ဢွၵ်ႇၵႂႃႇ 10
10
(8) ၽေးမႅင်းၵႅင်း
1ထႃႇဝရႃႉၽြႃးသမ်ႉ မီးဢမိင်ႉတီႈမူဝ်းသေႇလႄႈ လၢတ်ႈလႄႈဝႃႈၸမ်ႉ၊ မႂ်းၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးတႃႉ။ လွင်ႈၼင်ႇႁိုဝ်ၵဝ်တၵ်းလႆႈ ၼႄပျႃးၼီႉမိၵ်ႈၸိူဝ်းၼႆႉ ၵႃႈၼႂ်းမိူင်းၼႆႉ၊- 2ဢိၵ်ႇတင်းလွင်ႈၼင်ႇႁိုဝ်မႂ်းတၵ်းလႆႈဢဝ်လွင်ႈတၢင်းဢၼ်ၵဝ်ႁဵတ်းၵႃႈတီႈမိူင်းဢေႇၵိပ်ႉတူႉ ဢိၵ်ႇတင်းၼီႉမိၵ်ႈတင်းလၢႆဢၼ်ၵဝ်ၼႄပျႃးၵႃႈၼႂ်းၵူၼ်းဢေႇၵိပ်ႉတူႉၸိူဝ်းၼၼ်ႉ မွၵ်ႇလၢတ်ႈထိုင်ႁူလုၵ်ႈလၢၼ်မႂ်းလႄႈ ၶဝ်လႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉၸိုင်၊ ၵဝ်ႁႂ်ႈႁူဝ်ၸႂ်မၼ်း တင်းႁူဝ်ၸႂ်ၶႃႈမၼ်းၵူၼ်းမၼ်းတင်းလၢႆ ၼၵ်းၼႃႇယဝ်ႉ၊ ဝႃႈၼင်ႇၼႆဢေႃႈ။- 3မူဝ်းသေႇတင်းဢႃႇရုၼ်ႇၼၼ်ႉ ၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးၼၼ်ႉသေယဝ်ႉ၊ လဝ်ႊလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၵူၼ်းမဵဝ်းႁေႇပြႄးလၢတ်ႈလႄႈဝႃႈ၊ မႂ်းယင်းဢမ်ႇဢဝ်တူဝ်ၸဝ်ႈၵဝ်ႇၶျႃးတႅမ်ႇၵႃႈတီႈၽၢႆႇၼႃႈၵဝ်လႄႈ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။ ပွႆႇၵူၼ်းၵဝ်တင်းလၢႆၵႂႃႇ ႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။- 4ပေႃးဢမ်ႇၼၼ် ပေႃးယင်းဢမ်ႇပွႆႇၵူၼ်းၵဝ်တင်းလၢႆၵႂႃႇလႄႈယူႇၸိုင်၊ တူၺ်းလူး၊ ဝၼ်းမိူဝ်ႈၽုၵ်ႈ ၵဝ်တၵ်းဢဝ်မႅင်းၵႅင်း#10:4 "မႅင်းၵႅင်း" - ၸၵ်းတႅၼ်တင်းလၢႆ မႃးၵႃႈၼိူဝ်မိူင်းမႂ်းဢေႃႈ။- 5ၶဝ်တၵ်းႁူမ်ႇသုမ်ႇၼႃႈလိၼ်တေႃႇထိုင်ႁွတ်ႈထၼ်ႈပေႃး ၽူႈလႂ်ဢမ်ႇႁၼ်ၼႃႈလိၼ်လႆႈဢေႃႈ။ ၶဝ်တၵ်းၵိၼ်ၵႃႈဢၼ်ၵိုတ်းဢၼ်ၵျၢၼ်ႇလႄႈ လွတ်ႈဝႆႉၵႃႈဢၼ်မၢၵ်ႇႁဵပ်း ဢမ်ႇယႃႉလႄႈ ယင်းၵိုတ်းယင်းၵျၢၼ်ႇယူႇတီႈသူၼၼ်ႉ ဢိၵ်ႇတင်းတူၼ်ႈမႆႉၵႃႈဢၼ် ဢွၵ်ႇမႃးၵႃႈတီႈပၢင်ႇတီႈပဵင်းပုၼ်ႈသူၸိူဝ်းၼၼ်ႉဢေႃႈ။- 6ႁိူၼ်းမႂ်းလႂ်၊ ႁိူၼ်းၶႃႈမႂ်းတင်းသဵင်ႈတင်းလူင်လႂ်၊ ႁိူၼ်းၵူၼ်းဢေႇၵိပ်ႉတူႉ တင်းသဵင်ႈတင်းလူင်လႂ်၊ တၵ်းတဵမ်ဝႆႉၸွမ်းၵႃႈၼင်ႇဢၼ် ပေႃႈမႂ်းဢိၵ်ႇတင်းပူႇမွၼ်ႇမႂ်းတင်းလၢႆ ဢမ်ႇပႆႇတွၼ်ႉႁၼ်သေပွၵ်ႈ ၸႃႉၸဵမ်ၶိင်ႇၵႃႇလႃႉ ဢၼ်ၶဝ်ပဵၼ်မႃးၵႃႈၼိူဝ်လိၼ်ၼၼ်ႉ ႁၢၼ်ႉတေႃႇႁွတ်ႈမိူဝ်ႈလဵဝ်ၼႆႉၼၼ်ႉဢေႃႈ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဝၢႆႇၼႃႈလႄႈ ဢွၵ်ႇၵႂႃႇသေၵႃႈတီႈၶုၼ်ႁေႃၶမ်းၽႃႇရေႃးၼၼ်ႉဢေႃႈ။
7ၶႃႈၶုၼ်ႁေႃၶမ်းၽႃႇရေႃးၸိူဝ်းၼၼ်ႉၵေႃႈလဝ်ႊလၢတ်ႈတီႈမၼ်းလႄႈဝႃႈ၊ ၵေႃႉၼႆႉတၵ်းပဵၼ်တူင်ႇႁႅဝ်ႉတူင်ႇၶိုမ်းတီႈႁဝ်းၶႃႈလႄႈ ယူႇၶိင်ႇၵႃႇလႃႉႁိုင်ၵႃႈႁိုဝ်လူးၵွၼ်ႇတီႈၶႃႈ၊ ပွႆႇၵူၼ်းၸိူဝ်းၼၼ်ႉၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈၶဝ်ၼၼ်ႉသေၵမ်းတီႈၶႃႈ။ ၸဝ်ႈႁဝ်းဢမ်ႇပႆႇႁူႉလွင်ႈဢၼ်မိူင်းဢေႇၵိပ်ႉတူႉ လူႉၼႆႉတီႈၶႃႈႁိုဝ်။ ဝႃႈၼင်ႇၼႆသေယဝ်ႉ၊
8ၵမ်းၼၼ်ႉ သမ်ႉဢဝ်မူဝ်းသေႇတင်းဢႃႇရုၼ်ႇၶိုၼ်းသႂၢင်းၶဝ်ႈ ၵႃႈတီႈၶုၼ်ႁေႃၶမ်းၽႃႇရေႃးလႄႈ မၼ်းလၢတ်ႈတီႈၶဝ်လႄႈဝႃႈ၊ ၵႂႃႇႁႂ်ႈလႆႈႁဵတ်းဝၢတ်ႈတီႈ ထႃႇဝရႃႉၽြႃး ၽြႃးပဵၼ်ၸဝ်ႈသူၼၼ်ႉတႃႉ။ ၵူၺ်းၵႃႈ ၶဝ်ၸိူဝ်းဢၼ်တၵ်းလႆႈၵႂႃႇၼၼ်ႉ ပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊
