Lukaas 5

Riyiri Yeese Nomtaanak Gɛɛŋk Sigɛɓa Tuktaanakik

(Maa. 4:18-22; Mar. 1:16-20)

1Ɓeny omalte saaɓa Yeese ɛtɛtɛrɗi goroo sinɔɔnɛ obiiŋɔŋk Genseretik kɛntɛɛk, nɛɓa kurak joop a ɓɔɔkaaŋ son lak sɛɛnik, nɛɓa diri Sɛɛne tookɛɛta kɛnɔ tiyɛr pɛɛni Waakoyotoŋk. 2Nɛɓa dɛnɛɛr emɗakɔ a pɛɛy a ɛtɛtɛɗar goroo sinaanɛ obiiŋɔŋk kɛntɛɛ, maɓa joop sigɛ kondidiyar oltiirk orurku ɛɛk, emɗakɔkɛ gɛɛnɛ nɛ a'aadar ola gɛŋk kondiyeetoŋk. 3Nɛɓa Yeese teeŋɛ emɗa nɛɛka omalta sinaanaɓa Simionuk. Nɛɓa kalɛyi Simion kɛnɔ widergeeɗ emɗ nɛɛk, walas gɔrɔwa nɛɛka a balaaŋ. Nɛɓa dokiiɗiɗe raŋk nɛ tuke rɔɔriyɔɔna joop sigɛ ɓɔɔkaak.

4Saaɓa ruumeeɗ waasiyɛ gɛɛŋkik, nɛɓa tonu Simiona kɛ, "Widar ɛɛk maawa gɛɛna saana ɓukuuruk nɔ oriitaarɔ any noŋk kondiyeetoŋk nɔ boŋkun oltiir."

5Nɛɓa Simion jumurgeeɗ kɛ, "Rɔɔriytaano, aayirkiikɔ kaay nɛɛk baŋɛ a bɔɔlaakiiŋ, nɛ kɛɛ any sinɔkɔ boŋkiik. Ma ɔkɔn tonun seŋkiŋ, nɛ oriira ola sigɛ kondiyeetoŋkuŋ."

6Saaɓa ijaagirɗi oko sinɛkik, nɛɓa boŋurku oltiir a ɓɔɔkaaŋ jɛt, a pɔɔpɔki any sinɛ kondiyeetoŋk. 7Nɛɓa wakiitar piraakak gɛŋk, sigɛɓa atu emɗ omalteek kɛnɔ kurak kɔnyɛr sɛɛg, nɛɓa kurak nɛ enyɛɛrar emɗakɔ sigɛ pɛɛyk oltiirɛ, a gunɔ emɗakɔ gɛɛnɛ liilerŋ.

8Saaɓa Simion Petros dɛnɛɛɗ any sinik, nɛɓa ɗiiri korontunɛ Yeeseye taamɛkɛ nɛ tongeeɗ kɛ, "Suumi naakɛ, widite ɛɛk agut sinɔ eet tikitank." 9Nɔɓa toniiɗ oko sinikik agut sinɔɓa ŋaatirɗi, sɛɛn a joop sigɛɓa sɛɛg a sɛɛnik baŋɛ, agut ɓɔɔkaaka oltiir sigɛɓa boŋurkuk. 10Nɛɓa reemɗi ɓayetun tɔɔmɔk Jɛbdiyoosuk, Yaykoob a Yowanis sigɛɓa Piraakak Simionuk.

Nɛɓa Yeese tonu Simiona kɛ, "Kat ɓuriikin, a tukiɗi ɓenyse ɗɔkunkɔɔ joop son lak Waakoyok oko sinɛ kondiyeeɗin oltiirk." 11Nɛɓa sɛɛk puruuteetar emɗakɔ gɛɛŋk walasa, nɛ ŋɔɗar ola baŋɛ nɛ nomɛrɗi sɛɛn.

Ebɔdɛ Yeese Iɗit Sinɔ Goru Dɔɔɓɔyk

(Maa. 8:1-4; Mar. 1:40-45)

12Ɓeny omalte saaɓa Yeese arkiɗ katamɛɛ omalteek, kusɓa iɗit sinɔɓa gaamu ɛɛk nɛɛk baŋɛ dɔɔɓɔyk son lak sɛɛnik. Nɛ saaɓa dɛnɛɛɗ Yeeseek, nɛɓa ugume sɛɛne taamɛkɛ, nɛ kalɛyi kɛ, "Suumi naakɛ, ɔkɔn ɗɛyin, oolun a ebɔduntuŋ."

