LUKAS 4
4
I Yesus nisal᷊ukateng u setang
(Mat. 4:1-11; Mrk. 1:12-13)
1I Yesus nikawasa ngu Roh u Mawu Ruata su tempo ngi Sie nanintang u sal᷊uhi Yordan. Roh u Mawu Ruata nangaha si Sie sarang tana l᷊inggi. 2Su se'e, I Sie nisal᷊ukateng u setang paupul᷊o su l᷊ounge l᷊iwuenge. Su kanandu tempo e'e, i Sie ta nukumang apa-apa. Panginsuenge i Sie nakapundang nahutung.
3Setang nangul᷊i si Sie, “I Kau ko Ahusi Mawu Ruata, aru? Inau, parentaiko watu i'i pakakoa boroti.”
4 #
Sau. 8:3
I Yesus nusumimbahi, “Su l᷊al᷊ung u Buki Susi mawawohe, ‘Taumata ta makapuwiahi kitang bou boroti.’ ”
5Bou e'e setang numbawa si Yesus sarang tampa ko marange, dang singkakonda setang nanibo si Sie kaul᷊i u kararatuang u dunia. 6“Kaul᷊i u kawasa dang kakakala i'i sarung daku isarakang si Kau,” angkung u setang si Yesus, “Watu'u kaul᷊ie seng nionggo si sia dang ia makapangonggo u e'e si sai-sai ko ia mo mangonggo. 7Kaul᷊ie sarung makoa koa-U, boko i Kau musuba manumba si sia.”
8 #
Sau. 6:13
I Yesus nusumimbahi, “Su l᷊al᷊ung u Buki Susi mawawohe, ‘Panumbate Mawu Ruatangu dingang putahamawu si Sie sisane.’ ”
9Bou e'e setang numbawa si Yesus sarang Yerusalem dang nundui si Sie su tahiwuwung u Wal᷊e ngu Mawu dang nangul᷊i si Sie, “I Kau Ahusi Mawu Ruata, aru? Inau, tumpate bou i'i. 10#Mzm. 91:11Watu'u su l᷊al᷊ung u Buki Susi mawawohe, ‘Mawu Ruata sarung mundoi manga malaikati-E pundiaga si Kau pakapia-pia.’
11 #
Mzm. 91:12
Dang l᷊ai, ‘Manga malaikati e'e sarung manomahi si Kau dingang u l᷊ima ngi sire, tadeau l᷊aeri-U ta masuhung su watu.’ ”
12 #
Sau. 6:16
I Yesus nusumimbahi, “Su l᷊al᷊ung u Buki Susi mawawohe, ‘Kumbahang manal᷊uka Mawu Ruatangu.’ ”
13Suapang setang nasue bou nanal᷊uka si Yesus dingang u haghi ngu akal᷊i, i sie nanintang I Yesus dang mangampal᷊i temponge ko mapia.
I Yesus nanita u hal᷊i-E su Galilea
(Mat. 4:12-17; Mrk. 1:14-15)
14Bou e'e I Yesus sau nusul᷊e sarang Galilea; dang i Sie nikawasa ngu Roh u Mawu Ruata. Habari u hal᷊i u watangeng-E seng nakeke su kaul᷊i u tampa e'e. 15I Sie nanintiro su apang wal᷊e pukakal᷊iomanengang, dang kaul᷊i u taumata nundalo si Sie.
I Yesus ta nitarima su Nazaret
(Mat. 13:53-58; Mrk. 6:1-6)
16I Yesus natamai l᷊ai sarang Nazaret, tampa I Sie nipakal᷊abo. Su l᷊ou ngu Sabati, tumuhu narang-E i Sie nakoa sarang wal᷊e pukakal᷊iomanengang. I Sie nurumarisi guna ngu mubasa Buki Susi 17dang nionggol᷊ang u Buki i nabi Yesaya. I Sie namuka buki susi e'e, bou e'e nikarea-E ayeti i'i.
18“Roh u Mawu ene si Sia,
watu'u i Sie seng nuhengke si Sia guna ngu muhabari
Habari Mapia su tau ko susa.
I Sie nundoi si Sia guna ngu pamohang
kal᷊al᷊iwiri su taumata ko katataweng
dang kal᷊aul᷊e su taumata ko wuta;
guna ngu mupakal᷊iwiri taumata ko masasira
19 #
Yes. 61:1-2
dang muhabari tempo ngu sasongo ngu Mawu
manal᷊amati umati-E.”
20I Yesus sau nanaka buki e'e, dang nanul᷊e ngu e'e su mul᷊al᷊ahal᷊i, bou e'e nukumangiang.#4:20: bou e'e nukumangiang: su tempo e'e tau Yahudi mukumangiang boko manintiro 21Dang I Yesus nanita nudidato si sire, kiri'i, “Manga ayeti su Buki Susi i'i su l᷊ou i'i naganapi su tempo i kumu nakaringihi e'e.”
22Apang didato ko nipudidato-E masidada kahingang, hakiu i sire naherang dang nusumbala si Sie. I sire nangul᷊i, “I Sie wal᷊ingewe ana i Yusuf?”
