RASUL-RASUL EKUGWA WENE 3
3
Ap iniyok mbanggo kunik mende pano erkige wene
1Ir Petrus o nen Yohanes o, ir imbirak o keyanggwi jam tiga paga, Ar Tuhan Ai Palekma tamban erurak panggo yirigemo arar lagugwa. 2Mende etoma ar ap ambi agwiya akla nen, iyok ago ndalek endago mende, o endaga “Tukande Panoma” eragalu eta welagage. Ar ap eti Tuhan Ai Palekma akuni wulkik unggigik ekunem, ande nggino yoraga dogowak nen yiluk, o kup keyam eta kambogogo bi wagu lagugwa. 3Nen o eti paga, ar Petrus Yohanes imbirak, Allah Ai Palekma unggugwi il lakdaga lagagerek, ar nen inamendek ambi wogoruwak nen yiluk, ande nggino yoragage. 4Nggino yorarigemo, ir imbirak inil bikugu lagugwarik, ar Petrus nen yoga dogolir, “Nir kil birninan o,” yiluk yorige. 5Yorigemo, ar ap eti akla nen, ir nen nena kwak ambi woknirugun yiluk il inoba birlagage. 6Ogwe ar Petrus nen yoga dogolir, “An nauang mondok dek arar o. Ogwe an namende noba werek mende eti, kar wokirigin o: Ar Yesus Kristus ai Nazaret mende eti obatne paga, kar yi menatuk tuwan lan o!” yiluk yorige. 7Yotuk ar Petrus nen ap enogo inggi ebema nggwe pagago mendirige. Menogo bega kigik, ap enogo iyok inom nen iyok iluwak inom obogar obarne agage o. 8Obatne agagerek, mendok togon menatuk, nen ar ebe tuan arar lagage. Enogo arar pano atuk, ir Petrus o nen Yohanes o, enogo inom arar Allah Ai Palekma unggirugwa o. Unggugu dogolir, ap enogo nen Allah pogoraka dogolir, ya mbok dagagik, nda mbok dagagik, erir unggirige. 9Nen ir akuni inil ar enogo tuwan laga karugwa mende nen, Allah endaga wogok dirugwa. 10Tuguluk, ar ap ande nggino yogwa, Ar Tuhan Ai Palekma “Tukande Panoma” ande mbalek eragalu dogirtaga enogo o, yiluk inilu agage.
11Ap enogo Petrus Yohanes imbirak mugurek mban ekige. Nen Allah Ai Palekma nen lambimo endaga “Serambi Salomo” etoma wundi wagugwama, ir akuni obogar wonggali wagugwarik, nen bi wakugwa. 12Kuak ekwi ar Petrus il dalok yoraga dogolir, “Kir akuni Israel mende yirani! Kir nenaluk wene wi au yiluk yirtagwi? Kir nenaluk kinil nir ninoba mban agotik? Kir kinakla nen ar ap yi oba pano aga eti, nir ninobatne paga a, nir Ar Allah ane yugu ndak-ndak eko paga kwak a? 13#Kel. 3:15Nir ninumbu ninomba Abraham inom, nen Isak inom, nen Yakub inom, wogok bugu lagugwa eti nen, Ar Ayedoman Yesus eti obogar ar wogok begemo o. Ar Yesus ebe eti, Ar kir nen ap maduk mende ininggimo bogop o, nen kir Pilatus ilka paga aredo waku dogolir, ar Pilatus nen kede pigalogo wuldiknen yiluk yirige mende, kir nen tebelkwi ekugup o. 14#Mat. 27:15-23; Mrk. 15:6-14; Luk. 23:13-23; Yoh. 19:12-15Ar ebe ap pano, Ar maduk unggukdek mende ar ogwe, kir nen Ar puduk padak yogwi, nen ar Pilatus nen ap akuni inakwa maduk mende eti kir kinake kede pigalogo wulnera eme yiluk kinane obatne paga yogwi ekop o. 15Nen Newe nawor kir nen ar, Ar ebe wakop o. Nen ebebar mende eti, ye ap nde ap yoma iniluk dogu mende edo, Ar eti ar kigik wakopma o. Nen Ar ebe arar kanggigerek ogwe, Ar Allah nen muk iluk erogo begemo o. Nen eta mende nir obok ninil ebe nen kogoma o.
