KARARIADI 31
31
I Yakub nutumal᷊ang bou koa i Laban
1I Yakub nakaringihi manga ana i Laban nangul᷊i kiri'i, “I Yakub seng nangal᷊a apang rarotong i papa. Kaul᷊i u kakakalae asal᷊ie bou rarotong i papa.” 2I Yakub nakawua l᷊ai himoneu i Laban seng ta mahimumu kere horo si sie. 3Bou e'e Mawu nuhengetang si Yakub, “Pusul᷊ete sarang wanua ngi papa ngu dang sarang manga ana u simbau'u. Ia sarung manirung si kau.”
4Bou e'e i Yakub nundoi taumata puhabari si Rahel sire rua ngi Lea tadeau musuma dingange su ngudae su tampa u ghapang u kambing dombae. 5Bou e'e angkung i Yakub si sire rua, “Ia nakawua himoneu i papa ngu seng ta mahimumu kere horo si sia; kateho Mawu Ruata ko nisumbang i papaku manirung si sia. 6I rua l᷊ai matitong himoneu ia seng nuhal᷊i su koa i papa ngu nahimbatu uhaku. 7Maneng kere'e ia seng niakal᷊enge dang niwal᷊ue wawaehi si sia sarang paka mapul᷊o. Kateho Mawu Ruata ta nupakawala ngi sie nukoa ko dal᷊ai si sia. 8Su tempo ngi papa ngu nangul᷊i, ‘Kambing ko pia tonte'e sarung makoa wawaehi si kau,’ kuteu apang kambing e'e nuhana u ana ko pia tonte'e. Su tempo ngu i sie nangul᷊i, Kambing ko pia wuhie sarung makoa wawaehi si kau, kuteu apang ghapang u kambing e'e nuhana ana ko pia wuhie. 9Kere'e Mawu Ruata seng nangal᷊a ghapang u binatang i papa ngu bou e'e nionggo-E si sia.
10Dang su tempo ngu manga binatang e'e mul᷊al᷊anaghi, ia nipi nakawua kaul᷊i u kambing ko ese ko kapul᷊al᷊anaghi, ko loreng, pia tonte'e dang pia wuhie. 11Dang Mawu Ruata dingang u ghahi u malaikati nudidato dingangku su l᷊al᷊ung u ipi e'e, angkung-E, ‘Yakub!’ Ia l᷊ai nusumimbahi, ‘Iya’. 12Malaikati e'e sau nudidato, ‘Tuhunge kaul᷊i u kambing ko ese kapul᷊al᷊anaghi e'e ko loreng, l᷊au ko pia tonte'e dang ko pia wuhie. Ia nutaturi nangatori e'e guna ngi kau ual᷊ingu Ia seng nakawua kaul᷊i u ko seng nikoa i Laban si kau. 13#Kar. 28:18-22 Ia Mawu Ruata ko seng nutingkaandaghi watangeng si kau su Betel. Pai se'e i kau seng nupararisi simbau watu putatinaungang dingang naniwohi l᷊ana zaitung su wawoe. Pai se'e l᷊ai i kau seng nutewa si Sia. Orasi i'i panadiate dang pusul᷊ete sarang wanua ko nipamotokang puiriu.’ ”
14Bou e'e i Lea sire rua ngi Rahel nusumimbahi, “Seng takoae l᷊ai bahageang bou kakakala i papa ngi kami ko sarung makoa pusaka i kami. 15I kami i'i nikoae kere tau raghi. I sie seng nuwal᷊u si kami dang apa ko seng nitarimae guna ngu e'e, seng nipakasue'e l᷊ai. 16Kaul᷊i u kakakalae ko seng nial᷊a u Mawu Ruata bo i papa ngi kami tuhu hinonge ko koa i kami dang koa u manga ana i kami. Koae apang ko niparenta ngu Mawu Ruata si kau.”
17-18Bou e'e i Yakub nusasadia guna ngu mapul᷊e sarang koa i papange su wanua ngu Kanaan. Nipaawie manga kawinge l᷊au manga anae su wawo u onta, dang niahae kaul᷊i u ghapang u kambing dombae dang kaul᷊i u apang ko seng nikahombange su Mesopotamia. 19Su tempo e'e i Laban ene su ngudae kapungguntinge ruku u manga dombae, dang su tempo e'e i Rahel nanako patong dadiaga tataho u wal᷊enge#31:19: dadiaga tataho u wal᷊enge: su wahasa ngu Ibrani Terafim, e'e patong barhala narange musul᷊ung u taumata dang nisumba kere dadiaga tataho u wal᷊e. koa i papange. 20I Yakub nangakal᷊i si Laban dingang ta nangul᷊i i sie ko seng mapul᷊e. 21I sie seng nangal᷊a apang rarotonge, dang natamai dingang masahawu-sahawu. I sie nul᷊umiu sal᷊uhi Efrat bou e'e nakoa sarang wul᷊uri u Gilead.
