Markoos 13
13
Yaaŋtan Eme Sinɛkoy Pediyaak
(Maa. 24:1-51; Luk. 21:5-38)
1Saaɓa Yeese ŋaarkiɗ Godeey sinaanɛ Geetitank walsak, nɛɓa nomtaanakɛ gɛɛnɛ omaay tongeeɗ kɛ, "Rɔɔriytaano, dɛnko Gode sini Geetitank. Lak godeyik sigɔɓa kɛnyɛ a mentaana jɛtik a giɗeek sigɔ boobɛrŋɔŋk."
2Nɛɓa Yeese jumurgeeɗ kɛ, "Dɛnin godeyik sigi boobɛrŋɔŋkuŋ? Godeyik sigi baŋɛ aalɗiikoyŋ. Giɗeek sigi baŋɛ ɗiirtarkoy ɗooka. Ki dakɛ sinɔkoy giɗe kirɗi aalɗit omaay omalte raŋk."
3Saadi baŋiya beeberɓa Yeese kurkum Dɛbirɛ Jɛytik raŋk sinɛ ar Godey sinaanɛ Geetitank taamɛkɛk. Nɛɓa Petros a Yaykoob, a Yowanis, a Indiriyaas wideetar ɛɛk son lak sɛɛnik sɛɛg mowan nɛɓa kɔɔniyar kɛ, 4"Tonute tina any sini ɓɛɛlɛkoy okoɗ? Saakoy wɔɔŋkuɗuk yaaŋtan nɛɛk jikon?"
5Nɛɓa Yeese jumur sɛɛga kɛ, "In koorɛɛ ɛɛk kɛnɔ mokoy kɔnu ari iɗit omaay a badɛɛriŋ. 6Mɛlɛrkikoy joop a ɓɔɔkaaŋ tiriyaakɛ gaanɛ kɛ, 'Eet Keresee!' Arirkoy joop a ɓɔɔkaaŋ a badɛrŋ. 7Saakoy tiyɛrɗɔ kaarin a ɗooran kaarinɔŋkuk, kat ŋaatɛɛ. Ege sini gidii nɔ ɓɛɛlɛɛɗik, yakana in ki gayɛ pedi nɛɛkɛk. 8Ŋaararkoy joop joope raŋk a maŋgisti maŋgistii raŋk nɛ kaararŋ. Lakɛkoy ŋaawu a yike ɗookoŋk nyonitaakɛ sigɔɔgɛ ɓɛɛlɛr kundiyaakɛk. Ege sini baŋɛ rakatɛ tuktan nɛɛk sinɔ ito suusuwi amɗ ɓartɛɛtoŋk.
9"In koorɛɛ ɛɛk. Gaɓɛrkoy kɔnu joop pirdiya. Ɗiŋerkoy kɔnu sinɔɔnɛ godeyi tolɛɛɗoŋk Ayuuduk. Ɛtɛɛrkoy pirdiya taamɛkɛ ɗumaag ɗookak a suumiyɛɛkoŋk agut eet kɛnɔkoy dakɛɛr a misikiriyɛ. 10Ɗɛyɛ jeemɛ a waasɛ Pɛɛni sini Ɓɛlkɛɛstank ɗoo baŋɛ. 11Saakoy kɔnu gaɓerɗi joop pirdiyak, kat ɓakɛyɗiikari agut any sinɛkɔɔ toniirik. In koy tonɛɛ any sinɛkoy kɔna gaɓɛ Waakoyotuk. Mokokoy tonɗiikari iinak, makoy tonɗi Wɛɛŋa sigɔ Geetitaanakik.
12"Gaɓɛkoy iɗit manya reta, gaɓɛkoy iɗit tɔɔn nɛɛk reta. Kirkoy tɔɔmɔk tiiɗit ɛpɛnaakaka a ɛmɛsaakaka arirkoy a ɓokootɛ sɛɛgiŋ. 13Ɓooyurkoy kɔnu joop baŋɛ agut sinɔ nomɛrɗɔ eetik. Mayakana iɗit sinɛkoy nomɛ eete pediyaak bɔdɛkoyŋ.
