KARARIADI 32

I Yakub nusasadia guna ngu musombang dingang i Esau

1I Yakub nanurusi l᷊al᷊al᷊engange. Bou e'e pirangkatau malaikati nusombang i sie. 2Su tempo ngi Yakub nakawua si sire, i sie nangul᷊i, “I'i pupakemaang ngu Mawu Ruata,” ual᷊ingu e'e nisighonge tampa e'e Mahanaim.#32:2: Mahanaim: Areng i'i su l᷊aal᷊ung u wahasa ngu Ibrani mangal᷊enge “pukakemang darua”. 3Bou e'e i Yakub nangoro pirangkatau raroie pal᷊al᷊eng pangihoro i sie sarang wanua ngu Edom tadeau pusombang i Esau, tuhange. 4I Yakub nangul᷊i si sire, “Ul᷊iko su tuhangku i Esau kiri'i, ‘Ia i Yakub, l᷊angu. Su l᷊iwuenge i'i ia seng natana dingang i Laban. 5Orasi i'i pia sapi, keledai, domba, kambing l᷊au manga l᷊ang. Ia mundoho habari su tuangku, dang muharapi i tuangku mal᷊uasi.’ ”

6Su tempo ngu manga raroi nusul᷊e sau si Yakub, i sire nangul᷊i, “I kami seng mbuae nakoa sarang koa i Esau, tuhang i Tuang dang orasi i'i i sie kal᷊al᷊enge simai guna ngu musombang i Tuang. I sie simai dingang u pauhasu su kataunge.” 7Nakaringihi e'e i Yakub nataku kahingang dang su ghaghawangeng. Bou e'e manga taumata ko ene dingange nipahiae nakoa dua ngkomol᷊i, kere'e l᷊ai manga dombae, kambinge, sapi l᷊au ontae. 8Su sipirange, “Boko i Esau sumongo dang mangalo komol᷊ang ko kahimotongange, kuteu komol᷊ang karuange pari neng botonge makasal᷊amati watangeng.”

9Bou e'e i Yakub nukal᷊iomaneng, “O Mawu Ruata, ko nisumba ngi upungku i Abraham, dang i papaku i Ishak, raringihiko ia! Mawu seng nundoi si sia pakapul᷊e sarang wanuaku dang sarang manga ana u simbauku. Dang Mawu seng nudiandi sarung mangatori kaul᷊i u patiku pakaudupi. 10Ia ta hinonge manarima kaul᷊i u kakindaghi l᷊au kasasatia ko seng nitode u Mawu si sia. Su tempo ngu ia nuwua nul᷊umiu sal᷊uhi Yordan, ia ta numbawa manga apa, su l᷊ikuri tiking. Orasi i'i ia sau nusumongo dingang dua komol᷊ang i'i 11Ia mukahioro singapang botonge, ambange ko ia bou tuhangku i Esau. Ia mataku singkawua i sie sumongo mangalo dang mupakawinasa si kami kaul᷊ie, nasu kowawine l᷊au manga ana. 12#Kar. 22:17Putinaungwe himoneu Mawu seng nudiandi sarung mangatori kaul᷊i u patiku dingang mapia guna ngu ia dang mangonggo si sia hintou ko maul᷊i. Takoae sarang singkatau ko botonge makarekeng ual᷊ingu ul᷊ie kere nei su apeng.”