16Newe nawor o, ap agondalek welaga mende yi, ebe kinilu, nen ar eka laga mende kugu lagop o. Ar iliti Yesus ebe inom, nen obatne inom ebebar andage paga, ap yi iyok obatne aga, nen ebe pano aga eke o. Nen ar iliti ebebar andage eti paga, ar yi kir kinilka paga, oba pano aga kinil kogop yi arar o.
17Newe nawor o! Kir inom nen ir ap nggok ndak obogar inom, Ar Yesus oba eku lagop ernogo, kir nen ekwi agotik mende eti, kir kinunggukdek dogolir eku lagopma kigi yiluk, an yogondak nilu aga o. 18Nenaluk wene yogondak ya etarir waritaga mende eti, o pagane Ar Allah nen Ar Raja Ndilinakwa mende eti, oba mep dagik dagok erugun o yiluk, ir nabi-nabi inobaru yirige mende ndak-ndak arar etari taga o. 19Eti paga ma, kir maduk eku lagop mende eti dambe kalok, kiniyok paga Ar Allah oba warni o. Nen Ar oba wagwi kinalok, ar nen kinomaduk kokinabigin o. 20Kir kinoba pano aruwak nen yiluk, Ar Tuhan kir kinoba warigin o. Nenaluk o pagane ar, Ar Allah nen Raja Ndilinakwa mende etaruak o yiluk pulogo birigerek ma, Ar Tuhan nen Ar Yesus inoba lan o, yiluk lakbi warigin o. 21Ar ebe o mbogor paga etoma mondok werek kigik, Ar Allah nen ir nabi-nabi inoba, o pagane etoma yoragage ndak-ndak, o yoma obogar ngger mende erogo bigin o. 22#Ul. 18:15, 18Ar Musa nen o paga etoma ambi men yirige, ‘Ar Tuhan Allah nen, ap nabi ambi ebe kir mende ar ogwe, an lakbani wagage ndak-ndak, kir kinoba lakbi warigin o. Ma ar nabi eti nen wene nena yigin eti kir kinaruk pik pak arar kolalino o. 23#Ul. 18:19Ar akuni ta nen ar ap nabi eti nen wene yigin mende pik pak dikbigin dek mende, ar akuni eti, ir akuni Ar Allah akburi inakla nen yamburogo wuldiluk, alep dek erogo bigin o.’ 24Ir ap nabi-nabi Ar Allah awene yugu, ir yugu lagugwa mende nabi Samuel kudi nen, ir nabi-nabi amberak yabongga kenam arir wagugwa mende etoma nen, o ya etaru mende ir obogar nen yirugwa o. 25#Kej. 22:18Ir nabi-nabi nen Allah ane amburu mende yugu lagugwa eti, kir kinake arar o. Ar Allah Nen kir kinumbui inoba ane amburu yirige mende akla, Ar Allah nen Abraham yegerogon yorige, ‘Kar kakburi wigalek paga, ir akuni o agar paga yoma obogar nadeknggen inoba bigin o.’ Ma wene ane amburu yirige eti, kir kinake inom ar yirige o. 26Wene eti kalok, Ar Allah nen Ar Ayedoman mende eti, Ar adeknggen ekbinagik nen yiluk, pulogo ibibir kir kinoba lakbi wagage o. Nen Ar adeknggen kir kinoba burak eti, kir kinomaduk mende obogar mbo bugwi kinalok perak, adeknggen eti kinoba binagurak o.”
Currently Selected:
RASUL-RASUL EKUGWA WENE 3: WLW
Highlight
Share
Copy
Want to have your highlights saved across all your devices? Sign up or sign in
