YOHANES 21

Ar Yesus mutok lagwi mende inebe tujuh paga inoba enam agage wene

1Tuguluk ambi inom ar, Ar Yesus inil neyawak nen yiluk, Danau Tiberias aik paga, aworomi Ar mutok lagwi mende inoba kenam agage. Ma wene ebe ekugwa mende yegerogon: 2O ambi paga ar Simon Petrus o, ar Tomas kuduk mbere yogu lagugwa eti o, Ar Natanael ai o Kana Galilea paga mende eti o, nen ar ap Zebedeus akburi o, nen Ar Yesus aworomi amberak inebe mbere inom, wonggal diluk welagugwa. 3Welagunem akla, Ar Simon Petrus nen, “An ikan wagani lagaluk o,” yiluk yirige.

Nen ir ogari nen yogu dogolir, “Nir ninom luwok o,” yiluk arar lagugwarik ogwe, o kukbaga arambik wulkugwa etiar ogwe, nena-nena ambi mondok waganukdek arar. 4Nen o mo il arar dagi waga kigik, Ar Yesus i aik paga menari wagage. Ogwe ir nen eti Ar Yesus o, yiluk yenggak kalokdek arar o. 5Nen Ar Yesus nen yoraga dogolir, “Nakburi, kir kinaikan werek a?”

Ir nen yogu dogolir, “Dek o,” yiluk yorugwa.

6 # Luk. 5:6 Nen Ar Yesus nen yoraga dogolir, “Kalok jala endi kininggi ebema nggwe endoma mbo lakbini nda, etoma nggwe kwak kinaikan kodagun o.” Yirigemo nen jala enogo ima etoma arar wukbirugwa, ogwe, tuguluk jala enogo iyok paga kede likau akber ambik arar etagage, nenaluk jala akla yemenogo ikan pakalok mondok ari unggirugwa paga ma o.

7Nen ar Yesus mutok lagwi mende ambi, Ar Yesus iliti kunik mondok ma, ar nen ar Petrus yoga dogolir, “Ar eli Tuhan arar a?” Nen ar Simon Petrus enogo aruk eli Tuhan yirige enogo aruk kolalka lagagerek, ar iyom baju yirtarige (nenaluk ar iyom yugudek dogogi nanggige) nen ebe ima arar mbo wurkige. 8Nen ir Ar mutok lagwi mende amberak, jala agede enogo lir kalok wolok perahu paga, abugur taga nggwe wulkugwa. Nen ir eta ebe loknengga negen dek ogwe, we seratus meter arar ndak-ndak ma o. 9Nen ir perahu akla nen wulku lagugwa, indu kunik keker yeganem akla, ikan werago a, roti werago a, inil ka wulkugwa. 10Nen Ar Yesus nen yoraga dogolir, “Kir ikan waganggop mende eta amberak wolok watni o.”

11Nen ar Simon Petrus enogo perahu akla dagaluk, jala enogo likalok wolok abugur taga dagarige. Nen jala enogo akla ikan yiluk muluk; nen ikan inebe seratus lima puluh tiga ekor paga. Nen ikan inebe etegedek ar ogwe, jala enogo ambi likbik yiluk dek mondok arar. 12Nen Ar Yesus nen yoraga dogolir, “Yogo werago mende nuwok nen watni,” yiluk yorarige. Ogwe ir enogo ar ambi nen kwak, “Ninombae kar yi ta?” yiluk yoru inobade agage. Nenaluk ir nen, Ar eti Tuhan arar o, yiluk inilu agage eti paga o. 13Tuguluk Ar Yesus ir inoba panggo yi lagagerek nen, roti wagangga lagagerek nen ir tumburirarige. Nen Ar ikan etegerogon ar ekige. 14Nen yi Ar Yesus iluk atuk wundi wagagerek, inggi mbere ambi paga ar, akuni Ar mutok lagugwa mende inoba neyawak nen yiluk, inom abuk agage. 15Ir enogo arar nunggu lagugwarik, Ar Yesus nen Petrus yoga dogolir, “Yogo kar Simon ap Yona akbur, ir amberak yoma An nakba ketagwi ar ogwe, kar kwak nakba nggok negen kertagan a?” yiluk yorige.

