YOHANES 14
14
Ar Yesus eti Ninombae oba laurak tuan arar o
1Ar Yesus nen ir yoraga dogolir, “Kiniliti dida yugup o. Ar Allah oba ebebar andani o. Nen An noba ogwe ebebar andani ar o. 2An Nombae uma etoma, akuni dogumo pakalok werek o. An etoma ligin eti, kir dogumo kinakdip mendagago bik nen yiluk ligin o. Etegerogon dek dogolepma, An wene etegerogon yokiralep dek o. 3An kir kinakdip ndak mendagago bi lalok nen, An niyok paga kir wokinabi warigin o. Nen An o nggoma dogogin eti, kir ninom etoma arar dogogun o. 4An o ligin mo etoma, kir tuan laurak kinilu arar o,” yiluk yirige.
5Yigi nanggige ar Tomas nen kinok yoga dogolir, “Tuhan wae, nir yi, Tuhan kar nggoma ligin eti ninungguk dek ar ma, nen nir tuan etoma laurak eti nenggerogon ninilu arurak kegen?” yiluk yorige.
6Yorigemo Ar Yesus nen, “Tuan ebe An ar o, nen ebebar wene eti An ar o, nen nabedal kabedal edo wene eti An ar o. An Nombae oba luok nen yiluk kalok, An Noba nggweru warugun dek kalok, ir eti An Nombae oba lugun mondok dek arar o. 7We kir nen An pik pak dikbanilep dogolepma, kir nen An Nombae ebe dikbilep ar o. Nen yogondak ya, kir Ar obok dikbogop, nen Ar kinil obok kogop o,” yiluk yoragage.
8Yigi nanggige ar Filipus nen Ar Yesus yoga dogolir, “Tuhan wae, Kar Kombae eti, nir ninilu aruwak nen, yokneran o,” yiluk yorige.
9Ogwe Ar Yesus nen onggo yoga dogolir, “An kir ninom idu paga welagorik ogwe, Filipus An dik banenggekdek ar welagana keyagi eti? Ir akuni An inil obok neyarugwa mende eti, An Nombae eti inil obok karugwa arar o. Ma, wene ‘Kar Kombae ebe yoneran yiluk yegen yi, nenggerogon paga kwak yegen’? 10Filipus! An Ar Nombae nimbirak eti ambiar o, nen Ar An Nombae nen, An nimbirak eti ambiar o. Etiar ogwe, kar kiliti ebebar andagikdek a? An nen nena kar yokigi mende eti, An naredo dogorogon paga yokigi dek o. An Nombae nimbirak kunik mondok werek ma, Ar nen dombok ar erir wari taga o. 11An Nombae nimbirak ambiragar dambulik agarik o, nen Ar An Nombae nen An nimbirak ambiar dambulik agarik o. Etegerogon arar ma, An noba ebebar andan o. Nenaluk, ebebar kwak kakla andamo, wene An erir waritaga etoma paga, kakla ebebar andan o. 12Wene yi An ebebar mende yigin o: ir akuni An noba ebebar andagun mende eti, ir nen An eki mende etoma erugun ar o. Eti kigik ar ogwe, ar nen wene nggok ndak mende amberak etoma erigin mban o. Nenaluk An Ar An Nombae oba ligin ma o. 13Nen kir ye mende nde mende nggino An nendaga paga yugun kalok, An nen yamakenagin o. Nen yamakenagin eti paga, Ar An Nombae endaga eti An paga arar wogok bugun o. 14Kir nen An nendaga paga, nena-nena etoma nggino yornirugun kalok, An nen wokeragin arar o.”
Ar Yesus nen Ar Allah mende Roh eti lakbi warurak mende abok yirige wene
15“Kir an kiniliti kunik kalok, ye wene nde wene eku dogorak yirigi mende etoma, kir nen eku dogogun o. 16Ar ambi kir kinom mondok-mondok dogolir, kir yamakinaga dogorak ake paga, An Nombae nggino yorumo, kir wokeragin o. 17Ar Allah mende Roh eti nen, wene Ar Allah abok ebebar mende kenam erogo bigin o. Nen ir o agar paga yoma nen, Ar ebe waganugun dek o, nenaluk Ar ebe inil kakbuk nen inunggukdek mende arar ma o. Ogwe kir eti Ar kinilu o, nenaluk Ar ebe kir kinom dogolir, nen kinom ambi ar dogogun o.
