YOHANES 13

Ar Yesus nen Ar mutok lagwi mende iniyok korkige wene

1Ininggi noge ambi ar yiluk Hari Raya Paskah ake paga komaruok nen yiluk kigik, Ar Yesus o agar paga yoma dambe kalok, nen Ar Ombae oba laurak o arar panggo yi wagage eti ilu welagage. Akuni Ar amende agugwa agar paga yoma mende, inakba iliti nggok kunik, nen iliti kunik mondok dagik, o irep kudi arar o.

2Ar Yesus Ar mutok lagwi mende inom, kukbaga ake erom arar narugwa. Nen eta paga, ar Iblis nen, wene ar Yudas ap Simon Iskariot akbur ernogo, wene maduk mende Ar Yesus onggo nggeralurak paga akla arar nggagalkige.#13:2: Iblis nen Ar Yesus onggo nggeralurak paga: nin yumo yegerogo, ar Iblis nen akuni Ar Yesus onggo nggeraligin mende eti, ar Yudas ap Simon Iskariot akbur eti nen, onggo nggeraligin yiluk obok pulogo birige o. 3Ar Yesus ilu eti, Ar Ombae obatne mende aktip ar nggorogo Ar oba birige eti, Ar ilu mondok welagage o. Nen Ar Ilu, Ar wagage eti Ar Allah nen lakbi wagage nen Ar ligin kalok eti Ar Allah oba mban ar ligin o yiluk, ilu mban ar welagage. 4Eti paga ma, Ar metlaga lagagerek, Ar Iyom jubah eti nggolalogo biluk, anduk ambi paga obakte kede nggeralkige. 5Eka lagagerek, i todek mende baskom akla kidirogo arar wuraka lagagerek, ir Ar mutok lagwi mende yemenogo iniyok i kokbalok, nen handuk enogo paga, i amburu korinakige. 6Erinabir laga dogolir, Ar Yesus Simon Petrus arar oba panggo yi lagagemo, Ar Simon Petrus nen, “Tuhan wae, Kar nen an niyok kornabu eti mondok ndak kigik ogwe erir tagan o,” yiluk yorige.

7Ar Yesus nen onggo yoga dogolir, “Yogondak ya paga, kar An erir taga yi kakla andakbuk ogwe, yabongga eta nen kilu arigin o,” yiluk yorige.

8Ar Petrus nen Ar Yesus wene onggo yoga dogolir, “Tuhan, maga o lak. An niyok we ambi paga kwak korurak eti mondok maga!” yiluk yorige.

Ogwe Ar Yesus nen onggo yoga dogolir, “An nen kar kiyok korigin dek kalok, kar An nimbirak kunik dek arar o,” yiluk yorige.

9Ar Simon Petrus nen onggo yoga dogolir, “Ae Tuhan, etegeron yigindik mo, kalok niyok adek dek ogwe, ninggi inom, nen naluak inom ar kornabin o lak,” yiluk nggino yorige.

10Yigi nanggige Ar Yesus nen onggo yoga dogolir, “Ir akuni nggoma obok waketek mende enogo eti, ir inoba eti i korek pano arar o. Nen ar eti oba i korurak dek arar o; we iyok mban arar o. Nen kir obogar kinoba i korek pano arar o, ogwe kir obogar dek o.” (11Nenaluk Ar Yesus akuni ta nen Ar onggo nggeraligin eti, Ar iluar ma, Ar nen yega dogolir, “Nen kir obogar kinoba korek pano arar o, ogwe ar ambi kwak dek o,” yiluk eti yirige o.)

12 # Luk. 22:27 Ar Yesus ir iniyok arar i korinaka lagagerek, nen Ar Iyom jubah eti yiktega lagagerek, iyok paga korek lagage. Korek lagagerek nen yoraga dogolir, “An kir ngger ekinaki yi, kir obogar dik bogop a? 13Kir nen An wai yoknugu dogolir, Guru inom nen Tuhan inom yorniri tagwi o. Nen eta mende ebebar yu ndak-ndak ar o. 14Etiar ma, An kir mende Guru nen kir mende Tuhan, eti kigik ar ogwe An kir kiniyok i kokinaki o. Eti ndak-ndak, kir-kir mondok etegerogon ar, kir kiniyok kor-kor eku dogorak o. 15Kir kinilu aruwak nen yiluk, An nen kir ekinaki mende yi, kir nen An ekinaki ndak-ndak etegerogon ar eku dogono o. 16#Mat. 10:24; Luk. 6:40; Yoh. 15:20An wene yi ebebar mende yokeragin o: ar akuni yedoman mende enogo eti, ar ombae nggok ndak-ndak dek o, nen ar wene wolok lan yiluk lakbitaga enogo tebe biluk, ar wene wolok lektaga mende ernogo, ar kwak nggok negen dek o. 17Kir wene An emekiragi mende obogar kinilu agop o, ma kir nen obogar erugun kalok eti, kir kinadeknggen arar dogono o.

18 # Mzm. 41:10 Wene An yigi mende yoma, kir obogar kinake paga yigi dek o. Ir tani kwak An nen pulogo bagi mende eti, An nilu ar agarik o. Ogwe wene Alkitab akla diru mbalek ndak-ndak mondok arar etaruak o, ma ‘Ar ambi An nimbirak erom nertaga nen, An Nabel dagaligin o.’ 19Wene yi auwan ertagik dek kigik, An kir yokiragi o. Nen wene arar kenam ari laga kalok, kir kinakla ebebar andano o, An eti perak, Ar abok yugu dogolir AN NEBE WEREK yirige enogo arar o. 20#Mat. 10:40; Mrk. 9:37; Luk. 9:48, 10:16Wene yi An ebebar yokeragin o: Ta nen ar An wene wolok lakbigin mende enogo waganigin kalok, ar eti An arar wornabigin o. Nen ta nen An wornabigin kalok, Ar An lakbani wagage mende eti arar waganigin o.”

