YOHANES 11

Ar Lazarus kanggige wene

1 # Luk. 10:38-39 Ar ap endaga Lazarus eti, o Betania etoma iruwi inendaga Maria o, Marta o, inom welagugwa. 2#Yoh. 12:3Nen ar Maria eti, o ambi paga minyak obari pano mende, Ar Tuhan iyok paga kidirogo bega lagagerek, ar iri paga kogal kirnik kornok ekige mende ernogo. Etegerogo ma, o ambi paga ar Lazarus arar u kunggige o. 3U arar kunggi nanggige, ir ar iruwiyak enogo nen, Ar Yesus aruk paga bi lagugwa, “Aii, Tuhan wae, nir niniruak Kar Tuhan kiliti kunik enogo ambo, u kunggemo yokiri wago o,” yiluk yorugwa.

4Wene enogo aruk kolalka lagagerek onggo yoraga dogolir, “U eti nen ar ebe mondok min warigin dek o. Wene etarigin paga, Ar Allah endaga yadek dugwi, nen Allah Akbur endaga yadek dugwi erugun o,” yiluk yirige.

5Ar Yesus ir Marta o, Maria o, nen Lazarus o, inoba iliti nggok mondok kunik welagage. 6Ogwe wene ar ap Lazarus u kunik enogo pagane ar aruk kolalkigerek ogwe, eram nen inggi nogo o mbere paga arar yirige. 7Tuguluk Ar Yesus nen Ar mutok lagwi mende yoraga dogolir, “Yogo nir niniyok paga o Yudea etoma luwok o, yiluk yirige.”

8Ir nen onggo yogu dogolir, “Guru Ninombae o, ir akuni Yahudi mende nen nggir karuwok nen yiluk eka ernogo, ngger negen ar ogwe, Ninombae yogondak o etoma lau yegen eti nenaluk nda?” yiluk yorugwa.

9Ar Yesus nen yoraga dogolir, “O dindaga dogir taga eti dua belas jam paga arar etnogogi? Ir akuni o dindaga paga lagwi mende eti, iniyok lakbir mbalagun dek o. Nenaluk, ar eti o agar taga yoma akbinak mende eti, ar nen il kigin paga arar o. 10Ogwe ir akuni o kukbagane lagwi mende eti, o akbinak mende eti dekma, iniyok lakbir mbalagun o.” 11Etegerogon yoraga lagagerek, Ar Yesus nen ambi inom yoraga dogolir, “Nir ninogar ar Lazarus eti, obok anoge yitagerek ogwe, An lalok nen, ar iluk erogo bi ligin o,” yiluk yorarige.

12Ar Yesus mutok lagwi mende nen yogu dogolir, “Tuhan wae, ar Lazarus eti noge yiluk nen ar u oba obok dek arigin.”

13Ar Yesus wene yirige eti, Lazarus obogar kangge o yiluk yirige. Ogwe ir inakla andagu dogolir, Lazarus wedek noge ar yirtaga yiluk inakla andarugwa. 14Eti paga nen, Ar Yesus wene ebe yangguk togon yoraga dogolir, “Ar Lazarus eti obogar wartaga o. 15Ogwe An etoma nebe dek eti pano ar o, Nenaluk nanonggal kwak kir kinake eti, kir kiniliti ebebar andagun eti arar o. Etiar ma, yogondak ar Lazarus oba luwok o,” yiluk arar lagugwa.

16Ar Tomas endaga nin yogu dogolir “Ar Kudik mbere mende” yogu lagugwa eti nen, ar ogari ir Yesus mutok lagwi mende yoraga dogolir, “Nir ninom ar kambuwok nen, Ar mutok luwok o!” yiluk yirige.

Ar Lazarus iluk erogo birige mende wene

17Ar ap Lazarus arar kanggigemo, ar ebe obok kubur erogo birugwarik kigik, nogo ininggi empat paga yirugwarik paga, 18Ar Yesus o Yerusalem nen, o Betania etoma, lok negen ar dek, we korok tiga kilometer ndak-ndak ma, kumbimo inoba arar bikda lagage o. 19Ir Maria o, Marta o, iniruak kanggige enogo paga, iniliti yonggo ninabu paga, ir akuni Yahudi mende inebe pakalogar, kumbimo inoba wagugwa ar o.

20Etama nen, ar Marta enogo, Ar Yesus muk waga o, yiluk aruk kolalka lagagerek, eloktekma wulkige. Nen ar Maria kwak uma puk agage. 21Ar Marta nen Yesus yoga dogolir, “Tuhan, Ae Ambo, o kibir kwak eta ar, Kar kebe ya dogolepma, an niruwak wartaga yi, wartatep dek mende o. 22Etiar ogwe, Ar Allah oba, ar Tuhan nen nggino yorigin mende eti, ebebar wogorigin eti yogondak an nilu ar agarik o,” yiluk yorige.

