ወንጌል ዘማቴዎስ 18

ምዕራፍ 18

በእንተ ትምህርተ ትሕትና

1 # ማር. 9፥33-37፤ ሉቃ. 9፥46-49። ወበይእቲ ሰዓት ቀርቡ ኀቤሁ አርዳኢሁ ለእግዚእ ኢየሱስ እንዘ ይብሉ መኑ እንጋ የዐቢ በመንግሥተ ሰማያት። 2ወጸውዐ ሕፃነ ወአቀሞ ማእከሎሙ። 3#19፥14። ወይቤ አማን እብለክሙ እመ ኢተመየጥክሙ ወኢኮንክሙ ከመ ዝንቱ ሕፃን ኢትበውኡ ውስተ መንግሥተ ሰማያት። 4ወዘአትሐተ ርእሶ ከመ ዝንቱ ሕፃን ዝ ውእቱ ዘየዐቢ በመንግሥተ ሰማያት። 5#10፥40። ወዘሂ ተወክፈ አሐደ ሕፃነ ዘከመዝ በስምየ ኪያየ ተወክፈ። 6#ኤር. 51፥63፤ ሉቃ. 17፥1-2። ወለዘሂ አስሐቶ ለአሐዱ እምእሉ ንኡሳን እለ የአምኑ ብየ ይኄይሶ ከመ ይእስሩ በክሣዱ ማኅረጸ አድግ ወያስጥምዎ ውስተ ልጐተ ባሕር። 7አሌ ሎቱ ለዓለም እመንሱት ዘይመጽእ እስመ ግብር ይመጽእ መንሱት ወባሕቱ አሌ ሎ ለውእቱ ብእሲ ዘያመጽኣ ለመንሱት። 8#5፥29-30። ወእመኒ እዴከ አው እግርከ ታስሕተከ ምትራ ወግድፋ እምላዕሌከ እስመ ይኄይሰከ ትባእ ውስተ ሕይወት ሐንካሰከ ወፅዉሰከ እምእንዘ ብከ ክልኤ እድ ወክልኤ እግር ትትወደይ ውስተ እሳት ዘለዓለም። 9ወእመኒ ዐይንከ ታስሕተከ ምልሓ ወግድፋ እምላዕሌከ እስመ ይኄይሰከ ነቋረከ ትባእ ውስተ ሕይወት እምእንዘ ክልኤ ዐይን ብከ ትትወደይ ውስተ እሳተ ገሃነም። 10#ዕብ. 1፥14፤ ሮሜ 14፥13። ዑቁ ኢታስተሐቅርዎ ለአሐዱ እምእሉ ንኡሳን እብለክሙ ከመ መላእክቲሆሙ በሰማያት ወትረ ይሬእዩ ገጾ ለአቡየ ዘበሰማያት። 11#9፥13፤ ሉቃ. 19፥10፤ 1ጢሞ. 1፥15። እስመ መጽአ ወልደ ዕጓለ እመሕያው ከመ ይኅሥሥ ወያድኅን ዘተኀጕለ።

በእንተ በግዕ ዘተኀጕለ

12 # ኤር. 50፥6፤ ሕዝ. 34፥6፤ 11፥12፤ ሉቃ. 15፥4-7። ምንተ ትብሉ እመቦ ብእሲ ዘቦቱ ምእት አባግዕ ወእመ ተገድፈ አሐዱ እምውስቴቶሙ አኮሁ የኀድግ ተስዓ ወተስዐተ ውስተ ገዳም ወየሐውር ይኅሥሥ ዘተገድፎ። 13ወእምከመ ረከቦ አማን እብለክሙ ከመ ይትፌሣሕ በእንቲኣሁ ፈድፋደ እምተስዓ ወተስዐቱ እለ ኢተገድፉ። 14ከማሁኬ ኢይፈቅድ አቡየኒ ዘበሰማያት ከመ ይትኀጐል አሐዱ እምእሉ ንኡሳን።

