Matius 16
16
Boko pomimpitn agama Yahudi minto Yesus bulah mujisat
(16:1-4)
(Mrk. 8:11-13)
1Lopas nantai, ado boboropo pomimpitn agama Yahudi doi' kolompok Farisi ongko kolompok Saduki, sia' datakng ko Yesus. Sia' honda' moncubo'i Sio. Jadi, sia' minto oca' Yesus bulah boko mujisat pakai' mombutian ko sia' obai kuaso-Nyo doi' Allah. 2Apo Yesus monimbas, “Aman langit mirah timpu matoari honda' tonggolapm, ongko kaitn bopandir, ‘Pasti cohayonyo borosih.’ 3Apo aman ado lotupm huatan potakng-hiru' watu sunsukng, ongko kaitn bopandir, ‘Pasti ari honda' hujatn.’ Jadi, aman kaitn moniant langit, kaitn ulih mongotohu'i cuacanyo agatn bondar. Apo biar pan kaitn moniant boko kojadian inyo tojadi joman ni'in, kaitn totap kinyo dapat mongotohu'i kohonda' Allah.” 4“Boko urakng di joman ni'in kotakan jahat ongko kinyo sotia ko Allah. Sia' monuntut suatu tando. Apo bayo sobuti' inyo paca'an dionju' ko sia', bayo mujisat sama'an inyo tojadi ko Nabi Yunus timpu joman komai.”#16:4: mujisat inyo dimasud Yesus ia'an watu Sio bobali' hidup. Nabi Yunus ado di porut ikatn somanah tigo ari, Yesus pan ado di dalapm pasaran somanah tigo ari sobolupm Sio bobali' hidup.
Lopas nantai, Yesus botula'am moninggalan sia'.
Jagocam diri oca' co sonjumpat'an ajaran urakng Farisi ongko Saduki
(16:5-12)
(Mrk. 8:14-21)
5Timpu sia' monyomborakng danau, boko murid Yesus tongkolupatn mombaba' roti. 6Yesus bopandir ko sia', “Jagocam diri kaitn tohadap ragi doi' boko pomimpitn agama Yahudi, doi' kolompok Farisi huatan doi' kolompok Saduki.”
7Jadi, sia' bopikir mongona'i pomandiran Yesus nantai. Sia' bopandir ko siku'-monyiku', “Yesus momandiran nantai obai kito co mombaba' roti.”
8Apo Yesus mongotohu'i la'apo inyo sia' kisahan. Jadi Sio bopandir, “Kuba'annyo kaitn jangan botikakan mongona'i co nyiant roti! Kaitn kurakng pocayo ko Aku! 9Kaitn ija' bolupm mongoroti jam! Tongkolupatn kaitam kojadian lima' roti dionju' ko lima' ribu urakng? Lalu ado banya' sisa'nyo inyo kaitn kumpulan. 10Kata'an tongkolupatn kaitam mongona'i tujuh pingkai' roti inyo dimakatn ompat ribu urakng. Lalu ado tujuh kobudu' sisa'nyo inyo kaitn kumpulan. 11Kuba'annyo kaitn udah mongorotiam! Aku co bopandir ko kaitn mongona'i roti. Apo jagocam diri kaitn tohadap ragi doi' boko urakng Farisi huatan boko urakng Saduki.”
12Obai nantai, hoyu' sia' mongoroti. Yesus kinyo bomasud oca' sia' monjago diri tohadap ragi roti. Sio bomasud oca' sia' monjago diri tohadap ajaran urakng Farisi ongko urakng Saduki.
Rasul Petrus mongatoan Yesus nantai Kristus, Rajo Inyo Dijanjian Allah
(16:13-20)
(Mrk. 8:27-30; Luk. 9:18-21)
13Lopas nantai Yesus botula' ko doerah dampikng kota Kaisarea Filipi. Di santai Sio botakutn ko boko murid-Nyo, “Kuji boko urakng, sopo Ana' Monsio?”
14Timbas sia', “Ado inyo bopandir Duatn ni'in Yohanes Pombaptis. Ado jam inyo bopandir Duatn ni'in Nabi Elia. Ado urakng bukai inyo bopandir Duatn ni'in Nabi Yeremia damo salah siku' urakng nabi bukai.”
15Lalu, Yesus botakutn ko sia', “Apo, monurut kaitn siku', sopo Aku ni'in?”
16Simon Petrus monimbas, “Duatn ni'in Rajo Inyo Dijanjian Allah.#16:16: Di buku Kisah Boko Rasul 4:24-25, Petrus mohubukan pongorotian ‘Kristus’ agatn Mazmur pasal 2. (Tiat catatan ponjolasan di Mat. 1:16.) Duatn ni'in Ana' Allah inyo hala hidup.”