23Kuteu I Yesus nangul᷊i si sire, “Nal᷊ahe i kumu sarung mupake u papinintu i'i si Sia, ‘Dokter, pakaul᷊e ko watangeng-U sisane. Ko makal᷊aherang nikaringihi kami nikoa-U su Kapernaum, koako l᷊ai su kampong-U sisane.’ ” 24#Yoh. 4:44I Yesus nanamba l᷊ai, “Tinaunge, takoae nabi adateng su kamponge sisane. 25#1Mar. 17:1Kateho raringihi: su tempo i Elia, pia tempo ko ta nurumasehi su l᷊al᷊ung u tilu taung stenga l᷊iwuenge, nariadi kal᷊ahutung ko l᷊abo suapang tampa. Su tempo e'e napene ko wal᷊u su Israel. 26#1Mar. 17:8-16Maneng kere'e, Mawu Ruata ta nundoi si Elia pakakoa sarang singkatau bo i sire ko wawal᷊u e'e kateho kitang sarang singkatau ko wal᷊u su Safrat su wanua ngu Sidon. 27#2Mar. 5:1-14Kere'e l᷊ai su tempo ngi Nabi Elisa, su Israel napene taumata ko pia sakie pisi ko makatataku, kateho takoae manga singkatau bo i sire ko nipakaul᷊e, su l᷊ikuri Naaman tau Siria e'e.”
28Kaul᷊i u taumata su wal᷊e pukakal᷊iomanengang e'e nuwawal᷊uang kahingang nakaringihi hal᷊i e'e. 29I sire nurumarisi, bou e'e nanokol᷊i si Yesus sarang l᷊ikuru soa, dang numbawa si Sie sarang l᷊engehi u wul᷊uri, pia soa ngi sire niwangung. I sire pia pandung manuhuri si Sie sarang l᷊al᷊ung u towae. 30Kateho I Yesus nul᷊umal᷊eng bou tal᷊oara u taumata maul᷊i e'e, apiru natamai.
Taumata ko nikasukang u roh ko dal᷊ai
(Mrk. 1:21-28)
31Bou e'e I Yesus nakoa sarang soa Kapernaum su Galilea. Pai se'e I Sie nanintiro apang taumata su l᷊ou ngu Sabati. 32#Mat. 7:28-29I sire naherang nakawua kakanoa-E nanintiro, watu'u I Sie nudidato dingang mahuntimari. 33Su se'e su wal᷊e pukakal᷊iomanengang pia singkatau ko nikawasa ngu roh ko dal᷊ai. Tau e'e mangkatewe nusumiki, 34“Ei Yesus, tau Nazaret, pakuraneng-U i kami? I Kau nusumongo tadeau mupakasilaka si kami? Ia matitong i sai i Kau: i Kau raroi ko susi bou Mawu Ruata!”
35“Karumasi!” I Yesus nuheang su roh ko dal᷊ai e'e. “Suwangte bou tau i'i!” Bou e'e roh ko dal᷊ai e'e namanting tau e'e su tingo ngi sire kaul᷊ie e'e, mbuhue nusumuwang bou tau e'e ta nupakaturu si sie.
36Kaul᷊i u taumata naherang, dang nangul᷊i simbau dingang ko wal᷊inge, “Wal᷊inge gampang apang didato-E. Dingang u huntimari dang kawasa, I Sie nuparenta manga roh ko dal᷊ai e'e pasuwang, dang i sire mang nusumuwang!” 37Kuteu habari hal᷊i I Yesus e'e nakeke su kaul᷊i u tampa e'e.
I Yesus nupakaul᷊e taumata maul᷊i
(Mat. 8:14-17; Mrk. 1:29-34)
38I Yesus nanintang u wal᷊e pukakal᷊iomanengang e'e, bou e'e nakoa sarang wal᷊e ngi Simon. I empo ngi Simon kowawine ko kal᷊ahange, dang apang taumata nangul᷊i hal᷊i e'e si Yesus. 39I Yesus natamai sarang l᷊al᷊okang u tau kowawine e'e, bou e'e nanguseri l᷊ahange e'e. L᷊ahange e'e dingang nail᷊ang, dang i empo ngi Simon kowawine e'e dingang nuwangung dang nutangkiang si sire.
40Su tempo matangutiti kasirae, kaul᷊i u taumata numbawa si Yesus manga ana u simbau i sire ko kaputatahang haghi ngu sahinda. I Yesus namilo u l᷊ima-Nge si sire simbau-simbau dang nupakaul᷊e ngi sire. 41Apang roh ko dal᷊ai nusumuwang bou taumata maul᷊i, apiru kakihae, “I Kau Ahusi Mawu Ruata!” Kateho I Yesus nuheang si sire dang ta nupakawala ngi sire mudidato, watu'u i sire matitong I Sie ko Ratu Mananal᷊amati.
I Yesus nunasi su l᷊al᷊ung u apang wal᷊e pukakal᷊iomanengang
(Mrk. 1:35-39)
42Su tempo ngu matangutiti manita sumuwang, I Yesus nanintang u soa e'e, bou e'e nakoa sarang tampa ko dio marumasi. Apang taumata nanita nundea si Sie, dang su tempo ngi sire nakarea si Sie, i sire nutatitehi tadeau I Sie kumbahang manintang i sire. 43Kateho I Yesus nangul᷊i, “Habari Mapia hal᷊i u kirapa Mawu Ruata mamarenta mambeng Daku ihabari l᷊ai suapang soa ko wal᷊inge, watu'u e'e Mawu Ruata nundoi u Ia sarang dunia.”
44Ual᷊ingu e'e I Yesus nunasi su l᷊al᷊ung u apang wal᷊e pukakal᷊iomanengang su kaul᷊i u soa ngu Yudea.
Currently Selected:
LUKAS 4: PLT
Highlight
Share
Copy
Want to have your highlights saved across all your devices? Sign up or sign in
