Luk 14
14
Kanya Ö Jecu Na Køny Dhaanhø Ki Cäŋ Jwömö
1'Ba dïcäŋ jwömö aciel na ci Jecu baŋ cam yi øt nyen mør mo kare dwøŋ dï jø Paricith, gena tïmö ni ge neeta eni døc. 2'Ba kanyøce da dhaanhø mør mo ena nyïme mo dëëre obooc. 3'Ba Jecu jø wø caan tiet ciik Jwøk ki jø Paricith apëënynye, ni kööe, «?Beeye gïn mo orømø ki køør ciik Jwøk ki man køny dhaanhø mo tuu ki cäŋ jwömö, wala jïre bäär?» 4'Ba gena lïŋö jaak. Kanyøgø Jecu ŋatøgø akäle ni køny gø, ni wëëk gø wääth. 5Ni kööe jïge, na «?Aŋa dïïu ni jïre da arëën wala dhieŋ mo opäth yi iith ki cäŋ jwömö, ni ba laar gø käl wøk?» 6'Ba gïnögø atïmö ni ba maarge løk.
Pwöc Kiper Jø Wø Døøc Dëëtge Mo Døøŋŋø
7Kanyøgø, Jecu jøøa näk ocwølø ki eni kar cam acäänne ki luubö mo keda leer, kanya joot geni ni ge jiera kwör bëëte moa beyø geni. Ni kööe jïge, 8ni «Kany wø näk mo ïïno cwøl ŋat mørri kar nywöm, kärï pï kany mo owøørø, kiper kanymør da ŋat mo dwøŋŋa kare ki ïïni mo ee cwølø. 9'Ba ŋata cwøl uuni öö ni kööm ïïni, ni ‹Wëëk kany nyeni.› Kanyøgønø, wïïï olää noo daaï kar bëëtö jaak. 10'Ba kany wø cwøl ï kar nywöm, ciï ni pïï kar bëëtö jaak, kiper kanyo ö ŋata cwøl ïïni niï köömme, ni ‹Nyie nyawat, ci kanyø beer ice.› Kanyøgønø, ï tïmö ni ïïno wøørø nyïm jøøa en kar cam ki ïïni na aciel. 11Kiper jiy bëët mo wø døøc dëëtge mo døøŋŋø, odwøk piny. 'Ba ŋat wø døøc dëëre mo can, otïïc ni dwøŋ.»
12Kanyøgø ŋata cwøl eni kar cam acäänne thuwø, ni kööe, ni «Kany wø tïmï ki cam jï jiy, nee mar wäär wala waŋcäŋ, kär niï cwøla jøøa näk nyïïawäätï, wala nyïïmeru, wala tuuŋu, wala jø atut moï mo okwär. Kanymør ï läwge ka cwøl thuwø ni ge cunna ïïni. 13'Ba ni näk mo ï tïmö ki cam jï jiy, cwøl jøøa can, ki jøøa näk dëëtge oränynyö, ki ŋööte, ki cööye. 14'Ba ïïno gwïëth, kiper ï ba maarge cunnö. 'Ba ïïno cunni cäŋo duu jøøa beyø wøk ki yi thøø.»
Luum Caap Nywöm
(Mathiew 22:1-10)
15'Ba nyen mør dëët jøøa en kar cam ki Jecu na aciel, na wïny gïnögø, ena köö jïgø, ni «Gwïëth oen dëër ŋato cämö ki møø buc Jwøk.» 16'Ba Jecu aköö jïgø, ni «Da dhaanhø mør mo otïïö ki cam mo päl ni cwøl jiy mo thööth. 17'Ba na tïme na dïcäŋ cam, eni laŋŋe ajääŋŋe nee jøøa näk ocwølø köömme, ni ‹Ööu, jammi bëët anø løny.› 18'Ba gena kweer karge bëët. Ni kö mana dïkwøŋŋi, ni ‹Aana ŋëëö ki pwödhö, maa bäŋ doo kääŋö ki man neena gø. A kwaya ïïni, naa weyï.› 19Ni kö maya, ni ‹Aana ŋëëö ki rwäth puur apaar. A cøøa kuna päänynya geni. A kwaya ïïni, naa weyï.› 20Ni kö mørri, ni ‹Aana nyöömmö ki dhaagø. Kiper manøgønø, a ba maar öö.› 21Køøre laŋŋøgøøni aöö ni køp gïïögø jï kwääye. Kanyøgønø, kwääyögø na wää paaci enø, laŋŋe acäänne no ogootø, ni kööe, ni ‹Laar ci wøk ni caathï uutjïëthe moa døøŋŋø ki moa therø dï pääny, ni kälï jøøa can ki moa näk oränynyö, ki cööye ki ŋööte.› 22Ni kö laŋŋøgø, ni ‹Kwäärö, gïna caanï anø tïïc, 'ba poot da kany mo laac.› 23Ni kö kwääyögø jï laŋŋø, ni ‹Ci uutjïëthe moa døøŋŋø ki moa näk ogaaŋŋø ki deŋge, ni magï jiy ki teek nee öge, nee øda pääŋe. 24'Ba a cäänna ïïni, ni bäŋ dhaanhø aciel røk jøøa näk ocwølø moo bel cama.› »
Pwöc Kiper Man Kwøŋ Wïc Caar
(Mathiew 10:37-38)
25'Ba kanyøgø lwaak mo päl aläp køør Jecu, ni ö eni ni løø nyïme baŋge, ni kööe jïge, 26ni «Ni näk da ŋat mo ööa baŋa ni ba män ki wänni, ki menni, ki cïïe, ki nyïïe, ki nyïïmenni, këël jwïëye kiree, ŋatøgø ba maar tïmö na bääŋa. 27Ni ŋato wäro ba käär jaadhe na näk odëëdö, ni cäädhe køøra, ba maar tïmö na bääŋa. 28?Kiper aŋa dïïu ni many man gëëde ki øtø mo dwøŋ ni ba kwøŋ pï piny ni kwaan jape ki man näk mo rømø ki gø? 29Kiper kanymør kanyo cwääc tier gø ni tïme ni ba maar lønyø jïre ki man thöör dëër gø, jiy bëët mo wø neen gø tïmö ni buua gø, 30ni ge köö, ni ‹Nyeni agëëdö ki øtø, 'ba atïmö ni ba maar lønyø jïre ki man thöör gø.› 31?Wala a nyenynye mane na doo ci kuna këëde ki nyeya mør mo määnynyö baŋe, ni ba kwøŋ pï piny ni cooŋ jiy, nee maara lønyø jïre ki man aae ki jiy ma kume apaar kuna røømge ki ŋata ö baŋe ki jiy ma kume ma pïërariiø? 32'Ba ni näk ba løny jïre, kanyo poot maya ni kare poot bäär, eni ööta baŋe ki dwøl, ni kwaya bëët-mëër. 33Kiper manøgø nø, ŋato wäro en dïïu noo ba taak japa en jïre bëët, ba maar tïmö na bääŋa.
Pwöc Mana Caan Na Leer Ki Ra Acäbö
(Mathiew 5:13; Maak 9:50)
34«Acäbö met. ?'Ba ni näk ma acäbö lawe obänhnhö, lawe ocäŋ døø kare nidïï? 35Tïmö ni ba rømi ki man jøri yi pwödhö wala leeŋa wï thuur wär. 'Ba wet jiyi wetø. Nee da ŋat mo jïre da ïdhi mo wïnye ki ge, beerra man cek ïthe.»
Currently Selected:
Luk 14: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
