Markoos 12
12
Rɔmɛ Ijaageer Taawa Wɛynik
(Maa. 21:33-46; Luk. 20:9-19)
1Tonuɓa sɛɛga Yeese rɔmɛ om kɛ, "Waayiɓa iɗit omaay wɛyin, nɛ isɛyɛ tookɛɛta, nɛ kɔwu utul anta tayakoŋk wɛynik, nɛ ijaag peem teeɓoŋk. Nɛɓa gaɓɛ taawa nɛɛk ijaageera kɛnɔkoy kaasiɗi, ma ŋaar ɗooka omalta. 2Nɛ saaɓa gayɛrɗi taamɛ gɛɛnɛkik, wosɛyɛɓa ijaagen nɛɛk son lak ijaageer gɛɛŋk taawa wɛynik kɛnɔ kaar ɗɔkatageeɗ taamɛ wɛynik. 3Yakanaɓa ijaager gɛɛnɛ sigɛ taawa wɛynik gaamur ijaagen nɛɛk, nɛ ɗiŋer, nɛ ɔɔyɛr a ɓɛɛlɛ sɔkɔn.
4Nɛɓa ɗuma wosɛyɛ ijaagen om kɛkar. Nɛ ijaager gɛɛnɛ sigɛ taawa wɛynik baabaalar ɔɗɔ nɛɛk giɗeekɛ, nɛ sɔɔkɛr nɛ ɔɔyɛrŋ. 5Nɛ wosɛykɛ om nɛ ɓokoturŋ. Nɛ wosɛykɛ a ɓɔɔkaaŋ nɛ ɗiŋer ɔgɔɔŋ, ma ɓokootar ɔgɔɔŋ.
6Ŋayɗiiɗi sisɔ wosɛ tɔɔn nɛɛk sinɛ poruk dakɛɗa. Nɛɓa pediya nɛɛka wosɛyɛ tɔɔn nɛɛk sinɔ omoŋɔŋk a koɓu kɛ, 'Kaɗɛɛŋ eemɛyarkɔɔ tɔɔn naakiŋ.'
7Yakanaɓa ijaager sigɛ taawa wɛynik tonur ɛkanɛɛkɛ gɛŋk kɛ, 'Ege sini sinɛkɔɔ boŋu ɗoo nɛɛkik. In kusɛɛ nɔ kusii ɓokotii nɔkɔɔ ɗoo nɛɛkɛ naŋk.' 8Nɛɓa gaamur tɔɔn nɛɛk, nɛ ɓokoturŋ, nɛ oriitar taawoy sinaanɛ wɛynik walasa.
9Ari sisɔ ɗuma sinɛ taawa wɛynik jikon? Kus sɛɛn ɗuma nɛ ɓokor ijaageer sigɛ taawa wɛynik. Nɛ gaɓɛ taawa sinɛ wɛynik joopa ɔgɔɔka. 10Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ, 'Giɗee sinɛɓa daraayɛr joop sigɛ kɛnyar godeyik giɗeekɛk, dakɛ a giɗee sinɛ obi giɗeekɛ baŋɛk. 11Ege sini ijaag Suumiyoŋk, ege ijaag nɛɛkɛ sɔɔriyɛ taamɛka gaŋk."'
12Ɗegerarɓa ɔɗɔwer Ayuuduk kɛ mermen rɔmɛ sinɛ tonu Yeeseek sɛɛg. Nɛɓa ɗɛyɛr gaamita, yakanaɓa ɓurer joop sigɛ ɓɔɔkaak nɛ ŋɔɗarŋ.
Kɔɔniyar Joop Paarisik Yeesee Agut Koyi Gibiriyoŋk
(Maa. 22:15-22; Luk. 20:20-26)
13Wosɛykɛɛɓa joop a omoŋ omoŋ sigɔ komoy joop Paarisik a Herodisik son lak Yeeseek kɛnɔ kaŋir waasiyɛɛkɛ gɛɛnɛk. 14Nɛɓa wideetargeeɗ ɛɛk nɛ tonurgeeɗ kɛ, "Rɔɔriytaano, ɗegerii kɛ iin eekerkan. Kɛɛ any sinɔ ijaagin a ɓuriiɗin a lagiɗin keenyk. Mermenin joop baŋɛ a koɓi omoŋ. Rɔɔriyaaɗin gopan Waakoyotoŋk eekeerɛ. Anɛ ɗɛyɛ a koyɛɛ gibiri Keesaara Roomukuŋ? Maŋk ki ɗɛyɛ? Koyɗiikiiŋ? Maŋk kat koyɗiikii?"
15Nɛɓa Yeese ɗeger koɓi nɛŋk sinɔ ŋɛɛwɛnŋɔŋk nɛ tonu sɛɛga kɛ, "Ɗɛyɛɛrti kaŋiɗa agut jikon? Inta yaaŋɛɛ wori sinɛ koyɛɛ a gibirik."
