RASUL-RASUL EKUGWA WENE 1
1
1 #
Luk. 1:1-4
Teofilus ap iliti werek wae, an nen buku alep mbalkigi mende paga, Ar Yesus nen yabu edoma ibanini erir wagage kudi, nen o mbogor paga dagarige kudi, wene eka lagage mende inom, nen wene yirige mende inom, obogar mbililogo yokigi o. 2Etiar ma, Ar mbogor paga auwan dagi lagikdek kigik, Roh Allah obatne paga, ir rasul-rasul mende ernogo, yegerogo eku dogono o, yiluk inaruk wakige. 3Ar kangga lagagerek nen, agataga yoma inggi empat puluh hari paga dogolir, ir rasul-rasul enogo telekma yoraga dogolir, An ebebar niluk agi o, yiluk yoraga lagage. Nen Ar aworomi nen inil kugwi, Ar nen Ar Allah o yoma inggi pago endaga mbogor dogolir, erurak mende abok ar yoraga, eka lagage.
4Ininggi omanggi paga, Ar aurumi inom dogalek dogolir, Ar nen wene ir eru mende yoraga dogolir, “Kir o Yerusalem yoma dambe kalok mondok lagup o, yiluk yorarige o. Kir kinebe etoma mondok ar kuwak erek dogolir, Nombae ane yirige mendek, An nen alep ar yokirarigi enogo ma, kir kinakla ebeku dogono o. 5#Mat. 3:11; Mrk. 1:8; Luk. 3:16; Yoh. 1:33Ar Yohanes nen, ima i paga wuk binagaga lagagerek ogwe, yogondak ya perak, we medak togon arar, Roh Allah obarne paga ima wukbinanigin o,” yiluk yoragage o.
Ar Yesus mbogor paga dagarige wene
6Ar Yesus awurumi inom kuwak erek dogolir, aurumi nen wene kinok Ar wokarugwa, “Tuhan wae, Ar Tuhan alep apma balok welagage kwak, yogondak kapma binanik yiluk yirtagan a?” yiluk kinok wokarugwa. 7Yorugwama, Ar Yesus nen wene onggo men yorarige, “An Nombae nen o yi paga erigin o, yiluk akla andarige nda-ndak arar etari waga kalok, arar etarigin o. Wene eta nggwe An Nombae adigar nen yurak o, nen kir kinilu arurak ndak dek o. 8#Mat. 28:19; Mrk. 16:15; Luk. 24:47-48Ogwe Ar Roh Allah kinoba wura watuk, Ar Obarne mendek ekbinagaga kalok, kir nen o Yerusalem inom, nen o Yudea inom, nen o Samaria inom, nen o irep-irep kudi paga etoma inom obogar, An wene eka kinil neyagop mende inom, wene yega kinaruk kolkugup mende inom, kir nen yorar lau dogu mende ake arar ertarugun o,” yiluk yoragage.
9 #
Mrk. 16:19; Luk. 24:50-51 Ar Yesus wene arar yoraga lagagerek, Ir akuni nggigil kugwa yanogo inil werek nggodek, Ar ebe Mbogor paga arar dagarige. Arar dagarigemo, ir inil etoma ar elagik werek ma, o agagona akla arar duk togon unggi lagagemo, inil kaurak ndak dek arar ertagage o.
10Ar Yesus ebe mbogor paga arar dagarigemo, ir inil yanogo elagik werekma, ap inebe mbere iniyom putih yugu, ir ineragalu yanogo arar menari wagugwa. 11Wagugwarik yoragu dogolir, “Kir akuni Galilea mende yi, kir nenaluk mendenda kinil elagik agoktip? Ar Yesus kir kinil paga wolok dagaga kogop eti ndak-ndak, yabongga Ar ebe kir kinil kogop eti ndak-ndak ar warigin o,” yiluk yorarugwa.
