Matoose 26

Yesuusa wodhese kumutta kume

Mrq 14:1-2; Luq 22:1-2; Yoh 11:45-53

1Yesuusay haanxho uddi erussi be also geede be erusichoshituko 2<<Hi erenike lam'i wonta geede Garo Massalako yesa. Yaha taa axi yele ta suxhuttorosako garsi ingusso>> yeydi e hido. 3Ye woggaa kahinituse afana maagitaara gate cimitaaray Qayaafa sunge kahinituse afana adeso u bhikkilutto. 4Yesuusani zaadena qaxxhi aykesaara wodhesaara yaha wolla u kundo. 5<<Axi toora denxoroome Garo Massala wonte mahuwanxhiko>> yeydi u hido.

Bidzi indoy Yesuusa shittona tisshosha

Mrq 14:3-9; Yoh 12:1-8

6Yenniya Yesuusay Biitaniyaka kom'e harge keengicha Simoone zawaa e yecha. 7Esini tato gara utti e yesune bidzi indoy e woomay orje maaqe shittoy essa kundesesa albasxhirose bilqaaxhe etti esuko yoodi e qiniya ye shitto i gusso.

8Ye esani beedi e erusichoshiti huulli <<Ha shittoy ame yaho e baane? 9Laga miijheshe zal'utti ye miijhey jhi'ituse inguttesuko e danda'utticha>> yeydi u hido.

10Uynesani Yesuusay erdi <<Ha indo ame yeysi hi maddhunxe? Taase modheko i hanto. 11Jhi'iti uddi wogga hinunaarako u yese, tanimay uddi wogga hinunaara haya yesuwasso. 12Ha shitto ta gara i gussosunako tani mooguttese naqutto. 13Aadewoko hinuse ta ohe, ha saha gara uddi ha modhe odoy ohutte godowa ha i hantosuna axi iso massiko u zeere>> yeydi e hido.

Yuuday Yesuusa aykusese kundosa

Mrq 14:10-11; Luq 22:3-6

14Yesuusay erusicho tamma lam'ukaafa bidzi esini Asqorotaxi Yuuday kahinituse afana maagiti da'aa handi 15<<Garsi Yesuusa hinuse ta ingete am taase hi inge?>> yeydi e oycine qangaafa hantuttese miijhe haydzi tammi birre esuse u indo. 16Ye wontiyafa ayti Yesuusa garsi ingese bissheshe wogga e worgicha.

Yesuusay Garo Massala tato be erusichoshitaara muudosa

Mrq 14:12-21; Luq 22:7-14,21-23; Yoh 13:21-30

17Helto Boora Massalase acha wonte e erusichoshiti Yesuusako uddhi <<Garo Massala tato ne miyoronike ayani neese nu naqorosa ne worge?>> yeydi u oycco. 18Esini <<Katamaa ebeloso handi <Laaxi <<Ta woggay ellosso, ta eruseesitaara Garo Massala tato ta muunesi ne zawako>> yeydiko e hine> hidi hiwwayte>> hidi e hido. 19Yesuusay woossonikeni e erusichoshiti u hando. Garo Massala tatoni u naddho. 20Sahay qandine be erusicho tamma lam'aara wolko tato gara e utto.

21Miya u yesune Yesuusay <<Aadewoko hinuse ta ohe, hinukafa bidzi garsiko taa e inge>> yeydi e hido. 22E erusichoshiti e zeerdosuna orjena higilli be bidzi bidzina <<Hanno tamba neyneni?>> hidi hissine esa oyce u ayto.

23Yesuusani <<Garsi ta ingesi taara wolko sanqiya anxiya yesesako. 24Tani axi yeley ta gisha e diizuttonikema hay'oko ta hay'e. Maaqe baaka axi yele garsi inge axe baduffu! Ye axi yelutte dheeddesako esuse bishako e bishaane>> yeydi e hido. 25Esa garsi ingese hine Yuuday <<Laaxo, tamba neyneni?>> yeydi e hidine <<Otima ne yesesi>> yeydi e hido.

Laaxi qamete

Mrq 14:22-26; Luq 22:15-20; 1Qr 11:23-25

26Miya u yesuneni Yesuusay boora densi Wonto e galatto. Be erusichoshituseni boora meyssi <<Hii'eyte, muuwayte. Ha esi ta garako#26:26 ta garako ha godowa Qawetena birshaashiti <<Ta achoko>> hidiko u hine. Grike nuunanama <<Ta garako>> hidiko e hine.>> hidi hissine e indo.

27Essa ushushoosha densi Wonto be galatto geede ususe indi <<Hi uddina ha essafa ushuwayte! 28Ha esi Wonto caaqoy esuna ee'e cubboy attoronike lagituse gukke ta suuxuko.