16Nɛɓa sɛɛk ɗɔkatageeɗ wori nɛɛkiŋ nɛ tonu sɛɛga kɛ, "Ege sini dɛnɛɛ worii sineene raŋk tipi wook? Ma sigɛɓa taapɛɛk tiriya wook? Nɛɓa sɛɛk tonurgeeɗ kɛ, "Keesaarik."
17Nɛɓa Yeese tonu sɛɛga kɛ, "Sisɔ in gaɓɛ Keesaarik Keesaara, ma Waakoyotoŋk Waakoyota."
Nɛɓa reemɗi ɓayɛtun gɛŋk agut toni siniŋ.
Palamɗi Joop Saaduukuk A Yeesee Agut Ŋaarin Ret Walsak
(Maa. 22:23-33; Luk. 20:27-40)
18Widerkiɓa ɛɛk joop Saaduukuk sigɛɓa ŋaadir kɛ kɛɛ iɗit sinɔkoy ŋaarki ret walsak a omoŋ omoŋ, son lak Yeeseek. Nɛɓa kɔɔniyar Yeesee kɛ, 19"Rɔɔriytaano, tonuɓa Muuse kɛ, "Ɔkɔn iɗit omaay rɛr makan jarti nɛɛkɛ kiigeeɗ ɓartɛɛt tɔɔnuŋ, nɛ in boŋu manya jarti iɗit sinɛkɔ rɛrkik nɔ tuuke komoy nɛɛk." 20Anɛɓatɔ lakɛ masiikeenak a tula pɛɛy, nɛɓa iɗit sinɛ bɔɔlɔŋ sɛɛga baŋɛk boŋu jarti nɛ rɛr ma in kiigeeɗ ɓartɛɛt tɔɔn. 21Nɛ manya sinɛ pɛɛyeen nɛɛkik boŋu jarti sinɛ nɛ rɛr ma in kiigiɗɛ ɓartɛɛt tɔɔn. Nɛɓɔrɛ jiiteen nɛɛkɛ ɓɛɛlɛ oko sinɛk. 22Nɛɓa boŋur jarti sinɛ a getu tula pɛɛy nɛ rɛrar ma in kir tuukɛ komoy. Nɛ sɛɛge baŋɛ baŋiya, rɛr jarti sinɛ. 23Masiikeenak sigɛ tula pɛɛyk boŋurɓa momogunɛɛkɛ. Nɛ saakoy ŋaararkiɗ joop ret walsak, jartikoy iɗit wonk?"
24Nɛɓa jumur sɛɛga Yeese kɛ, "Moko babadariŋ agut sinɔ kirɗɔ ɗegerɔɔn Wargatɛyɛ Waakoyotoŋk a ɓaŋkawuka Waakoyotoŋkuk? 25Saakoy ŋaararkiɗ ret walsak ɓɛɛlɛrkoy joop oko wosɛytaanak dariyoŋk, makoy kir boŋɗiit ɛkoy kir waawan. 26Agut ŋaarin ret walsak, kiirɓa ambabɛɛt wargatɛɛ Muuseek sinɛɓa tonu Waakoyot Muuseya maɗ sinɔɔnɛ ar rukoyɛkɛ takik? Sinɛɓa tonu Waakoyot Muuseya kɛ, Eet Waakoyo Abrahamuk, Waakoyo Iisiyaakik, Waakoyo Yaykoobuk.' 27Agut sini ege Waakoyot Waakoyo bɔdtaanakoŋk, ma moko Waakoyo reteeroŋk. Iinak joop Saaduukuk, tikeerkɔŋ jɛt."
Sekiyɛ Sigɛ Kaalɗi Baŋɛk
(Maa. 22:34-40; Luk. 10:25-28)
28Rɔɔriytaanakɛ higi Muuseek om tiyɛɓa palamɛ nɛŋkiŋ. Nɛɓa ɗeger kɛ jumurkɔ Yeese kɔɔniyɔn nɛɛk kɛ ɗɔm nɛ kɔɔniy kɛ, "Sekiyɛ sigɛ kaalɗi baŋɛk sɛɛg wook?"
29Nɛɓa Yeese jumurgeeɗ kɛ, "Sekiyɛ sigɛ kaalɗi baŋɛk sigɔ tonur kɛ, 'Iin Israeel, tiyik. Suumi Waakoyo naŋk Suumi omoŋ dakɛɗa. 30Poru seŋk Suumi Waakoyo nook, ɓayaay nookɛ baŋɛ, wɛɛŋakɛ gooŋkɛ baŋɛ, koɓiɗ nookɛ baŋɛ, ɓaŋkawukaat nookɛk baŋɛ.' 31Sekiyɛ pɛɛyeen nɛɛk sinɔ gayi a sinik sinɔ tonu kɛ, "Poru iɗit sinɛ beeɗiir jɔkikentik oko sinɛ poriiɗin ɛɛk nookuk.' Ege sekiyɛ sigi pɛɛyk sigɛ kaalɗi baŋɛk."
