KARARIADI 33
33
I Yakub nusombang i Esau
1I Yakub nakawua si Esau kasongonge dingang u pauhasu taumatange. Ual᷊ingu e'e nipahiae manga anae si Lea, si Rahel l᷊au si sire rua ngu dokae. 2I sie namilo dokae darua e'e singkahindo dingang u manga ana i sire rua kahorokange, bou i Lea singkahindo dingang u manga anae, bou e'e i Rahel dingang i Yusuf su kasamuriange. 3I Yakub nul᷊umal᷊eng kahorokange bo i sire kaul᷊ie, dang apiru kapanandighi su tuhange, i sie nusuba sarang pakapitu. 4Kateho i Esau nutumal᷊ang nusombang i Yakub, bou e'e nil᷊ahukutange l᷊au niimbue. Dang i sire rua kapuhunsangie. 5Su tempo ngi Esau nakawua kaul᷊i u kowawine l᷊au manga ana e'e, i sie nakina, “I sai i sire ko singkahindo dingang u i'i?”
“I sire manga anaku,” i Yakub nusumimbahi, “Mawu Ruata seng nangonggo manga ana e'e si sia.” 6Bou e'e manga dokae dingang u manga ana i sire nusumandighi si Esau bou e'e nusuba. 7Bou e'e nusumandighi i Lea dingang u manga anae, dang kasamuriange i Yusuf sire rua ngi Rahel nusumandighi bou e'e i sire kaul᷊ie nusuba.
8I Esau nakina, “Apa pandung u dingang u manga komol᷊ang ko daku nipusombang kanini?”
I Yakub nusumimbahi, “Tadeau mupakasanang naung i kau tuhang.”
9Kateho i Esau nangul᷊i, “Seng botonge rarotongku, tahawal᷊uasi i kau mangonggo u paraseng si sia.”
10Angkung i Yakub, “Kumbahang! Boko ia seng nakal᷊uasi naung i kau Tuhang, tarimae parasengku i'i. Si sia, mutuhung ghahi i kau Tuhang kere mutuhung ghahi u Mawu Ruata, ual᷊ing i kau tuhang kere'e kahimumunge si sia. 11Ia mukahioro, tarimae paraseng ko seng daku niwawa i'i. Mawu Ruata seng nutingkapia ngu naung-E si sia dang seng nangonggo kaul᷊i u patiku ko daku ipuparlu.” I Yakub turusi nanihasa sarang samuringe i Esau nanarima paraseng e'e.
12Bou e'e i Esau nangul᷊i, “Maite i kite musasadia l᷊umal᷊eng, ia l᷊umal᷊eng mangihoro bo i kumu.”
13I Yakub nusumimbahi, “I kau Tuhang matitong manga ana i'i ko l᷊ome, dang ia mambeng pakatiti dingang u kaul᷊i u binatang ko mborong kasusunge. Boko iaha pakaehong, maneng kitang silou, kuteu kaul᷊i u ghapang u binatang e'e sarung mate. 14L᷊al᷊engte horo, ia hindo tumuhu mal᷊ongge. Ia sarung l᷊umal᷊eng kahingang dingang u manga binatang l᷊au dingang u manga anaku i'i sarang botonge makatuhu si kau Tuhang su Edom.”
15I Esau nangul᷊i, “Boko kere'e, ia manintang si kau pirangkatau taumataku.”
Kateho i Yakub nusumimbahi, “Tahawal᷊uasi mutingkasusa, ia kitang mo mupakal᷊uasi naung i kau Tuhang,”#33:15: ia kitang mo mupakal᷊uasi naung i kau tuhang arako i kau tuhang mupakawala. 16Inau kere'e su silou e'e i Esau nuwua nusul᷊e sarang Edom. 17Arawe i Yakub nakoa sarang Sukot, bou e'e nupararisi u wal᷊e guna ngu watangenge dang tampa pusirungang u manga binatang. E'e sabapie tampa e'e nisigho Sukot. #33:17: Sukot: Areng i'i raringihang kere su wahasa ngu Ibrani mangal᷊enge “tampa pusasirungang”.
18Su l᷊al᷊ung l᷊al᷊al᷊engang bou Mesopotamia, i Yakub nurating dingang u sal᷊amati su soa ngu Sikhem su wanua ngu Kanaan, bou e'e nupararisi u kemae su ngudae simbau masandighi u soa. 19#Yos. 24:32; Yoh. 4:5Ngudae tampa u kemae e'e nil᷊uangenge bou singkatau hintou ngi Hemor, papa ngi Sikhem, dingang hariga mahasu doi sal᷊aka. 20Bou e'e i sie nupararisi u mesba su se'e dang nisighonge “El, Mawu Ruata ngi Israel”.
Currently Selected:
KARARIADI 33: PLT
Highlight
Share
Copy
Want to have your highlights saved across all your devices? Sign up or sign in