I Laban numbawatu si Yakub
22Hindo tilu l᷊ou bou e'e i Laban mbuhue nihabareng himoneu i Yakub seng nutumal᷊ang. 23Bou e'e i Laban nungomol᷊i manga taumatange dang singkahindo i sire numbawatu si Yakub pitu l᷊ou l᷊iwuenge sarang nituhukange su wul᷊uri u Gilead. 24Su huwinge Mawu Ruata nusumongo sarang koa i Laban su l᷊al᷊ung u ipinge, dang nuhengetang, “Pakaingati, kumbahang-bahang i kau mamataku si Yakub maneng kitang didato singkamohong.” 25Su tempo e'e i Yakub seng nupararisi kemae su wul᷊uri simbau. Bou e'e su wul᷊uri ko wal᷊inge su tampa e'e l᷊ai i Laban dingang u manga taumatange nupararisi kema ngi sire.
26Bou e'e i Laban nangul᷊i si Yakub, “Nakurawe i kau nangakal᷊i si sia dang nutumal᷊ang numbawa manga anaku, i sire kere kakakoa u ko nitaweng su tempo ngu parang? 27Nakurawe i kau nangakal᷊i si sia, dang natamai maruma-rumasi, ta nughilei. Kiko i kau naghilei, nal᷊ahe ia nangonggo si kau dingang mal᷊uasi ituhukang u samperi musik rebana l᷊au kecapi! 28I kau seng ta nangonggo u l᷊oahi si sia tadeau makapangimbu manga ana pungku kere imbu putatal᷊ei. Tumaniu dal᷊ai apang ko nikoa u e'e! 29Ia mborong matoghasi guna ngu mukoa ko dal᷊ai si kau, kateho mungkilaeng Mawu Ruata ko nisumba ngi papa ngu nangonggo ingati si sia tadeau kumbahang-bahang mamataku si kau. 30Ia matitong himoneu i kau nul᷊umal᷊eng e'e ual᷊ingu seng mo kahingang mapul᷊e. Kateho nakurawe i kau nanako patong dadiaga tataho u wal᷊eku?”
31I Yakub nusumimbahi, “Ia natamai maruma-rumasi ual᷊ingu mataku ntihang i Om sarung manahang manga ana i Om. 32Hal᷊i u patong e'e, boko i Om makarea singkatau su si'i ko seng nanako patong e'e, i sie sarung ihukung pateng. Wawuaite, apa pia manga rarotong i Om su si'i. Boko pia al᷊ae. Dang manga taumata ngi kite botonge makoa saksie.” I Yakub wugha himoneu ko i Rahel nanako patong e'e.
33Bou e'e i Laban nakoa sarang kema ngi Yakub dang nunahisiri; bou e'e i sie nakoa sarang kema ngi Lea dang kema ngi sire rua l᷊ang kowawine e'e, kateho patong e'e ta nikareae. Samuringe i sie nusumu sarang l᷊al᷊ung u kema ngi Rahel. 34Tintal᷊a ngu e'e i Rahel seng nangal᷊a patong e'e dang nipasue su l᷊al᷊ung u patoka ngu kakangianeng su onta, arawe i sie sisane nukumangiang su wawo u kakangianeng e'e. I Laban nunahisiri kaul᷊i u kema ngi Rahel, kateho mang ta nakarea patong e'e. 35Bou e'e i Rahel nangul᷊i si papa nge, “I papa ariwe puwawal᷊uang, ia ta makararisi manomahi si papa, watu'u ia ko pia kotori.” I Laban seng nundea pakatiti, kateho mang ta nakarea patong e'e.
