ወንጌል ዘዮሐንስ 9

ምዕራፍ 9

ዘከመ ፈወሶ ለዘዕዉሩ ተወልደ

1ወእንዘ የኀልፍ እምህየ ርእየ ብእሴ ዘዕዉሩ ተወልደ። 2#ሉቃ. 13፥2-4። ወተስእልዎ አርዳኢሁ ወይቤልዎ ረቢ በኀጢአተ መኑ ተወልደ ዝንቱ ዕዉር በዘርእሱኑ ወሚመ በዘአዝማዲሁ። 3#11፥4። ወይቤሎሙ እግዚእ ኢየሱስ ኢ ውእቱ አበሰ ወኢ አዝማዲሁ ዳእሙ ከመ ያስተርኢ ግብረ እግዚአብሔር በላዕሌሁ። 4#5፥17፤ ዘፍ. 1፥5። ወባሕቱ ርቱዕ ሊተ እግበር ግብሮ ለዘፈነወኒ እንዘ መዓልት ውእቱ እስመ ትመጽእ ሌሊት ዘኢይክል ቦቱ አሐዱሂ ገቢረ። 5#1፥9፤ 8፥12፤ ማቴ. 5፥14። እንዘ ሀሎኩ ውስተ ዓለም አነ ውእቱ ብርሃኑ ለዓለም። 6ወዘንተ ብሂሎ ወረቀ ውስተ ምድር ወገብረ ጽቡረ በምራቁ ወቀብዖ አዕይንቲሁ ለውእቱ ዕዉር። 7#ኢሳ. 8፥6፤ 2ነገ. 5፥10-11፤ ነህ. 3፥5። ወይቤሎ ሑር ተኀፀብ በምጥማቃተ ሰሊሆም ዘበትርጓሜሁ ሐዋርያ ወሖረ ወተኀፅበ ወገብአ እንዘ ይሬኢ። 8ወአግዋሪሁሰ ወእለሂ የአምርዎ ትካት ወይሬእይዎ እንዘ ይስእል ይቤሉ አኮኑ ዝንቱ ውእቱ ዘይነብር ውስተ ፍኖት ወይስእል። 9ወቦ እለ ይቤሉ ውእቱ ዝንቱ ወካልኣን ይቤሉ አልቦ አላ ይመስሎ ወለሊሁሰ ይቤ አነ ውእቱ። 10ወይቤልዎ እፎ ተከሥታ አዕይንቲከ። 11ወአውሥአ ወይቤሎሙ ብእሲ ዘስሙ ኢየሱስ ጽቡረ ገብረ በምራቁ ወቀብዐኒ አዕይንትየ ወይቤለኒ ሑር ተኀፀብ በምጥማቃተ ሰሊሆም ወሖርኩ ወተኀፀብኩ ወርኢኩ። 12ወይቤልዎ አይሁድ አይቴ ውእቱ ብእሲሁ ወይቤሎሙ ኢየአምር። 13ወወሰድዎ ኀበ ፈሪሳውያን ለውእቱ ዘዕዉሩ ተወልደ። 14#5፥9። እስመ ሰንበት አሜሁ አመ ገብረ እግዚእ ኢየሱስ ጽቡረ በምራቁ ወከሠቶ አዕይንቲሁ። 15ወተስእልዎ ካዕበ ፈሪሳውያን ዘከመ እፎ ርእየ ወይቤሎሙ ጽቡረ ገብረ በምራቁ ወወደየ ውስተ አዕይንትየ ወሖርኩ ወተኀፀብኩ ወርኢኩ። 16#7፥43። ወቦ እለ ይቤሉ እምፈሪሳውያን ዝንቱ ብእሲ ኢኮነ እምእግዚአብሔር ዘኢየዐቅብ ሰንበተ ወቦ እለ ይቤሉ በአይቴ ይክል ብእሲ ኃጥእ ገቢረ ዘከመዝ ተኣምረ ወተናፈቁ በበይናቲሆሙ በእንተ ዝንቱ ነገር። 17#4፥19። ወይቤልዎ ካዕበ ለውእቱ ዕዉር ምንተ ትብል አንተ በእንቲኣሁ እስመ ከሠተከ አዕይንቲከ ወይቤሎሙ ነቢይ ውእቱ። 18ወኢአምንዎ አይሁድ ከመ ዕዉሩ ተወልደ ወርእየ እስከ ጸውዑ አዝማዲሁ ለዘርእየ። 19ወተስእልዎሙ ወይቤልዎሙ ዝኑ ውእቱ ወልድክሙ ዘትብሉ ዕዉሩ ተወልደ ወበእፎ እንከ ይእዜ ይሬኢ። 20ወአውሥኡ አዝማዲሁ ወይቤሉ ነአምር ከመ ዝንቱ ውእቱ ወልድነ ወከመሂ ዕዉሩ ተወልደ። 21ወይእዜሰ ዘከመ እፎ ይሬኢ አው መኑ ከሠቶ አዕይንቲሁ ኢነአምር ኪያሁ ተሰአልዎ እስመ ልሂቅ ውእቱ ወይክል ተናግሮ ለርእሱ። 