KARARIADI 34
34
I Dina nil᷊amuhukang
1Pia su silou, i Dina ana kowawine ngi Yakub l᷊au i Lea, nutiwo pirangkatau kowawine ngu Kanaan. 2Su tempo ngi Sikhem, ana i Hemor tau Hewi ko nakoa ratu su tampa e'e nakawua si Dina, nitandange ana ko mahua e'e, bou e'e nikabasarange. 3Kateho i sie nanano kahingang si Dina, hakiu nanawo naunge mo i sie dang mutawakal᷊i tadeau ana mahua e'e mo si sie l᷊ai.#34:3: mutawakal᷊i tadeau ana mahua e'e mo si sie l᷊ai arako muhibori. 4Angkung i Sikhem si papange, “Ia mukahioro i papa putawakal᷊i pundea ana mahua e'e guna ngu ia. Ia mo mukawing dingange.”
5I Yakub nakaringihi himoneu anae seng nil᷊amuhukang watangenge, kateho ual᷊ingu manga anae natarang kapundiagae manga binatang su ngudae i sie ta nakakoa manga apa su horo u i sire mapul᷊e.
6I Hemor, i papa ngi Sikhem, nusumongo sarang koa i Yakub mo mul᷊al᷊ahintau dingange. 7Nusuma su tempo e'e manga ana i Yakub napul᷊e bou ngudae. Nakaringihi hal᷊i e'e, i sire nahuwi dang nuwawal᷊uang kahingang. Watu'u dingang nul᷊amuhu ana i Yakub e'e, i Sikhem seng nuhinakang kaul᷊i u tau Israel. 8Angkung i Hemor si Yakub, “Anaku i Sikhem mo kahingang su anau kowawine; ia mukahioro tadeau pakawalako anaku mukawing dingange. 9Maite i kite mul᷊al᷊ahintau himoneu bangsa ngu l᷊au bangsa ngi kami botonge mukawing mul᷊al᷊au. 10Kuteu manga ana u simbau botonge matana singkahindo dingang i kami su tampa i'i, su apa kao i kumu. Manga ana u simbau botonge bala kao mudagang dang mangomol᷊i rarotong.”
11Bou e'e i Sikhem nangul᷊i si papa ngi Dina l᷊au su manga mahuanenge, “Tarimae ndoku i'i, kuteu ia sarung mangonggo kaul᷊i u patiku ko ikao i kumu. 12Habariete paraseng apa ko ikao i kumu, dang tantue wul᷊aeng paiki u kawinge. Ia sarung mangonggo apang ko ipundokang i kumu, asal᷊i i kumu mupakawala ngu ia mukawing dingang ana mahua e'e.”
13Ual᷊ing i Sikhem seng nul᷊amuhu watangeng u wawine ngi sire i Dina, manga ana i Yakub nul᷊eo si Sikhem l᷊au si Hemor i papange. 14Angkung i sire si sire rua e'e, “I kami mamea mupakawala ngu wawine ngi kami mukawing dingang u taumata ko ta nisunati. 15I kami kitang botonge mul᷊al᷊ahintau ndo u e'e dingang simbau tundunge, e'e ko i kumu mambeng pakakoa kere i kami, mangal᷊enge kaul᷊i u ko ese su tal᷊oara i kumu mambeng pakisunati. 16Bou e'e i kami mbuhue tumuhu ndo i kumu hal᷊i u mukawing mul᷊al᷊au e'e. I kami sarung matana turusi su tal᷊oara i kumu dang makoa bangsa simbau dingang i kumu. 17Arawe boko i kumu mandi manarima manga tundu ngi kami, dang mandi i sunati, i kami sarung mangal᷊a ana mahua e'e dang wawaneng tamai.”
18I Hemor l᷊au i Sikhem mupundang tundu e'e seng nuhino, 19dang i Sikhem seng sadia mungganapi surati e'e ual᷊ing i sie mo kahingang si Dina. Su tal᷊oara u kaul᷊i u manga ana u singkataunge, seng i Sikhem kal᷊abokange iraringihang.
20Bou e'e i Hemor sire rua ngi Sikhem natamai sarang tampa pukakomol᷊ang su tukari u sasukang u soa, dang nudidato su manga tataho u soa ngi sire, kiri'i, 21“Manga tau Israel e'e ko ghawe ngi kite. Inau walate i sire patana dingang i kite su wanua i'i dang walate i sire mukoa apa tuhu kao i sire. Wanua i'i mborong mal᷊oahi guna ngi sire l᷊ai. I kite botonge mukawing dingang u manga mahua ngi sire, dang i sire l᷊ai botonge mukawing dingang u manga mahua ngi kite. 22Kateho manga taumata e'e kitang mo matana dingang i kite dang makoa bangsa simbau dingang i kite dingang simbau tundu, e'e ko kaul᷊i u apang ko ese su tal᷊oara i kite mambeng isunati kere i sire. 23Hindo kaul᷊i u ghapang u binatang i sire dang apang rarotong i sire mariadi koa i kite. Inau maite i kite manarima ndo i sire tadeau i sire matana dingang i kite.” 24Kaul᷊i u tataho u soa ko nakomol᷊i e'e nutumuhu ndo i Hemor l᷊au i Sikhem e'e, bou e'e kaul᷊i u kol᷊aese ko seng matilang su soa e'e nisunati.
25Tilu l᷊ou bou e'e, su tempo ngu manga kol᷊aese e'e mborong kaputatahang u turu ual᷊ingu bou nisunati, ana i Yakub darua, mahuane ngi Dina arenge i Simeon l᷊au i Lewi, nangal᷊a pera ngi sire, bou e'e maruma-rumasi nusumu sarang l᷊al᷊ung u soa. Bou e'e i sire namate kaul᷊i u kol᷊aese su se'e, 26nasu su l᷊al᷊unge i Hemor sire rua ngi Sikhem. Mbuhue i sire nangal᷊a si Dina bou wal᷊e ngi Sikhem bou e'e nul᷊umal᷊eng. 27Nasue pamamate e'e, manga ana i Yakub ko wal᷊inge nuhampasi soa e'e kere wawal᷊isi saki u naung i sire ual᷊ingu wawine ngi sire seng nil᷊amuhukang watangenge. 28I sire nangal᷊a ghapang u kambing, domba, sapi, keledai, dang patiku ko ene su l᷊al᷊ung u soa dang su ngudae. 29I sire nangal᷊a kaul᷊i u rarotong ko mal᷊al᷊ighari, nanaweng kaul᷊i u kowawine l᷊au manga rario, dang nuhampasi apang tataho u manga wal᷊e su soa e'e.
30I Yakub nangul᷊i si Simeon l᷊au si Lewi, “I kumu nupakasusa si sia. Orasi i'i tau Kanaan l᷊au tau Feris dang kaul᷊i u kawanua ngu soa i'i sarung mubinsi u ia. Manga taumata ngi kite mahal᷊i; boko kawanua e'e kaul᷊ie masimbau mundoka dang mangalo si sia, kaul᷊i u walagheng i kite sarung ipakawinasa.”
31Kateho i sire nusumimbahi, “I kami ta makawala ngu wawine ngi kami nikoa kere kowawine ko dal᷊ai.”
Currently Selected:
KARARIADI 34: PLT
Highlight
Share
Copy
Want to have your highlights saved across all your devices? Sign up or sign in