18Nen kir elege wenabeda nenggen mbo binagaluk ligin dek o. An kir kinoba warigin o. 19We dogoluk dek arar, agar paga yoma nen, inil ambi inom An neyagun dek arar o. Ogwe kir nen kinil neyagun o. Nenaluk An niluk mende ma, kir ogwe kiniluk ar dogogun o. 20O telek ambi enam ari warigin eti paga, An Nombae Nimbirak ambi ar dambulik eti kinilu arigin o. Ma, kir An ninom dambulik nen An kir ninom dambulik.
21Ir akuni An wene ekudogorak yirigi mende etoma wokbiluk eka kalok, Ar eti An iliti kunik arar o. An Nombae eti, ir akuni An iniliti kunik ernakwi mende eti, Ar iliti kunik erinaka dogolir o. An ogwe ar akuni eti niliti kunik eka, nen Nebe neyawak nen inugur kega erigin o.”
22Tuguluk Ar Yudas (Yudas Iskariot kwak dek) eti nen kinok Ar Yesus yoga dogolir, “Tuhan wae, Tuhan Kar nenaluk nir inom, nen o agar paga yoma inom, Kar kebe kinugur niyau yiluk yegen?”
23Ar Yesus nen onggo yoga dogolir, “Ir akuni An iniliti kunik mende eti, An wene eku dogu yirigi mende etoma yugu ndak-ndak eka dogogin o. Nen An Nombae nen ar eti iliti kunik eka dogogin o. Nen An inom nen An Nombae inom ar eti oba watuk ninom dogogun o. 24Ir akuni An iniliti kunik dek mende eti, An wene eku dogorak yirigi mende etoma eka dogogin dek o. Nen wene eku dogu mende, An nen emekiragagi mende etoma, An nen dek o. Etoma An Nombae lakbani wagage eti nen arar o.
25An wene kir yokirataga yoma, An kir ninom werek ya paga arar o. 26Ogwe, Kir yama kinaga dogu mende, Ar An Nombae nen, An nendaga paga Ar Allah mende Roh eti lakbi warigin eti nen, ye wene nde wene emerkiraga, nen wene An yokeraga lagi mende etoma obogar kinoba yidilogo binagagin o.
27Kir kinakla adeknggen dogorak mende eti, kinoba binagagin o. An nadik nakla adeknggen mende eti, kir wokeragin o. Nen An wokeragin eti, o agar paga yoma nen wokiragun mende eti ndak-ndak dek o. Kir kinakla dibi yugup o, nen kir kinobade arugup ar o. 28An nen yokeragagi mende kinaruk kolalkop o, ‘An ligin ogwe, tuguluk niyok paga bikina warigin o.’ Kir kiniliti An noba kunik kalok, An Nombae oba ligin eti, kir kinakla adeknggen arigin o. Nenaluk An Nombae eti, Ar Ebe nggok lektek mende arar o, ogwe An eti we bugudak, Ar apma mende o. 29Wene etoma obogar etarir lagikdek kigik, An yogondak ya yokerar taga o. nen etoma etarir waga kinil kalok, eti paga kir kiniliti ebebar andagun o. 30An wene kir ninom yuk negen ambi mbalugun dek arar o, nenaluk o agar paga yoma ir ininggi pago werek mende eti, ir warurak o arar panggo yege o. Ogwe, ar An apma banurak obatne dek o. 31Nen ye wene nde wene etoma, obogar etarurak mende arar o. Eti etaga paga, agar paga yoma nen, An Nombae niliti kunik eti paga, nen Ar Nombae nen erurak yiluk noba birige mende eti, obogar eki o.
Ma yogondak yoma nen luwok o,” yiluk yirige.
Currently Selected:
YOHANES 14: WLW
Highlight
Share
Copy
Want to have your highlights saved across all your devices? Sign up or sign in
