Ijaag Wosɛytaanakoŋk 1
1
Guugunytan
1Iin Tewopiloos, taapɛɛraɓana jeemɛ wargatɛɛ naakɛ ola sigɛɓa Yeese tuke sɛɛg ijaagaak a sigɛɓa rɔɔriyaɗik baŋɛ, 2a inɓa ki ŋaarin dariya, ege sigi sekiyɛ sigɛɓa gaɓɛ sɛɛg Yeese Wɛɛŋakɛ sigɔɔgɛ Geetitaanakik baŋiyaak, nomtaanaka sigaagaɓa daam sɛɛgik. 3Saaɓa Yeese laŋkiɗ rakatɛk baŋiya, nɛɓa yaaŋɛ sɛɛga ɛɛk a ɓɛɛlɛ wɛɛŋakɛ misikiriyɛɛkɛ sigɔɔgɛ ɓɔɔkaaŋɔŋk. Nɛɓa yaaŋɛ sɛɛga ɛɛk a ɗoŋ pɔlpɔlɛ joop pɛɛyk, nɛɓa rɔɔriya agut burɛ Waakoyotoŋk. 4Ɓeny omalte saaɓa Yeesee a sɛɛg agut omoŋɔŋk nyon ɗamatoŋkuk, nɛɓa tonu sɛɛga kɛ, "Kat ŋaarirɛɛ Yorsaleeme. In koorɛɛ any sinɛkan tonu Baabɛk kɛ gaɓɛkɔɔ kɔnaŋɔŋk sinɛkan tiyɛɛr eeteek jeemɛk. 5Aadikan kɔnu Yowanis maawɛ, mayakana iinak aadɛɛkɔɔ kɔnu Wɛɛŋakɛ sigɔɔgɛ Geetitaanakik ɗoŋikɛ sigɔɔgɛ tekeriŋɔŋk baŋiya."
Ŋaar Yeese Dariya
6Saaɓa nomtaanak gɛɛnɛ tolɗiɗ agut omoŋɔŋk, nɛɓa kɔɔniyar Yeesee kɛ, "Suumi naŋk, ɔɔtɛ sinɛkɔɔ jumurkuɗun joopa Israeelak ɗoo nɛŋkik sisɔ?"
7Nɛɓa Yeese jumur sɛɛga kɛ, "Kikɔna ɗɛyɛɛ a ɗegerari ɔɔtɛ a sayiti sinɛɓa gaamu Baabɛ ɓaŋkawukaat nɛɛkɛkik. 8Mayakana saakoy kɔna kurakiɗ Wɛɛŋa sigɔ Geetitaanakik raŋanaak nɛkoy boŋiir ɓaŋkawuka, nɛkoy waasiɗiikar agut eet sinɔɔnɛ Yorsaleemuk, sinɔɔnɛ ɗoo Yuudaak baŋɛ, sinɔɔnɛ Sɛmaariyaak, mɛlɛɛɗa kɛntɛya ɗookoŋk."
9Saaɓa Yeese toniiɗ sinik baŋiya, nɛɓa ŋaar dariya a dɛdɛnar, nɛɓa badɛɛr tiimana.
10Saaɓa ŋaarɗik nɛɓa sɛɛk mermena dariya, nɛɓa ɛtɛr sɛɛge jɔk joop a pɛɛy sigɔ latu abiyak sigɔ tupenyjuŋɔŋk. 11Nɛɓa tonur sɛɛga kɛ, "Iinak joop Gɛlilaak, ɛtɛɛr a mermenaakari dariya agut jikon? Yeesee sini dɛnɛɛr saa ŋaarɗi dariyak weerikikoy oko sinɛ dɛnɛrɗɔ saa ŋaarɗik."
Daamɛɛ Maatiyaas Ɔɔtɛ Yuudaak
12Saadi baŋiya weerikɓa nomtaanak kurkum Dɛbirɛ Jɛytik Yorsaleema. Kurkum Dɛbirɛ Jɛytik ege yowɛrka nɛɛkɛ Yorsaleeme kiilo meeter omoŋ. 13Nɛɓa Petros, a Yowanis, a Yaykoob, a Indiriyaas, a Pilipoos, a Toomaas, a Bɛrtɛloomiyos, a Maatiyos, a tɔɔn Ilpiyoosuk Yaykoob, Simion sinɛɓa palamɗi agut ɗoo nɛɛkik, a tɔɔn Yaykoobuk Yuudaa mɛlɛrkiɓa Yorsaleema nɛ teeŋɛr pooka sinaanaɓa beebeɗarɗik. 14Totoliiɓa sɛɛk ɗanɗamɔɔna ɓɛɛnyɔwɛ gɛɛŋk baŋɛ, a jartiyatɔk a omoŋ omoŋ, a Maariyam ɛmɛs Yeeseya, a ɓɔrɛ manyaakak Yeeseya agut omoŋ.
