isreel, vai Naheca upene unyum, Iesu, as ati yin aiek,
28mika eri ago nitai iji eigki asega as upyi hup aiek um anacanac iran an nikmam, um ika uhpu ago.
29Im lep ineig, ak Natimarid, almoi intas atavaitap ura: um alupai ilpu aheca unyum nemda asega mika eri asuptecnaig intas unyum:
30namu ada nikmam aiek um ago cehcehe atimi; uhmu lep ago niji auritai ehka im niji auritai imyiali, an nidai Iesu Naheca upene unyum.
31Eris wat alaigaheni ara, is um ahcatina nuarin iyehki eris amen iran ara; is amen alupas a Nesgan Upene ehele ra asega, eris asuptecnaig emda intas o Atua ara.
32IS tup ethi ache inliinmopoi ra sji eigki is ahinag eris imyiisjis ninivaijec ara, im naktaktai ura: is lep eti ika tah, et o un ache niji itai o un; ja eris asipiaig jipe niji itai asega ura ara.
33Eris asuptecnaig emda inusjai o Iesu Natimarid a ilpu apostolo: is amen alupas ira ra asega naiheuc o Atua.
34Is eti ihki natimi tah ira ra: ara, eris ohuun nobohtan ara, im niji eom, eris ahtai ara, um leucse pan nimtan nitai iji eigki eris ahtai ara,
35um ikni u eduei ilpu apostolo: eris ahaig upene irai ilpu ihki atimi asega ara.
36Im lep Joses, eris lep anvi nidan a ilpu apostolo par ika Barnabas, (nesgan tas ineigki, Natimi tas upene,) is mapoi Livai aien, eris apos yin Saiprus,
37is ohuun nobohtan aien, ja is ahtai aien, um leucse pan nimtan, um ikni u eduei ilpu apostolo.
Currently Selected:
Niji auritai o ilpu Apostolo 4: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
