YOHANES 20
20
Ar Yesus kambiluk iluk agage wene
(Mat. 28:1-8; Mrk. 16:1-8; Luk. 24:1-12)
1Ar Maria Magdalena ernogo, o hari minggu paga, o keyalek namun kamun mondok kuburan arar lagage. Lagage mende, kuburan nggir tu larek mende eti, obok koknalogo lakbirugwama, nen kubur ebe ande tu kurik il ka lagage. 2Kega lagagerek, ar medak togon mbu Simon Petrus o, nen Ar Yesus mutok laga lagage mende awor iliti kunik eti o, inoba laga lagagerek yoraga dogolir, “Ar Tuhan ebe kuburan nen arar waganggama o, nen nggoma nggwe wolok bi lagiya an nungguk dek o.”
3Yirigemo ar Petrus o, nen ar mutok laga lagage mende ambi enogo imbirak, kuburan arar lagugwa. 4Ir imbirak mbu agan arar lagugwarik ogwe, ar Petrus auwan laga kigik, ar mutok nega lagage mende ambi ernogo, ar ndak kuburan ari lagage. 5Lagagerek, ar il kuburan onggo lagage mende, tu kain kafan eti mban nonggodek il karigerek ogwe, ebe unggigikdek welagage. 6Nen ar Simon Petrus enogo yabongga waga lagagerek, lok-lok akman nggwe arar unggirige. Nen tu kain kafan enogo nonggodek etoma il karige. 7Ogwe tu kain ambi Ar Yesus aluak kede makugwa mende eti, eragalu korok negen dek ogwe, obok pirik perek erek adik negen ar inil karugwa. 8Tuguluk ar ambi Ar mutok nega lagage mende, o kuburan etoma alebagik ar ndak lagage enogo, akman nggwe unggirige ar. Onggega lagagerek il kalok, iliti ebebar andarige. 9Nen o eta etagage kudi nen, wene Alkitab akla diru mbalek, Ar watlarigin ogwe, iluk arigin o, yiluk yirige mende eti, inakla dambuk yirige. 10Nen ir Ar Yesus mutok lagu lagugwa mende enogo, arar inuma lagugwa.
Ar Yesus nen, Maria Magdalena il neyawak nen yiluk, ilka paga kenam agage wene
(Mat. 28:9-10; Mrk. 16:9-11)
11Ar Maria Magdalena enogo kuburan tukandekma mendek dogolir, de aka lagage. De yega dogolir, il we kweya togon onggo lagage mende, 12ir malaikat tu putih yugu il darige. Nen ir enogo Ar Yesus warek winogo birugwama, ar ambi aluwak ma nggwe, nen ar ambi iyok ma nggwe, korek welagwi il darige o. 13Nen ir malaikat yemenogo nen yogu dogolir, “Ar kwe yi wae, kar de nenaluk yi tagan?” yiluk kinok yorugwa.
Yorugwama, ar Maria nen wene onggo yoraga dogolir, “An mende Tuhan kodegama o, nen an ar nggoma nggwe bega nungguk dek o.”
14Etegerogon yoraga lagagerek, il ambotna meda togon laktaga lagage, Ar Yesus mendek il lakarige. Ogwe Ar eti Yesus arar mendek yiluk yenggak mondok kalok dek. 15Ar Yesus nen kinok yoga dogolir, “Kwe yi, kar de etoma nenaluk yi tagan? Nen kar ta kwak kwari tagan?”
Ogwe ar Maria nen akla andega dogolir, akuni eti, yabu mende yiluk akla andalok, yoga dogolir, “Ai ambo, kar nen Ar ambimo waganogo kimak begen kalok, o nggoma kimakbegen, an Ar waganik nen begena etoma yornirin nde lak,” yiluk yorige.
16Ar Yesus nen wene onggo yoga dogolir, “Maria wae!” yiluk yorige.
Yirigi nanggige, ar Maria elokte Yesus obanggwe laktatuk, wene onggo ir Ibrani inane paga yoga dogolir, “Rabuni wae!” (Rabuni eti “Guru”) yiluk yorige.
17Yorigemo, Ar Yesus nen onggo yoga dogolir, “An kinggi paknakup o, nenaluk An Nombae oba auwan lagikdek ma o. Ogwe kar yogondak, An nogari inoba ibar lalok, wene ir men yorano, yogondak Ar An Nombae nen kir Kinombae, Ar An mende Allah nen kir mende Allah, Ar oba An yogondak arar dagagin o,” yiluk yorano o.
