YOHANES 12

Ar Yesus o Betania paga etoma amburu obari pano mende oba kidirkugwa wene

(Mat. 26:6-13; Mrk. 14:3-9)

1Ar Yesus Hari Raya Paskah ake komarurak enan hari negen panggoktek kigik, o Betania etoma arar lagage. Lagage mende etomala ar Lazarus kanggige mende, Ar nen iluk erogo birige enogo, ar adigar werek ma ka lagage. 2Oba arar lagugwama, ir etoma nen dado palinaku dogolir, ar Marta nen dago darogo wogoragagemo, ar Lazarus ernogo, Ar Yesus o, akuni kuro amberak inom korek latuk erom narugwa. 3#Luk. 7:37-38Etanogo werekma, Ar Maria nogo minyak ambi endaga Narwastu, ebe onggo ambik mende ma, setengah liter#12:3 Setengah liter eti minyak narwastu eti todek odo kirogon, ande kerok togon dek. ndak-ndak todek wolok wagage. Wolok wagagerek, Ar Yesus iyok paga kidirogo wukbega lagagerek, iri paga Ar Yesus iyok kogal kirnik kornok tobalkige. Eki nanggige, o uma apmanggwe yemenogo, obogar minyak enogo obari pano-pano ndak warek arar ertagage. 4Ogwe ar ambi, ir Ar Yesus mutok lagwi mende endaga Yudas Iskariot, tuguluk Ar Yesus onggo nggeralkige werek eti nen yega dogolir, 5“Minyak wangi yi onggo tiga ratus uang perak kunogo nen, akuni ininggi dek mende inakba erurak ogwe, nenaluk yi erir taga,” yiluk yirige. 6Ar Yudas wene etegerogon yirige eti, akuni ininggi dek mende ebebar inakba nen yirige dek ogwe, ar ebe ilimodonggar ma yirige o. Uang kas ir inake dambulik begetek yemenogo, ar pago ma, ninige ar ilimodo wagangga lagage o.

7Ogwe ar Yesus nen yega dogolir, “Ar kwe yi eka kinil dambe kani o! Ar erir taga yi, An kubur erogo banurak enogo ake paga arar erir taga o. 8#Ul. 15:11Nen ir akuni ininggi dek mende endoma, ninggi nanggi kir kineragalu kinom dogogun ar ogwe, An perak dek o,” yiluk yorarige.

Ar Lazarus waruok nen yiluk aik matuk lagugwa

9Ir akuni Yahudi mende pakalok inaruk kolalku dogolir, Ar Yesus o Betania werek o yiluk inaruk kolalku lagugwarik, ir etoma arar lagugwa. Ir lagugwa eti Ar Yesus adigar paga lagugwa dek ogwe, Ar Yesus nen ar Lazarus warek mende iluk birige enogo inil kaurak paga inom ar lagugwa o. 10Wene eti paga, ir ap imam-imam kepala nen, ar Lazarus enogo min arar waruok o yiluk abok mbalkugwa; 11Nenaluk ar obabur paga, ir akuni Yahudi mende nen ir dambe dalok, Ar Yesus kwak mondok ebebar o yiluk andarugwa eti paga arar o.

12Kubenengge noge yiluk, ir akuni pakalok Paskah paga komakunem wagugwa yemenogo, ir inaruk kolalku dogolir, dek o, Ar Yesus yogondak arar, Yerusalem tuan paga warik wari taga o, yiluk inilu agage. 13#Mzm. 118:26Inaruk koldiluk, ir akuni pakalok yemenogo obogar o endaga palem eti enggangga mbalogo wolok, Ar Yesus eloktekma ilka waganggu dogolir, “Allah Endaga pogor kuwok o! Ar Tuhan endaga paga waga eti, nggok inggi weregar aruwak o. Ap Israel mende Raja eti, nggok inggi werek Ar mban ar etaruwak o!” yiluk akmik mir luk-luk yirugwa.

14Ar Yesus keledai ngger leraka ambi wagangga lagagerek ambor taga dagaluk lagage. Eti ekige eti, wene diru mbalek mende yi:

15 # Za. 9:9 “Ir kumi Sion mende yi wae, kinobade arugup o!

Kir mende raja ernogo,

keledai ngger leraka mende ambor paga, denggelartuk waritaga yi, lakani o.”

16Ma o eti paga, ir Ar Yesus mutok lagwi mende yemenogo, nena-nena etagage yemenogo, nenaluk etarirtaga yiluk inakla ambi tengge larukdek mondok arar o. Ogwe Ar Yesus arar wakugwama, kambiluk iluk agage paga nen, ir wene akuni Ar Yesus oba ekbugu lagugwa yemenogo obogar, wene Alkitab akla Ar Abok diru mbalek ndak-ndak arar o, yiluk inilu agage.