Ar Yesus nen Ar onggo nggeralurak mende wene elalkige

(Mat. 26:20-25; Mrk. 14:17-21; Luk. 22:21-23)

21Ar Yesus etegerogon yoraga lagagerek, Ar iliti maduk agage. Tuguluk Ar nen yoraga dogolir, “An wene yi ebebar mende yokeragin o: ar ambi kir kinanggedekla ya agarik mende nen, An nonggo nggeraligin o,” yiluk yirige.

22Ir Ar mutok lagwi mende ernogo, ta kwak paga yege eti, ir inunggukdek ar ma, inil bir-bir yugu dogolir, weh, yiluk bi ambik wakugwa. 23Ar mutok lagwi mende ar ambi Ar Yesus nen iliti kunik mondok welagagerek ma, ar eti Yesus eragalu korek werek ma, 24Ar Simon Petrus nen ilkumbuk kinok eti ta yiluk Yesus yorin o, yiluk yorige.

25Yorigemo Ar mutok laga mende ernogo, Ar Yesus oba nggwe lambo yi lagagerek, nen kinok yoga dogolir, “Tuhan, eti kwak?” yiluk kinok yorige.

26Ar Yesus nen onggo yoga dogolir, “Ar akuni eti, An roti i mangkok akla yalogo nen wogorigin mende eti arar o.” Yega lagagerek, Ar Yesus roti mbalek ambi inggim wagangga lagagerek, i mangkok akla yalka lagagerek, ar Yudas ap Simon Iskariot akbur eti arar wogorige. 27Ar Yudas roti enogo ibar-ibar wagangga kigik arar, ar Iblis enogo arar ar akla unggirige o. Tuguluk Ar Yesus nen yoga dogolir, “Yogo kar eru kakla andagen mende ibar erin!” yiluk yorige. 28Yiluk yigi nanggige, ir korek erom inom narugwa etanogo mende, ar ambi kwak nen, Ar Yesus wene ar Yudas yoge eta, wene ebe ela nen yege yiluk mondok dik biluk dek arar. 29Ir amberak nen inakla andagu dogolir, Ar Yesus nen ir pesta ekwi eti ake nen, eru akla andage mende ambi onggo kuni lan yoge a, akuni ininggi dek mende inake uang wogora lan yiluk yoge a, yiluk andarugwa. Nenaluk ar Yudas eti bendahara welagage.

30Ar Yudas roti enogo wagangga lagagerek, o kukbaga etinem ar, ar wundiluk arar lagage o.

Wene eku dogorak ngger mende wene yirige

31Ar Yudas enogo arar lagagemo, Ar Yesus nen yoraga dogolir, “Yogondak Ar Akuni Inakbur enogo wogok bugun arar o, nen Ar erigin paga, Ar Allah wogok bugun arar o. 32Ar erigin paga, Ar Allah wogok bugun kalok, Ar ogwe Ar Allah adik mban nen ar, wogok bigin o. Ogwe Ar Allah nen Ar ibar-ibar arar wogok bigin o. 33#Yoh. 7:34Nakburi o, An kir ninom idu paga dogogun dek o. Kir nen An kwaknabugun o, ogwe wene an nen, ir ap Yahudi mende inewai yorarigi enogo ndak-ndak, eterogon ar yogondak An kir yokeragin o; o nggoma An ligin mo etoma, kir nen laurak ndak dek o. 34#Yoh. 15:12, 17; 1Yoh. 3:23; 2Yoh. 5Ma wene eku dogorak ngger mende yi yokirak o: Kir-kir kiniliti kunik eku dogoni o. An kir niliti kunik ekinabi taga ndak-ndak, kir ogwe etegerogon ar, kir-kir kiniliti kunik mondok eku dogoni o. 35Kir-kir kiniliti kunik eku dogogun kalok, ir akuni obogar nen, kir eti An mutnarek lagwi mende o, yiluk inilu arugun o,” yiluk yirige.

Ar Petrus nen Ar Yesus eti an ninggukdek yigin o yiluk elalkige

36Yigi nanggige ar Petrus nen kinok Ar Yesus yoga dogolir, “Tuhan wae, Tuhan kar nggoma nggwe lak nen yiluk yitagan?” yiluk yorige. Yorigemo Ar Yesus nen onggo yoga dogolir, “An o nggoma ligin mo etoma, kar yogondak nimbirak laurak ndak dek o. Ogwe yabongga eta kalok, kar An mutnarek ligin o.”

37Yorigemo ar Petrus nen onggo yoga dogolir, “Tuhan, An yogondak mukarek laurak ndak dek eti nenaluk? Kar kake paga, we onggo dek narurak eti ndak ar o,” yiluk yorige.

38Yorigemo Ar Yesus nen onggo yoga dogolir, “Kar An nake paga, konggo dek kamburak ndak ar yegen a? Wene yi kilu togon dogono o, tewe ayam ane yigikdek kigik, kar nen kinggi mbere ambi paga, kar kane Ar endi an nunggukdek o, yiluk, nabel dagaligin o,” yiluk yorige.

Currently Selected:

YOHANES 13: WLW

Highlight

Copy