9 မူဝ်းသေႇၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၶဝ်တၵ်းလႆႈပႃးဢဝ်တင်းလုၵ်ႈဢွၼ်ႇ၊ ၵူၼ်းထဝ်ႈ၊ လုၵ်ႈၸၢႆး၊ လုၵ်ႈယိင်း၊ ၽုင်သူဝ်းၽုင်ဝူဝ်းၶႃႈၸဝ်ႈႁဝ်းၶဝ်ၼၼ်ႉၵႂႃႇတီႈၶႃႈဢေႃႈ။ လွင်ႈမၼ်းၸမ်ႉ ၶႃႈၸဝ်ႈႁဝ်းၶဝ်တၵ်းလႆႈၶၢမ်ႇပွႆးတီႈ ထႃႇဝရႃႉၽြႃးတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 10မၼ်းလၢတ်ႈလႄႈဝႃႈ၊ ႁႂ်ႈပဵၼ်တႃႉ။ ႁႂ်ႈထႃႇဝရႃႉၽြႃးမီးလူၺ်ႈၵၼ်တင်းသူ ၵႃႈၼင်ႇဢၼ်ၵဝ်ပွႆႇသူတင်းလုၵ်ႈဢွၼ်ႇသူၵႂႃႇၼၼ်ႉတႃႉ။ ႁဵတ်းသတီႉတႃႉ။ သူၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီယဝ်ႉလူင်ပႄႇ။- 11ဢမ်ႇလီပဵၼ်ၸိူဝ်ႉၼင်ႇၼၼ်။ ၶဝ်ၸိူဝ်းဢၼ်ပဵၼ်ၵူၼ်းၸၢႆးၵူၺ်း ဢွၼ်ၵၼ်ၵႂႃႇလႄႈ ႁဵတ်းဝၢတ်ႈတီႈထႃႇဝရႃႉၽြႃးတႃႉ။ လွင်ႈတၢင်းၼႆႉၸမ်ႉ၊ ပဵၼ်လွင်ႈတၢင်းဢၼ် သူႁႃဢဝ်ယဝ်ႉ၊ ဝႃႈၼင်ႇၼႆလႄႈ သွင်ၶႃလႆႈၶၢမ်ႇတၢင်းဢၼ်ပိူၼ်ႈႁေႃႈဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၼၼ်ႉဢေႃႈ။
12ၵမ်းၼၼ်ႉ ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ ယိုၼ်ႈမိုဝ်းမႂ်းၶိုၼ်ႈၵႃႈၼိူဝ်မိူင်းဢေႇၵိပ်ႉတူႉပုၼ်ႈမႅင်းၵႅင်းတင်းလၢႆ ႁႂ်ႈၶဝ်ႈႁွတ်ႈမႃးၵႃႈၼိူဝ်မိူင်းဢေႇၵိပ်ႉတူႉလႄႈ ၵိၼ်တူၼ်ႈၵႃႈဢၼ်မီးၵႃႈၼိူဝ်လိၼ်တင်းသဵင်ႈတင်းလူင် ဢၼ်မၢၵ်ႇႁဵပ်းဢမ်ႇယႃႉလႄႈ ၵိုတ်းၵျၢၼ်ႇဝႆႉၸိူဝ်းၼၼ်ႉတႃႉ၊ ဝႃႈၼင်ႇၼႆသေယဝ်ႉ၊- 13မူဝ်းသေႇဢဝ်ၶွၼ်ႉတဝ်ႉမၼ်းယိုၼ်ႈၶိုၼ်ႈၵႃႈၼိူဝ်မိူင်းဢေႇၵိပ်ႉတူႉလႄႈ၊ ထႃႇဝရႃႉၽြႃးႁႂ်ႈလူမ်းတၢင်းဢွၵ်ႇမႃးၵႃႈၼိူဝ်လိၼ်ၼႂ်းဝၼ်းၼၼ်ႉတင်းဝၼ်း ၼႂ်းၶိုၼ်းၼၼ်ႉတင်းၶိုၼ်းလႄႈ၊ မိူဝ်ႈဢၼ်ထိုင်ႁွတ်ႈၶိင်ႇၵၢင်ၼႂ်ၸိုင်၊ လူမ်းတၢင်းဢွၵ်ႇၼၼ်ႉပႃးဢဝ်မႅင်းၵႅင်းတင်းလၢႆမႃးဢေႃႈ။- 14မႅင်းၵႅင်းၸိူဝ်းၼၼ်ႉ ႁွတ်ႈမႃးၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်လႄႈ ၸပ်းယူႇၵႃႈၼႂ်းၶွပ်ႇၼမ်ႉလႅၼ်လိၼ်မိူင်းဢေႇၵိပ်ႉတူႉ ၵူႈတီႈၵူႈလႅၼ်လႄႈ ၼမ်ၵိုၼ်းၼႃႇလူင်လၢင်ဢေႃႈ။ မႅင်းၵႅင်းၸိူဝ်ႉၼင်ႇၼၼ်ၼၼ်ႉ၊ ၸႃႉၸဵမ်မိူဝ်ႈၵႃႇလႃႉဢွၼ်ၼႆႉၼၼ်ႉလႄႈ ဢမ်ႇတွၼ်ႉပဵၼ်သေပွၵ်ႈ၊ ၵမ်းလိုၼ်းၵေႃႈတၵ်းဢမ်ႇပဵၼ်။- 15ၶဝ်ႁူမ်ႇလူမ်ႈၼႃႈလိၼ်တင်းသဵင်ႈတင်းလူင် တေႃႇထိုင်ႁွတ်ႈထၼ်ႈပေႃး ႁႂ်ႈလိၼ်ၼၼ်ႉလမ်ၵႂႃႇလႄႈ ၵိၼ်တူၼ်ႈယိူဝ်ႈၵႃႈမီး ၵႃႈၼႂ်းမိူင်းၼၼ်ႉတင်းသဵင်ႈတင်းလူင် ဢိၵ်ႇတင်းမၢၵ်ႇမႆႉမၢၵ်ႇတွၵ်ႇ ဢၼ်လွတ်ႈတင်းမၢၵ်ႇႁဵပ်းၵႃႈမီးတင်းသဵင်ႈတင်းလူင် ၸိူဝ်းၼၼ်ႉဢေႃႈ။ ၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်ၼၼ်ႉ၊ ဢမ်ႇၵိုတ်းဢမ်ႇၵျၢၼ်ႇဝႆႉ လွင်ႈတၢင်းဢၼ်ၶဵဝ်ဝႆႉ ၵႃႈတီႈတူၼ်ႈမႆႉဢိၵ်ႇတင်းတူၼ်ႈယိူဝ်ႈတူၼ်ႈယႃႈ ၵႃႈတီႈပၢင်ႇတီႈပဵင်းၼၼ်ႉသေၸိူဝ်ႉသေပိူင်။
16မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃး ႁိပ်ႈၼႅတ်ႈႁွင်ႉဢဝ်မူဝ်းသေႇတင်းဢႃႇရုၼ်ႇလႄႈလၢတ်ႈဝႃႈ၊ ၵဝ်ၽိတ်းပိူင်ႈထႃႇဝရႃႉၽြႃး ၽြႃးပဵၼ်ၸဝ်ႈသူ ဢိၵ်ႇတင်းသူယဝ်ႉ။- 17ပိူဝ်ႈၼႆလႄႈ တေႃႈလဵဝ်ၼႆႉ ပွၵ်ႈၼႆႉၶႅၼ်းတေႃႈယိူၼ်ႉၶၢမ်ႇဢပႅတ်ႈၵဝ်သေၵမ်း။ တွင်းပၢၼ်ႇထႃႇဝရႃႉၽြႃး ၽြႃးပဵၼ်ၸဝ်ႈသူၼၼ်ႉ ႁႂ်ႈမၼ်းၸဝ်ႈလႆႈဢဝ်ၽေးတၢင်းတၢႆဢၼ်ၼိုင်ႈၼႆႉၵူၺ်းပႅတ်ႈသေၵႃႈတီႈၵဝ်သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 18မူဝ်းသေႇဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၵႂႃႇလႄႈ၊ တွင်းပၢၼ်ႇထႃႇဝရႃႉၽြႃးဢေႃႈ။- 19ထႃႇဝရႃႉၽြႃးပွႆႇလူမ်းတၢင်းတူၵ်းဢၼ်ႁႅင်းယႂ်ႇၼႃႇၼၼ်ႉမႃးလႄႈ လူမ်းၼၼ်ႉဢဝ်မႅင်းၵႅင်းၸိူဝ်းၼၼ်ႉ ၵႂႃႇၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇ ဢေႇတုမ်ႇသေဢေႃႈ။ ၵႃႈၼႂ်းမိူင်းဢေႇၵိပ်ႉတူႉၵူႈတီႈၵူႈလႅၼ်ၼၼ်ႉ၊ ဢမ်ႇၵိုတ်းဢမ်ႇၵျၢၼ်ႇဝႆႉမႅင်းၵႅင်းသေတူဝ်။- 20ၵူၺ်းၵႃႈ ထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈ မၼ်းၵေႃႈယင်းဢမ်ႇပွႆႇၵူၼ်းမဵဝ်းဢီႉသရေႇလႃႉၵႂႃႇလႄႈယူႇဢေႃႈ။
(9) ၽေးလပ်းသိင်ႇ
21ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ ဢဝ်မိုဝ်းမႂ်းယိုၼ်းၶိုၼ်ႈ ၵႃႈၼိူဝ်ၽႃႉၵၢင်ႁၢဝ် ႁႂ်ႈလပ်းသိင်ႇပဵၼ်ၵႃႈတီႈမိူင်းဢေႇၵိပ်ႉတူႉ ၵူႈတီႈၵူႈလႅၼ်ဢၼ်ဝႃႈလပ်းသိင်ႇ ဢၼ်လုပ်ႈၵမ်းဢဝ်ထၼ်ႈပေႃးလႆႈၼၼ်ႉတႃႉ၊ ဝႃႈၼင်ႇၼႆသေယဝ်ႉ၊- 22မူဝ်းသေႇ ဢဝ်မိုဝ်းမၼ်းယိုၼ်းၶိုၼ်ႈ ၵႃႈၼိူဝ်ၽႃႉၵၢင်ႁၢဝ်လႄႈ လပ်းသိင်ႇဢၼ်ၼႃတၼ်ၼႃႇလူင်လၢင်ၼၼ်ႉပဵၼ်ၵႃႈတီႈမိူင်း ဢေႇၵိပ်ႉတူႉ သၢမ်ဝၼ်းတဵမ်တဵမ်ဢေႃႈ။- 23မိူဝ်ႈၼၼ်ႉ ၵေႃႉၼိုင်ႈလႄႈၵေႃႉၼိုင်ႈ ဢမ်ႇႁၼ်ၵၼ်လႆႈ။ သၢမ်ဝၼ်းတဵမ်တဵမ်ၽူႈလႂ်ဢမ်ႇလုၵ်ႉသေၵႃႈတီႈဢၼ်တူဝ်ၸဝ်ႈၵဝ်ႇယူႇၼၼ်ႉ။ ၵူၺ်းၵႃႈ ၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်ၸိုင်၊ လႆႈဢၼ်လႅင်းၵႃႈၼႂ်းႁိူၼ်းတီႈဢၼ်ၶဝ်ယူႇၸိူဝ်းၼၼ်ႉယူႇဢေႃႈ။
24မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃးႁွင်ႉဢဝ်မူဝ်းသေႇလႄႈလၢတ်ႈဝႃႈ၊ သူၵႂႃႇႁႂ်ႈလႆႈႁဵတ်းဝၢတ်ႈတီႈထႃႇဝရႃႉၽြႃးတႃႉ။ ၼႂ်းဝႃႈၼၼ်သေၵေႃႈ ႁႂ်ႈဢွၼ်ၵၼ်ဝႆႉၵိုတ်းဝႆႉၵျၢၼ်ႇ ၽုင်သူဝ်းၽုင်ဝူဝ်းသူတႃႉ။ လုၵ်ႈဢွၼ်ႇသူၸိုင်၊ ႁႂ်ႈဢွၼ်ၵၼ်ပႃးဢဝ်ၵႂႃႇတႃႉ၊ ဝႃႈၼင်ႇၼႆဢေႃႈ။- 