32Nɛɓa rɔɔriytan sinɛ higi Muuseek tonu Yeeseya kɛ, "Rɔɔriytaano, mentan sinɛkɔ jumurunkuŋ. Liki sinɛkɔ toniiɗin any sinik. Suumi Waakoyo omoŋ dakɛɗa kɛɛ Waakoyo om ara. 33Agut sini iɗit ɗɛygeeɗ a poru Waakoyo ɓayɛ nɛɛk baŋɛ, koɓi nɛɛk baŋɛ, ɓaŋkawukaa nɛɛk baŋɛ, ɛ ɗɛygeeɗ a poru iɗit sinɛ beeɗiir jɔkikentik oko sinɛ poriiɗ ɛɛk nɛɛkik. Ege sigi sekiyɛ sigɛ kaalɛ uduŋeet sinɛ gaɓii Waakoyotak baŋɛk."
34Nɛɓa Yeese dɛnɛ akɔ jumurgeeɗ ɗegerɔɔn ɛɛkoŋk nɛ tongeeɗ kɛ, "Kin seŋk yowɛrka Burɛɛ Waakoyotoŋkuŋ" Nɛɓa saadi baŋiya kɛɛ iɗit sinɔ oolɛ a wideer kɔɔniyɔn Yeeseyaak.
Ege Kerese Tɔɔn Wook?
(Maa. 22:41-46; Luk. 20:41-44)
35Saaɓa Yeese rɔɔriyaaɗ Godeey sinaanɛ Geetitank, nɛɓa kɔɔniya kɛ, "Rɔɔriytaanak higi Muuseek tonur kɛ, 'Ege Keresee tɔɔn Daawitik,' agut jikon? 36Tonuɓa Daawit ɓaŋkawukaat Wɛɛŋa sigɔ Geetitaanakik kɛ,
'Tonuɓa Waakoyot Suumiya naaka kɛ,
Beeɗi ɗiɗikakɛ gaanɛk,
nɔ mɛlɛɛɗa nɔkoyna ariiɗa gumaakeer gooŋk ana ɛtɛr korontunɛ derakɛ goonɛ goyse ɗeekik.'
37Ɔkɔn Daawit ɔɗɔwa nɛɛka riy kɛ 'Suumiŋ', nɛ Keresee dakɛ a tɔɔn nɛɛk ɛk?" Geleewɛrgeeɗɓa joop a ɓɔɔkaaŋ yaakat."
Goop Yeese Rɔɔriytaanak Higi Muuseek A Joop Paarisik
(Maa. 23:1-36; Luk. 20:45-47)
38Saaɓa Yeese rɔɔriyaaɗik tonuɓa kɛ, "In koorɛɛ ɛɛk rɔɔriytaanakɛ higi Muuseek. Sɛɛg kadir abiyak sigɔ jeeɗuwatuŋɔŋk a ɗɛyɛr a weeweri gɔɔtaase kɛ gɔɔtaase sinɔɔnɛ gabiyeyoŋk a boŋur digoy eemɛyɔɔnoŋk. 39Ɗɛyɛr barsum sinɛ kaalɗi baŋɛk godeey tolɛɛɗoŋk, ɗɛyɛr barsum sinɛ kaalɗi baŋɛk nyon wɔɔroŋk. 40Arir godeyik jartiyatɔk sigɔ kɛɛ sɛɛge babuykuk a ɓɛɛlɛr sɔkɔn. Ijaagir ɗanɗamɔn sinɔ jeeɗoŋɔŋk kɛnɔ kat ɗegerɛ sɛɛge, agut sini mɛlkikoy sɛɛga goopan sinɔ kaalɛŋɔŋk."
Tigi Jarti Sinɔ Kiiɗɛ Baabuyk
(Luk. 21:1-4)
41Saaɓa Yeese beeberɗi Godeey sinaanɛ Geetitank tak saadi lak any sinɛ ririɓɗɛ tigik jɔkuk, nɛɓa dɛnɛ joop a ɓɔɔkaaŋ saa gaɓɛrɗi wori sanduka nɛɛka takanak. Joop sigɔ latu worik gaɓɛrɓa wori a obiiŋ. 42Nɛɓa mɛlki sankan om sinɔ kiiɗɛ baabuyk nɛ gaɓɛ taaribɛɛ a pɛɛy. 43Nɛɓa Yeese riyiri nomtaanak gɛɛŋk nɛ tonu sɛɛga kɛ, "Eekeer tona kɔnaaŋ, jarti sini sankank sini kiiɗɛ baabuyk gaɓɛkɔ a kaalɛ joope sigeegekɔ gaɓɛr wori sanduka sineenak baŋɛ. 44Gaɓɛrkɔ joop ɔgɔɔk sinɛkɔ ŋayɗiik wori nɛŋkik, ma sɛŋk sɛɛn sankan nɛkɔ gaɓɛ sinɛ lakik baŋɛ a kɛɛ sinɔ ŋɔrk."
Currently Selected:
Markoos 12: KSTM
Highlight
Share
Copy
Want to have your highlights saved across all your devices? Sign up or sign in