18Yorigemo ar Maria enogo ir Ar Yesus mutok lagu lagugwa mende enogo inoba lagagerek, Ar Tuhan ebe an arar nil kigi o, nen wene etoma obogar Tuhan nen ar yorige mende obogar yirige o.
Ar Yesus nen ir aworomi mutok lagwi mende nen, inil kowak nen yiluk inoba enam agage wene
(Mat. 28:16-20; Mrk. 16:14-18; Luk. 24:36-49)
19Ar Yesus aworomi mutok lagwi mende, o hari minggu etinem arar kukbaga agagemo, o omanggila tu kunci lar-lar erogo ari unggirugwa. Nenaluk ir ap Yahudi mende inewai yemenogo inoba inobade nen. Werekma, Ar Yesus inagur bik bak wagagerek ineragalu menari wagagerek men yirige, “Wanelak, kir obok kinadeknggen arar,” yiluk yorarige.
20Etegerogon yoraga lagagerek, Ar inggi wakugwama inom, nen elabur wakugwama inom, kinil neyani o, yiluk inugur darige. Nen ir Ar Tuhan arar inil kugu lagugwarik, inakla adeknggen ambik arar etagugwa. 21Tuguluk Ar Yesus nen ambi inom ar yoraga dogolir, “Wanelak, kinakla adeknggen togon o. Ar An Nombae lakbani wagage ndak-ndak, eti ndak-ndak An nen kir lakbinagagi o.” 22Tuguluk Ar akla nen tar wulabi waga lagagerek yoraga dogolir, “Roh Allah arar kodani o. 23#Mat. 16:19, 18:18Kir nen akuni ambi omaduk dek erogo bugun kalok, Ar Allah nen ar akuni eti omaduk dek erogo bigin ar o. Nen kir nen akuni ambi omaduk dek erogo bugun dek kalok, Ar Allah nen akuni eti omaduk dek erogo bigin degar o,” yiluk yorarige.
Ar Yesus nen ar Tomas yorige wene
24Ar Tomas (kuduk mbere yogu lagugwa ernogo), ir ap dua belas paga Ar Yesus mutok lagwi mende enogo, ar ir inom dekma, Ar Yesus inoba wagage o. 25Nen ir Ar Yesus mutok lagwi mende amberak nen, ar Tomas yogu dogolir, “Ar Tuhan nir obok ninil kogo o!” yiluk yorugwa.
Ogwe ar Tomas nen onggo yoraga dogolir, “Ar inggi paku wakama obakdik mo etoma inom, nen elabur tega ndalkama etoma inom, nen paku warir wagama amberak etoma inom, an ninggi paktigikdek kigik, we ebebar eti ugunar andagin mondok dek o.”
26Ir Ar Yesus mutok lagwi mende ernogo nen, ininggi tamban ambi ekbugu lagugwarik, o welagugwama etanogo ar, ar Tomas inom welagugwa. Nen uma etoma tu dombok obogar kunci larek welagugwa. Ogwe Ar Yesus nggi paga nen talek ar, muk inakla ari unggirigerek yoraga dogolir, “Wanelak, kinakla adeknggen togon o,” yiluk yoragage. 27Yoralok ar Tomas enogo yoga dogolir, “An ninggi paku naka yoma kil kan, nen kinggi yoma pakneya emenda. Nen kinggi An nelabur tega nakama yoma, kinggi pakneya emenda. Kiliti duk mbere dogu maga o, ogwe ebebar andan o!”
28Nen ar Tomas nen Yesus yoga dogolir, “Kar eti An mende Tuhan arar o, nen an mende Allah arar o.”
29Yigi nanggige Ar Yesus nen yoga dogolir, “Kar nen An kil neyagen paga kiliti ebebar andagen o, a? Ogwe ir akuni An inil neyagun dek ar ogwe, ir iniliti ebebar andagun eti perak, inadeknggen arar dogowak o!” yiluk yorarige.
Buku yi diru mbalkige edo wene
30Ir Ar Yesus aworomi inil paga, ye wene nde wene erukbuk mende ekige amberak etoma pakalok ar agarik o, ogwe buku yi akla diru mbalkikdek o. 31Ogwe wene obogar diru mbalki ya, kir obogar kiniliti, ar Yesus eti Raja Ndilinakwa mende, Allah Akbur, ebebar mende arar o, yiluk kiniliti Ar oba ebebar andugun kalok, kir obogar kinebe ndilkodagun o.
Currently Selected:
YOHANES 20: WLW
Highlight
Share
Copy
Want to have your highlights saved across all your devices? Sign up or sign in
