KARARIADI 35

I Yakub dingang u tumatakinge nakoa sarang Betel

1 # Kar. 28:11-17 Pia su silou Mawu Ruata nuhengetang si Yakub, “Seng Ia Mawu Ruata ko nutingkaandaghi watangeng si kau su tempo ngu i kau nutumal᷊ang bou tuhang u i Esau. Tamaite pakaehong sarang Betel. Katanae pai se'e dang pararisiko mesba simbau guna ngu Ia.”

2-3Bou e'e i Yakub nangul᷊i su manga walaghenge dang su kaul᷊i u taumata ko ene singkahindo dingange, “I kite sarung l᷊umal᷊eng bou i'i dang matamai sarang Betel. Pai se'e ia sarung mupararisi mesba guna ngu Mawu Ruata ko seng nutul᷊ung si sia su tempo ngu kasasusaku dang seng nanirung si sia sarang manga apa ia l᷊umal᷊eng. Inau rumete manga patong dewa ngu tau raghi ko ene si kumu, koako tundu ngu adati pamamursi ngu watangeng dang pul᷊ohoko pakeang ko bursi.” 4Bou e'e i sire nanarakang si Yakub kaul᷊i u patong dewa ngu tau raghi ko ene si sire dang l᷊ai anting-anting i sire. Kaul᷊i u rarotong e'e nil᷊uwing i Yakub su wal᷊ang u kau ko l᷊abo masandighi soa ngu Sikhem.

5Su tempo ngi Yakub l᷊au tumataking u walaghengnge nuwua, Mawu Ruata nupasongo ngu katataku su kawanua ngu apang soa ko su sindihange, hakiu i sire ta numbawatu si Yakub l᷊au tumatakinge. 6Bou e'e i sire nurating u tana Kanaan su soa ngu Betel ko horo arenge Lus. 7Su se'e i Yakub nupararisi u mesba dang nusigho tampa e'e “El-Betel,” Watu'u Mawu Ruata seng nutingkaandaghi watangeng si sie su se'e su tempo ngu i sie nutumal᷊ang bou tuhange. 8Pai se'e l᷊ai i Debora, mundadiaga si Ribka nate bou e'e nil᷊uwing su wal᷊ang u kau ko l᷊abo su simbuka ngu timuhi soa e'e. E'e sabapie kau e'e nisigho “Kau sasangitang.”

Mawu Ruata nangal᷊amati si Yakub su Betel

9Suapang i Yakub nusul᷊e bou Mesopotamia, Mawu Ruata sau nutingkaandaghi watangeng si sie dang nangal᷊amati si sie. 10#Kar. 32:28Mawu Ruata nangul᷊i si sie, “I kau seng ta sarung isigho l᷊ai i Yakub, kateho i Israel.” Kere'e Mawu Ruata nusigho si sie i Israel. 11#Kar. 17:4-8Bou e'e sau angkung u Mawu Ruata, “Seng Ia Mawu Ruata ko Tumaniu Makawasa. Puhana pupungte i kau pakaul᷊i! I kau sarung muhintou ngu manga bangsa dang makoa i upung u mararatu. 12Wanua ko seng Daku nionggo si Abraham l᷊au i Ishak, sarung Daku ionggo si kau l᷊au su hintou ngu.” 13Bou e'e Mawu Ruata nanintang i Yakub. 14#Kar. 28:18-19 Su tampa Mawu Ruata nuhengetang si Yakub, i sie nupararisi simbau watu putatinaungang. Bou e'e watu e'e nisumbange su Mawu Ruata dingang nanuang anggori l᷊au l᷊ana zaitung su wawoe. 15Tampa e'e nisighonge “Betel”.

I Rahel napul᷊e asal᷊ie

16Nasue bou e'e i Yakub l᷊au tumatakinge nanintang u Betel. Su tempo ngi sire mborong dio marau bou Efrata, nuratingte temponge i Rahel mahinding. Kateho anae nawantahi. 17Su tempo ngu kal᷊ikinge maturu kahingang, i biang nangul᷊i si sie, “Pakatoghasi naung u, Rahel, ana u sau ko ese.” 18Kateho i Rahel seng masandighi temponge mapul᷊e asal᷊ie, dang su tempo ngu i sie seng mamal᷊usi sinangonge, nisighonge anae i Ben-Oni#35:18: Ben-Oni: Areng i'i su wahasa ngu Ibrani mangal᷊enge “ana singsaraku”. arawe i papange nusigho ana e'e i Benyamin.#35:18: Benyamin: Areng i'i su wahasa ngu Ibrani mangal᷊enge ana ko sarung makauntu.

19Suapang i Rahel napul᷊e asal᷊ie, i sie nil᷊uwing su sindihang u l᷊al᷊eng ko Sarang Efrata, ko orasi i'i arenge Betlehem. 20I Yakub nupararisi simbau watu putatinaungang su se'e, dang sarang l᷊ou i'i kubul᷊i Rahel e'e mang mborong nitiang u watu e'e. 21Bou e'e i Yakub nanurusi l᷊al᷊al᷊engange, mbuhue namasi kemae su tampa simbau l᷊umiu manara ngu Eder. 22#Kar. 49:4Tintal᷊a i sire ene su tampa e'e i Ruben natiki dingang i Bilha, doka i papange. Hal᷊i e'e nikaringihi Yakub, dang i sie nuwawal᷊uang kahingang.#35:22: simbau salenang ko tuwei wawal᷊uang kahingang. Su wahasa ngu Ibrani takoae manga didato e'e.

Manga ana i Yakub

(1Taw. 2:1-2)

I Yakub pia anae kol᷊aese i sire mapul᷊odua. 23Manga ana i Lea ko i Ruben (ana i Yakub ko iyakang), i Simeon, i Lewi, i Yehuda, i Isakhar l᷊au i Zebulon. 24Manga ana i Rahel ko i Yusuf l᷊au i Benyamin. 25Manga ana i Bilha l᷊ang i Rahel ko i Dan l᷊au i Naftali. 26Manga ana i Zilpa, l᷊ang i Lea, ko i Gad l᷊au i Asyer. Manga ana e'e nipahinding su Mesopotamia.

I Ishak napul᷊e asal᷊ie

27 # Kar. 13:18 Bou e'e nuratingte i Yakub su koa i Ishak i papange, su tampa katanakenge su Mamre masandighi u Hebron. (Ndahuwite i Abraham i tete'e, l᷊ai natana su se'e). 28-29Su umurie ko seng maghurang kahingang, seng mahasuwal᷊umpul᷊o su taunge, i Ishak napul᷊e asal᷊ie bou e'e nil᷊uwing u manga anae i Esau l᷊au i Yakub.

Currently Selected:

KARARIADI 35: PLT

Highlight

Copy