Ijaag Wosɛytaanakoŋk 2
2
Mɛlɛrki Wɛɛŋa Sigɔ Geetitaanakik
1Tolɗiiɓa ŋaadtaana a nyon omoŋ agut omoŋ baŋɛ, waawuy Pentekosteek. 2Nɛɓa sisa mɛlki koŋgoy dari a ito wɛɛr sinɔ ɓaŋkawuŋɔŋk, nɛɓa enyɛr gode sinɛɓa atukuɗuk. 3Nɛɓa dɛnɛɛ ola sigɔ ito kaɗateer maɗoŋkuk, nɛɓa kaakasar ɛɛk nɛ dokur sɛɛge raŋk a omoŋ omoŋ. 4Nɛɓa enyɛɛri Wɛɛŋakɛ sigɔɔgɛ Geetitaanakik sɛɛg baŋɛ, nɛɓa tuker a tonɗi atutunɛ ɔgɔɔkɛ oko sinɛɓa sɛɛga gaɓɛrɗi oolan nɛɛkik Wɛɛŋa sigɔ Geetitaanakik.
5Saaɓak joop Ayuuduk sigɔɓa ɓaŋkaawar ɗanɗamɔɔnuk sigɔɓa kurak ɗokanɛɛkɛ sigaagɛ ɓɛɛlɛr ɗook raŋk ɓɛɛlɛrɓa Yorsaleeme. 6Saaɓa tiyɛrɗi ɗooran sinik, nɛɓa tolɗitar joop a ɓɔɔkaaŋ. Nɛɓa tiyɛr a tonɗi joop sigɛ atutunɛ gɛŋk a omoŋ omoŋ, nɛɓa reemɗi ɓayɛtun gɛŋk sɛɛg baŋɛ.
7Reemɗiɓa ɓayɛtun gɛŋk a ŋaatir nɛ tonur kɛ, "A moko joop Gɛlilaak sigi tonɗi oko sinikik? 8Anɛ tiyii a tonɗi atutunɛ ɗokan sigɛɓa tin ɓartɛɛɗɛɛk ɛk? 9Eteŋk joop Parteek, a Meedik, a Eelaamuk, a Mɛspetoomiyaak, a Yuudaak, a Kɛpɛdookiyaak, a Pantoosuk, a Isiyaak, 10a Pirgiyaak, a Pinpiliyaak, a Gibsik, a nyonitaak sigɛ atu ɗook Libiyaak sigɛ atu Kɛreenaake jɔkuk, a joop sigɔkan guugunyar joopa Ayuuduk, a joop Ayuuduk sigɔkan kurak Roomeek, 11a joop Kɛrteesik, a Arɛbik. Nɛ sisɔ tiyii joop sigi baŋɛ a tonur ijaag Waakoyotoŋk sinɔ obiiŋɔŋk atutunɛ gaŋk!" 12Nɛɓa reemɗi ɓayɛtun gɛŋk sɛɛg baŋɛ nɛ kir ɗegerɔɔn kɛ tonur ɛk, nɛ totoni ɛkanɛɛkɛ gɛŋk kɛ, "Ege sini any sinɔ ɓɛɛlɛ ɛkik?" 13Maɓa ɔgɔɔk daraayɛr sɛɛg nɛ tonur kɛ, "Uterkɔ ogool wɛynik a ɓɔɔkaaŋ nɛ pɔyarŋ."
Toni Petrosuk
14Saaɓak ɛtɛrɓa Petros a nomtaanak sigɛ aarin a omoŋɔŋk, nɛ tonu a ɗooruŋ joopa sigaaga ɓɔɔkaak kɛ, "Iinak joop ɗoo Yuudaak a joop sigɛ beeɗir Yorsaleemek, in geleewɛɛ kɛ ɗɔm anta sineena kɔna tonaak! 15Kir joop sigi tɔpɔy oko sinɛ koɓurɗɔɔk, in ege ɔɔtɛ nɛɛkɛ sayitiyɛ jiit romiɗoŋk. 16Mayakana nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa tonu iɗit pɛrkaakoŋk Yooelk.
17Tonu Waakoyot kɛ, 'Wawuykɛ sigaagɛkoy pediyoŋk ɓɛɛlɛkoy oko sinik,
gupatɛɛrakoy Wɛɛŋa gaaŋk joopa baŋɛ.