Ar Petrus nen onggo yoga dogolir, “Ebebar o, Tuhan Kar kilu ar o, an niliti Kar kakba mondok o?”

Ar Yesus nen onggo yoga dogolir, “An mende domba mende agwi inaruam pik pak dogono o.”

16Ar Yesus nen inggi na mbere paga ar Petrus yoga dogolir, “Kar Simon ap Yona akbur wae, kar An nakba kertagan a?” yiluk yorige.

Ar Petrus nen onggo yoga dogolir, “Ebebar o, Tuhan Kar kilu ar o, an Kar kakba mondok o?” yiluk yorige.

Ar Yesus nen onggo yoga dogolir, “An mende domba mende agwi etoma inaruam pik pak dogono o,” yiluk yorige.

17Ar Yesus nen inggi na mbere ambi paga, ar Petrus yoga dogolir, “Kar Simon ap Yona akbur, kar An nakba kertagan a?”

Ar Petrus etnogo, Ar Yesus inggi mbere ambi paga inom ar yogi nanggige, ar iliti buru yega lagagerek yoga dogolir, “Tuhan wae, Tuhan kar ye wene nde wene kilu mondok ar o. Nen Tuhan kar an niliti kar koba kakba kertaga mende eti Kar kilu ar o,” yiluk yorige.

Yirigemo Ar Yesus nen onggo yoga dogolir, “An mende domba mende agwi inaruam pik pak dogono o. 18An wene ebebar yigin o: Kar kebe elege lerago auwan paga, kar kengga werek nen ketaninggi yitaga lagagen o, nen kar lau wadok andarigen ma etoma kakla andalok lagagen o. Ogwe kar kanggok ari laga paga, kar kinggi wogoramo, ir nen kinggi kede marogo bagaluk, nen ir nen kar lau ka'ir andigin mo etoma kigik ar, wokarek bagi lugun o.” 19(Nen ar Yesus eta yirige eti, ar Petrus Allah endaga wogok bega dogolir, kambigin mende arar elalogo yorige o.) Etegerogon yoga lagagerek, Ar Petrus men yorige, “An mutnarek eme o!” yiluk yorige.

Ar Yesus mutok lagwi mende amberak inom ekugwa wene

20 # Yoh. 13:25 Tuguluk ar Petrus il meda yirige mende, ar amborna korok eta ar, ar Yesus mutok lagwi mende ambi, Ar Yesus nen oba akba mondok ma, ebe eta welaga il karige. (Ar eti alep kwak dago nunggu dogolir, Ar Yesus eragalu imbirak korek dogolir, ar nen Ar kinok men yorige, “Tuhan, Tuhan kabok mbalogo konggo nggeraligin kwak eti ta kegen?” yiluk yorige werek ernogo o.) 21Il kega lagagerek, ar Petrus nen Ar Yesus yoga dogolir, “Tuhan, ar yi kwak nenggerogon?”

22Ar Yesus nen onggo yoga dogolir, “Ar iluk mondok kigik, An warurak kudi ari ligin o, yiluk An wadok kega dogomo, eti An naredo negen dek o!”

23Yigi nanggige, ir Ar Yesus mutok lagwi mende nen, ar nin yogik yugu dogolir, ar eti kambigin mondok dek arar o, yiluk yirugwa. Ebebar kwak, Ar Yesus nen, Ar mutok nega lagage mende eti kambigin yiluk yigikdek ogwe, “Ar iluk mondok kigik An warurak kudi ari ligin o, yiluk An wadok kega dogomo, eti An naredo negen dek o,” yiluk yorige.

24Nen Ar mutok nega lagage mende eti nen, ye wene nde wene etagage mende etoma mbililogo bugali taga o. Nen, ar nen mban ar diru yi mbalke o. Nen nir obogar ninilu eti, wene ar yege etoma ebebar mende arar o.

Wene irep paga

25Wene Ar Yesus nen yirige mende amberak pakalok werek o. Nen etoma obogar nandik-nandok erogo diru mbalumo, an nakla paga nen, o agar paga yoma, buku diru mbalek etoma bumo ndak dek arurak o.

Currently Selected:

YOHANES 21: WLW

Highlight

Copy