36Kuteu i Yakub seng nuwawal᷊uang, “Hal᷊i ko dal᷊ai apa ko seng daku nikoa?” kakinae wawal᷊uang, “Apa sal᷊aku hakiu i papa akang mangkate kapumbawatue si sia?” 37Orasi i'i, suapang bou nanahisiri apang sal᷊iumpuhiku, apa i papa akang nakahombang sal᷊iumpuhi koa i papa akang? Pasuwangte barang e'e dang piloe su si'i, tadeau manga taumataku l᷊au manga taumata ngi papa akang botonge makawua dang mamonesi i sai bou tal᷊oara i karua ko nuhino. 38Duampul᷊o su taunge ia seng natana dingang i papa akang. Ghapang u domba l᷊au kambing i papa akang seng nuhite maul᷊i, dang ia tangkeng nukumang sarang simbau kambing ko ese bou binatang i papa akang. 39Ko nate nitumbou ngu binatang ko wawahani ta sarang paghisa daku niwawa sarang koa i papa akang, kateho mang ia sisaneku nungganti, Ko nitako l᷊ou arako huwi sintinia i papa akang manuntu tadeau ia pungganti e'e. 40Tahaghisa ia mutatahang u titi su tempo ngu l᷊ou dang nil᷊al᷊indingang su tempo ngu huwi. Dang tahaghisa l᷊ai ia ta kapatikilang. 41Kere'e kakakoaku su tempo ngu nuhal᷊i su koa i papa akang duampul᷊o su taunge l᷊iwuenge. Mapul᷊o pa su taunge l᷊iwuenge ia nuhal᷊i guna ngu makahombang ana i papa akang darua e'e — dang nungu taung l᷊ai guna ngu makahombang ghapang u kambing domba e'e. Dang l᷊iwuenge e'e l᷊ai i papa akang namal᷊u wawaehi si sia sarang pakapul᷊o. 42Kiko ia ta nisirungang u Mawu Ruata ngi i upungku, Mawu Ruata ko nisumba ngi Abraham l᷊au i Ishak, kuteu i papa akang nal᷊ahe seng nundoi ia pal᷊al᷊eng dingang l᷊ima mapul᷊o. Kateho Mawu Ruata seng nakawua kasasusaku dang hal᷊i ko seng daku nikoa, dang mungkilaeng I Sie seng nangonggo u tahisi-E.
Pudadiandi su Tal᷊oara i Yakub dingang i Laban
43Bou e'e i Laban nusumimbahi si Yakub, “I sire rua ana kowawine e'e ko anaku; ana i sire ko pungku, dang ghapang u domba e'e ko koaku l᷊ai. Tuhu hinonge, kaul᷊i u apang ko nikawua ngu su si'i ko koaku. Kateho ia ta makakoa apa-apa guna ngu mutahatinda ana pungku. 44Watu'u e'e maite i kite mukoa pudadiandi dang manusung manga watu kere tatia ngu pudadiandi e'e.”
45Bou e'e i Yakub nangal᷊a watu simbau dang nupararisie nakoa watu putatinaungang. 46Bou e'e i sie nangoro manga taumatange punggopol᷊i watu dang pakindu. Bou e'e i sire nukumang singkahindo su sindihang u ndu u watu e'e. 47I Laban nusigho ndu u watu e'e Yegar-Sahaduta,#31:47: Yegar-Sahaduta: Areng i'i kere su wahasa ngu Aram mangal᷊enge “ndu u watu kere putatinaungang”. arawe i Yakub nusigho ngu e'e Galed. #31:47: Galed: Areng i'i kere su wahasa ngu Ibrani mangal᷊enge “ndu u watu kere putatinaungang”. 48Angkung i Laban si Yakub, “Ndu u watu i'i sarung makoa putatinaungang si karua.” E'e sabapie tampa e'e nisigho Galed. 49I Laban nuhabari l᷊ai, “Mal᷊umbako Mawu mutuhung si kite su kanandu i kite muwiahi mararau.” Ual᷊ingu e'e tampa e'e nisigho l᷊ai Mizpa.#31:49: Mizpa: Areng i'i raringihang kere su wahasa ngu Ibrani mangal᷊enge “tampa i kite nidiagateng”. 50I Laban sau nangul᷊i, “Boko i kau mukoa ko dal᷊ai su manga anaku, arako mukawing dingang u manga kowawine ko wal᷊inge, maneng takoae ko matitong, putinaung, Mawu Ruata kaputuhunge si kite. 51Ko i'i manga watu seng daku nindu, dang i'i watu putatinaungang. 52Maneng watu ko seng nindu i'i, arako l᷊ai watu putatinaungang i'i mangonggo ingati si kite himoneu ia ta botonge mul᷊umiu ndu u watu i'i guna ngu mangalo si kau, dang i kau l᷊ai ta botonge mul᷊umiu ndu u watu i'i l᷊au watu putatinaungang i'i guna ngu mangalo si sia. 53Mawu Ruata ko nisumba ngi Abraham dang nisumba ngi papaku i Nahor #31:53: Abraham … Nahor: Abraham e'e ko i upung i Yakub, dang i Nahor e'e ko papa ngi Laban. sarung makoa hakim su tal᷊oara i kite.” Bou e'e i Yakub nutewa su areng u Mawu Ruata ko nisumba ngi Ishak, i papange, guna ngu mungganapi diandinge. 54I sie namoto simbau binatang dang nisumbange su wawo u wul᷊uri e'e. Bou e'e ninotie manga taumatange nukumang singkahindo. Suapang nasue kange, i sire natiki su wul᷊uri e'e. 55Ndai mal᷊ou mal᷊uka-l᷊ukari, i Laban nangonggo imbu putatal᷊ei su manga ana punge, nangal᷊amati si sire, bou e'e napul᷊e sarang tampa katanakenge.
Currently Selected:
KARARIADI 31: PLT
Highlight
Share
Copy
Want to have your highlights saved across all your devices? Sign up or sign in