15Ɓeny omalte saaɓa tolɗiɗ ŋaadtaana sigɔ ɗibɛ omoŋ a ruumer iɗitik, nɛɓa Petros ɛtɛ sɛɛge kɔɔr nɛ tonu sɛɛga kɛ, 16"Iinak manyaakak eeta, gunkan dusanɛɛ pɛrka sigɛɓa tonur sɛɛg Wɛɛŋa sigɔ Geetitaanakik jeemɛ Daawite Wargatɛɛ sinɔɔnɛ Geetitank agut Yuudaa sinɛkan ɔɗɔwen joopa sigaagaɓa gaamur Yeeseekiŋ. 17Yuudaa sɛɛnkan a eteŋk agut omoŋ ijaag naŋk."
18Iɗit sini ɓaliɓa ɗoo worii sinaanɛɓa gagiɗɛ agut ijaag tikiyɛɛkoŋkuk, nɛɓa saadi muke tepeen nɛɛkɛ ɗoo, nɛɓa sarii ɛɛk nɛɛkɛk sɔ kɔɔroŋk, nɛɓa kɛɛtiɗi ɗikiny gɛɛnɛŋ. 19Nɛɓa ɗegerar any sini joop sigɛ beeɗir Yorsaleemek baŋɛ, nɛɓa riyɛɛ ɗoo sinɛ ad nɛŋk kɛ Akeldaama, wooran nɛɛk sinɔ kɛ Ɗoo Yɛromoŋkuk.
20Nɛɓa tonu Petros kɛkar kɛ, "Nɔ ɓɛɛlɛɛɗ sinik oko sinɛɓa taapɛɛɗɛ Wargatɛɛ Iiliyagoŋk kɛ, 'In koy ɓɛɛlɛ gode nɛɛkɛ sɔkɔn, kat koy lakɛ iɗit sinɔ beeɗiiɗik.' Ɛɓa taapɛɛ kɛkar kɛ, 'In koy boŋiiɗ suumiikeen nɛɛk iɗit omaay.'
21"Agut sini ɗɛyɛ tina a daamii iɗit a omoŋ nyona Yuudaak, joope sigaagɛkan eteŋk a sɛɛgik saaɓa Suumi Yeese weeweriiɗ ɓɛɛnyɔwɛ gɛɛŋk baŋɛ eteŋkɛ kɔɔruk, 22a tukiɗi aadiit Yowanisik mɛlɛɛɗa ɓɛɛnyɔwa sinaanakan Suumi Yeese ŋaarɗi dariyaak. Iɗit sinɔ sɛɛn a eteŋk kɛnɔ waasii ŋaarin nɛɛk ret walasak."
23Saadi baŋiya wideetarɓa sɛɛk joop a pɛɛy, sɛɛg sigi, Yoosep sinɛɓa riyɛ kɛ Bersaabak maŋk Iyoostoosuk a Maatiyaas. 24Ɗanɗamaaɓa saaɓak kɛ, "Iin Suumi sinɛ ɗeger ɓayɛ etoŋk baŋɛk. Yaaŋ tina iɗit sinɛkɔ daamun joope sigeege pɛɛyk, 25yaaŋ tina iɗit sinɛkɔɔ boŋu nyon Yuudaak sinɛkɔ ŋɔr ijaag nɛɛk wosɛyɛɛtoŋk saakɔ ŋaarɗi nyona nɛɛkaakik." 26Saadi baŋiya orurɓa ita nɛɓa ɗiiri ita nɛɛkɛ Maatiyaasa. Nɛɓa ikomɛɛ sɛɛn a wosɛytaanak sigɛ aarin a omoŋɔŋk agut omoŋ.
Currently Selected:
Ijaag Wosɛytaanakoŋk 1: KSTM
Highlight
Share
Copy
Want to have your highlights saved across all your devices? Sign up or sign in
