Lukaas 4

Paari Setan Yeesee

(Maa. 4:1-11; Mar. 1:12-13)

1Enyɛɛriɓa Yeese Wɛɛŋa sigɔ Geetitaanakik, nɛɓa weeriki Goroo Yordanoosuk. Nɛɓa arir Yeesee Wɛɛŋa sigɔ Geetitaanak kɛnɔ kɛɛ paatoona, 2nɛɓa paari sɛɛn setan kɛnɔ gun ijaag tikiyɛ a ki ɗamit a wawuy pɔlpɔlɛ joop pɛɛyk a kaayetun pɔlpɔlɛ joop pɛɛyk nɛɓa pediya nɛɛka lak ŋaawu.

3Nɛɓa tongeeɗ setan kɛ, "Ɔkɔnɓɔ iin Tɔɔn Waakoyotoŋk, tonutɔ giɗeyta sineena nɔ mɛyɛ a kiiwu." 4Nɛɓa Yeese jumurgeeɗ kɛ, "Taapɛɛɓa Wargatɛɛ Waakoyotoŋk kɛ, 'Ki iɗit beeɗit kiiwe dakɛɗa."'

5Nɛɓa setan diile Yeesee soona ar rakaayk nɛ yaaŋgeeɗ maŋgistiyɛ ɗookoŋk baŋɛ a ito nyaalan. 6Nɛ setan tongeeɗ kɛ, "Gaɓaakɔɔna ɓaŋkawuka a eemɛyɔn sini baŋɛ agut sinɔɓata gaɓɛɛɗɛ sigi baŋɛk, nɛ oola a gaɓa eta sinaana ɗɛyakiŋ. 7Nɛ ɔkɔnta ugumun, ege kɔɔ sini baŋɛ nook."

8Nɛɓa jumurgeeɗ Yeese kɛ, "Taapɛɛɓa Wargatɛɛ Waakoyotoŋk kɛ,

'Ugumu Suumiya nooka Waakoyota,

ijaaga sɛɛna dakɛɗa."'

9Nɛɓa saadi setan diile Yeesee Yorsaleema, nɛɓa boŋu sɛɛn ajeeranta Gode sinɛ Geetitank, nɛ tongeeɗ kɛ, "Ɔkɔnɓɔ iin tɔɔn Waakoyotoŋk, orartɔ ɛɛk seedi ɗooka, 10agut sinɔ taapɛɛɓa Wargatɛɛ Waakoyotoŋk kɛ,

'Tonukoy Waakoyot wosɛytaanaka gɛɛnak,

kɛnɔnu koorɛr kɛ ɗɔm.

11Tawɛrkɔɔnu arnɛ gɛŋk,

kɛnɔ kat dertɛ deran nookɛ giɗeet."'

12Nɛɓa Yeese jumurgeeɗ kɛ, "Tonɛɛɓa Wargatɛɛ Waakoyotoŋk kɛ,

'Kat paarin Waakoyo, Suumi nook."'

13Saaɓa setan ruumeeɗ paariit nɛɛkik, nɛɓa ŋɔr Yeesee nɛ ŋaarŋ saadi ɔɔtɛya sinɔɔna balaaŋɔŋk.

Tuke Yeese Rɔɔriyɔn Gɛlilaake

(Maa. 4:12-17; Mar. 1:14-15)

14Enyɛɛriɓa Yeese ɓaŋkawuka Wɛɛŋa Sigɔ Geetitaanakik, nɛɓa weeri Gɛlilaaka. Nɛɓa tiyɛɛ ɔɔtɛ nɛɛk ɗoo nɛɛk baŋɛ. 15Rɔɔriyaaɓa godeey nɛŋk tolɛɛɗoŋk Ayuuduk nɛɓa pɔɔsɛɛ joop baŋɛ.

Laŋki Yeese Ɓooyan Naajireete

(Maa. 13:53-58; Mar. 6:1-9)

16Mɛlɛɓa Yeese katamɛya sinaanaɓa ɓɔlɔɔrɛɗik Naajireeta. Nɛɓa guuguny godeya tolɛɛɗoŋk Ayuuduk waawuy Sambatɛyoŋk oko sinɛɓa barɛɗik, nɛɓa ŋaar raŋana kɛnɔ ambabɛ Wargatɛ Waakoyotoŋk. 17Gagiɗɛɛɓa wargatɛ iɗit pɛrkaakoŋk Isaayasik sinɔ tintimtank, nɛɓa ɓarɓaɗɛ nɛ laŋki soonɓa taapɛɛɗɛ kɛ,

18"Atu Wɛɛŋa Suumiyoŋk eete raŋk,

agut sinɔ suumekɔtu kɛnɔ waasa Pɛɛni sini Ɓɛlkɛɛstank sankaanaka.