25မူဝ်းသေႇၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းတၵ်းလႆႈပၼ်တူဝ်ယိတ်ႈဢိၵ်ႇတင်း ယိတ်ႈဢၼ်တုတ်ႇၽႆးတင်းလၢႆ ပုၼ်ႈဢၼ်တၵ်းပုၵ်ႈၸေႃႇတီႈထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁဝ်းၸိူဝ်းၼႆႉၼၼ်ႉတီႈၶႃႈဢေႃႈ။- 26တရိၵ်ႈသၢၼ်ႇၶႃႈၸဝ်ႈႁဝ်းၶဝ်တၵ်းလႆႈပႃးလူၺ်ႈၵၼ်တင်းၶႃႈၸဝ်ႈႁဝ်းၶဝ်ၵႂႃႇတီႈၶႃႈဢေႃႈ။ ဢမ်ႇလႆႈဝႆႉၵိုတ်းဝႆႉၵျၢၼ်ႇ ၵိပ်ႇမၼ်းသေၵိပ်ႇတီႈၶႃႈ။ လွင်ႈမၼ်းၸမ်ႉ တၵ်းလႆႈလိူၵ်ႈၵဵပ်းဢဝ် ၵႃႈၼႂ်းၶဝ်ၼၼ်ႉပုၼ်ႈဢၼ်တၵ်းႁဵတ်းဝၢတ်ႈ ထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။ ၸူဝ်ႈဢၼ်ဢမ်ႇပႆႇႁွတ်ႈထိုင်ၵႃႈတီႈၼၼ်ႈၼၼ်ႉၸိုင်၊ ဢမ်ႇႁူႉလွင်ႈဢၼ်တၵ်းလႆႈဢဝ်တင်းတူဝ်ၸိူဝ်ႉၼင်ႇႁိုဝ် ႁဵတ်းဝၢတ်ႈတီႈထႃႇဝရႃႉၽြႃးၼၼ်ႉတီႈၶႃႈ၊ ဝႃႈၼင်ႇၼႆသေယဝ်ႉ၊- 27ထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃး ၵႅၼ်ႇၶႅင်လႄႈ မၼ်းၵေႃႈယင်းဢမ်ႇပွႆႇၵူၼ်းမဵဝ်းဢီႉသရေႇလႃႉၵႂႃႇလႄႈ ယူႇဢေႃႈ။
28ၵမ်းၼၼ်ႉ ၶုၼ်ႁေႃၶမ်းၽႃႇရေႃးမီးဢမိင်ႉတီႈမူဝ်းသေႇလႄႈဝႃႈ၊ ဢွၵ်ႇၵႂႃႇသေၵႃႈတီႈၵဝ်ၼႆႉတႃႉ။ ၵမ်းလိုၼ်းႁဵတ်းသတီႉတႃႉ။ယႃႇပေႁႂ်ႈလႆႈႁၼ်ၼႃႈၵဝ်။ ၼႂ်းဝၼ်းဢၼ်မႂ်းႁၼ်ၼႃႈၵဝ်ၼၼ်ႉ၊ မႂ်းတၵ်းလႆႈတၢႆဢေႃႈ၊ ဝႃႈၼင်ႇၼႆဢေႃႈ။- 29မူဝ်းသေႇၵေႃႈလဝ်ႊလၢတ်ႈလႄႈဝႃႈ၊ လွင်ႈဢၼ်ၸဝ်ႈႁဝ်းမီးဢမိင်ႉၼႆႉလီတီႈၶႃႈယဝ်ႉ။ ၵမ်းလိုၼ်း ၶႃႈၸဝ်ႈႁဝ်း တၵ်းဢမ်ႇလႆႈႁၼ်ၼႃႈၸဝ်ႈႁဝ်းတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
Currently Selected:
ဢွၵ်ႇၵႂႃႇ 10: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
