Matoose 28

Yesuusay haybowafa dendosa

Mrq 16:1-10; Luq 24:1-12; Yoh 20:1-10

1-2Sanbatay gardine acha wonte ketiya Magdoolaxhi Maaramiyara ye fede Maaramiyaray e boossa beyese u hando. E maxutto baanne iitana saha en'oy e maaddho. Wonto woosaxini afaafa hodhi boossa suma tuccecha shuche andarsi e gara e utto. 3Woosaxi aafushani zeelunxuke faqicha e maa'oni shachuke booticha. 4Boossa kakkichashiti esani jhasshi koburdi haydhasuke u maaddho.

5Ye woosaxi indowaxhitani <<Jhasshofita, suxhuttecha Yesuusa hi worgenike erako ta ere. 6Haya baasso, be otechonikeko e dendese. Woydhi e yecho godo yoodi beewayte. 7Yoonase ukke handi <Haybowafa dendosso, Galilako dhaddi hi buro e gare, yahako esa hi degexe> yeydi e erusichoshituse ohuwayte. Tanini hay otusso>> yeydi e hido.

8Yenniyani indowaxhiti boossaafa haynani jhassho haynani magga hissine e erusichoshituse handi ohese allena u woxxho. 9Ogiya usaara muti Yesuusay <<Sawoyte>> yeydi e hido. Esuko uddhi e toke ayti e buro u akkirdo. 10Yenniyani Yesuusay <<Jhasshofita! Handi nuundo na'axhituse Galila u hamoronike ohuwayte. Yahako taa u beene>> yeydi e hido.

11Ye indowaxhitini hamiya yesune boossa kakkicha tooraxitaafa bidzi bidziti maaddha base uddina kahinituse afana maagituko katamaa handi u oto. 12Kahinituse afana maagitaara gate cimitaaray bhikkilutti wolla be kundo geede be tooraxituse miijhe lagussi indi 13<< <Nu getesuneko e erusichoshiti qama yoodi aha kayssi u etto> yeydi axuse odusuwayte! 14Ayhuda gate ahichashini ha zeere e siita'ayko nuunko esaara zeerara, maddhay hi gara elluwannikeko nu mahe>> yeydi u hido. 15Ye tooraxitini miijhe etti hade u otechonike u mato. Ye odoy hanzo aalloni Ayhudaxiti gidda yeydiwoko e odusutte.

Yesuusa woosso

Mrq 16:14-18; Luq 24:36-49; Yoh 20:19-23; Anx 1:6-8; 1Qr 15:3-8

16E erusicho tamma bidzi Yesuusay otecho bakka gara Galila u hando. 17Esa beedini e buro u akkirdo. Maaquwaye baaka bidzi bidzitini eezzo. 18Yesuusani hanke usuko uddhi <<Adetoy uddi afaani sahaani taase inguttiko e yese. 19-20Yoonase be wude wude yese axituko uddi hanguwayte! Adena yelena Ayaana Geeshi sunxuna xhamaqisine hinumba ta woossosa uddi u kaforonike erusisine ta oge hangeesita mahuwayte. Yebo ha saha aallicira aallo uddi wogga tani hinunaara wolkoko ta yese>> yeydi e hido.

Currently Selected:

Matoose 28: KilleC

Highlight

Copy