Tɔɔmɔk goŋk sigɛ moojakik a sigɛ peetakik waasɛrkoy pɛrka,
joop goŋk sigɔ atiinyiik dɛnɛrkoy pɛrkiyɛ,
gutarɛyɛ goŋk pɛrkiɗiikoyŋ.
18Ɓɛɛnyɔwɛɛkɛ sigaagɛkoyk,
gupatɛɛrakoy wɛɛŋa gaaŋk ijaageera gaana sigaaga moojakik a sigaaga peetakik,
nɛkoy sɛɛk waasɛr pɛrka.
19Yaaŋakoy ola sigɔ reemɗi ɓayɛk a sɔɔriyɛ rakaay dari a ɗook goyse ɗeek,
lakɛkoy yɛrom a maɗ a duuŋan tooroŋk.
20Kɔjurkukoy waawuyŋ,
makoy ɛyɛn gayi a yɛrom,
a in kiiki mɛlɛɛ waawuy sinɛ obi a reemɗigeeɗ ɓayaayk sinɛkoy goopaaɗ Suumiik.
21Joop sigɛ riyar tiriya Suumiyoŋk baŋɛ bɔdɛrkoyŋ.'
22"Iinak joop Israeelik, in tiyɛɛ kɛ ɗɔm. Lak Yeese Naajireetik ɓaŋkawuka sinɔ ito Waakoyotoŋkuk, yaaŋɛɓa Waakoyot goy Yeeseek iinakɛ kɔɔr sɔɔriyɛ, a ola sigɔ reemɗigeeɗ ɓayaayk, a ola sigɔ boobɛrŋɔŋk, oko sini ɗegerarɗɔɔk. 23Gaɓɛɛɓa Yeesee ariita noŋk koɓiiɗ Waakoyotoŋk sinaanɛɓa ɗeeŋk, a ɗegerɔɔn nɛɛkɛ, nɛɓa laalawari ariit joop sigɔ ŋɛɛwɛŋɔŋk nɛ ɓokotiiriŋ. 24Yakanaɓa Waakoyot aalɛ ɓaŋkawuka retoŋkuŋ, nɛɓa boŋku sɛɛn ret walasa agut sinɔ kiirɓa sɛɛn ret gaamit a dakɛɛriŋ. 25Tonuɓa Daawit agut sɛɛn kɛ, 'Dɛna Waakoyo ɓɛɛnyɔwɛ gɛɛŋk baŋɛ taamɛkɛ gaanɛk. Nɛ kaa ŋaatan, agut sinɔ ar sɛŋk ɗiɗikakɛ gaanɛk. 26Agut sini yaa ɓayɛ naakɛkiŋ, tonɗi ato naakɛ yaakaat, beeɗ taar naakɛ ŋaadiyɛɛkɛ sigaagɛ kookorɛɛk. 27Kiirinti toŋoɗ sioola takana. Kiirin toŋoɗ geetitan nook kɛnɔ dakɛɛr utula retoŋk kɛnɔ mojɛɗ. 28Yaaŋinkɔta gopan wɛɛŋakoŋk, yaata jɛt agut sinɔ iin a eetik.'
29Iinak manyaakik eeta, oola a tona kɔna kɛ ɗɔm kɛ ɔrɛyak gaŋk sigɛɓa ɗeeŋk om Daawit rɛrɓa nɔɓa kɔɔwɛɛ, a ɓɛɛlɛ pii nɛɛkɛ seedi lak eteŋkik mɛlɛɛɗa sisɔwa. 30Sɛɛnɓa iɗit pɛrkaakoŋk, nɛɓa ɗeger kɛ kuumɗigeeɗɓa Waakoyot kɛ komoy nɛɛkɛ om riiɓekoy barsum nɛɛkɛ raŋk. 31Sɛɛn dɛnɛɓa any sini jeemɛ, nɛɓa tonu ŋaarin ret walsak kɛ kiirkoy Kerese dakɛ utula retoŋk, kikoy mojɛ buusɛ nɛɛkɛk. 32Boŋkuɓa Waakoyot Yeesee ret walasa. Eteŋk misikiriyɛ any sinik baŋɛ. 33Nɛɓa sɛŋk ɓɔŋgɔɔrɛ ɛɛk rakaaya nɛ beeɗ ɗiɗikakɛ Waakoyotoŋk, nɛɓa boŋu Wɛɛŋa sigɔ Geetitaanakik sigɛɓa tongeeɗ Ɛpɛna Waakoyotuk kɛ gaɓaakoy naŋɔŋk nɛ gupatiki any sini dɛnɛɛrik a sini tiyɛɛrik. 34Sisɔ kiɓa sɛŋk Daawit ŋaarin dariya. Tonuɓa sɛŋk ɔɗɔwa nɛɛka kɛ,
35" 'Tonuɓa Waakoyot Suumiya naaka kɛ,
"Beeɗ ɗiɗikakɛ gaanɛk,
nɔkoyna ariiɗa gumaakeer gooŋk, a atu ɓaŋkawukaat nookɛ goyse ɗeekik.' "
36Sisɔ in ɗegerar joop Israeelik baŋɛ kɛ ɗɔm kɛ Yeesee sinɛɓa laalawarik ariɓa Waakoyot a Suumi ɛ Keresee,!"
