KARARIADI 25

Hintou ngi Abraham bou kawinge ko wal᷊inge

(1Taw. 1:32-33)

1I Abraham nukawing sau dingang u singkatau kowawine arenge i Ketura. 2Kawinge e'e nahinding manga ana ko arenge: i Zimran, i Yoksan, i Medan, i Midian, i Isybak, l᷊au i Suah. 3I Yoksan ko papa ngi Syeba l᷊au i Dedan, dang hintou ngi Dedan ko tau Asyur, tau Letus, l᷊au tau Leum. 4Manga ana i Midian ko: i Efa, i Efer, i Henokh, i Abida, l᷊au i Eldaa. I sire kaul᷊ie hintou ngi Ketura.

5Maning i Abraham namusaka apang rarotonge si Ishak, 6su tempo ngi sie mborong wiahi i sie nangonggo maul᷊i paraseng su manga anae ko nikareae bou manga kawinge ko wal᷊inge. Bou e'e niroie manga ana e'e pangal᷊ing sarang tampa su simbuka ngu raki bou Kanaan, tadeau putingkaghea bo i Ishak anae.

I Abraham nate dang nil᷊uwing

7-8I Abraham nate su umurie seng marange, mahasupitumpul᷊ol᷊ima su taunge. 9I sie nil᷊uwing u manga anae, i Ishak l᷊au i Ismael, su Liang Makhpela su awuhi su simbuka ngu raki bou Mamre. Horo anseri e'e ko koa i Efron ana i Zohar tau Het, 10#Kar. 23:3-16 kateho seng nil᷊uangeng i Abraham bou tau Het e'e. I Sara, kawing i Abraham, nil᷊uwing su se'e l᷊ai. 11Suapang i Abraham nate, Mawu Ruata nangal᷊amati si Ishak, ana i Abraham. Su tempo e'e i Ishak natana su sindihang u pahighi ko nisigho “I Sie ko nupandung si Sia”.

Hintou ngi Ismael

(1Taw. 1:28-31)

12I Ismael ko ana i Abraham dingang i Hagar, kowawine tau Mesir, l᷊ang i Sara e'e. 13-16I Ismael pia anae i sire mapul᷊odua su kataunge ko nihabari su si'i nanita bou kaiyakanenge: i Nebayot, i Kedar, i Adbeel, i Mibsam, i Misyma, i Duma, i Masa, i Hadad, i Tema, i Yetur, i Nafis l᷊au i Kedma. Manga ana e'e nakoa i upung i sire bangsa mapul᷊odua dang kampong l᷊au kema ngi sire nisigho nutuhu manga areng i sire. 17I Ismael nate umurie mahasutilumpul᷊opitu su taunge. 18Hintounge natana su wanua su wula u Syur su simbuka ngu raki bou Mesir mutatingo Asyur. I sire nuwiahi naghea bou hintou ngi Abraham ko wal᷊inge.

I Esau sire rua ngi Yakub nipahinding

19I'i wuke ngi Ishak, ana i Abraham. 20I Ishak umurie paupul᷊o su taunge su tempo ngi sie nukawing dingang i Ribka, wawine ngi Laban, ana i Betuel, singkatau tau Aram bou Mesopotamia. 21Ual᷊ing i Ribka ta nakarea ana, i Ishak nukal᷊iomaneng su Mawu guna ngu kawinge. Dang Mawu nundaringihi kakal᷊iomaneng i Ishak, hakiu i Ribka nikadehokang. 22I sie numbawa ana hindua, dang su horo u manga ana e'e nipahinding, i sire rua kapubilorenge su l᷊al᷊ung u kal᷊uwaeng. Angkung i Ribka, “Nakurawe hal᷊i i'i mambeng mariadi su watangengku?” Bou e'e i sie nukahioro tatibo su Mawu.

23 # Rm. 9:12 Mawu nangul᷊i si sie,

“Bangsa darua ene su l᷊al᷊ung u kal᷊uwaengu;

i kau sarung mahinding bangsa darua ko muraroka;

tuaringe lebe matoghasi bou tuhange

ko iyakang mutangkiang ko tuari.”

24Seng nurating temponge i Ribka mahinding, dang i sie nahinding ana hindua kol᷊aese. 25Ko iyakang pisinge mangkate mahamu dang pisinge kere juba ko pia rukue. Watu'u e'e i sie nisigho si Esau.#25:25: Esau: Arenge i'i nitika pia wuhie dingang u Seir, e'e tampa ko samuringe ko nikatanakeng hintou ngi Esau; Seir tingihie kere didato Ibrani ko mangal᷊enge “maruku”. 26Su tempo ngu ana karuange nipahinding, l᷊imange kapuhinggonge pakeli Esau. Watu'u e'e i sie nisigho si Yakub.#25:26: i Yakub: Areng i'i tingihie kere didato ngu Ibrani mangal᷊enge “pakeli”. Umuri Ishak nungupul᷊o su taunge su tempo ngi sire rua nipahinding.

I Esau nuwal᷊u hakie kere ana ko iyakang

27Manga ana rarua e'e kal᷊al᷊aboe. I Esau nakoa tahapanganu ko mapilesa dang kaoe matana su ngudae, arawe i Yakub mal᷊umuri dang kaoe matana su wal᷊e. 28I Ishak lebe makindaghi si Esau, watu'u i Ishak makihaghi kumina ghisi ngu binatang bou nianu. Arawe i Ribka lebe makindaghi si Yakub.

29Pia su silou su tempo ngi Yakub kapul᷊aghange duku timbue mahamu, i Esau nasongote bou nanganu. I sie nikal᷊unusang. 30I Esau nangul᷊i si Yakub, “Ia seng nahutung-hutung. Maiko mundo singkodo timbue mahamu e'e.” (E'e sabapie i sie nisigho si Edom.) #25:30: Edom: Areng i'i tingihie kere didato Ibrani ko mangal᷊enge “mahamu”.

31Sasimbahi Yakub, “Kere'ete, asal᷊i i kau pangonggo horo hakiu kere ana ko iyakang.”

32Angkung i Esau, “Koateng apa haki e'e si sia. Ia seng mate ngu l᷊unusi!”

33 # Ibr. 12:16 I Yakub sau nangul᷊i, “Putewako horo himoneu i kau mangonggo hakiu si sia.”

I Esau nutewa dang nangonggo hakie si Yakub. 34Bou e'e i Yakub nangonggo si sie boroti l᷊au simbahageang bou duku timbue mahamu e'e. I Esau nukumang dang nanginung bou e'e natamai. Kere'e i Esau ta nuhariga ngu hakie kere ana ko iyakang.

Currently Selected:

KARARIADI 25: PLT

Highlight

Copy