Wosɛykikanti kɛnɔ laaganya,

kɛnɔ woori joop sigɛɓa korkoɗɛɛk,

kɛnɔ dɛnɗi joop sigɛ motakik kɛkar,

kɛnɔ ŋaararki joop sigɛ atu laaŋoyk yaakata,

19ɛɓɔrɛ wosɛykikanti kɛnɔ kusa waasa ɔɔtɛ sinɔ Waakoyot ebɔdɛɛɗ joop gɛɛŋkik."

20Nɛɓa miinye wargatɛ nɛɛk, nɛ gaɓɛ ijaagenta nɛɛka, nɛ dokuɗe. Nɛɓa mermenar sɛɛn joop sigɛ atu godeey sinaanɛ tolɛɛɗoŋk Ayuuduk baŋɛ kɛ ɗɔm. 21Nɛɓa tonu sɛɛga kɛ, "Dusanɛɛ pɛɛnii sineene ɓenysek pɛɛni sinɛɓa taapɛɛk sini tiyɛɛr wenanɛ goŋkuk."

22Tonurɓa sɛɛg baŋɛ any sinɔ mentanŋɔŋk agut sɛɛn reemɗiɓa ɓayɛtun gɛŋk agut any sinɛɓa waasɛk mentanŋɔŋk. Nɛ tonur kɛ, "A moko ege sini tɔɔn Yoosepuk?"

23Nɛɓa tonu sɛɛga Yeese kɛ, "Ŋaada kɛ toniirti rɔmɛɛɗ kɛ, 'Iin ɗumaat korusaka, ebɔdu ɛɛk nook. Ijaag ɓɔrɛ katamɛɛ sineene nyaki nookɛkik any sinɛkan tiyiik ijaagin Kipirnahoomek.

24Eekeer tona kɔnaaŋ, iɗit pɛrkaakoŋk kɛɛ eemɛyɔɔn ɗook nɛɛkɛk.

25Eekeerɛ eme sinaanɛɓa Eliyaasik sinaanɛɓa koriiɗ dari a emeyi jiit a ɛyɛkeer tula omk sinaanɛɓa lakiɗɛ ŋaawu sinɔ ɓaŋkawuŋɔŋk ɗook nɛɛkɛ baŋɛk, lakɛɓa Israeele jartiyatɔk sigɔɓa rɛrar babuy gɛŋkŋɔŋk a ɓɔɔkaaŋ. 26Kɛɛɓa wosɛyɛt Eliyaas son lak omuk sigeege. Maɓa wosɛyɛ son lak jarti sinɔɓa rɛr baabuy nɛɛkɛŋɔŋk dakɛɗa sinɔ ar ɗook Sidoonaak mɛndɛre Sɛraptaak. 27Maɓɔrɛ eme sinaanɛɓa iɗit pɛrkaakoŋk Elsaak, lakɛɓa joop sigɔ latu dɔɔɓɔyk a ɓɔɔkaaŋ Israeele, nɛ kɛɛ iɗit sinɔɓa bɔduku sɛɛgek bɔdukuɓa Niiman iɗit Sooriyaak dakɛɗa."

28Joop sigɛɓa atu godeey tolɛɛɗoŋk Ayuuduk saaɓa tiyɛrɗi any sinik, nɛɓa ŋadir jɛt. 29Ŋaararɓa nɛ puruuter Yeesee, nɛ boŋitar katamɛɛ walasa. Ɗɛyɛrɓa a gun oriitar saakoya, nɛɓa diiler sirpɛya sinɔɔnaɓa ijaagɛ katamɛɛ nɛɛkɛkik. 30Yakanaɓa sɛŋk ɗoyu sɛɛge takan nɛ ŋaarŋ.

Ebɔdɛ Yeese Iɗit Sinɔ Lak Wɛɛŋa Sigɔ Somkaanakik

(Mar. 1:21-28)

31Ŋaarɓa Yeese nɛ kɛɛ katamɛya Kipirnahoomuk sinaana ar ɗook Gɛlilaak, nɛɓa saadi rɔɔriy joop sigɛ ɓɔɔkaak waawuy Sambatɛyoŋk. 32Nɛɓa reemɗi ɓayɛtun gɛŋk agut rɔɔriyɔn nɛɛk, agut sinɔɓa rɔɔriyɗi sɛɛg ɓaŋkawukaatik.

