RASUL-RASUL EKUGWA WENE 2
2
Roh Allah Wura wagage wene
1 #
Im. 23:15-21; Ul. 16:9-11 Hari Pentakosta ake komarurak muk korok panggo yi wagagemo, ir akuni nen Ar Yesus oba iniliti ebebar andarugwa mende, ir inebe obogar omanggimo wonggalkugwa. 2Wonggalek werekma, o wiya pulka waga dogolir ane yitaga eti ndak-ndak, mbogor paga nen ane yirige. Nen o palek ir akuni wonggalek werekma yomanogo, wiya ane enogo arar nggedek agage. 3Inaruk kolalkugwarik, inil bikarugwa mendek, indu akdah negen inoba arar wurabi wagagemo, akuni inoba obogar kwi ndede yirige. 4Ma, Ar Roh Allah eti, ir inakla nggedek ari unggirigemo, ir nen wene ye akuni nde akuni inane paga wene yirugwa. Ir nen wene yugu dogolir, Ar Roh Allah nen wene tuguriraga kigik yugu lagugwa.
5Etinem, akuni Yahudi mendek Allah ane mbalek dikbiluk erir lagugwa mendek, o ye ai nde ai obogar, o Yerusalem unggirugwarik kuwak erek welagugwa. 6Werekma, ane nggok ar yirige enogo inaruk kolalku lagugwarik, akuni inebe dogalek ar kuwak eri wagugwa. Kuwak eri wagugwarik werekma, ir Yesus aworomi yomanogo nen, akuni ye ai nde ai nen wagugwa mendek yomanogo inane paga dombok yugu nanggugwa, ir inaruk kolalkugwarik, inagur lagage. 7Inagur lagugwarik wogokbagu dogolir, “Ir ap wene yoknira tagwi yi, inebe obogar ap Galilea mende dogu a? 8Wene nena etagama nen, ir nen wene nir ye ap nde ap, ninai dombok ninane paga wene yonera tagwi? 9Nir ninebe nina o Partia mende inom, Media mende inom, Elam mende inom, Mesopotamia mende inom, Yudea mende inom, Kapadokia mende inom, Pontus mende inom, Asia mende inom, 10Frigia mende inom, Pamfilia mende inom, Mesir mende inom, o Libia Kirene korok etoma mende inom, nen ir amberak Roma nggwe nen wagiya mende inoma o. 11Nir ninebe penak nggwe Yahudi mendek, nen ir penak nggwe wedek mendek, ir Yahudi mendek ninoba unggwi watuk Allah ane waganggugwarik, Yahudi mendek talek arar ninom werek o. Nen, akuni o Kereta mende inom, akuni Arab mende inom werekma, ir ap yi nen, Ar Allah obatne paga elalin ekige mende yoniragunem ninengga werek ninane paga dombok ninaruk kolalirtagwi yio.” 12Ir nen wi au yiluk bi warinaku dogolir, “Wene yi enggen nenggerogon kogop?” yiluk yirugwa.
13Ogwe ir amberak nen aikdagok mbaikdagok yoragu dogolir, “Ah! Ir akuni yi mabuk ekdegarik o.”
Ar Petrus Allah Wene wurakige wene
14Inane etegerogon yugwi dagik, ar Petrus enogo ogari sebelas rasul enogo inom menatuk, wene ane nggok paga ar yoraga dogolir, “Nogari o, kir akuni Yahudi mende inom, nen kir akuni o Yerusalem paga werek mende obogar inom, kinaruk dik togon kolini o. Nenaluk, an wene yi kir kinilu erogo yokeraurak o. 15Kir nen, Ir akuni yi mabuk ekdegarik yiluk andagop eti ndak-ndak dek o, nenaluk o yogondak ya jam sembilan o keyalek arar o. 16Ogwe, wene yi Ar Allah nen, Ar Nabi Yoel obaru wene alebar obok yirige o:
17 #
Yl. 2:28-32
Ar Allah nen yega dogolir, ‘O irep kudi paga,
An mende Roh eti, akuni obogar inoba wukbi warigin o.
Kir kinakburi wadigi inom nen komadigi inom, An nen wene yoraga neyalok, ir nen wene kir yokeragu dogogun o.
Ir elege lerago mende nen, yi wene ndik wene, An nen inil kowak nen yiluk erumo, ir nen inil kugun o.
Ir akuni inanggok mende inakbi paga, An wene yoragin mende inakbi kugun o.