23Yigi nanggige, ar Yesus nen Marta yoga dogolir, “Kar kiruak arar iluk arigin o,” yiluk yorige.

24Yorigemo ar Marta nen onggo yoga dogolir, “O Aga Yobok paga, akuni kanggugwa mende iniluk ekbaga dogolir, ar Lazarus iluk arigin eti an nilu o,” yiluk yorige.

25Ar Yesus nen Marta wene onggo yoga dogolir, “Akuni warek mende iniluk ekbagwa mende inom, nen iniluk edo wogorar taga mende eti inom, An nebe yi arar o. Etiar ma, ir akuni iniliti An noba ebebar andagun mende etoma, ebebar kambugun ogwe nen ar ir iniluk arugun o. 26Ma wene yi kakla ebebar andan o, ir akuni iniliti An noba ebebar andaga mende eti, ir iniluk agarik yoma, ir mondok-mondok kambugun dek arar o, yiluk kakla ebebar andar tagan a?”

27Yigi nanggige, Ar Marta nen, “Tuhan wae, Kar eti Tuhan Ar Allah Akbur, Raja Ndilinakwa mende, agar paga yoma warigin yugu lagugwa enogo arar o yiluk, niliti ebebar andagi o.”

Ar Yesus de yirige

28Ar Marta wene etegerogon yega lagagerek, ar ogar Maria wai yori lagagerek, aruk mo popok yoga dogolir, “Ar Guru obok wagarik yoma werek o; nen Ar Kar kaginok wagangge o,” yiluk yorige. 29Yorigemo aruk kolir-kolir, ar Maria ibar-ibar mendok togon menagagerek, Ar Yesus oba imbirak abuk ari lagage. 30O etinem, Ar Yesus uma tilimo auwan unggigik dek. Ar Yesus Marta imbirak abuk agagemo etanogo ar welagage. 31Ir akuni Yahudi mende ar Maria iliti yonggonggwi mende ernogo, ar Maria mendok togon ibar-ibar wundiluk laga lakalok, ir inakla nen kuburan de yik nen yiluk lektaga yiluk andugu lagugwarik, ir obogar ar mutok lagugwa o.

32Ar Maria enogo, Ar Yesus werekma etanogo oba ari lagagerek, ebe il kalok, ar Maria endop yungguk togon Ar Yesus apma korek tari lagagerek, yoga dogolir, “Ae Tuhan wae, o kibir kwak eta ar, Kar ya dogolepma, an niruak yi, ebe kambilep dek o, Ambo,” yiluk yorige.

33Yotuk, Ar Yesus apma ar Maria enogo de yega, nen ir akuni Yahudi mende ar Maria mutok wagugwa yemenogo, ir inom ar de yirugwa. Nen de yugwi Ar nen daga lagagerek, Ar Yesus iliti maduk atuk, Ar akla buru yirige. 34Ma ir akuni yemenogo, Ar Yesus nen kinok yoraga dogolir, “Kir ar nggoma kubur ekop?” yiluk yorarige.

Ir nen onggo yogu dogolir, “Tuhan, kil kanok nen eme o,” yiluk yorugwa.

35Yorugwama, etanogo kwak Ar Yesus iliti ebiluk buru yiluk, de arar yirige o. 36Etegerogon de yega kalok, ir akuni Yahudi mende nen yugu dogolir, “Lakani o, ar Lazarus iliti oba kunik mondok ma, ade yirtaga o,” yiluk yirugwa. 37Ogwe ir amberak inom welagwi mende nen men yirugwa, “Ar nen ir akuni inil mbuk mende pano erinake, Lazarus kangganem yiluk, Ar ambi eru ar ogwe, ekikdek eke eta nenaluk?” yiluk yirugwa.

Ar Lazarus iluk erogo birige wene

38Wene eta yirugwa nen, Ar Yesus iliti ibiluk buru yega lagagerek arar lagage. Nen kuburan eti kwiyon nggok lendago, nen abir nggir tabik nggok ar paga larek welagage.

39Ma Ar Yesus nen yega dogolir, “Nggir endi ibar lemelogo lakbini nda,” yiluk yirige.

Marta ar ap kanggige werek iru enogo nen, Ar Yesus yoga dogolir, “Ogwe, Tuhan wae, ar kubur erogo bogoma, inggi empat hari noge yege o. Ma obok pidi atuk obari mbugalir taga o,” yiluk yorige.