13Nɛɓa keri Yeese ari nɛɛk nɛ kume nɛ tongeeɗ kɛ, "Ɗɛyaaŋ, bɔduk" Nɛɓa ŋɔr sɛɛn dɔɔɓɔy nɛɛkɛ sisa.

14Nɛɓa Yeese tongeeɗ kɛ, "Kat lakɛ iɗit sinɔ tonguɗun any sinik. Mayakana, mak nɔ kɛɛɗin yaaŋin ɛɛk nook tapaɗa ŋaadiyɛɛkoŋk kɛnɔkoy dakɛ a misikiri joopa baŋɛ, mak widak tigi sinɛɓa tonu Muuse agut bɔdɛ nookuk.

15Yakanaɓa tiyɛɛ ɔɔtɛ Yeeseek a kaalɛŋ, tolɗiiɓa joop a ɓɔɔkaaŋ jɛt kɛnɔ tiyɛr any sinɛ tonuk ɛ ebɔdɛ sɛɛg goriɗakɛ gɛŋk. 16Yakanaɓa sɛŋk Yeese ɛnyɛnyɛ agut ɓɔɔkaaŋ paatoona nɛ ɗanɗamaaŋ.

Ebɔdɛ Yeese Iɗit Sinɔ Nyɔŋtank

(Maa. 9:1-8; Mar. 2:1-12)

17Ɓeny omalte saaɓa Yeese arkiɗ rɔɔriyɔɔnuk, nɛɓa dokurɗe joop Paarisik a rɔɔriytaanak higi Muuseek sɛɛne jɔk. Kurakɓa sɛɛk mɛndɛrakɛ Gɛlilaak a Yuudaak baŋɛ a ɓɔrɛ katamɛɛ Yorsaleemuk. Lakɓa Yeese ɓaŋkawuka Waakoyotoŋk sinɔ ebɔdɛɛɗ gortaanakik. 18Nɛɓa kurak joop sigɔ diilerki iɗit om sinɔ nyɔŋtank beeɗi son lak sɛɛnik nɛɓa paaritar gaɓɛɛɗ godeya sinaana arkiɗ Yeeseek, nɔgun riiɓer sɛɛne taamɛkɛ. 19Yakanaɓa ooɗɛ sɛɛg sinɔ gaɓɛtarkiɗ nyɔŋtan nɛɛk godeyak agut sinɔɓa ɓɔɔkaakiɗ joopuk. Nɛɓa teeŋɛr ajeeranta nɛ ɓuurer gode nɛɛk nɛ gaɓɛɛtar nyɔŋtan nɛɛk a beeɗi nɛɛk joope gɛɛnɛ kɔɔr Yeeseye taamɛkɛ.

20Nɛɓa Yeese dɛnɛ ŋaadiyɛ gɛŋk, nɛ tonu eta sinaana kɛ, "Iin iɗit sini, ranyjɛɛrɛ kɔne tikiyɛ gooŋkuŋ."

21Nɛɓa rɔɔriytaanak higi Muuseek a joop Paarisik koɓur kɛ, "Ege sigi nyɔɔna tiriya Waakoyotoŋk! Wooɗ sinɛ oolɛ a ranyjɛ tikiyɛɛk Waakoyote sinaanɛ omoŋɔŋk sɔgɔɔsɔyk?"

22Nɛɓa Yeese ɗeger koɓiɗa gɛŋk nɛ tonu sɛɛga kɛ, "Koɓiir any sini ɓayɛtunɛɛkɛ goŋk agut jikon? 23Sini kɛ, 'Ranyjɛɛrɛ kɔne tikiyɛ gooŋkŋɔŋk,' a sini kɛ, 'Ŋaari raŋana nɔ ŋaarink' bala won? 24Mayakana nɔ toniiɗa sinik kɛnɔ ɗegerari kɛ, "Lak Tɔn Etoŋk ɗook raŋk ɓaŋkawuka sinɔ ranyjɛɛɗ tikiyɛɛŋɔŋk." Nɛɓa tonu nyɔŋtaana saa kɛ, "Tonaana kɛ, ŋaar raŋana nɔ boŋun beeɗi nook nɔ ŋaarin nyaka nookaak." 25Nɛɓa ŋaar raŋana sisa nɛ ɛtɛ sɛɛge taamɛkɛ, nɛ boŋu beeɗi nɛɛk, nɛ ŋaar nyaka nɛɛka a pɔɔsɛ Waakoyo. 26Reemɗiɓa ɓayɛtun joop sigɛ atu saadik baŋɛ a ɓuriiŋ, nɛ pɔɔsɛr Waakoyo a tonur kɛ, "Dɛniikɔ ɓenyse any sinɔ reemɗi ɓayɛk."