18Etanen, an nayedoman mendek, ap inom kumi inom,
O eta paga, An Naguringge eti wogoragin o.
Ir nen An nen wene yoragin mende etiar ir nen yugun o.
19Mbogor paga etoma, An nen erukbuk mende eka,
nen erukbuk mende amberak agar paga kogona paga yoma eka;
nen mep inom, indu inom, tuguluk agagona inom tokde inom kenam arigin o.
20Mo il amum aga,
tur mep talek mep-mep aga,
eka kalok kir nen, yogo Ar Tuhan ao nggok mende inom, nen aitok mondok mende eti inom, arar ari waga, o yiluk andagup o.
21O eta paga, ir akuni nen Tuhan endaga mbalugun mende
ir inebe ndilinabigin o.’
22Kir akuni Israel mendek nagadagi nirui o! An nane yigi yi kolalini o: Ar Yesus ao Nazaret mende ernogo, Ar Allah nen kir kinake pulogo birige o. Wene eti mende, yi wene ndik wene elalin erukbuk mende Ar Allah nen, Ar Yesus obaru erir waga kigik, kir kinil obogar kogop o. Eti paga, Ar Yesus Ar Allah nen lakbi wagagemo, yiluk telekma etaga lagage mende eti, kir obogar kinilu o. 23#Mat. 27:35; Mrk. 15:24; Luk. 23:33; Yoh. 19:18Mende, Ar akla andarige ndak-ndak, Ar Allah nen Ar Yesus ebe kininggimo birige o. Nen kir kininggimo birigemo, kir nen Ar ebe ap maduk ekwa mende nen, o kari karo paga warogo buak nen yiluk, Ar ir ininggimo dambe karugup o. 24#Mat. 28:5-6; Mrk. 16:6; Luk. 24:5Ogwe Ar ebe akuni warek mende inakla nen, Ar Allah nen iluk erogo birige o. Ar ebe kambiluk lektagama arar lagagerek ogwe, Ar Allah nen pigalogo wulbi wagage o. Nenaluk kanggwi mende eti nen, Ar ebe tebelogo biluk dogorak ndak dek o. 25#Mzm. 16:8-11Ar Yesus ake ar Daud nen men yirige o,
‘Ar Tuhan eti An nilka paga mondogar nil larketaga o;
Ir tani nen kwak, nggar wurnabuwok nen yiluk ekwi kau, Ar ebe an nimbirak nega agarik o,
26Eti paga, nakla adeknggen dogolir,
nen nande paga nen ndai waka:
nen an nebe kuburan etoma
torek nabodok dek atuk dogogin o.
27Nenaluk, Kar nen an naguringge akuni kambiluk lektagama etoma dogowak nen yiluk, dambek banigikdek eti paga o.
Kar nen yedoman wene diktogo ekwa eti, pidi atuk nuk atawak nen yiluk, mbo banigin dek ar o.
28Kar nen niluk nabedal kabedal dogu mende tuwan yanggul negen o.
Kar Kebe nimbirak agorik eti paga, nakla adeknggen pakalok etarir taga o,’ yiluk yirige o.
29Mende nawor nakbur wa, wa, wa. Ar ninumbu Daud enogo abok ambi yokirak o. Ar ebe wartagagemo, nen kubur erogo birugwama, kuburan ebe yogondak kudi ker tagwi yi o. 30#Mzm. 132:11; 2Sam. 7:12-13Ar Allah nen Ar Daud oba ane amburu wene kumbuk mbalogo yoga dogolir, akuni kar paga wigalek mende ambi, Ar Allah nen ap raja ar, kar kakdikmo mendigin o, yiluk yorige o. Wene amburu yirige eti ar Daud ilu ar o nen ar ebe ap nabi ma, 31Ar Allah nen nena erigin eti ilu ar o. Etiar ma, ar nen Ar Raja Ndilinakwa eti wartatuk nen iluk arigin o, yiluk obogar elalogo yirigemo o. Tuguluk ar Daud nen yega dogolir,
‘Ar ebe akuni kambiluk lektagama etoma dogowak nen yiluk dambe kigin dek o;
Ar ebe pidi atuk bularuwak nen yiluk dambe kigin dek ar o,’yiluk yirige o.