13-15Suapang natiki su se'e, i Yakub nangal᷊a simbahageang bou manga binatange guna ngu i paraseng si Esau, paraseng e'e ko: duahasu kambing kowawine, duampul᷊o domba ko ese, tilumpul᷊o onta ko mborong kapupasusunge anae, singkahindo dingang anae, paupul᷊o sapi kowawine, mapul᷊o sapi ko ese, duampul᷊o keledai kowawine, dang mapul᷊o keledai ko ese. 16Nipupapahiae manga binatang e'e nakoa pirang komol᷊i bou e'e nisarakange taha pusingkomol᷊i su singkatau l᷊ange. Angkunge si sire, “L᷊al᷊engte puhoro bou ia, dang diagate tadeau pia wulae su tal᷊oara u komol᷊ang simbau dingang komol᷊ang tuhue.” 17I Yakub nuparenta su l᷊ang ko kahimotongange, “Boko tuhangku i Esau musugha i kau, dang makina, ‘I sai tuangu? Sarang apa? I sai pia koae manga binatang ko kahiahau e'e?’ 18Kuteu simbahi, ‘Koa u l᷊ang u i Yakub. I sie nundoho i'i kere sasumba si Esau tuange. L᷊angu i Yakub sisane simai makatuhu si kami.’ ” 19-20Su l᷊ange ko karuange, katilunge dang kaul᷊i u taumata ko seng niparentang pangurusi manga ghapang u binatang e'e, nionggol᷊ang parenta ko musul᷊ung. Watu'u i Yakub nusipiri i sie botonge mul᷊ana si Esau dingang u sasumba e'e, hakiu boko musugha, i Esau mo munggile ampunge si sie. 21Inau i sie nundoho horo sasumba e'e, arawe i sie sisane natiki su kema.

I Yakub nul᷊al᷊inga su Pniel

22Su huwi e'e l᷊ai i Yakub nuwangung bou e'e numbawa si sire rua kawinge, si sire rua dokae l᷊au i sire mapul᷊onsau anae, nul᷊umiu sal᷊uhi Yabok. 23Suapang mbuae nupakal᷊iu ngi sire, i sie nusul᷊e dang nirohoe patiku koae sarang simbuka. 24#Hos. 12:3-4Arawe i sie natana sisanenge.

Kuteu nusumongote singkatau ko ese nul᷊al᷊inga dingang i Yakub sarang kalonge. 25Su tempo ngu taumata e'e nakapundang himoneu i sie seng ta makauntung, nipukul᷊i Yakub su punarie, sarang l᷊al᷊ensorang u punarie naenso. 26Bou e'e angkung u taumata e'e, “Piloe ia; singkodo l᷊ai matangutiti seng musumuwang.”

I Yakub nusumimbahi, “Ia ta sarung mamilo si Tuang, su l᷊ikuru boko i Tuang mangal᷊amati si sia.”

27I sai arengu? kakina u taumata e'e.

“I Yakub.”

28 # Kar. 35:10 Tau e'e nangul᷊i, “Arengu seng wal᷊inge i Yakub. I kau seng nul᷊al᷊inga dingang u Mawu Ruata dang dingang u taumata, dang i kau nakauntung; ual᷊ingu e'e arengu seng nakoa i Israel.”#32:28: Israel: Areng i'i raringihang kere su wahasa ngu Ibrani mangal᷊enge “i sie nul᷊al᷊inga dingang u Mawu Ruata”, arako “Mawu Ruata nul᷊al᷊inga”.

29 # Mam. 13:17-18 I Yakub nangul᷊i, “habariko areng i Tuang.” Kateho tau e'e nusumimbahi, “Tahawal᷊uasi i kau makina i sai arengku!” Bou e'e nial᷊amatenge i Yakub.

30Bou e'e i Yakub nangul᷊i, “Ia seng nusugha u pahesi dingang u Mawu Ruata, dang ia mborong wiahi.” Ual᷊ingu e'e nisighonge tampa e'e Pniel.#32:30: Pniel: Areng i'i raringihang kere su wahasa ngu Ibrani mangal᷊enge “pahesi u Mawu Ruata”. 31Su tempo ngu matangutiti nusumuwang, i Yakub nanintang u Pniel, dang i sie nakento ual᷊ingu l᷊ensorang u punari naenso. 32Sarang orasi i'i hintou ngu tau Israel ta kukang ghisi ko nanaka l᷊al᷊ensorang u punari u binatang, ual᷊ing i Yakub seng nikahinomang u papukul᷊i su punarie.

Currently Selected:

KARARIADI 32: PLT

Highlight

Copy