17Ir akuni ar Lazarus warek ma, Ar Yesus nen wai yortuk, ebe iluk erogo birige enogo ekanem inil karugwa mende obogar nen, wene enogo mondok arar bugalir arar wulkugwa o. 18Eti paga nen, ir akuni pakalok Ar Yesus oba lagugwa eti, ir inaruk kolalku dogolir, dek o, Ar Yesus nen elalin eti eke o, yiluk kolalkugwa eti paga. 19Eti paga nen, ir akuni Farisi mende ernogo, ar ambi yogik eku dogolir, “Nir nen ambi erurak ndak dek arar o! Kinil kani, ye ai nde ai agar paga yoma obogar, Ar mutok mban arar lektagwi o!” yiluk yirugwa.

Ir akuni Yunani mende nen Ar Yesus kwarir lagugwa

20Ir akuni o Yerusalem komaruwok nen yiluk lagugwa mende yemenogo inakla, ir akuni inalebunu Yunani mende, inebe dogalek negen ar inom lagugwa. 21Ir ar Filipus oba wagugwarik yogu dogolir, “Ai ninogar, we ndak kalok o lak, nir ambo, ar Yesus ninom abuk aru wadok ogwe o,” yiluk yorugwa. (Ar Filipus eti ai edo o Betsaida Galilea paga etoma.)

22Yorugwama ar Filipus enogo nen ar Andreas yoga lagagerek, ir imbirak Ar Yesus yori lagugwa. 23Yorugwama Ar Yesus nen onggo yoraga dogolir, “Ar Akuni Inakbur eti wogok burak enogo, yogondak arar panggo yi waga o. 24An wene yi ebebar mende yokeragin o: ogandum enggen ambiar agarla ai yakbiluk, nen ebe ai agarla yakbu mende eti wartagakdek kalok, ar aingge eti ebe omanggiar dogogin o. Ogwe enggen ambiar eti agarla wartarigin kalok, ar nen enggen pakalok arar yirigin o. 25#Mat. 10:39, 16:25; Mrk. 8:35; Luk. 9:24, 17:33Ir akuni iniluk akba ekodagun kalok, ir iniluk mondok dogu mende eti bularigin o. Ogwe, ir akuni iniluk mende eti, o agar paga yoma nen ina'ir ekodagun kalok, ir iniluk nabedal kabedal mondok dogorak mende eti, idi erogo bartagun o. 26Ir akuni An nayedoman etaru wadok kalok, An mutnarek mondok laga dogorak o; eti erugun paga ar An nayedoman eti, An nggoma ari ligin eti, ar nimbirak etoma arar ari lugun o. Nen ir akuni An neyabu erugun mende eti, An Nombae nen inalon palogo woguk bagin o,” yiluk yoragage.

Ar Yesus kamburak mende yirige wene

27“An niliti dibi ernabi taga, nen An wene nggi yukbuk o? Nen yurak kwak dogomo eti, Nombae o, wene yi noba aganem ndilnabin yiluk yurak o. Ogwe wene An wagagi edo eti, kener waka dogoluk, nebe kamburak eti ake paga arar wagagi o. 28Ma, Ae Nombae o, Kar kendaga mban ar lektek mondok dogowak o!” Eta yigi nanggige, mbogor paga nen ane yega dogolir, “An Ar obok wogok birigi o, nen An ambi inom ar wogok bigin o.”

29Ir akuni pakalok yanogo welagugwa mende nen, Ar ane yirige enogo inaruk kolalku lagugwarik, yugu dogolir, “Eti mbogor ane o!” yiluk yirugwa. Ogwe ir amberak nen yugu dogolir, “Dek o! Ir malaikat mende nen, Ar wene yorirtagwi o,” yiluk yirugwa.

30Tuguluk Ar Yesus nen ir yoraga dogolir, “Ane ninaruk kolalko eti, An nake paga dek o, ogwe kir kinake paga o. 31Yogondak ya eti, o agar paga yoma endokma waganogo uwak denurak arar panggo yege o. Nen ir o agar paga yoma inobatne werek atuk welagiya mende eti, inebe arar tebelogo korek bagin o. 32Ogwe An yi perak, o agar paga yoma nen, An yadek banunggwi kalok, ir akuni ndik akuni etoma obogar wiralogo, An napma ba warigin o.” 33Ar wene eta etegerogon yirige eti, Ar kamburak mende enogo nenggerogon kamburak eti, kenam erarkige o.

34 # Mzm. 110:4; Yes. 9:6; Yeh. 37:25; Dan. 7:14 Ir akuni pakalok yemenogo nen Ar yogu dogolir, “Nir mende Hukum Wene diru mbalek eti paga yega dogolir, Ar Raja Ndilinakwa mende eti, iluk nabedal kabedal dogogin yirtaga o. Ma Kar nen yega dogolir, Ar Akuni Inakbur eti, o agar paga yoma nen yadek bugun yegen? Ar Akuni Inakbur eti ta?”

35Ar Yesus nen onggo yoraga dogolir, “We yogondak dudu ake paga mban ar, akbinak mende eti kir kinom agarik o. Eti ar ma, kir o amum eti tebelkinaka kau, tuwan laurak eti, akbinak werek paga ya arar o. Ir akuni o amum mo kigik tuwan lagwi mende eti, o nggoma lektaga eti inunggukdek arar o. 36Ar akbinak eti kinom ya werek kigik, ar akbinak eti oba ebebar andani o. Eti ekwi kinalok perak, kir ar akbinak mende eti akburi arar arugun o.”

Ir akuni Yahudi mende nen Ar Yesus ebebar andalok dek.

Ar Yesus etegerogon yoraga lagagerek, Ar etoma nen dambe dalok arar lagage. Nen tuguluk ir ambi inom abuk aru dambiyak darige. 37Ar Yesus erukbuk mende elalin pakalok arar, ir inilka paga ekigerek ogwe, ir nen inakla Ar oba ebebar andalok dek arar o. 38#Yes. 53:1Ma wene ar Nabi Yesaya nen yirige mende enogo arar apma dik yirige o,

“Tuhan wae, ta nen nir wene yugun mende eti ebebar andagin o?

Ar Tuhan obatne ambik mende eti ta oba il kowak nen yiluk erurak?

39Wene eti paga ma, ir nen inakla ebebar andalokdek arar o. Nenaluk ar Yesaya nen etegerogon ar yega dogolir,

Ar Allah nen yega dogolir,

40 # Yes. 6:10 ‘Ir inil an nen mbuk erogo bigin o,

nen ir iniliti obatne ambik mende erogo bagin o;

eti erigin paga, ir nen inil mondok kugunem o,

nen ir inaluakma mondok ebekunem o.

Nen ir nen An Noba iniyok paga wagunem o.

tuguluk An nen ir u palinabigin o.’ ”

41Ar Yesaya wene etegerogon yirige eti nenaluk, Ar Yesus eti ap nggok lektek mende arar o, yiluk paga etoma il lakalok wene Ar abok etoma yirige o.

42Etegerogon ar ogwe, akuni pakalok inom, nen ir ap Yahudi mende nggok ndak nen Ar Yesus eti ebebar andarugwa o. Ogwe akuni inilka paga telekma yu inobade nen welagugwa. Nenaluk ir akuni Farisi mende nen inilu atuk, o tamban erir tagama etoma unggurak tido bagunem yiluk, welagugwa. 43Ir inakla paga nen, Ar Allah nen ir wogok baurak mende kwak eti, we teberek negen andagwi, nen akuni nen wogok baurak kwak eti lektek o, yiluk andagu lagugwa.

Ar Yesus ane eti akuni inuwak dolkwa arar

44Tuguluk Ar Yesus Ane nggamoka dogolir, “Ir akuni An Noba ebebar andar tagwi mende eti, An Noba ebebar andar tagwi dek o, ogwe Ar An lakbani wagage mende eti oba ebebar anda tagwi o. 45Nen ir akuni An inil neya tagwi mende eti, ir Ar An lakbani wagage mende eti arar inil kertagwi o. 46An o agar paga yoma wagagi eti akbinak ake o, Nenaluk ir akuni An Noba ebebar andagun mende eti, o amum akla welagwi kau arar o. 47Ir akuni wene An emerirar taga mende kolalkwi ogwe, ebe ekikdek kalok, maduk anggin mende ar oba bigin dek o. Nenaluk An o agar paga yoma wagagi eti, akuni inendokma waganogo, inoba maduk anggin mende bik nen yiluk dek o, ogwe ir inebe kwagago ndilinaburak ake paga o. 48Ir akuni An nebe inom, nane inom, waganu dambe banunggwi kalok, ir eti obok inendokma waganek arar arik o. Wene an nane yigin eti nen ar, O Aga Yobok paga, ir inendokma waganogo inuwak dolinaka erigin o. 49Nenaluk wene An Nakla wadok andagetek paga yitaga dek o, ogwe Nombae Ar lakbani wagage mende eti nen o. Ar eti nen mban, An erurak mende inom, An yurak mende inom, yorniri taga o. 50Nen An nilu mondok o, Ar Ane yirtaga etoma eti, akuni iniluk mondok, nabedal kabedal dogorak ake arar o. Eti paga ma, An wene Ar Nombae Ane yotnegetek mutok mban kir wene yokerar taga o,” yiluk yirige.

Currently Selected:

YOHANES 12: WLW

Highlight

Copy