14"Oko sinɛɓa toniiɗ iɗit pɛrkaakoŋk Danielk, saakoyk dɛnɛɛrkoy any sinɔ ŋɛɛwɛnŋɔŋk sinɔ ɓooyu Waakoyotuk a ɛtɛ nyon sinɔɔnɛ kir ɗegerkak. In koɓuku sini iɗit sinɛ ambabɗik. Saakoyk joop sigɛ atu ɗook Yuudaak, inkoy gonar kurkumɛɛka. 15Iɗit sinɔkoy ar godeey ajeerantik katkoy worworiiki kɛnɔ boŋu ɓolaatuuruwɛ gɛɛŋk godeey tak. 16Iɗit sinɔkoy ar taawoyk, katkoy weeriiki baŋiya kɛnɔ boŋu abii nɛɛk. 17Ɗoŋikɛ sigaagɛ duri koy joopa sigaaga laki amtunɛk a joopa sigaaga ŋeŋeetunuk. 18In ɗanɗamaakɛ kɛnɔ mokoy togon noŋk ar baŋgii. 19Saakoyk lakɛkoy rakatɛ sinɔ obiiŋɔŋk, sinɔ inɓa kɛɛ a tukiɗi saaɓa riiɓeeɗ Waakoyot ɗook nɔ mɛlɛɛɗa ɓɛɛnyɔwasek. Ɛkoy ɓɔrɛ ɔɗɔɔka kɛɛ sinɔ ito sɛɛnik. 20Ɔkɔnkoy Waakoyot ki ariiɗ ɗoŋi sigɛ a dinyatuŋ, gunkoy kɛɛ iɗit sinɔ bɔdɛk ara. Yakanakoy dinyatu ɗoŋi sigɛŋ agut joop sigɛɓa daamɛɛ sɛɛgik. 21Saakoyk ɔkɔnkoy kɔna tonu iɗit omaay kɛ, 'Isi Keresee seedi!', maŋk 'Ɔsɔ sooyk!', kat ŋaadɛɛ. 22Agut sinɔ ŋaararkikoy Kereseyak sigɔ nyonkaanakik a joop pɛrkaakoŋk sigɔ nyonkaanakik. Ɔkɔn gayɛ sɛɛgaŋ arir a tikiɗi joop sigɛɓa daamɛɛkiŋ, ijaagir sɔɔriyɛ a ola sigɔ reemɗigeeɗ ɓayaayk sigɔ boobɛrŋɔŋk. 23In koorɛɛ ɛɛk, tonaɓa kɔna any baŋɛ jeemɛŋ.
24"Saakoyk ɗoŋikɛ sigaagɛkoy rakatɛyoŋk baŋiya, kɔjurkukoy waawuyuŋ, kikoy ɛyɛn gaamit pɛɗɛrka. 25Ɗiirarkikoy maryɔ dari, yikiɗiikoy ɓɔrɛ ɓaŋkawkaata sigɛ atu darikiŋ.
26"Saakoyk dɛnɛɛkoy Tɔɔn Etoŋk saakoy mɛlkiɗi gumoy ɓaŋkawukaat a eemɛyɔɔn sinɔɔnɛ obiiŋɔŋkuk. 27Wosɛykikoy wosɛytaanak gɛɛŋk, nɛkoy tolɛr joop sigɛɓa daamɛɛ sɛɛg sɛɛnak gɔɔteerɛ sigeege aŋank a tukiɗi kɛntɛɛ ɗookoŋk nɔ mɛlɛɛɗa kɛntɛya dariyoŋk.
28"In kɔna dakɛ rɔmɛ kɛɛt bɛlɛɛsik a rɔɔriyɔn. Saa beetiyerɗi rɛkɛnak gɛɛnɛkik ɛ ligimerɗi peeŋɔk gɛɛnɛkik, nɛ sisa ɗegerari kɛ wɔɔŋku baŋgi. 29Nɛ saakoy ɓɔrɛ dɛnɛrɗɔ ola sigi baŋɛk, in ɗegerɛ kɛ wɔɔŋku jɛt a ar tugaat ɔɔtɛ sinɛkoy mɛlkiɗ Tɔn Etoŋkuk. 30Eekeer tona kɔnaaŋ, nɔkoy dusanɛɛɗɛ ola sigi baŋɛk joop sigi ɓɛɛlɛr sisɔk kirkoy badɛ baŋɛ. 31Ɗoyurkoy ɗook a dariŋ, mayakana kikoy ɗoyi pɛɛni Naakɛ adaktan.
32"Kɛɛ iɗit sinɔkoy ɗeger ɓɛɛnyɔ a sayiti sinɛkoyk, kɛygun wosɛytaanak dariyoŋk kɛygun Tɔɔn nɛɛk. Mayakana, ɗegeerakoy Ɛpɛn dakɛɗa. 33In koorɛɛ ɛɛk, in ɓaŋkaawurɛɛ, agut sinɔ kiir ɗegerɔɔn ɔɔtɛ nɛɛk kɛ okoɗkoy. 34Gayi sini a iɗit sinɔkan ŋɔr gode nɛɛk nɛ ŋaar ɗooka sinɔɔna yowɛɛɗŋɔŋk. Kaasɛ ijaageera gɛɛna a omoŋ omoŋ ijaagaak sigɔ ɓɛɛlɛr kundiyaakɛk, tonu koortaana kɛnɔ koorii a ɓaŋkawuŋ. 35Agut sini kiir ɗegerɔɔn ɔɔtɛ sinɛkoy mɛlkiɗ ɗuma godeyak nɛ in koorɛɛ ɛɛk, ka ɗɛɛŋ mɛlkikoy ajigeya, maŋk kaalt kɔɔr, maŋk ɔɔtɛ sineene ɗooriiɗ kogeleesik, maŋk romiɗ kuleet. 36In ɓaŋkaawurɛɛ kɛnɔ mokoy mɛlki a gorgor nɔkoy kɔnu laŋki ma ɗeegarariŋ. 37Oko sinɛkɔ kɔna toniiɗaak, tona ɓɔrɛ joopa ɔgɔɔka baŋɛ kɛ in ɓaŋkaawurɛɛ."
Currently Selected:
Markoos 13: KSTM
Highlight
Share
Copy
Want to have your highlights saved across all your devices? Sign up or sign in
