KARARIADI 27

I Ishak nangal᷊amati si Yakub

1Pia su silou, su tempo ngi Ishak seng maghurang dang ko wuta l᷊ai, nikuinge i Esau, anae ko iyakang, bou e'e nangul᷊i si sie, “Anaku!”

“Iya papa,” sasimbahi Esau.

2I Ishak nangul᷊i, “I kau matitong himoneu ia seng maghurang dang pari seng ta mal᷊iwue l᷊ai muwiahi. 3Inau al᷊ako busuri l᷊au manga panau, dakoe panganu simbau binatang su ngudae. 4L᷊aghako pakatemang sarang mutatahino su l᷊ehiku, bou e'e wawa mai si sia. Suapang ia masue kange e'e, ia sarung mangonggo u al᷊amati si kau su horo ia mate.”

5Puwawisara ngi Ishak dingang i Esau e'e nikaringihi Ribka. Kuteu suapang i Esau l᷊umal᷊eng nanganu, 6i Ribka nangul᷊i si Yakub, “Wuhu i'i ia nakaringihi i papa ngu nangul᷊i si Esau kiri'i, 7‘Dakoe panganu binatang simbau dang l᷊agha pakatemang guna ngu ia. Suapang ia bou nukumang, sarung daku ionggo al᷊amatiku si kau su saruang u Mawu, su horo ia mate.’ 8Inau anaku,” angkung i Ribka sau, “Raringihiko dang koa apang ko daku iul᷊i i'i. 9Tamai sarang tampa u domba ngi kite, dang pamileko darua ana u kambing ko matawa, tadeau daku l᷊aghang makoa kang ko mutatahino su l᷊ehi i papangu. 10Bou e'e wawa si sie tadeau ikange, dang bou e'e i sie sarung mangonggo al᷊amatie si kau su horo u i sie mate.”

11Kateho i Yakub nangul᷊i si mamange, “mama, wal᷊inge kere badang i Esau maruku, arawe badangku mal᷊ino? 12Singkawua i papa managhipo badangku dang makatitong himoneu ia ko nangakal᷊i si sie; ntihang i sie wal᷊ingewe mangonggo u al᷊amati, kateho kutoki si sia.”

13I mamange nusumimbahi, “Kumbahang maghagha, i kau ana. Walate hindo ia mananggong apang kutoki. Koae apang ko seng daku niul᷊i, dakoe al᷊a manga kambing e'e.” 14Kuteu i Yakub natamai nangal᷊a manga kambing e'e dang niwawae sarang koa i mamange, bou e'e i Ribka nul᷊agha masakang kao i Ishak. 15Bou e'e i Ribka nangal᷊a pakeang i Esau ko kasidadakenge, ko niresoe su wal᷊e, mbuhue nil᷊ohoe si Yakub. 16I sie l᷊ai namukisi pisi ngu ana u kambing su takiahi l᷊au su l᷊ehi i Yakub ko takoae rukue e'e. 17Bou e'e nionggoe si Yakub kang ko matemang e'e dang boroti ko seng nikoae.

18Bou e'e i Yakub natamai sarang koa i papange dang nangul᷊i, “Papa!”

“Iya,” nisimbahi Ishak, “I sai i kau, i Esau arako i Yakub?”

19I Yakub nusumimbahi, “I Esau, ana i papa ko iyakang; parenta ngi papa seng daku nituhukang. Kaiangko dang kangte ghisi ngu binatang ko daku nianu ko seng niwawa i'i, tadeau i papa seng botonge mangal᷊amati si sia.”

20I Ishak nangul᷊i, “Maehong kahingang i kau nakarea e'e yamang.”

I Yakub nusumimbahi, “Ual᷊ingu Mawu Ruata ko nisumba i papa seng nutul᷊ung si sia.”

21Bou e'e angkung i Ishak si Yakub, “Maiko pakasandighi tadeau ia botonge makasaghipo si kau. Apa tingari i kau i Esau?” 22I Yakub nusumimbahi si papange, dang i papange e'e nanaghipo si sie dang nangul᷊i, “Tingihiu kere tingihi Yakub, arawe takiahiu kere takiahi i Esau.” 23I Ishak ta nakakil᷊al᷊a si Yakub ual᷊ingu takiahi pia rukue kere takiahi i Esau. Kateho su tempo ngu i Yakub seng ial᷊amateng, 24i sie mborong nakina paghisa l᷊ai, “Tingari i kau i Esau?”

“Tingari,” nisimbahi Yakub.

25Bou e'e i Ishak nangul᷊i, “Onggoko si sia ghisi ngu binatang e'e. Suapang ia masue kange sarung daku ionggo al᷊amatiku si kau.” I Yakub nangonggo ghisi ngu binatang e'e si sie dang l᷊ai anggori singkodo tadeau paki'inung. 26Bou e'e i papange nangul᷊i si sie, “Maiko lebe pakasandighi l᷊ai, yamang, dang imbuko ia.” 27#Ibr. 11:20Su tempo ngi Yakub nusumandighi guna ngu mangimbu si sie, i Ishak seng nakaimbu raruru ngu pakeang i Esau, bou e'e nial᷊amatenge i sie. Angkung i Ishak, “Raruru mawungi anaku kere raruru ngu awuhi ko seng nial᷊amateng u Mawu. 28Mal᷊umbako Mawu Ruata mangonggo si kau ombong bou l᷊angi, dang mupakatawa ngu apang awuhiu! Mal᷊umbako I Sie mangonggo si kau gandung l᷊au anggori mapene-pene! 29#Kar. 12:3Mal᷊umbako apang bangsa makoa l᷊ang u dang apang suku bangsa musumulung si kau. Mal᷊umbako i kau mangawasa kaul᷊i u ana u simbau u, dang hintou ngi mama ngu musuba su tingo ngu. Kadongki pia wontoghi su kaul᷊i u taumata ko mangane si kau dang ial᷊amateng kaul᷊i u taumata ko mangal᷊amati si kau.”

