Matius 15
15
La'apo sobondarnyo inyo bulah monsio kotor di hadapan Allah
(15:1-20)
(Mrk. 7:1-23)
1Lopas nian, ado boboropo pomimpitn agama Yahudi inyo datakng doi' Yerusalem, ia'an boboropo pomimpitn doi' kolompok Farisi ongko boboropo guru agama Yahudi jam. Sia' datakng ko Yesus. Kato sia', 2“Hibo boko murid kolai kinyo monaati adat baso angki-bayatn kito? Sia' co bobasu' jari sobolupm sia' makatn.”
3Apo timbas Yesus ko sia', “Hibo kaitn molanggar porintah Allah, bayo ongkah honda' jumpat adat baso angki-bayatn kaitn. 4Obai Allah bopandir, ‘Hormati indai Bopai kaitn.’#15:4: Doi' buku Keluaran 20:12 ongko Ulangan 5:16. Allah pan bopandir, ‘Urakng inyo mohayam indai bopainyo gola' dihukupm mati.’#15:4: Doi' buku Keluaran 21:17 ongko Imamat 20:9. 5Apo kaitn bopandir obai siku' urakng suba' bopandir ko indai bopainyo, ‘Aku culih moonji'i potulukan ko kaitn agi'. Obai aku udah bojanji pakai' momposombahan nantai ko Allah.’ 6Kaitn bopandir aman ado urakng inyo molabuhan nantai, lalu io kinyo gola' mohormati indai bopainyo agi'. Jadi, agatn caro jumpat adat istiadat kaitn nantai, lalu kaitn moanggap pomandiran Allah kinyo gola' ditaati agi'. 7Jadi, sobondarnyo kaitn bayo pompadah boi'. Timpu joman komai, nabi Yesaya udah monyampaian pomandiran Allah mongona'i kaitn. Topat bondar pomandiran Allah ni'in:
8‘Boko urakng ni'in bayo morogo'i Aku agatn pomandiran di bibir sia'.
Padohal hati sia' kinyo bobondar honda' monyonangan hati Ku.
9Pocumo ja' sia' monyombah Aku. Obai sia' bayo moajaran boko poraturan monsio.’ ”#15:9: Doi' buku Yesaya 29:13. Timpu joman komai, nabi Yesaya mongatoan nantai mongona'i banso Israel. Apo watu joman Yesus, pomandiran nantai monggambaran banya' pomimpitn agama Yahudi agatn bondar!
10Lalu, Yesus moningkau boko urakng banya', “Sio bopandir ko sia'! 11Dinga'an huatan mongoroti cam ni'inan: boko hal inyo mansu' ko dalapm nyao kinyo bulah boko urakng monjadi campah. Apo boko hal inyo koluar doi' nyao, nanam inyo bulah boko urakng monjadi campah bukakng-tubuhnyo.”
12Boko murid Yesus datakng lalu bopandir ko Sio, “Kata'an Duatn tohu obai pomandiran Duatn nantai boko urakng Farisi tosinggukng?”
13Timbas Yesus, “Ado boko tontanaman inyo kinyo ditanam ulih Allah Bopai-Ku inyo di sorugo. Sotiap tontanaman nantai paca'an dicabut sampai ko boko uratnyo! 14Jadi, jangan bodulian sia'. Sia' samo sama'an urakng buto inyo moirikan urakng buto. Aman siku' urakng buto moncubo moirikan urakng buto bukainyo, pasti kododuonyo paca'an jatu' ko dalapm parit.”
15Lalu Petrus bopandir ko Sio, “Tulukng jolasan ko koi poumpamoan nantai tontai mongona'i nyao.”
16Timbas Yesus, “Kaitn ija' jam bolupm mongoroti jam! 17Pasti kaitn tohu obai pomakatn minuman inyo mansu' ko dalapm nyao, turutn ko dalapm porut, lalu dibuakan ko jambatn ja'am. 18Apo pomandiran inyo koluar doi' mulut monunju'an hati boko urakng. Boko hal nantai inyo ulih bulah boko urakng monjadi campah bukakng-tubuhnyo. 19Obai boko pikiran jahat sama'an ni'in boasal doi' hati: pikiran pakai' mombunuh, bomporajoan bulah dosa, mongolit, bulah kotumbukan mongutu' uyakng. 20Boko hal nantaiam inyo bulah boko urakng monjadi campah, bukainyo obai boko urakng kinyo mombasu'i jari sobolupm makatn!”
Siku' botina' inyo bukainyo urakng Yahudi pocayo obai Yesus bokuaso
(15:21-28)
(Mrk. 7:24-30)
21Lopas nantai, Yesus moninggalan tompat nantai lalu botula' ko doerah Tirus ongko Sidon. 22Siku' botina' doi' doerah nantai datakng ko Yesus. Botina' nantai doi' banso Kanaan. Sio moningkau, “Tuhatn, Rajo doi' koturutan Daud. Kasihicam aku! Ana' botina' ku dirasu'i roh jahat. Io kotakan podih jorih.”
