ဢွၵ်ႇၵႂႃႇ 11

မူဝ်းသေႇလၢတ်ႈလွင်ႈၽေးလုၵ်ႈတူၼ်ႈတၢႆ

1မိူဝ်ႈၼၼ်ႉ ထႃႇဝရႃႉၽြႃးလၢတ်ႈတီႈမူဝ်းသေႇလႄႈဝႃႈ၊ ၵဝ်တၵ်းႁႂ်ႈၽေးတၢမ်ႇပႃးၼိုင်ႈႁွတ်ႈထိုင်ၵႃႈၼိူဝ်ၶုၼ်ႁေႃၶမ်းၽႃႇရေႃးတင်း မိူင်းဢေႇၵိပ်ႉတူႉထႅင်ႈလူးၵွၼ်ႇဢေႃႈ။ ဝၢႆးၼၼ်ႉ မၼ်းတၵ်းပွႆႇသူၵႂႃႇဢေႃႈ။ ၼႂ်းမိူဝ်ႈဢၼ်မၼ်းပွႆႇသူၵႂႃႇၼၼ်ႉၵေႃႈ မၼ်းတၵ်းႁေႃႈသူဢွၵ်ႇၽွမ်ႉမိူဝ်ႈလဵဝ်ၵၼ်ဢမၢၼ်ႇၶၼ်ပဵၼ်ဢေႃႈ။- 2မွၵ်ႇလၢတ်ႈထိုင်ႁူၵူၼ်းတင်းလၢႆလႄႈႁႂ်ႈၵူၼ်းၸၢႆးၵူႈၵေႃႉ ယွၼ်းယိုမ်ဢဝ်ၶိူင်ႈငိုၼ်းၶိူင်ႈၶမ်းတီႈၵူၼ်းၸၢႆးဢၼ်ႁိူၼ်းၸမ်ၵၼ်တင်းၶဝ်ၼၼ်ႉ ဢိၵ်ႇတင်းႁႂ်ႈၵူၼ်းယိင်းၵူႈၵေႃႉယွၼ်းယိုမ်ဢဝ်တီႈၵူၼ်းယိင်းဢၼ်ႁိူၼ်းၸမ်ၵၼ်တင်းၶဝ်ၼၼ်ႉ ႁင်းၽႂ်ႁင်းမၼ်းတႃႉ၊ ဝႃႈၼင်ႇၼႆဢေႃႈ။- 3ၵမ်းၼၼ်ႉ ထႃႇဝရႃႉၽြႃးႁႂ်ႈၶဝ်ထူပ်းၵျေးၸူးသိုဝ်ႈၼႃႈတႂ်ႈတႃၵူၼ်းဢေႇၵိပ်ႉတူႉတင်းလၢႆဢေႃႈ။ မူဝ်းသေႇၵေႃႈမီးသရေႇၼႃႈတႃ ဢၼ်ယႂ်ႇၼႃႇၵႃႈၼႂ်းမိူင်းဢေႇၵိပ်ႉတူႉၵႃႈတီႈၽၢႆႇၼႃႈၶႃႈ ၶုၼ်ႁေႃၶမ်းၽႃႇရေႃး ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။