33Lakɛɓa godeey sinaanɛ tolɛɛɗoŋk iɗit sinɔɓa gaamur wɛɛŋa sigɔ somkaanakik, nɛɓa ooyɛ a ɗooruŋ kɛ, 34"Iin Yeesee Naajireetik, ɗɛyin jikon sooy lak eteŋkik? Kusunkɔ kɛnɔ tin sɔɔkun? Ɗegera kɛ iin wooɗuŋ. Iin Tɔɔn Waakoyotoŋk sinɛ Geetitank."

35Nɛɓa Yeese lamɛ kɛ, "In dakɛɛ kɛ many, nɔ ŋaarari ete sineene!" Nɛɓa wɛɛŋa sigɛ somkaanakik iber iɗit sinɛ nɛ ŋɔɗar nɛ ŋaararŋ, ma kɛɛ soon kɔ arɗiiɗik.

36Nɛɓa reemɗi ɓayɛtun joop gɛɛŋkik baŋɛ nɛ totoni ɛkanɛɛkɛ gɛŋk kɛ, "Ege sini pɛɛni kɛ jikon tonɗi wɛɛŋaka sigɔɔga somkaanakik Suumiikent a ɓaŋkawukaat nɛ ŋaararŋ?" 37Nɛɓa tiyɛɛ ɔɔtɛ Yeeseek ɗook nɛɛkɛ baŋɛ tookɛɛta.

Ebɔdɛ Yeese Gortaanak A Ɓɔɔkaaŋ

(Maa. 8:14-17; Mar. 1:29-34)

38Ŋaarkiɓa Yeese godeey tolɛɛɗoŋk nɛ kɛɛ guuguny waa Simionuk. Maɓa saadi keerɛɛk Simionuk goru moɗɛ ɛɛkoŋk a ɓaŋkawuŋ, nɛɓa kalɛyir sɛɛn kɛnɔ ebɔdɛɗ. 39Nɛɓa Yeese wideer ɛɛk, nɛ ɛtɛ sɛɛne jɔk, nɛ lamɛ moɗɛ sinɛ ɛɛkoŋk. Nɛɓa sɛɛn ŋɔr sisa, nɛ ŋaar raŋana nɛ wɔɔrɛ sɛɛgiŋ.

40Saaɓa ɗiirirkiɗ waawuyk, nɛɓa ɗɔkarki joo joop sigɔɓa gaamur sɛɛg goriɗak sigɔ ɓɛɛlɛr kundiyaakɛk baŋɛ son lak Yeeseek. Nɛɓa sɛŋk riiɓe sɛɛge ari a omoŋ omoŋ nɛ ebɔdɛ sɛɛgiŋ. 41Nɛɓa ɓɔrɛ wɛɛŋa sigɔ somkaanakik duriyer a ŋaarark joope sigɔɔgɛ ɓɔɔkaaŋɔŋk a tonur kɛ, "Iin sɛŋk Tɔɔn Waakoyotoŋk!" Nɛɓa sɛŋk lamɛ sɛɛgiŋ. Nɛɓa ɓaarɗi sɛɛg kɛnɔ kat lakɛ any sinɔ tonurk, agut sinɔɓa ɗegerarɗi kɛ Kereseek.

Topu Yeese Rɔɔriyɔn Nɛɛk Gɛlilaake

42Saaɓa aayirkiɗik, nɛɓa ŋaar Yeese saadi soona ɓɛɛlɛ mowank. Nɛɓa warɛr joop sigɛ ɓɔɔkaakiŋ, nɛ saaɓa laŋirɗik, nɛɓa tonurgeeɗ kɛnɔ kat pakat sɛɛge ɛɛk. 43Nɛɓa sɛŋk Yeese tonu sɛɛga kɛ, "Ɗɛyɛta a kɛɛɗa katamɛɛka ɔgɔɔka nɔ kɛɛɗa waasa Pɛɛni sini Ɓɛlkɛɛstank Burɛ Waakoyotoŋkuŋ agut sinɔ wosɛykɛkanti agut any sini." 44Nɛɓa rɔririyii sinɔɔnɛ godeyi tolɛɛɗoŋk Ayuuduk ɗook Yuudaak.

Currently Selected:

Lukaas 4: KSTM

Highlight

Copy