23Apo Yesus kinyo monimbasi botina' nantai samo sokali. Lalu, boko murid Yesus datakng. Sia' minto ko Yesus, “Siuh bo botina' nantai botula'. Io torus ja' mombodapan kito kapikng mondongkakng-mondorah.”
24Jadi, Yesus monimbasi botina' nantai, “Allah bayo moutus Aku ko boko urakng Israel. Sia' samo ubo domba inyo sosat.”#15:24: Sobondarnyo, Yesus mongasihi boko urakng. Sio bayo mongatoan ni'in pakai' monokatan pikiran boko urakng inyo salah. Banya' urakng Yahudi bopikir Rajo Inyo Dijanjian Allah datakng pakai' monyolamant'an sia'. Sia' monganggap banso bukai kinyo cucu', hususnyo musuh Sia' sama'an banso Kanaan apo, Yesus momuji indai ni'in obai io pocayo ko Sio.
25Apo botina' nantai mondampiki Yesus lalu tundu' monyungkapan di hadapan Sio. Kato botina' nantai, “Tuhatn, tulukngbo aku!”
26Kato Yesus, “Kinyo cucu'#15:26: Yesus gola' monulukng urakng Yahudi ja'am. monguti' pomakatn inyo di siap'an pakai' boko bobia' lalu di buakan ko kudu'!”
27Kato botina' nantai, “Bondar Tuhatn. Apo boko kudu' pan ulih monggilati boko komputikng inyo jatu' doi' meja habakngnyo.”
28Lalu Yesus bopandir ko io, “Indai, kotakan bosar kopocaya'an kolai! Lalu, biaram tojadi sosuai agatn porminta'an kolai.” Watu nantai jam ana' botina' nantai lansukng nyamanam.
Yesus monyamani boko urakng sakit
(15:19-31)
29Lopas nian Yesus moninggalan doerah nantai lalu bojalatn di pinggir Danau Galilea. Sio noi' ko pucu' bukit lalu dudu' di santai. 30Banya' urakng inyo datakng ko Sio. Sia' mombaba' boko urakng agatn bomacapm ponyakit. Ado urakng inyo lumpuh, urakng inyo buto, urakng inyo timpakng, urakng inyo bisu, huatan banya' urakng agatn ponyakit bukai. Sia' molota'an boko urakng sakit nantai di pohadapan Yesus. Lalu, Sio monyamani somuo urakng sakit nantai. 31Urakng banya' nantai kagupm moniant boko inyo bisu ulih bopandir, urakng inyo timpakng ulih bojalatn, huatan urakng buto ulih moniant. Obai nantai, sia' somuo momuji Allah banso Israel.
Yesus bulah mujisat moonji'i pomakatn ko ompat ribu urakng
(15:32-39)
(Mrk. 8:1-10)
32Lalu Yesus moningkau boko murid-Nyo. Kato-Nyo, “Aku kotakan salu' agatn boko urakng banya' ni'in. Udah tigo ari sia' bosamo agatn Aku. Ni'in sia' conyiant pomakatam. Aku cuku honda' moyiuh sia' pulakng ongko kolaparan obai mungkitn sia' paca'an pinsatn di dalapm pojalatan.”
33Boko murid-Nyo bopandir ko sio, “Tompat ni'in langunt. Co mungkitn kito ulih bodapat roti pakai' urakng sobanya' ni'in!”
34Kato Yesus ko sia', “Ado boropo pingkai' roti umputn kaitn?”
Timbas sia', “Ado tujuh pingkai' roti ongko boboropo iku' ikatn kocit.”
35Lalu, Yesus monyiuh urakng banya' nantai dudu' di pucu' tanah. 36Lopas nian, Yesus monguti' tujuh pingkai' roti ongko boboropo ikatn nantai lalu moucap'an torima' kasih ko Allah. Sio momingkai'-mingkai' roti ongko ikatn nantai, lalu dionju'nyo ko boko muridnyo oca' dipombagian ko boko urakng banya' nantai. 37Sia' somuonyo makatn sampai konyang. Lopas nantai, sia' mongumpulan kolobihannyo ko kobudu'. Ado tujuh kobudu' inyo bisi! 38Inyo jumpat makatn kiro-kiro ompat ribu urakng, bolupm tomansu' botina' ongko boko bobia'.
39Lopas nantai, Yesus monyiuh urakng banya' nantai pulakng. Sio siku' noi' porohu, botula' ko doerah Magadan.
Currently Selected:
Matius 15: TBDS
Highlight
Share
Copy
Want to have your highlights saved across all your devices? Sign up or sign in
