Luk 16
16
Pwöc Mana Caan Na Leer Ki Ri Kwääy Tïïc Mana Raac
1Kanyøgø thuwø, Jecu aköö jï bääŋi, ni «Da nyen mør mo okwär mo jïre da kwääy tïïc mo jape ee wii cer gø, ni wïny luup møøk kiper gø, ni eni räänyö ki jape. 2Ni put gø cwøl baŋe, ni kööe jïgø, na ‹?Agïnaŋø ni wïnynya kiperï en? Mëëk a wëëlla en cerï nee jammi cääbø, kiper ï ba maar bëëdö ni ïïna kwääy tïïc këët.› 3Ni ö kwääy tïïögø ni pëëny dëëre keere, na ‹?Agïnaŋø noo tïïa nø, ni ö kwääya ni käl tïï kwär wøk cera? Kiper a jääk ki puur, ni wïïa laay ki kwac. 4'Ba mano tïïa ajooda, kiper naa wëëk jiyi ciin mïëcge kanyo käl a wøk yi tïï kwär.› 5Kanyøgø nø, jø pïït mo kwäärö mare acøøre no oceele oceele, ni pëëny mana dïkwøŋ, na ‹?A jap kwääya adïï ni en bäätï?› 6Ni dwøk gø, ni ‹Dëëra da baarmïïle mo maaw ma dïpa.› Ni kööe jïgø, ni ‹Lwør wëël acääba marï, ni laarï pï piny ni göörï pïërabïïc yie.› 7Køøre mør apëënynye, na ‹?A jammi adïï ni en bäätï?› Ni dwøk gø, ni ‹Dëëra da cwat beel ma dïpa.› Ni kööm gø, ni ‹Lwør wëël acääba marï, ni göörï pïërabära yie.›
8«Kanyøgø nø, kwääyögø, kwääy tïïc manøgø ni bëëte raac enø apwøe kiper mana caar wïïe. Kiper wäät pinyi en, nyeŋge reegø ki man ŋäcge dëëtge keerge ni kaala wäät tar. 9'Ba aani ki dëëra, a cäänna uuni, ni määnynyu dëëtu ki nyïïawäädi ki jap kwärö mo bäät piny, kiper dïcäŋo thum jammi yie, nou jïëc kwör bëëte moa näk bäŋ cuŋge.
10«'Ba ŋat wø ŋääth ri jammi mo nøk, maar ka ŋääth thuwø ki jammi mo thööth. 'Ba ŋat wø ba ŋääth ri jammi mo nøk, ba maar ŋääth thuwø ki jammi mo thööth. 11?'Ba ni näk mo u kär ŋäädhö ri jap kwärö mo bäät piny, aŋa noo wëëk u jap kwärö moa näk adïëri? 12?'Ba ni näk mo u kär ŋäädhö ri jap ŋat mør, aŋa noo wëëk u japa näk mou? 13Bäŋ ŋat tïïc mo doo tïny kwääri ariiø. Kiper eni løny ki man männe ka aciel ni mëëre ki maya, wala cwïnye wëëge aciel ni jøøŋ maya. Kiper ba løny jïïu ki man tïnynyu Jwøk ni tïnynyu jap piny.»
14'Ba jø Paricith na mëër ki jammi, moøgø bëët awïnyge, ni buuge gø. 15'Ba Jecu aköö jïge, ni «Beeye uuni ni wø pwøc dëëtu keeru nyïm jiy nou beyø, 'ba cwïnynyu ŋäc Jwøki. Kiper gïn wø näk wøp døc ki jï jiy, beeye gïna raaca eni ki jï Jwøk.
Luum Ciik Jwøk Ki Buc Jwøk
(Mathiew 11:12-13)
16«Kiper ciik Jwøk ki mo nyïïkuk Jwøk abëëdö këël mana ö Jøønni. Køøre nø, atïmö ni køpa luumma nyään na met kiper buc Jwøk, ni tïm jiyi bëët ni cøøa yie ni ge rïïö. 17'Ba doo jööta eni ki man dak maalli ki piny, ki man tïm thääŋ piil ciik Jwøki mo thiinh ni pätha wøk.
Pwöc Jecu Kiper Apääk Ki Dhaagø
(Mathiew 5:31-32; Maak 10:11-12)
18«Ŋato wäro kwier cïïe ni cäŋ nyöömmö ki dhaagø mør, mare luk. Ni ŋato wäro nywøm dhaagø mo opääö ki cwøre, mare luk.
Luum Ŋata Näk Okwär Ge Ki Ladhara
19«'Ba da nyen mør mo okwär, mo wø käära abïïe ma wøpe, mo cam päl jïre cooth. 20'Ba dhi kiire da nyen mør mo can mo ree ee nyaaŋ piny mo cwøl ni Ladhara, mo dëëre ogääbö ki ŋwiili. 21Ni eni manynya man cam gïï wø päth piny kar cam ŋata no okwär. Ni kaace da guu thuwø mo wø öö ni naaŋge ŋwiite. 22Kanyøgø ŋata can athøw, ni kääri ya nyïïatwiet maalli ni kïthge gø köör Eeberam. Køøre ŋata no okwär athøw thuwø, ni koonyi. 23'Ba ena kïth kar pöödö yi rääm mo leth døc. Ni tïŋ wïïe maal ni neen Eeberam kany mo bäär ni Ladhara ena kööre. 24Ni cwøl gø, na ‹Awuuö ma Eeberam, køny aani. Jääŋ Ladhara, nee wï lweete keere kïth yïth pïï, nee leeba ŋïnynye. Kiper dëëra waŋŋi ki maai.› 25'Ba Eeberam aköö, ni ‹Wääda, caar wïïï ki kanya bëëdï piny niï kwøw. Ïïno jäŋ ki jammi mo beyø. 'Ba Ladhara bëëdö ka bëët can yïth jammi mo reyø. 'Ba kawaane cwïnye ee cïp piny kany, ni ïïni, ï ena yi rääm. 26'Ba maya thuwø, yïthakiyø da aŋaak mo dwøŋ døc mo otïïö, kiper nee jøøa doo many man känhge baŋu ki kany, nee ba maar lønyø jïge. Ni bäŋe dhaanhø thuwø mo doo känhnhö ki kunögø ni ö baŋwa.› 27Kanyøgø ena köö, ‹'Ba a kwaya ïïni, awuuö, nee eni jääŋŋï dhi øt wära. 28Kiper jïra da nyïïmera abïïc, nee ge köömme. Kiper kanymør ge ööa kany thuwø na kar rääm en.› 29'Ba Eeberam aköö, ‹Luup Modhe ki mo nyïïkuk Jwøk ena baŋge. Beerra man wïnyge geni.› 30'Ba ena köö, ‹Jïre bäär, awuuö ma Eeberam; ni näk mo da dhaanhø mo cøøa baŋge ki dëët jøøa näk othøw, cwïnyge løkge løø.› 31'Ba Eeberam aköö jïgø, ‹Ni näk luup mo Modhe ki mo nyïïkuk Jwøk ba wïnyge, këël doo da dhaanhø mo duua wøk ki yi thøø, yïthge ba dege ciiø thuwø.› »
Currently Selected:
Luk 16: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