40Yirigemo Ar Yesus Marta yoga dogolir, “Wene An obok yokigi a dek a: Kar kakla ebebar andagen kalok, Ar Allah obatne erukbuk mende elalin erir taga enogo, kar kil kigin o!” 41Wene eta yigi nanggige, ir enogo nggir tu larek enogo bugalogo lagakugwa. Lakbirugwama Ar Yesus elokte mbogor paga liktaga lagagerek, men yirige, “Aii, Allah Nombae o, Kar An Nane yigi karuk kolalken eti paga, wi wa o, yiluk yokigi o. 42Kar nen An nggino yokegetek ndak-ndak arar erir tagan eti, An nilu arar o, ogwe An wene yi yokirigin o, ir akuni ya agarik inake paga, An eti ebebar Kar nen lakbani wagagen yiluk inilu aru paga yigi o.” 43Etegerogon yega lagagerek, ane nggok mondok paga yega dogolir, “Lazarus, ibar wundime!” yiluk yorige. 44Etegerogon yigi nanggige, akuni warek mende enogo iluk atuk wundi wagage. Nen ar ebe obogar tu kain kafan ar inggi iyok paga pirik perek erek, nen elokte paga etegerogon ar kain kafan pirik perek erek arar wundi warigi nanggige, Ar Yesus nen akuni yemenogo yoraga dogolir, “Yogo tu kain kafan etoma, ibar pigalogo dambe kani o,” yiluk yorarige o.

Yesus warurak abok mbalkugwa wene

(Mat. 26:1-5; Mrk. 14:1-2; Luk. 22:1-2)

45Ir akuni Yahudi mende, ar Maria kumbi wakbi wagugwa mende yemenogo, elalin ekige etagage enogo inil kugu lagugwarik, inebe pakalok mondok ar nen, Ar Yesus eti ebebar mende o yiluk andarugwa. 46Ogwe ir amberak nen, wene Ar Yesus ekige inil kugu lagugwarik, ap Farisi mende yegerogon eka kogo o, yiluk kurumbi yora lagugwa. 47Wene etnogo paga, ir akuni Farisi mende inom, imam-imam kepala inom, ar ap Mahkamah Agama inom, ir dambulogo wene mbalku dogolir, “Nir nenggerogon eruok? Ar akuni wene erukbuk mende elalin pakalok mondok ar erir taga o! 48Nen Ar yegerogon erir waga kigik, nir dambe kugun kalok, akuni obogar nen, Ar ebebar andugun. Nen eta aga dogomo, ir ap Roma mende wagu dogoluk nen, Tuhan Ai Palek yi arar miyak-mayak ekwi, nir ninebe obogar enggen dikdek erogo binanugun o.”

49Yugu nanggugwa ar ap imam agung endaga Kayafas eti nen yega dogolir, “Yogo puk-puk, kir wene kinungguk dek mondok ar kinagi o. 50Ir ye akuni nde akuni yoma inake paga inom, nen o yoma pano dogu ake paga inom, pano kwak eti, ar akuni ambiar eti mondok min arar warurak o,” yiluk yirige. 51Wene ebebar kwak, ar Kayafas nen yirige eti, ar adik akla andalok yirige dek o. Ogwe ar o eta paga, ar ebe yabu nggok imam agung eti inggi pago ma, wene yirige eti, Ar Yesus ir akuni Yahudi mende obogar inake paga kambigin o, yiluk elalogo birige. 52Nen ir akuni Yahudi mende mban inake dek o, ogwe ir Ar Allah Akburi tidik mbidik etagugwa mende yemenogo kuwak erogo baurak paga arar o.

53O eti paga kudi nen, ir ap Yahudi mende nggaindak kwak obogar, Ar Yesus eti waruwok arar o yiluk inane dambulkugwa. 54Etegerogon yugwi agagemo, Ar Yesus telekma ir akuni Yahudi mende inilka paga ertatuk, wene mbalkikdek lambo yirige o. Nen o Yudea paga dambe kalok, o ado paga nggwe, o Efraim paga etoma arar lagage. Etoma Ar mutok lagwi mende inom, kambuk yiluk welagugwa.

55Nen o etinem, Hari Raya Paskah ir Yahudi mende wene nggok komakwi paga arar ari wagage. Nen ir akuni uma nggwe yemenogo, Hari Raya Paskah eti etari wagikdek kigik, ir yimaduk ndik maduk eku lagartek mende korinabu paga, o desa-desa etoma dambe kalok, o Yerusalem dombok obogar lagu-lagugwa. 56Ma ir akuni yemenogo, Tuhan Ai Palekma yemenogo ari unggugu lagugwarik, Ar Yesus kwarir nugu dogolir, ar ambi yogik eku dogolir, “Kar kakla nenggerogon andagen?” Ah, yogondak komakunem Ar wagikdek a, men a,” yiluk yirugwa 57Ir wene etegerogon yirugwa eti, ir ap imam-imam kepala inom, nen ir ap Farisi mende inom nen, wene wulaku dogolir, Ar Yesus kinil kalok arumo, kurumbi yornirau o, nen nir yokniramo, Ar ebe paktawok nen o yiluk yirugwa eti paga o.

Currently Selected:

YOHANES 11: WLW

Highlight

Copy