Riyiri Yeese Leewii

(Maa. 9:9-13; Mar. 2:13-17)

27Saadi baŋiya, ŋaarɓa Yeese saadi nɛ ŋaarŋ. Nɛɓa dɛnɛɛr iɗit sinɔ yayawu worik sinɔ riyɛ kɛ Leewii a beeber nyon sinɔɔnɛ yayawuɗɛ worik nɛ tongeeɗ kɛ, "Nomate." 28Nɛɓa sɛŋk ŋaar raŋana, nɛ nomɛɗiŋ.

29Nɛɓa Leewi ijaag Yeeseya wɔɔr sinɔ obiiŋɔŋk nyaki nɛɛkɛk. Beeɗirɓa joop sigɔ yayawar worik a ɓɔɔkaaŋ a joop ɔgɔ a sɛɛn agut omoŋ nyon ɗamatoŋk. 30Nɛɓa joop Paarisik a sɛɛge rɔɔriytaanak higi Muuseek laaganyar nomtaanak Yeeseek kɛ, "Ɗamikari ɛ utiɗiikari a joop sigɔ yayawar worik a tikitaanak agut omoŋ agut jikon?"

31Nɛɓa Yeese jumur sɛɛga kɛ, "Ɗɛyɗigeeɗ akiimi gortaanak, ma moko bɔdtaanak. 32Kusaakan saak kɛnɔ riyka tikitaanak tikiyɛɛkɛ Waakoyota, ma mokokan kɛnɔ riyka joop sigɔ mentaanaŋɔŋk taamɛkɛ Waakoyotoŋkuk."

Kɔɔniyɔn Sinɔ Widikɛ Agut Soomuk

(Maa. 9:14-17; Mar. 2:18-22)

33Saadi baŋiya kɔɔniyarɓa Yeesee kɛ, "Nomtaanak Yowanisik a joop Paarisik soomɛr ɛ ɗanɗama otoop, ma sɛŋk nomtaanak goonɛ ɗami ɛ utiɗi otoop agut jikon?"

34Nɛɓa Yeese jumur sɛɛga kɛ, "Toortaanak a ar iɗit sinɛ waawuguɗɛɛk sooy lak sɛɛgik nɛ oolɛɛr a soomɛrŋ? 35Mayakana mɛlkikɔɔ ɔɔtɛ sinɛkɔɔ pakatiiɗ sɛɛge ɛɛk iɗit sinɛ waawuguɗɛɛkiŋ, nɛkɔɔ soomɛr sisa."

36Tonuɓa sɛɛga rɔmɛ kɛkar kɛ, "Kɛɛ iɗit sinɔ pɔɔkuku abii sinɔ tɛmŋɔŋk tɔɔnuk nɔ ɗɛpoyɛɛr abiya sinɔɔna bɔɔlɔŋk. Ma ɔkɔn ijaag oko sinikiŋ, nɛ pɔɔpɔk abii sinɛ tɔɔnuk abii sinɔ bɔɔlɔŋkuŋ kir ɗegegerit a abii sinɔ tɔɔnuk. 37Maɓɔrɛ kɛɛ iɗit sinɔ gaɓɛ ogool wɛynik sigɔ tɔɔmɔkuk kaŋkaloota sinɔɔna bɔɔlɔŋk. Ma ɔkɔn ijaag oko sinikiŋ, nɛ ogool sigɛ wɛynik tɔɔmɔkuk arir a ɓɛrɛ kaŋkalo nɛɛkɛŋ. Nɛ gupatɗi ogool sigɛ wɛynikiŋ nɛ kɛɛ tɔkɔny kaŋkaloote nɛɛkɛ. 38Yakana ɗɛyɛ a gaɓɛɛ ogool wɛynik sigɔ tɔɔmɔkuk kaŋkaloota sinɔɔna tɔɔnuk. 39Kɛɛ iɗit sinɔ ute ogool wɛynik sigɔ bɔɔlɔŋeerk, nɛ ɗɛyɛ sigɔ tɔɔmɔkuk agut sinɔ toniiɗ kɛ, "Dɔɔs sigɔ bɔɔlɔŋeerkik."

Currently Selected:

Lukaas 5: KSTM

Highlight

Copy