በእንተ ገሥጾተ እኍ

15 # ዘሌ. 19፥17፤ ገላ. 6፥1። ወእመኒ አበሰ ለከ እኁከ ሑር ወገሥጾ በባሕቲትከ በባሕቲቱ አንተ ወውእቱ ወእመ ሰምዐከ ረባኅኮ ለእኁከ። 16ወእመሰ ኢሰምዐከ ንሣእ ምስሌከ በዳግም አሐደ አው ክልኤተ እስመ በአፈ ክልኤቱ ወሠለስቱ ሰማዕት ይቀውም ኵሉ ነገር። 17#1ቆሮ. 5፥4፤ 2ተሰ. 3፥14። ወእመሰ ኢሰምዖሙ ሎሙሂ ንግራ ለቤተ ክርስቲያን ወእመሰ ለቤተ ክርስቲያንሂ ኢሰምዓ ይኩን#ቦ ዘይቤ «ይኩንከ» ከመ አረማዊ ወመጸብሓዊ። 18#16፥19፤ ዮሐ. 20፥23። አማን እብለክሙ ዘአሰርክሙ በምድር ይከውን እሱረ በሰማያት ወዘፈታሕክሙ በምድር ይከውን ፍቱሐ በሰማያት። 19#ማር. 11፥24። ወዓዲ እብለክሙ ለእመ ኀብሩ ክልኤቱ አው ሠለስቱ እምኔክሙ በውስተ ምድር በእንተ ኵሉ ግብር ዘሰአሉ ይትገበር ሎሙ በኀበ አቡየ ዘበሰማያት። 20#28፥20። እስመ ኀበ ሀለዉ ክልኤቱ ወሠለስቱ ጉቡኣን በስምየ ህየ እሄሉ አነ ማእከሎሙ። 21#ሉቃ. 17፥4። ወእምዝ ቀርበ ኀቤሁ ጴጥሮስ ወይቤሎ እግዚኦ ስፍነ እመ አበሰ ሊተ እኁየ እኅድግ ሎቱ እስከ ስብዕኑ። 22ወይቤሎ እግዚእ ኢየሱስ ኢይብለከ እስከ ስብዕ አላ እስከ ሰብዓ በበስብዕ።

በእንተ ምሳሌ ንጉሥ ወአግብርቲሁ

23በእንተዝ ትመስል መንግሥተ ሰማያት ብእሴ ንጉሠ ዘፈቀደ ይትሐሰቦሙ ለአግብርቲሁ። 24ወሶበ አኀዘ ይትሐሰቦሙ አምጽኡ ሎቱ አሐደ ዘይፈድዮ እልፈ መካልየ። 25#2ነገ. 4፥1። ወኀጢኦ ዘይፈድዮ አዘዘ እግዚኡ ይሢጥዎ ምስለ ብእሲቱ ወምስለ ውሉዱ ወኵሎ ዘቦ እስከ ይፈዲ። 26ወወድቀ እንከ ውእቱ ገብር ታሕተ እገሪሁ ወሰገደ ሎቱ ወአስተብቍዖ#ቦ ዘኢይጽሕፍ «ወአስተብቍዖ» እንዘ ይብል እግዚኦ ተዐገሠኒ ወኵሎ እፈድየከ። 27#ሉቃ. 7፥42። ወምሕሮ እግዚኡ ለውእቱ ገብር ወፈትሖ ወዕዳሁኒ ኀደገ ሎቱ። 28ወወፂኦ ውእቱ ገብር ረከበ አሐደ ገብረ እምነ አብያጺሁ ዘይፈድዮ ምእተ ዲናረ ወአኀዞ ወኀነቆ እንዘ ይብል ሀበኒ ዘትፈድየኒ። 29ወወድቀ ውእቱ ገብር ታሕተ እገሪሁ ወአስተብቍዖ እንዘ ይብል ተዐገሠኒ ወኵሎ እፈድየከ። 30ወአበዮ ወሖረ ወሞቅሖ እስከ ይፈድዮ። 31ወርእዮሙ አብያጺሁ ዘገብረ ተከዙ ጥቀ ወሐዊሮሙ ነገርዎ ለእግዚኦሙ ኵሎ ዘገብረ። 32ወእምዝ ጸውዖ እግዚኡ ወይቤሎ ኦ ገብር እኩይ ኵሎ ዕዳከ ኀደጉ ለከ እስመ አስተብቋዕከኒ። 33#ቈላ. 3፥13። አኮሁ መፍትው አንተሂ ትምሀር ቢጸከ በከመ አነ መሐርኩከ። 34#5፥26፤ ያዕ. 2፥13። ወተምዐ እግዚኡ ወመጠዎ ለእለ ይሣቅይዎ እስከ አመ ይሤልጥ ኵሎ ዘይፈድዮ። 35#6፥14-15። ከማሁኬ አቡየኒ ሰማያዊ ይገብር ብክሙ እመ ኢኀደግሙ አበሳሆሙ ለቢጽክሙ እምኵሉ ልብክሙ።

Currently Selected:

ወንጌል ዘማቴዎስ 18: ሐኪግ

Highlight

Copy