37Saaɓa joop gɛɛnɛ tiyɛrɗi sinik, nɛɓa ɓeesɛ sɛɛg ɓayɛtun jɛt. Nɛ tonur Petrosa a wosɛytaanaka sigaaga ɔgɔɔk kɛ, "Iinak manyaakak eteŋka, anɛ ijaagii jikon?"
38Nɛɓa Petros tonu sɛɛga kɛ, "In weerikɛ tikiyɛɛkɛ Waakoyota nɔ kɔnu aadɛɛ a omoŋ omoŋ tiriyaakɛ Yeeseek, nɔkɔɔ kɔne ranyjɛɛrɛ tikiyɛ goŋk. Boŋiirkɔɔ Wɛɛŋa sigɔ Geetitaanakik sigɛ tigiik. 39Kuumeet sini iinaka a tɔɔmɔka goŋk, a joopa sigaagakoy riy sɛɛg Suumii naŋk Waakoyot ɛɛka nɛɛkakik sigaaga ɓɔrɛ atu a yowɛɛɗŋɔŋk.
40Waasɛɓa sɛɛga Petros ola a ɓɔɔkaaŋ a jeeɗo ɔɔtɛ nɛɛk jɛt, tonuɓa sɛɛga kɛ, "In koolɛɛ ɛɛk noŋk goopan sinaanɛkoy mɛlki ɓartiyɛɛka sigeega ŋɛɛwɛŋɔŋk." 41Boŋurɓa sɛɛge joop a ɓɔɔkaaŋ pɛɛni nɛɛk nɛɓa aadɛɛ sɛɛgiŋ. Ɓeny sinaanɛɓak tuukiɗiikɓa ŋaadtaana a atu sigɔɔgɛ kumɛɛ jiitik. 42Tiitiyarɓa sɛɛk rɔɔriyɔn wosɛytaanakoŋk, nɛɓa arir omaayikeen, nɛɓa nyɔɔkiɗi ɛ ɗami agut omoŋ ɓɛɛnyɔwɛ gɛɛŋk baŋɛ.
Beeɗit Omaayikent Agut Omoŋ Ŋaadtaanakoŋk
43Saaɓak agut sinɔɓa ijaagiiɗɛɛ sɔɔriyɛ, a ola sigɔ reemɗigeeɗ ɓayaayk a ɓɔɔkaaŋ ariit wosɛytaanakoŋkuk, nɛɓa ɓuri joop baŋɛ. 44Nɛɓa ɓɛɛlɛr joop sigɛɓa ŋaadiɗiik agut omoŋ, any sinɛɓa latuk baŋɛ nɛŋkɓa sɛɛg baŋɛ. 45Ɓaɓaliiɓa ɗook nɛŋk a wori nɛŋk nɛ wori nɛɛk kaakasar ɛkana gɛŋk oko sinɛ sɛɛga ɗɛyɛɛɗik. 46Totoliiɓa ɓɛɛnyɔwɛ gɛɛŋk baŋɛ agut omoŋ Godeey sinaanɛ Geetitank, ɗamarɓa kiiwu nyaki nɛŋk yaakaat a ɓayaay sinɔɔnɛ mentanŋɔŋk, 47pɔɔsɛrɓa Waakoyo nɛɓa eemɛyar sɛɛg joop baŋɛ. Nɛɓa tuukuku Suumii joop sigɔ bɔdɛrŋɔŋk ɓɛɛnyɔwɛ gɛɛŋk baŋɛ tolɛɛɗa nɛŋk.
Currently Selected:
Ijaag Wosɛytaanakoŋk 2: KSTM
Highlight
Share
Copy
Want to have your highlights saved across all your devices? Sign up or sign in
