KARARIADI 26
26
I Ishak natana su Gerar
1Su wanua e'e nariadi l᷊ai kal᷊ahutung kere ko seng nariadi su tempo ngi Abraham. I Ishak nusombang i Abimelekh, ratu ngu tau Filistin, su Gerar dang naghilei matana pai se'e. 2Hal᷊i e'e nikoae ual᷊ingu Mawu seng nutingkaandaghi watangeng-E si sie dang nuhengetang, “Kumbahang makoa sarang Mesir; katanae su wanua i'i, kere ko seng Daku niparenta si kau. 3#Kar. 22:16-18 Ia sarung manirung dang mangal᷊amati si kau. Kal᷊abo u wanua i'i sarung Daku ionggo si kau dang su hintou ngu. Ia sarung mungganapi diandi ko seng Daku nionggo si Abraham i papangu. 4Ia sarung mangonggo si kau ana pung kere ul᷊i u wituing su l᷊angi, dang kal᷊abo u wanua i'i sarung Daku ionggo si sire. Kaul᷊i u bangsa su dunia i'i sarung mukahioro si Sia tadeau Ia mangal᷊amati si sire kere Ia seng nangal᷊amati hintou ngu. 5Ia sarung mangal᷊amati si kumu, ual᷊ing i Abraham seng nundaringihi si Sia dang namal᷊ihara patiku tita-Ku l᷊au parenta-Ku.”
6Inau natanate i Ishak su Gerar. 7#Kar. 12:13, 20:2Su tempo ngu manga taumata su se'e nakina hal᷊i i Ribka, i Ishak nusumimbahi himoneu i sie ko wawinenge, dang wal᷊inge kawinge. I Ishak mataku su manga taumata e'e sarung mamate si sie tadeau makarea si Ribka ko kere'e kasidadae. 8Suapang i Ishak natana pira ngkatempo pai se'e, pia su silou Ratu Abimelekh nutuhung bou janelae, dang nikawuae i Ishak kapul᷊al᷊iaghi dingang i Ribka. 9Kuteu nikuiange i Ishak dang i sie nangul᷊i, “Wal᷊ingewe kawingu kowawine e'e? Nakurawe i kau nangul᷊i uare i sie ko wawinengu?”
I Ishak nusumimbahi, “Su sipirangku, ia sarung ipate boko mangul᷊i himoneu i sie ko kawingku.”
10“Apa ko seng nikoa u si kami?” angkung i Abimelekh. “Singkatau bou kawanuaku botonge l᷊ai matiki dingang kawingu, boko hal᷊i e'e mariadi, i kau pananggong sal᷊a ngi kami e'e.” 11Bou e'e i Abimelekh nangonggo u ingati su kaul᷊i u kawanuange kiri'i, “I sai-sai ko manal᷊uka tau i'i arako kawinge, sarung ihukung pateng.”
12I Ishak nanawuhi sasuang guna ngu pusasuangeng su wanua e'e, dang su taung e'e nakarea l᷊uange nal᷊ipa paka mahasu bou sasuang ko nisawuhi, watu'u Mawu nangal᷊amati si sie. 13Kakakalae mang katatambange dang i sie nakoa taumata ko kala kahingang. 14Tau Filistin masaki naung si sie ual᷊ing i sie pia l᷊ange maul᷊i, ghapang u domba l᷊au sapi. 15Bou e'e i sire nangambung tana su kaul᷊i u pahighi ko seng nikal᷊i ngu manga l᷊ang i Abraham su tempo i sie mborong wiahi.
16Bou e'e i Abimelekh nangul᷊i si Ishak, “Dakoe pangal᷊ing bou wanua ngi kami. I kau seng lebe makawasa bo i kami.” 17Inau Ishak nul᷊umal᷊eng dang nukoa kema su wal᷊ang u Gerar. Su se'e i sie natana pira ngkatempo l᷊iwuenge. 18I sie sau nukal᷊i manga pahighi ko seng mbuae nikal᷊i su tempo ngi Abraham dang ko seng niambungang u tau Filistin dingang u tana su pananintang i Abraham. Manga pahighi e'e nionggol᷊ang u arenge ko musul᷊ung kere ko seng nionggo i papange.
19Manga l᷊ang i Ishak nukal᷊i pahighi su wal᷊ang u Gerar dang nakarea simbul᷊u ake maul᷊i-ul᷊i. 20Kateho manga mul᷊al᷊ukari binatang su Gerar nurarendehi dingang u manga mul᷊al᷊ukari binatang i Ishak. Angkung i sire, “Ake i'i koa i kami.” Ual᷊ingu e'e i Ishak nusigho pahighi e'e “Purarendehang”.
21Manga l᷊ang i Ishak sau nukal᷊i pahighi ko wal᷊inge, kuteu sau nariadi purarendehi hal᷊i u pahighi e'e. Ual᷊ingu e'e, i Ishak nusigho pahighi e'e, “Pusasudu”. 22Bou e'e i sie nangal᷊ing bou tampa e'e dang nukal᷊i pahighi ko katilunge. Paghisa i'i takoae purarendehi. Ual᷊ing e'e, i Ishak nusigho pahighi e'e, “Kal᷊al᷊iwiri”. Angkunge, “Su orasi i'i Mawu seng nangonggo si kite kal᷊al᷊iwiri guna ngu matana su wanua i'i, dang i kite sarung muwiahi mapia su tampa i'i”.
23Bou e'e i Ishak nuwua dang nahumpa su Bersyeba. 24Su huwi e'e Mawu nutingkaandaghi watangeng-E si sie dang nuhengetang, “Ia ko Mawu Ruata ngi papa ngu i Abraham. Kumbahang mataku; Ia manirung si kau. Ia sarung mangal᷊amati si kau dang mangonggo si kau hintou ko maul᷊i ual᷊ingu diandi-Ku su l᷊ang-Ku i Abraham.” 25Bou e'e i Ishak nupararisi mesba dang nanumba Mawu su tampa e'e. I sie natana su kema su se'e dang manga l᷊ange nukal᷊i pahighi ko wal᷊inge.
Pudadiandi su tal᷊oara i Ishak dingang i Abimelekh
26 #
Kar. 21:22
Pia su silou i Abimelekh bou Gerar nusumongo, dingang i Ahuzat, mananughunge, l᷊au i Pikhol, panglima ngu sordadonge, guna ngu musombang i Ishak. 27Kuteu i Ishak nakina, “Nakurawe i kumu nusumongo musombang u ia su orasi i'i, sumbal᷊i horo i kumu nundoka dang nanokol᷊i si sia bou wanua ngi kumu?”
28I sire nusumimbahi, “Su orasi i'i i kami matitong himoneu Mawu manirung si kau dang su pundang i kami mapiang i kite mukoa pudadiandi. Putewako 29himoneu i kau ta sarung mukoa ko dal᷊ai si kami, kere'e i kami l᷊ai mborong ta sarang paghisa nukoa ko dal᷊ai si kau. I kami seng nukoa ko mapia si kau dang nupakawala ngi kau pal᷊al᷊eng dingang u purarame. Seng nal᷊ahe si kami himoneu Mawu mangal᷊amati si kau.” 30Bou e'e i Ishak nanadia kang inung si sire, dang i sire nukumang dang nanginung. 31Ndai mal᷊ou mal᷊uka-l᷊ukari singkatau-singkatau nuhabari didato pudadiandi ko nitoghaseng dingang u tewa. Bou e'e i Ishak nuhabari sal᷊amati l᷊umal᷊eng si sire dang i sire nutal᷊ei kere ghawe.
32Su l᷊ou e'e l᷊ai manga l᷊ang i Ishak nusumongo nangalaki si sie hal᷊i u pahighi ko seng nikal᷊i ngi sire. Angkung i sire, “I kami seng nakarea ake.” 33Bou e'e i Ishak nusigho pahighi e'e, “Tewa”. E'e tita u soa e'e nisigho Bersyeba. #26:33: Bersyeba: Areng i'i su wahasa ngu Ibrani mangal᷊enge “Pahighi Tewa” arako “Pahighi Pitu” (Tuhunge 21:31).
Manga kawing i Esau bou bangsa ko wal᷊inge
34Su tempo ngi Esau umurie paupul᷊o su taunge, i sie nukawing dingang ana mahua darua bou bangsa Het, e'e ko i Yudit ana i Beeri, dang i Basmat ana i Elon. 35I sire rua kowawine e'e nupakasusa ngu wiahi Ishak sire rua ngi Ribka.
Currently Selected:
KARARIADI 26: PLT
Highlight
Share
Copy
Want to have your highlights saved across all your devices? Sign up or sign in