4မိူဝ်ႈၼၼ်ႉ မူဝ်းသေႇလၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၶိင်ႇတဵင်ႈၶိုၼ်းၵဝ်တၵ်းဢွၵ်ႇၸူးၵႃႈတီႈၶိုင်ႈၵၢင်မိူင်းဢေႇၵိပ်ႉတူႉဢေႃႈ။- 5ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်းၽႃႇရေႃး ဢၼ်ၼင်ႈယူႇၵႃႈၼိူဝ်ႁေႃ တေႃႇထိုင်ႁွတ်ႈလုၵ်ႈတူၼ်ႈမႄႈယိင်းၶႃႈ ဢၼ်ၼင်ႈယူႇၵႃႈတီႈၽၢႆႇလင်လူၺ်ၶိုတ်ႈၶဝ်ႈၼၼ်ႉ၊ လုၵ်ႈတူၼ်ႈၵႃႈဢၼ်မီးၵႃႈၼႂ်းမိူင်းဢေႇၵိပ်ႉတူႉတင်းသဵင်ႈတင်းလူင် တၵ်းတၢႆလႄႈ လုၵ်ႈတူၼ်ႈတရိၵ်ႈသၢၼ်ႇၵႃႈမီးတင်းသဵင်ႈတင်းလူင်ၵေႃႈ တၵ်းတၢႆဢေႃႈ။- 6တၢင်းဢၼ်ႁွင်ႉဢၼ်ႁႆႈဢၼ်ယႂ်ႇၼႃႇ၊ ဢၼ်ၸႃႉၸဵမ်ၶိင်ႇၵႃႇလႃႉမိူဝ်ႈဢွၼ်ၼႆႉဢမ်ႇပႆႇတွၼ်ႉပဵၼ်သေပွၵ်ႈ၊ ဢၼ်ၶိင်ႇၵႃႇလႃႉၵမ်းလိုၼ်းၵေႃႈတၵ်းဢမ်ႇပဵၼ်ၼၼ်ႉ တၵ်းပဵၼ်ၵႃႈၼႂ်းမိူင်းဢေႇၵိပ်ႉတူႉၵူႈတီႈၵူႈလႅၼ်ဢေႃႈ။- 7ၵူၺ်းၵႃႈ လွင်ႈၼင်ႇႁိုဝ်သူတၵ်းႁူႉလွင်ႈဢၼ်ထႃႇဝရႃႉၽြႃးႁႂ်ႈၵူၼ်းဢေႇၵိပ်ႉတူႉတင်းၵူၼ်းမဵဝ်းဢီႉသရေႇလႃႉပႅၵ်ႇပိူင်ႈၵၼ်ၼၼ်ႉၸိုင်၊ မႃသေတူဝ်ဢမ်ႇလႆႈမႅပ်ႈလိၼ်ႉတေႃႇၵူၼ်းမဵဝ်းဢီႉသရေႇလႃႉသေၵေႃႉသေၵူၼ်း၊ ဝႃႈၼင်ႇၼႆတီႈၶႃႈဢေႃႈ။- 8ၶဝ်ၸိူဝ်းဢၼ်ပဵၼ်ၶႃႈၸဝ်ႈႁဝ်းၵႃႈမီးတင်းသဵင်ႈတင်းလူင်ၸိူဝ်းၼႆႉ တၵ်းဢွၼ်ၵၼ်လူင်းၸူးတီႈၶႃႈၸဝ်ႈလႄႈ ၶုပ်ႉမူပ်ႇယူႇသေလႄႈလၢတ်ႈဝႃႈ၊ မႂ်းဢိၵ်ႇတင်းၶဝ်ၸိူဝ်းဢၼ်ၸွမ်းလင်မႂ်းတင်းသဵင်ႈတင်းလူင် ဢွၼ်ၵၼ်ဢွၵ်ႇၵႂႃႇသေၵမ်း၊ ဝႃႈၼင်ႇၼႆသေယဝ်ႉ၊ ၶႃႈၸဝ်ႈတၵ်းဢွၵ်ႇၵႂႃႇတီႈၶႃႈဢေႃႈ၊ ဝႃႈၼင်ႇၼႆလႄႈ ၸႂ်မႆႈၶႆႈၸႃႉၼႃႇလူင်လၢင်ယူႇသေလႄႈ ဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃးၼၼ်ႉၵႂႃႇသေဢေႃႈ။

9ထႃႇဝရႃႉၽြႃးလၢတ်ႈတီႈမူဝ်းသေႇလႄႈဝႃႈ၊ လွင်ႈၼင်ႇႁိုဝ်လွင်ႈတၢင်းဢၼ်လီဢၢမ်းၵဝ်တင်းလၢႆ တၵ်းၼမ်ၵိုၼ်းၵႃႈၼႂ်းမိူင်းဢေႇၵိပ်ႉတူႉၸိုင်၊ ၶုၼ်ႁေႃၶမ်းၽႃႇရေႃးယင်းဢမ်ႇထွမ်ႇဢဝ်ၵႂၢမ်းသူလႄႈတၵ်းယူႇဢေႃႈ၊ ဝႃႈၼင်ႇၼႆဢေႃႈ။- 10မူဝ်းသေႇတင်းဢႃႇရုၼ်ႇႁဵတ်းလွင်ႈတၢင်းဢၼ်လီဢၢမ်းၸိူဝ်းၼႆႉတင်းသဵင်ႈတင်းလူင် ၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးဢေႃႈ။ ၵူၺ်းၵႃႈ ထႃႇဝရႃႉၽြႃးႁႂ်ႈႁူဝ်ၸႂ် ၶုၼ်ႁေႃၶမ်းၽႃႇရေႃး ၵႅၼ်ႇၶႅင်လႄႈမၼ်းၵေႃႈ ယင်းဢမ်ႇပွႆႇၵူၼ်းမဵဝ်းဢီႉသရေႇလႃႉဢွၵ်ႇသေၵႃႈတီႈမိူင်းမၼ်းၵႂႃႇလႄႈ ယူႇဢေႃႈ။

Currently Selected:

ဢွၵ်ႇၵႂႃႇ 11: CBMS

Highlight

Compare

Copy