KARARIADI 23

I Sara nate dang i Abraham nul᷊uang tana pul᷊al᷊uwingang

1Suapang i Sara natimu umurie mahasuduampul᷊opitu su taunge, 2i sie nate su Hebron su tana Kanaan. I Abraham nasusa dang nukahuang su papate ngu kawinge e'e.

3Bou e'e i Abraham nanintang u bangke ngu kawinge dang nakoa sarang manga taumata ngu Het, ko natana su soa e'e. I sie nangul᷊i, 4#Wuk. 7:16; Ibr. 11:9, 13“Ia i'i ko taumata ngu raghi ko natana su tal᷊oara u manga ana u simbau; kere botonge onggol᷊eko ia tana singkompeng tadeau ia botonge mul᷊uwing kawingku.”

5I sire nusumimbahi, 6“I Kami mangadati si Tuang kere pangaha ko matoghasi su tal᷊oara i kami, inau l᷊uwingte kawing i Tuang su l᷊al᷊ung u kubul᷊i ko kapiange bou koa i kami. I kami kaul᷊i e'e mal᷊uasi manadia kubul᷊i guna ngu kawing i Tuang.”

7Bou e'e i Abraham nusuba su tingo ngi sire, 8dang nangul᷊i, “Boko manga ana u simbau mangonggo si sia mul᷊uwing kawingku su si'i, tul᷊ungko pundoke si Efron, ana ko ese i Zohar, 9tadeau i sie muwal᷊u si sia L᷊iang Makhpela su wiwihi u anseri. Mapiangwe i sie muwal᷊u tana e'e su si'i ikasaksi ngu manga ana u simbau. Harigange sarung daku waehang kaul᷊ie, tadeau tana e'e mariadi koaku.”

10Su tempo e'e i Efron sisane ene kakangiang dingang u manga tau Het e'e su tampa pukomol᷊ang su tukari u soa. Bou e'e dingang nikawua ngu kaul᷊i taumata ko ene su se'e, i sie nusumimbahi, 11“Bangsaku sisane makoa saksi himoneu anseri e'e dingang u l᷊iange daku ionggo tadeau i Tuang botonge makapul᷊uwing kawing i Tuang.”

12Kuteu i Abraham nusuba su tingo ngu manga tau Het e'e, 13dang nikaringihang kaul᷊i taumata, i sie nangul᷊i si Efron, “Tul᷊ung raringihiko ia. Ia mo mul᷊uang kaul᷊i u anseri e'e. Tarimae doinge, tadeau ia makapul᷊uwing kawingku su se'e.”

14I Efron nusumimbahi, 15“Simpalang tana ko harigange kitang pauhasu doi sal᷊aka — apa mangal᷊enge e'e si karua? Kubul᷊iete kawing i Tuang su se'e.” 16I Abraham nukumire hariga e'e. I sie nundekeng doi sal᷊aka ul᷊ie kere ko seng nisigho ngi Efron, pauhasu doi sal᷊aka, tuhu timbangang ko ipupake u manga mudadagang. Bou e'e i sie namaehi si Efron dingang nikawua ngu kaul᷊i u tau Het e'e.

17Kere'e kobong i Efron ko mapapilo su Makhpela su simbuka ngu raki su Mamre, nariadi koa i Abraham. Tana e'e bou awuhi l᷊au l᷊iange dang kaul᷊i u manga kaunge nasu manga kau ko ene su manga pusarange. 18Tana e'e niaku ngu kaul᷊i u tau Het ko ene su l᷊al᷊ung u komol᷊ang su tukari u soa e'e kere koa i Abraham.

19Bou e'e i Abraham nul᷊uwing i Sara kawinge su l᷊al᷊ung u L᷊iang Makhpela su tana Kanaan. 20Kere'e awuhi l᷊au u l᷊iange ko horoe koa u tau Het, nariadi koa i Abraham guna ngu tana pul᷊al᷊uwingang.

Currently Selected:

KARARIADI 23: PLT

Highlight

Copy