Ir rasul-rasul nen tamban ekulagugwa wene
12Yorarugwama, ir rasul-rasul enogo tuguluk inoyok paga, Zaitun kur taga nen, o Yerusalem arar unggi lagugwa. Ma ado Zaitun paga nen, o Yerusalem eta korogar, we satu kilometer ndak-ndak negen. 13#Mat. 10:2-4; Mrk. 3:16-19; Luk. 6:14-16Nen ir o welagugwama Yerusalem etoma arar lagugwa. Lagugwarik nen, uma o tidama nggwe dagarugwarik welagugwa. Ma ir rasul-rasul inebe inendaga yi o: Petrus inom, Yohanes inom, Yakobus inom, Andreas inom, Filipus inom, Tomas inom, Bartolomeus inom, Matius inom, nen Yakobus Alfeus akbur inom, Simon Patriot inom, nen Yudas Yakobus akbur inom. 14Ir inebe obogar o etomala dogolir, iniliti omanggi ar atuk, tamban mban ekwi ar welagugwa. Nen ir kumi wedek mende amberak inom nen Maria Ar Yesus agwiya o, nen Ar Yesus ogariyak o, ir inom tamban eku lagugwa.
Ar Matias Yudas akdikmo mendirugwa wene
15O, ambi paga, ir inebe seratus dua puluh ndak-ndak komarek werekma, ar Petrus arar mertaga lagagerek nen, wene yegerogon yorarige, 16“Nogari nirui, wanelak! An nen wene ambi yirtaga o, Alkitab paga diru mbalek eti, ar Yudas nen akuni Ar Yesus paktau mende wogorek Yesus paktau paga erigin yiluk, ar Daud nen Roh Allah pagaru yirige ndak-ndak arar etagama, kogo o. 17Nen ar Yudas eti, nir ninom yabu pano ekudogowak nen yiluk mendirige ar o.”
18 #
Mat. 27:3-8
(Ar Yudas ebe agar kubur erogo bumo, maduk akige onggo wogorugwa paga, agar arar onde agage o. Nen ar ebe elokte wanduk togon kangga dogolir, akla mende obogar kiduk togon wundi wagage o. 19Nen wene yi, ir akuni o Yerusalem welagwi mende inebe obogar inaruk kolalkugwa. Eti paga nen, agar onggo mbalkigemo eta endaga ir inane paga eti, Akeldama talkugwa. Nen Akeldama eti Agar Amep wulakigemo, yiluk arar o.)
20 #
Mzm. 69:26, 109:8 “Nenaluk, wene etagage mende eti,
etarigin yiluk Mazmur paga diru mbalek yegerogon o;
‘O ar werekma uma etoma, o wum aruwak o. Ar uma akuni ambi mondok welagunem o.’
Nen wene diru mbalek ambi yegerogo yirige o,
‘Yabu ar pago welagama etoma, ar akuni ambi arar kodanek o,’ yiluk yirige o.
21-22 #
Mat. 3:16; Mrk. 1:9, 16:19; Luk. 3:21, 24:51 Etiar ma, Ar Tuhan Yesus ebebar wartaga mende, muk iluk aga o yiluk yir wundu ake, ap ya ninom agarik mende ambi kwaruok o. Etegerogon ma, Ap ebe eti, nir ninom kup keyam Tuhan Yesus mutok dambulik nugu lago mende, ar ap Yohanes ima wukbaga lagage kudi nen, lok Ar Yesus mbogor paga wolok dagage kudi mende kalok ambi kwarurak o.”
23Etegerogon yoragagemo, ir akuni eta kuwak ekugwa mende nen yugu dogolir, inebe mbere ya arar o, ambi endaga Yusuf, nen endaga ambi yogu dogolir eti Barsabas, nen (ambi yogu dogolir eti Yustus yogu lagugwa) eti arar o. Nen ap ambi endaga Matias yi o. 24-25Arar yugu lagugwarik, ir yanogo arar tamban eku dogolir, “Tuhan, Kar akuni inakla eberkwi mendek eti kilu arar o. Ar ap Yudas yabu eka lagagemo dambe karigerek, nen ebe arar wartaga o. Etegerogon ma, nir eru mende ya yorneran o, ap inebe mbere ndak ya ma, Tuhan Kar nen ar Yudas akdipmo eru mende yi o, yiluk yoneran o.” 26Etegerogon yirugwarik, ap inebe mbere yanogo ta kwak endaga erek wundi warigin yiluk, o mbuk tenggelogo yikwa-yikwa erirtagwi ndak-ndak ekugwa mende; ar Matias endaga erek arar wundi wagagemo, Ar ebe rasul arar ir ap inebe sebelas rasul enogo inom menogo birugwa.
Currently Selected:
RASUL-RASUL EKUGWA WENE 1: WLW
Highlight
Share
Copy
Want to have your highlights saved across all your devices? Sign up or sign in