17Kato Yesus ko io, “Simon ana' Yunus, kolai udah diborokati Allah Bopai-Ku inyo di sorugo. Obai kolai mondapat pongorotian mongona'i hal nantai doi' Sio, bukainyo doi' monsio. 18Dinga'anbo! Kolai ia'an Petrus, inyo rotinyo ‘Bukit Batu’. Di pucu' bukit batu ni'in Aku paca'an mombangun jomaat-Ku huatan kuaso komatian kinyo mampu mongalahan sia'.#16:18: Kato ‘maut’ di si'itn ulih jam rotinyo bokuaso Rajo Sitatn damo komatian somanah-manahnyo. Yesus mongatoan obai Rajo Sitatn kinyo paca'an bulah jomaat-Nyo tongga' pocayo ko Sio. KATA'AN Yesus mongatoan obai jomaat-Nyo paca'an hidup somanah-manahnyo di sorugo. 19Aku paca'an moonju' ko kolai kunci Koraja'an Sorugo. Aman kolai mongobat sosuatu di dunia ni'in, hal nantai paca'an dikobat di sorugo jam. Aman kolai molopasan sosuatu di dunia ni'in, hal nantai paca'an dilopasan di sorugo jam.”#16:19: Ayat ni'in rotinyo Yesus moonji'i kuaso ko Petrus pakai' momimpitn jomaat-Nyo.
20Lopas nantai, Yesus morarakng boko murid-Nyo oca' jangan momadahan ko sopo pan obai Sio nantai Rajo Inyo Dijanjian Allah.#16:20: Tiat catatan ponjolasan di Lukas 9:21.
Yesus momadahan mongona'i ajab sonsaro inyo paca'an dialapi-Nyo
(16:21-23)
(Mrk. 8:31-33; Luk. 9:22)
21Mula'i doi' watu nantai, Yesus monjolasan ko boko murid-Nyo obai Sio gola' botula' ko Yerusalem. Boko pomimpitn banso Yahudi, boko imam kopala', huatan boko guru agama Yahudi paca'an bulah Sio ajab sonsaro. Sio paca'an dibunuh apo Allah paca'an bulah Sio bobali' hidup timpu ari kotigo. 22Apo Petrus monari' Yesus ko sopia' lalu monikaki Sio. Kato Petrus, “Jangan, Tuhatn! Co mungkitn Allah mombiaran Duatn ajab sonsaro sama'an nantai!”
23Yesus mongilikng ko Petrus. Kato-Nyo, “Jangan kolai monjadi sama'an Rajo Sitatn mohalak-halaki Aku momonuhi roncana Allah. Kolai sonjumpat'an pikiran monsio, bukainyo pikiran Allah!”
Somuo murid Yesus gola' siap ajab sonsaro apo paca'an bodapat jam hidup di sorugo
(16:24-28)
(Mrk. 8:34–9:1; Luk. 9:23-27)
24Lopas nian Yesus bopandir ko boko murid-Nyo, “Aman siku' urakng bondar-bondar honda' monjadi murid-Ku, io gola' moninggalan kosonangan dirinyo siku'. Io gola' momikul kayu salibnyo huatan hala tuyut Aku. 25Aku mongatoan nantai obai urakng inyo moutamoan kohidupannyo sikuꞌ, sobondarnyo kinyo paca'an mondapat'annyo. Apo urakng inyo monyorahan kohidupannyo siku' obai Aku, pasti paca'an mondapat'annyo. 26Soumpamonyo ado siku' urakng inyo ulih mondapat'an somuo hal di dunia ni'in, apo io kohilakan nyaonyo sobondarnyo io co borojoki. Io culihnyo momboli nyaonyo. 27Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo. 28Dinga'anbo, ado urakng di antaro kaitn somuo di si'itn inyo kinyo paca'an mati sobolupm moniant Ana' Monsio datakng agatn Korajaan-Nyo.”#16:28: Ado tigo komungkitan damo lobih pakai' watu sia' paca'an moniant Koraja'an Allah. 1) Watu boboropo rasul-Nyo ulih moniant komulia'an-Nyo di gunung (17:1-8), 2) Watu Sio mati di kayu salib lalu hidup Agi' DAMO, 3) Watu Roh Allah moonji'i ko sia' komulia'annyo (Kisah 2).
Currently Selected:
Matius 16: TBDS
Highlight
Share
Copy
Want to have your highlights saved across all your devices? Sign up or sign in