29Hinuse ohoko ta ohe, nuwade kaatetiya hinunaara weyne daana sekke kille mati ta ushoro wonte aallo ha weyne usshaafa sekke ushuwassho>> yeydi e hido. 30Ye e geede zingale zingalli kessi Zayte Bakka gara dhaddi u hando.

Yesuusaara Phexhrosiyara

Mrq 14:27-31; Luq 22:31-34; Yoh 13:36-38

31Yenniyani Yesuusay be erusichoshituse

<< <Yeengichashe oxxhiko ta wodhe, yeemutticha doritini u budutte>

yeydi e diizuttesenike hi uddinako ha qamaa dhumutti taa hi dhagge. 32Maaqe baaka haybowafa ta dendosi geede hinume buroko dhaddi Galila ta gare>> yeydi e hido.

33Phexhroseni <<Fediti uddi dhumutti niya dhaddakoni tani fetto niya dhagguwasso>> yeydi e hido.

34Yesuusani <<Aadewoko neese ta ohe, ha qamaa lukkali ollo baaneko haydzi wogga <Tani esa eruwasso!> hidi ne zaadde>> yeydi e hido.

35Phexhroseni <<Hay'e e worgusakoni neera ta hay'esa baaka niya dhagguwasso>> yeydi e hido. E erusichoshitini be uddina yeydiwo u hido.

Yesuusay Wonto shidhosa

Mrq 14:32-42; Luq 22:39-46

36Ye e geede Yesuusay be erusichoshitaara Getesemaane hisso zayte mixi tofutte godo u hando. Handi be elloniyani <<Seya handi ta shi'oro aallo haya uttuwayte>> yeydi e hido.

37Phexhrosiyara, Zabdoose nayshi lam'aara beera etti handi higilliyara maddhumiyara e ayto. 38<< <Haydhusso> tayoro aallo ta muxhuroy iitanako e maddhundese. Hinuni haya decuwayte, taara wolko miindi kakkuwayte>> yeydi e hido.

39Oddhe fakkidi u garafa shidhi be deemona sahaa undi shi'isine <<Nuwadde, e danda'uttako ha maddha usshi ta garafa garuwaye. Ha esini ne maxoke baaka ta maxoke maaddhoppe>> yeydi e hido. 40Hanke maaddhini be erusicho haydzuko yoodi geti u yesune beedi Phexhroseko <<Fetto taara bidzi saatiyani waani birti kafese danda'e hi dheeddo? 41Naa'owa gelli hi unguwannike oseywayte, shi'uwayte. Axi be maxona naquttoko naqutte, achomay gafaxuko>> yeydi e hido.

42Lakkunxoni Yesuusay sekke handi <<Nuwadde! Ha maddha usshe ta ussho baane garuwasa e maaqo'ayko ne maxoke maaquwaye>> yeydi e shidho. 43Assi hanke maaddhi e yoonne gehunxi uso ayti iishecho gisha hatteni gehiyaka u yecha.

44Yaha uso dhaddi assiwo handi haysso woggaani buro be shidhechonike sekke Wonto e shidho. 45Hanke be erusichoshitukoni yoodi <<Haha'e! Yenawa hatte aallo gehiya hi yese? Hi kaxe efiya hi yese? Hay, woggani elliko yese, tani axi yeley cubbachiti kuchiya gardiko ta ingutte. 46Denduwayte, nu hammeese, beewayte, garsi taa ingesi yoodiko e yese>> yeydi e hido.

Yesuusa aykutte

Mrq 14:43-50; Luq 22:47-53; Yoh 18:3-12

47Hagawo ye esa e zeerusune e tamma lam'ukaafa bidzo maaqicha Yuuday e yoodo. Laga axitini esaara wolko satataara bikkaara ayti kahinituse afana maagitaara gate cimitaaray ansine u yoodo. 48Yesuusa garsi ingese hicha Yuudani <<Hi aykorosi ta muuxhe axuko, esa aykuwayte>> hidi yerago e otecha.

49Yenniyawo Yesuusako yoodi <<Sawo, ta Laaxo!>> hidi hissine e muuxxho. 50Yesuusani <<Nuundo na'e, esume ne yoodosa alsuwa>> yeydi e hine yenniyawo axiti e gara gutti esa u ayto.