I Esau mukahioro al᷊amati bo i Ishak

30Ta nal᷊iwue bou Ishak nangonggo al᷊amati si Yakub dang i Yakub seng nul᷊umal᷊eng, i Esau, tuhange, napul᷊e bou nanganu. 31I sie l᷊ai nuputung kang ko matemang mbuhue niwawae sarang koa i papange, angkunge, “Kaiangte, papa, dang kangte ghisi ngu binatang ko seng daku niwawa guna ngi papa, tadeau i papa botonge mangal᷊amati si sia.”

32“Ko i sai i kau?” kakina i Ishak.

“Esau ana i papa ko iyakang,” nisimbahie.

33I Ishak nanita nukumende kaul᷊i u badange, dang i sie nakina. “Boko kere'e, ko i sai seng nanganu binatang dang numbawa e'e si sia kanini? Ia seng mbuae nukumang su horo u i kau nusumongo. Bou e'e ia seng nangonggo al᷊amatiku ko panginsuenge si sie, dang su orasi i'i al᷊amati e'e seng nakoa koae sarang kal᷊iwuenge.”

34Suapang i Esau nakaringihi e'e, i sie numpal᷊ehe mauha dang nasusa kahingang, bou e'e nangul᷊i, “Al᷊amati ko ia l᷊ai, papa!”

35I Ishak nangul᷊i, “Tuariu seng nusumongo mai dang nangakal᷊i si sia. I sie seng nangal᷊a al᷊amati ko hinonge sarung daku ionggo si kau.”

36 # Kar. 25:29-34 I Esau nangul᷊i, “i'i seng karuange i sie nangakal᷊i si sia. Nuhino arenge i Yakub.#27:36: Yakub: Areng i'i tingihie kere wahasa ngu Ibrani mangal᷊enge “l᷊inga”. I sie seng nangal᷊a hakiku kere ana ko iyakang, dang su orasi i'i i sie nangal᷊a l᷊ai al᷊amati ko seng guna ngu ia. Apa i papa seng takoae al᷊amati ko wal᷊inge guna ia?”

37I Ishak nusumimbahi, “Ia seng nukoa si sie mahang mawu ngu, dang kaul᷊i u apang ana u simbaue daku nikoa l᷊ange. Ia seng nangonggo gandung l᷊au anggori. Su orasi i'i seng takoae manga apa ko daku ikaonggo guna ngi kau yamang!”

38 # Ibr. 12:17 I Esau ta nangiro nukahioro si papange, “Apa i papa kitang pia simbau al᷊amati? Al᷊amatiko ia l᷊ai papa!” Bou e'e i sie sau nanita numpal᷊ehe.

39 # Ibr. 11:20 Bou e'e i Ishak nangul᷊i si sie,

“Sarung takoae ombong bou l᷊angi guna ngi kau,

sarung takoae tana ko matawa guna ngi kau.

40 # Kar. 36:8; 2Mar. 8:20 I kau sarung muwiahi bou pera ngu,

kateho makoa l᷊ang u tuariu,

arawe boko i kau mamarontaki,#27:40: mamarontaki arako nisal᷊iabae.

i kau sarung mapilo bou kawasange.”

41Kuteu i Esau nubinsi si Yakub ual᷊ing i papange seng nangonggo u al᷊amati su tuaringe e'e. Su pikirange, “Ta mal᷊iwue l᷊ai i papange seng mapul᷊e asal᷊ie dang masue i kite mul᷊al᷊utu, i Yakub sarung daku pateng!”

I Ishak nundoi si Yakub patamai sarang koa i Laban

42Su tempo ngi Ribka nakaringihi hal᷊i kirou ngi Esau e'e, i sie nangoro pakikuie i Yakub dang nangul᷊i, “Daringiheko, tuhangu i Esau nukirou mamal᷊isi saki u naunge dang mamate si kau. 43Inau, koako apang ko daku iul᷊i i'i. Tamaite pakaehong sarang koa u mahuaneku i Laban su Haran, 44dang katanae dingange pira ngkatempo l᷊iwuenge, sarang wawal᷊uang u tuhangu mal᷊ompeng 45dang i sie seng ta mutinaung apang ko nikoa u si sie. Bou e'e ia sarung mundoi taumata pumbawa si kau mapul᷊e mai. Ia mandi kailangeng u anaku darua singkahindo.”

46Kuteu i Ribka nangul᷊i si Ishak, “Ia seng nasahe dang nal᷊al᷊ai naungku makawua manga kawing i Esau bou suku bangsa ngu raghi e'e. Boko i Yakub l᷊ai mukawing dingang ana mahua ngu Het, mapiangwe ia mate.”

Currently Selected:

KARARIADI 27: PLT

Highlight

Copy