22#12፥42። ወዘንተ ይቤሉ አዝማዲሁ እስመ ይፈርህዎሙ ለአይሁድ እስመ አዘዙ አይሁድ ለእመቦ ዘአምነ ቦቱ ከመ ውእቱ ክርስቶስ ይሰደድ እምኵራብ። 23ወበእንተ ዝንቱ ይቤሉ አዝማዲሁ ልሂቅ ውእቱ ሎቱ ተሰአልዎ። 24#ኢያ. 7፥19። ወጸውዕዎ ዳግመ ለውእቱ ብእሲ ዕዉር ወይቤልዎ ሑር ሀብ ስብሐተ ለእግዚአብሔር ንሕነሰ ነአምር ከመ ኃጥእ ውእቱ ዝ ብእሲ። 25ወአውሥአ ውእቱ ብእሲ ወይቤሎሙ ኢየአምር ለእመ ኃጥእ ውእቱ ወአሐተ ባሕቱ አአምር ከመ ዕዉር አነ ወይእዜ እሬኢ። 26ወይቤልዎ ካዕበ ምንተ ገብረ ለከ ወእፎ ከሠተከ አዕይንቲከ። 27ወአውሥአ ወይቤሎሙ ነገርኩክሙ ወኢትሰምዑ ምንተ እንከ ካዕበ ትፈቅዱ ትስምዑ አንትሙሂ አርዳኢሁኑ ትኩኑ ትፈቅዱ። 28ወጸአልዎ ወይቤልዎ አንተ ኩን ረድኦ ሎቱ ወንሕነሰ አርዳኢሁ ለሙሴ ንሕነ። 29ወንሕነ ነአምር ከመ ለሙሴ ተናገሮ እግዚአብሔር ገጸ በገጽ ወለዝንቱሰ ኢነአምሮ ከመ እምአይቴ ውእቱ። 30ወአውሥአ ውእቱ ብእሲ ወይቤሎሙ ዓዲ በዝንቱ ጥቀ መንክር ውእቱ ዘኢተአምርዎ እምአይቴ ውእቱ ወከሠተኒ አዕይንትየ። 31#ኢሳ. 1፥15፤ ምሳ. 15፥29። ወንሕነሰ ነአምር ባሕቱ ከመ ለኃጥኣን ኢይሰምዖሙ እግዚአብሔር ዘእንበለ ለዘይፈርሆ ለእግዚአብሔር ወለዘይገብር ፈቃዶ ሎቱ ይሰምዖ። 32እምአመ ተፈጥረ ዓለም ኢተሰምዐ ግሙራ ከመ ቦ ዘዕዉሩ ተወልደ ወተከሥታ አዕይንቲሁ።#ቦ ዘይቤ «ዘከሠተ አዕይንቲሁ ለዘዕዉሩ ተወልደ» 33ሶበሰ ኢኮነ እምኀበ እግዚአብሔር ዝንቱ ብእሲ እምኢክህለ ገቢረ ወኢምንተኒ። 34ወአውሥኡ ወይቤልዎ ዘለሊከ በኀጢአት ተወለድከ አንተሁ ትሜህረነ ለነ ወሰደድዎ ወአውፅእዎ አፍኣ። 35#6፥40። ወሰምዐ እግዚእ ኢየሱስ ከመ አውፅእዎ አፍኣ ወረከቦ ወይቤሎ ተአምንሁ አንተ በወልደ እግዚአብሔር። 36ወአውሥአ ውእቱ ብእሲ ወይቤ መኑ ውእቱ ወልደ እግዚአብሔር እግዚኦ ከመ እእመን ቦቱ። 37ወይቤሎ እግዚእ ኢየሱስ ዘትሬእዮ ወዘይትናገር ምስሌከ ውእቱ ዝንቱ። 38ወይቤ አአምን እግዚኦ ወሰገደ ሎቱ። 39#ማቴ. 13፥13። ወይቤሎ እግዚእ ኢየሱስ አንሰኬ መጻእኩ ለኵነኔ ዝንቱ ዓለም ከመ እለ ኢይሬእዩ ይርአዩ ወእለኒ ይሬእዩ ይዑሩ። 40ወቦ እምፈሪሳውያን እለ ሀለዉ ምስሌሁ እለ ሰምዑ ዘንተ ወይቤልዎ ንሕነኒኬ ዕዉራንኑ ንሕነ። 41#15፥22።ወይቤሎሙ እግዚእ ኢየሱስ ሶበሰ ዕዉራን አንትሙ እምኢኮነክሙ ጌጋየ ወይእዜሰ ባሕቱ ንቡር ጌጋይክሙ እስመ ትብሉ ንሬኢ ወኢትሬእዩ ወበእንተዝ ኢይትኀደግ ለክሙ ጌጋይክሙ።

Currently Selected:

ወንጌል ዘዮሐንስ 9: ሐኪግ

Highlight

Copy