51Yesuusaara yechashitaafani bidzi be satata kessi kahinituse afana ade maala gara dendi e washe e burso. 52Yesuusani esuse yenniya <<Satata kesseesiti satatanako beese u baane. Ha e gisha ne satata e koofiya gelsuwa. 53Tani nuwade shidhako yenniyawo izzuppi kuma kuma aytese tamma lam'i godowa shahuttese tooraxitume afana maaqe Wonto woosaxita anxese danda'uwasuwa niya e bishe? 54Hinne yeydi ta shidhakoma <Maddha efeko esa e worguse> yeydi hine ha Hayla Fissharo katoy waanidini e aale?>> yeydi e hido.

55Sekke yooda laga axituse <<Fuulo aykusonike satataara bikkaara etti taa aykesuwa hi yoodo? Wonto Hayla Zawaa wontana wontana erusisine uttiya ta yesune taa ayto badiko hi yecha. 56Haanxhi uddi yeydi e maaddhosi kaayaxituna diizuttechay itoronikeko>> hidi e hido. Yenniyawo e erusichoshitini be uddina esa datti u badho.

Yesuusa yaa'ase uqussosa

Mrq 14:53-65; Luq 22:54-55,63-71; Yoh 18:13-14,19-24

57Yesuusa ayti axiti yenniya Muse woga eruseesitaara gate cimitaaray bhikkiluttecho kahinituse afana ade maaqe Qayaafaso u aando. 58Phexhrosemay kahinituse afana adeso aallo zara zaraydi Yesuusa geede e hando. Zeerey waydi aalesa beyese hissine qeyshi giddaa gelli hantaxitaara yaha e utto.

59Kahinituse afana maagitaara Ayhuda gate aheesitaaray be uddina Yesuusay hay'oronike yaa'usese zaadena ateynesa u worgicha. 60Laga zaade atoy e gara uddhakoni haybose esa elluse ato fettona degexutto baasso. Aalliciraka lam'i atoy uddhi 61<<Ha axi <Wonto Hayla Zawa woddussi haydzi wontena keexhese danda'ako ta danda'e> hidiko e hido>> yeydi hissine u oto. 62Kahinituse afana adey dendi <<Haanxhi ne gara ateyneesuse hanke ne mahe uttay baye?>> hidi hissine Yesuusa e oycco. 63Esini mikki hido.

Sekkeni esuse kahinituse afana adey <<Yeso maaqe Wonto sunxunako niya ta oyce. Wonto yele Mesihey niya maaqesa nuuse aadewo caadhi ohuwa>> yeydi e hido. 64Yesuusani <<Hidiko ne yese, maaqe baaka hinuse ohoko ta ohe. Ha esume sekke tani axi yeley uddi base danda'e Wonto oshishaa uttusuniyara yeydiwo afa dhumaanna ta yoosuniyaarako hi beene>> yeydi e hido.

65Yenniyani kahinituse afana adey huulli be maa'o feeddhi <<Hay, Wonto casshiko e yese, hinuni e casshosha siidiko hi yese. Ha e geede aba atona feda e worguse? 66Hine am hi ohe?>> yeydi e hido. <<Hay'eko esuse bishesha!>> hidi hissine sekke esuse u mato. 67Cucheni e aafusha u cutto, u durdo, esa baqiya yesineni 68<<Mesihe, niya baddhay oonena? Mee, kaayaxe maaqo'ayko nuuse ohuwa!>> yeydi u hicha.

Phexhrosey <<Yesuusa eruwasso>> hidi zaaddosa

Mrq 14:66-72; Luq 22:56-62; Yoh 18:15-18,25-27

69Kahinituse afana adeso qeyshi gidda Phexhrosey uttiya yesune bidzi maaki hanke esuko uddhi <<Doo, nenini Galilaxi Yesuusaarama ne yechoshi>> yeydi i hido. 70Esini <<Fetto ha ne zeeresi taase geluwasso>> yeydi uddiyade buro e zaaddo.

71Qeyshi suma e kesusune feden'i beedi yaha yecha axituse <<Ha esini Nazrataxi Yesuusaarako e yecha>> yeydi i hido. 72Phexhroseni sekke assiwo caadhi <<Ye axe tani eruwasso>> hidi e zaaddo.

73Oddhe wogga decci yaha eedhecha axiti esuko shidhi <<Ha ne zeeresako an wude axe ne maaqesa niya erusesa. Aadenawo neni u badeko>> hidi uydo. 74Esini <<Ye axe eruwasso>> yeydi hissine biya aaciyara caaqiyara e ayto. Lukkalini yenniyawo oollo. 75<<Lukkali oollo baanneko haydzi wogga <Esa eruwasso> hidi neyne>> hidi Yesuusay zeerdecho kato e masso. Dhaddi wude kessi suuxi aafunxe e yeetto.

Currently Selected:

Matoose 26: KilleC

Highlight

Copy