KARARIADI 21

I Ishak nipahinding

1 Mawu nangal᷊amati si Sara, kere seng ko nipudiandi-E. 2#Ibr. 11:11Su tempo ko seng nitantu u Mawu Ruata, su tempo ngi Abraham seng maghurang, i Sara nikadehokang bou e'e nahinding singkatau ana ko ese. 3I Abraham nusigho ana e'e i Ishak; 4#Kar. 17:12; Wuk. 7:8dang su tempo ngi Ishak natimu wal᷊u l᷊ou umurie, i sie nisunati Abraham, kere ko seng niparenta ngu Mawu Ruata. 5Umuri Abraham mahasu su taunge su tempo ngi Ishak nipahinding. 6I Sara nangul᷊i, “Mawu Ruata seng nakakoa si sia nul᷊umighei #21:6: nul᷊umighei: Ishak su wahasa ngu Ibrani mangal᷊enge “i sie kal᷊igheinge”. ual᷊ingu mal᷊uasi. Apang taumata ko makaringihi hal᷊i i'i sarung l᷊umighei mal᷊uasi dingangku.” 7Bou e'e nitambae, “i sai horo botonge muhabari su kawingku himoneu ia sarung mupasusu ngu ana? Kateho ia mang seng nahinding l᷊ai maneng kawingku seng maghurang kahingang.”

8Ana e'e nanamba l᷊aboe, dang su l᷊ou i sie nanita nipaikang, I Abraham nukoa sal᷊iwang ko l᷊abo.

I Hagar l᷊au I Ismael niuseri

9Pia su singkatempo, ana I Abraham l᷊au i Hagar tau kowawine bou Mesir e'e, kaputaghunange dingang#21:9: kaputaghunange dingangarako kapul᷊al᷊aheghesi. i Ishak, ana i Sara.#21:9: pira mbau salenang ko tuwei: i Ishak, ana i Sara. 10#Gal. 4:29-30I Sara nakawua hal᷊i e'e bou e'e nangul᷊i si Abraham, “Useri l᷊ang kowawine e'e dingang anae. Ta botonge ana u tau kowawine e'e manarima bageang bou kakakalau ko sarung makoa pusaka u anaku i Ishak.” 11I Abraham ta mal᷊uasi kahingang dingang u tughu e'e, ual᷊ingu Ismael ko mang anae l᷊ai. 12#Rm. 9:7; Ibr. 11:18Kateho Mawu Ruata nangul᷊i si Abraham, “Tahawal᷊uasi i kau maghagha ngu l᷊ang u i Hagar l᷊au anae e'e. Tuhukete kao i Sara, ual᷊ingu bo Ishak e'e i kau sarung makahombang hintou ko seng Daku nipudiandi e'e. 13Kere'e l᷊ai su ana i Hagar sarung Daku onggol᷊ang u ana pung pakaul᷊i tadeau i sire makoa simbau bangsa. Watu'u i sie mang ana u l᷊ai.”

14Ndai mal᷊ou mborong mal᷊uka-l᷊ukari, i Abraham nangonggo kang l᷊au kambeto bou pisi pia tahoe ake si Hagar guna ngu sinasa su l᷊al᷊al᷊engang. I sie namilo ana e'e su l᷊ikuri Hagar, dang nundoi tau kowawine e'e pal᷊al᷊eng. Bou e'e i Hagar nul᷊umal᷊eng dang nul᷊iku tana l᷊inggi Bersyeba. 15Su tempo ngu ake sinasae nasue, i Hagar namilo anae su l᷊al᷊ung u nggal᷊umue, 16bou e'e nukumangiang pari manga mahasu su meteri bou tampa e'e. Angkunge su l᷊al᷊ung u naung, “Ia ta makatahang mutuhung anaku mate.” Bou e'e i sie numpal᷊ehe.#21:16: i sie, simbau salenang ko tuwei: ana e'e.

17Mawu Ruata nakaringihi tingihi Ismael, dang bou l᷊angi Mawu Ruata nudidato si Hagar, angkung-E, “Apa ko nakasusa naung u Hagar? Kumbahang mataku. Mawu Ruata seng nakaringihi tingihi u anau. 18Tamaite sarang anau, sapua dang sal᷊iwuhete rario e'e. Ia sarung mukoa hintounge simbau bangsa ko l᷊abo.” 19Bou e'e Mawu Ruata nukoa si Hagar tadeau makawua dingang mal᷊ahe, hakiu nikawuae simbau pahighi. Kuteu i sie natamai bou e'e nutaho kambeto bou pisi e'e dingang u ake, mbuhue nionggoe anae panginung.

20Mawu Ruata nuhundingang i Ismael. Ana e'e nanamba nal᷊abo; i sie natana turusi su tana l᷊inggi Paran, dang nakoa tahapanganu ko mapilesa. 21I mamange nupukawing i sie dingang u tau kowawine bou Mesir.

Pudadiandi su tal᷊oara i Abraham l᷊au i Abimelekh

22 # Kar. 26:26 Su tempo e'e Ratu Abimelekh l᷊au i Pikhol, panglima ngu sordadonge, nusumongo sarang koa i Abraham dang nangul᷊i, “Mawu Ruata mutul᷊ung si kau su l᷊al᷊ung u patiku hal᷊i ko koateng u. 23Watu'u e'e putewate su si'i su saruang u Mawu Ruata, himoneu i kau ta sarung mangakal᷊i manga apa si sia, dang l᷊ai su manga anaku arako su hintouku. Kere ia seng nukoa ko mapia si kau, pukoae l᷊ai kere'e si sia dang su soa ko nikatanakeng u i'i.”

24Angkung i Abraham, “Ia mutewa.”

25Kateho bou e'e i Abraham nusisili si Abimelekh hal᷊i u simbau pahighi ko seng niaho ngu manga l᷊ang u ratu e'e. 26I Abimelekh nangul᷊i, “Ia wugha minsang i sai nukoa hal᷊i e'e. I kau mborong ta nuhabari si sia, dang i'i kahimotongange ia nakaringihi hal᷊i e'e.” 27Bou e'e i Abraham nangonggo domba l᷊au sapi pira mbau si Abimelekh, dang i sire rua e'e nukoa pudadiandi. 28I Abraham nuhae ngu pitu ana u domba bou ghapang u dombae, 29dang i Abimelekh nakina si sie, “Nakurawe i kau nukoa hal᷊i e'e?”

30I Abraham nusumimbahi, “Tarimae ana u domba pitu i'i kere tatia i Tuang mangaku himoneu ko ia seng nukal᷊i pahighi i'i.” 31Kere'e tampa e'e nisigho Bersyeba, #21:31: Bersyeba: Areng i'i su wahasa ngu Ibrani mangal᷊enge “Pahighi Tewa” arako “Pahighi Pitu”. ual᷊ingu su se'e i sire rua nutewa.

32Suapang i sire rua nukoa pudadiandi su Bersyeba, i Abimelekh l᷊au i Pikhol nusul᷊e sarang soa ngu tau Filistin. 33Bou e'e i Abraham nusuang simbau kau tamariska su Bersyeba dang nanita tempo e'e tampa e'e nipake'e guna ngu manumba Mawu, Mawu Ruata ko sarang kal᷊iwuenge. 34Bou e'e i Abraham natana dio mal᷊iwue su soa ngu tau Filistin.

Currently Selected:

KARARIADI 21: PLT

Highlight

Copy