32Etegerogon yirige ndak-ndak ar, Ar Yesus yi, Ar Allah nen iluk erogo bege o. Nir obogar ninuwagam nen eka ninil kogo o. 33Ar Allah nen Ar ebe yabu eka dogowam akdipmo lektek eti paga bi dagaga, nen obatne werek nggok mende ar erogo bega, nen Roh Allah Ar Allah nen ane amburu yirige enogo wagangga erigin o. Nen kir yogondak kinil nen kogop yoma inom, nen kinaruk kolkop yoma inom, eti Ar Roh ebe eti, ar nir ninoba wurabi wagama nen yoma erirtagwi o. 34#Mzm. 110:1Ar Daud ebe engga werek eti, mbogor paga dagalukdek o, ogwe ar nen yega dogolir,
‘Ar Tuhan nen an mende Tuhan eti yoga dogolir:
35Akuni kar kinom wim mende etoma kayelama tebelogo banok nen,
An ninggi ebema nggwe korektarin o,#2:35: Ninggi ebe ma nggwe: Ir akuni Yahudi mende nen, ininggi ebe ma nggwe korek bagwi kalok eti, akuni inalon palek inendaga nggok kalok mban eku lagugwa. yiluk yorige.
36Eti paga ma, kir akuni Israel mende yi, Ar Yesus ebe kir nen o paga menogo biluk wakotik ogwe, Ar Yesus ebe eti ar, Ar Allah nen Tuhan Raja Ndilinakwa mende arar erogo bege o!”
37Etegerogon yoragage inaruk kolalku lagugwarik inobade atuk, ar Petrus o, nen ir rasul-rasul amberak inom, ir inoba kinok wokdagu dogolir, “Ninogari o, yogo nir nenggerogon eruwok nda?” yiluk kinok wokdarugwa.
38Etegerogon kinok yirugwama ar Petrus nen, “Maduk ekulagop mende dambe kalok, kiniliti kwaktani o. Nen kir kinomaduk kokinabuak nen, kir kinadiktak dombok Ar Yesus Kristus endaga paga ima wukbinaguak o. Eti ekwi kinalok, Ar Allah nen Roh Allah eti wokeragin o. 39Nenaluk, Ar Allah nen Ane amburu yirige eti kir kinake inom, nen akuni kir paga wigalarugun mende inake inom, nen ir akuni o walegar ya nda agarik etoma inake obogar, Ar Tuhan Allah nen Oba waruwak nen yiluk kinayonggo birigemo o,” yiluk yoragage.
40Wene ebe ar Petrus nen etegerogon ar emeriragage o. Nen Ar nen wene ebe amberak pakalok ar yoraga dogolir, ir inebe akuni maduk ekwa, Ar Allah nen hukum wogoragin mende eti, mbo biluk wundi waruwak nen yiluk yorarige o. 41Inaruk etegerogon wakigemo, ir etinem wene waganggugwa mende, ima wukbarugwa eti inebe tiga ribu paga arar ima wukbarugwa. 42Ima wukbalok, ir akuni ima wukbarugwa mende yemenogo, ir rasul-rasul yemetnogo inom kuwak ekbiluk wene emekwi, dago ndak-ndak inom nunggwi, nen tamban dambulik ekwi, eku lagugwa o.
Akuni ebebar andarugwa mende inobabur welagugwa wene
43Ir rasul-rasul nen wene erukbuk mende pakalok ekwi paga, ir akuni inobade atuk, wi'au, yiluk bi warinakugwa. 44#Kis. 4:32-35Nen ir akuni wene ebebar yiluk waganggugwa enogo iniliti ambiar dambulik dogolir, nen ir inamindik inamendek obogar ndak-ndak tumburogo waganggu lagugwa. 45Nen ir obogar nen, inamindik inamendek onggo kundiluk, uang yemetnogo ir etau wadok ndak-ndak lakigik tumbur-tumbur eku lagugwa. 46Ir o ninggi nanggi Tuhan Ai Palek ma inom nen ir inuma nggwe inom kuwak ekwi; dago dambulik nunggwi, ir iniliti yanggolek paga inadeknggen ambik dogolir, eku lagugwa. 47Nen ir enogo Ar Allah endaga kup keyam wogukbugwi, nen ir akuni nen inadeknggen erinakwi eku lagugwa. Nen ir inoba Ar Tuhan nen, akuni iniliti ebebar andagwi mende ndilogo, inoba lambolinaka eka lagage.
Currently Selected:
RASUL-RASUL EKUGWA WENE 2: WLW
Highlight
Share
Copy
Want to have your highlights saved across all your devices? Sign up or sign in
