Wïlöölö 22
22
Eeberam Ajïëy Ki Man Cïp Aydhak
1'Ba na tïme na køør gïïögø bëët, Jwøk Eeberam apääre, ni kööe jïgø, ni «Nyie Eeberam.»
Ni kö Eeberammi, ni «Aani en.»
2Ni kö Jwøki, ni «Ennø, lwør wäädï ma Aydhak na näk aciel keere, na mëërï ki gø, ni ciï ŋööm Möria; ni cïpï gø no olämi man wø waaŋ bäät kïdi aciel mano caana jïrï røk kïte moo en kaace.»
3'Ba na tïme na amöölla cøøn, Eeberam aö maal ni jiiŋ jammi bäät arëën mare, ni lwöte ki jiy ariiø røk jø tïïc moe, ni lwør wääde ma Aydhak; ni kääe ki jenni mo waaŋ olämi ki gø, ni ö maal ni ci kanya caan Jwøki jïre. 4'Ba na tïme na dää nïne, Eeberam alwïthö nyïme, ni joot kanyøca ki kany mo bäär. 5Køøre Eeberam aköö jï jaga näk ariiø, ni «Dööŋŋu kany ka arëën, nee aani ki nyilaal nee wa ciwa kuna wøørwa nyeŋ Jwøk kaace; køøre waano duu baŋu.»
6Ni ö Eeberammi ni lwør jenni mo waaŋ olämi ki gø, ni cïp ge göön wääde ma Aydhak, ni lwør maac ki caakïïn ni käär ge ki cere, ni putge aay na aciel karge riedi. 7Køøre Aydhak acäänö ki wänni ma Eeberam ni kööe, na «Awuuö.»
Ni kö wänni, ni «Aani en, wääda.»
Ni kö Aydhaki, ni «Ennø, maac ki jenni nutö. ?'Ba age nyidiel mano cïp no olämi man wø waaŋ?»
8Ni kö Eeberammi, ni «Nyie wääda, Jwøk ki dëëre cïpö ki nyidiel mano waaŋ no olämi.» Køøre gena put aay na aciel karge riedi.
9'Ba na nø pïïcge kanya näk ocaan Jwøki, Eeberam atïïö ki gïn wø cïp olämi bääte kaace, ni peeth jenni na karge, ni twöc wääde ma Aydhak, ni pïël gø bäät gïn wø cïp olämi bääte bäät jenni maal. 10Køøre Eeberam cere arwaak baŋ caakïïn ni lwør gø nee wääde ŋaale. 11'Ba nyïïatwiel maal mar Wuuö Jwøk acwötö ki maal ni kööe, ni «Eeberam! Eeberam!»
Ni kö Eeberammi, ni «Aani en.»
12Ni kö nyïïatwielli, ni «Kär cerï ŋaapï bäät nyilaal; kär dee gïn mo tïïyï ki gø, kiper kawaane ennø møn, aŋääa niï lwäär ki Jwøk, kiper wäädï ma aciel keere kärï mänö ki aani.»
13Køøre Eeberam wïïe atïŋ maal ni lwïthe, ni joot nywø røømmø ni tuge omak abuŋŋö; ni ö Eeberammi ni cøøe ni lwør nywø røømmø manøgø, ni ŋaal gø ni cïp gø no olämi man wø waaŋ na kar wääde. 14Køøre Eeberam nyeŋ kanyøgø aput cwøl ni «Wuuö Jwøk cïpö,» kaawat man poot caani dïcäŋi en, ni «Bäät kïdi manøgø, Wuuö Jwøk cïpö yie.»
15Køøre nyïïatwiel maal mar Wuuö Jwøk, Eeberam acäŋ cwøllø ki maal ri rietge, 16ni kööe, ni «Mana caan Wuuö Jwøki beeye en, ena köö, ni ‹Kiper gïna tïïyï enøgø, ni kärï wäädï ma aciel keere mänö, 17aana kööŋ ŋëëta keera ki man gwïëdha ïïni døc kiree, ni tïïa nyïïkwaayï nee nyaacge ni caala ceer mo maal, ni caala nyeŋ akwöny deŋ naama dwøŋ; ni ö nyïïkwaayï ni maanyge mïëc nyïïmänge. 18Ni ö wïth juurre mo bäät piny bëët ni gwïëdhi ki køør nyïïkwaayï, kiper mana leŋï dwøra.› »
19Køøre Eeberam adøø baŋ jaga näk ariiø, ni öge maal ni aacge na aciel ni ge døøa Bëërcïïba; ni ö Eeberammi ni put bëëdö Bëërcïïba.
Luum Nyïïkwaac Neeyör
20'Ba na tïme na køør gïïögø bëët, luup møøk acaan jï Eeberam, ni køp, ni «Milka cï coku ma Neeyör anyöödö ko obwöre, ni jït coku ko obwöre; 21ni beege Uc na näk kaa, ki coki ma Buc, ki Këmuël wää Aram, 22ki Ködhat, ki Adhö, ki Pildac, ki Jitlap, ki Batuël.» 23Ni ö Batuëlli ni nywøl nyaare ma Rebëëka. Jøøgø na abära yøø beege wäät Neeyör cok Eeberammi na nywøl Milka. 24'Ba obwöre mo Neeyör moa nywøl dhaaŋŋa näk kwanynyø, na näk nyeŋŋe Rëëma, beege Theba, ki Gaam, ki Taac, ki Maika.
Currently Selected:
Wïlöölö 22: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
