ဢွၵ်ႇၵႂႃႇ 9
9
(5) ၽေးဢၼ်တူဝ်သတ်းတင်းလၢႆတၢႆ
1ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ မႂ်းၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးလႄႈ လၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ ၵူၼ်းႁေႇပြႄးတင်းလၢႆလၢတ်ႈလႄႈဝႃႈၸမ်ႉ၊ ပွႆႇၵူၼ်းၵဝ်တင်းလၢႆၵႂႃႇ ႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။- 2ပေႃးမႂ်းႁႄႉၶႅၼ်ထဵင်ပႅတ်ႈလႄႈဝႃႈ၊ ဢမ်ႇပွႆႇၵႂႃႇၵူၺ်ႉ၊ ဝႃႈၼင်ႇၼႆၸိုင်၊- 3မိုဝ်းထႃႇဝရႃႉၽြႃးၼၼ်ႉ တၵ်းႁွတ်ႈထိုင်ၵႃႈၼိူဝ်တရိၵ်ႈသၢၼ်ႇမႂ်း ဢၼ်မီးၵႃႈၼႂ်းတူင်ႈၼႃး ဢၼ်ဝႃႈ မႃႉလႂ်၊ လီႈလႂ်၊ ၵလႃးဢုၵ်ႉလႂ်၊ ၽုင်သူဝ်းၽုင်ဝူဝ်းလႂ်ၸိူဝ်းၼၼ်ႉလႄႈ ၶဝ်တၵ်းၸပ်းတၢင်းပဵၼ်ၵႃႇလႃႉ ဢၼ်ႁၢႆႉၵျၢမ်းၼႃႇဢေႃႈ။- 4ထႃႇဝရႃႉၽြႃးတၵ်းႁႂ်ႈတရိၵ်ႈသၢၼ်ႇ ၵူၼ်းမဵဝ်းဢီႉသရေႇလႃႉတင်းတရိၵ်ႈသၢၼ်ႇၵူၼ်းဢေႇၵိပ်ႉတူႉ ပႅၵ်ႇပိူင်ႈၵၼ်လႄႈ တရိၵ်ႈသၢၼ်ႇ ဢၼ်ၵူၼ်းမဵဝ်းဢီႉသရေႇလႃႉပိူင်ႇၸိူဝ်းၼၼ်ႉ တၵ်းဢမ်ႇတၢႆသေတူဝ်။- 5ထႃႇဝရႃႉၽြႃးမၵ်းၶၢၼ်းဝႆႉၶိင်ႇဢၼ်မၢၼ်ႇဢၼ်မႅၼ်ႈလႄႈဝႃႈ၊ ဝၼ်းမိူဝ်ႈၽုၵ်ႈထႃႇဝရႃႉၽြႃးတၵ်းႁဵတ်းဢမူႉၼၼ်ႉ ၵႃႈၼႂ်းမိူင်းၼႆႉဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 6ၼႂ်းဝၼ်းမိူဝ်ႈၽုၵ်ႈ ထႃႇဝရႃႉၽြႃးႁဵတ်းဢမူႉၼၼ်ႉလႄႈ တရိၵ်ႈသၢၼ်ႇၵူၼ်းဢေႇၵိပ်ႉတူႉတင်းသဵင်ႈတင်းလူင်တၢႆဢေႃႈ။ တရိၵ်ႈသၢၼ်ႇၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၸမ်ႉ၊ ဢမ်ႇတၢႆသေတူဝ်။- 7ၶုၼ်ႁေႃၶမ်းၽႃႇရေႃးပွႆႇၸႂ်ႉၵူၼ်းၵႂႃႇလႄႈ လႆႈႁူႉလွင်ႈဢၼ် တရိၵ်ႈသၢၼ်ႇၵူၼ်းမဵဝ်းဢီႉသရေႇလႃႉဢမ်ႇတၢႆသေတူဝ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းၽႃႇရေႃး ၸႂ်ၼၵ်းၸႂ်ၼႃယူႇလႄႈ ယင်းဢမ်ႇပွႆႇၵူၼ်းမဵဝ်းဢီႉသရေႇလႃႉတင်းလၢႆၵႂႃႇလႄႈယူႇဢေႃႈ။
(6) ၽေးတုမ်ႇၽီ
8ထႃႇဝရႃႉၽြႃးမီးဢမိင်ႉတီႈမူဝ်းသေႇ ဢိၵ်ႇတင်းဢႃႇရုၼ်ႇလႄႈဝႃႈၸမ်ႉ၊ ဢဝ်တင်းမိုဝ်းယိပ်းၵမ်ဢဝ်တဝ်ႈၵႃႈၼႂ်းၽီးၽႆးပဵၼ်ၵမ်ပဵၼ်ၵမ်လႄႈ ႁႂ်ႈမူဝ်းသေႇၵမ်ပိုၼ်ၶိုၼ်ႈၵႃႈၼိူဝ်ၽႃႉၵၢင်ႁၢဝ်သိုဝ်ႈၼႃႈၶုၼ်ႁေႃၶမ်းၽႃႇရေႃးတႃႉ။- 9တဝ်ႈၼၼ်ႉတၵ်းပဵၼ်မုၼ်ႈဢၼ်ၸွတ်ႇၸႅတ်ႇၵႂႃႇၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်လႄႈ ပဵၼ်တုမ်ႇၸဵပ်းၵႃႈၼႂ်းၼိူဝ်ႉဢၼ်ဢွၵ်ႇမႃး ပႃးတင်းတၢင်းဢၼ်ပဵၼ်ၶိုၼ်လိုၼ်ၶၢၼ်လၢၼ် ၵႃႈတီႈၵူၼ်းဢိၵ်ႇတင်း တရိၵ်ႈသၢၼ်ႇတင်းလၢႆၵႃႈၼႂ်းမိူင်းဢေႇၵိပ်ႉတူႉၼႆႉ ၵူႈတီႈၵူႈလႅၼ်ဢေႃႈ၊ ဝႃႈၼင်ႇၼႆသေယဝ်ႉ၊- 10သွင်ၶႃဢဝ်တဝ်ႈၵႃႈၼႂ်းၽီးၽႆးလႄႈ ၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးသေယဝ်ႉ၊ မူဝ်းသေႇၵမ်ပိုၼ်ၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈ တဝ်ႈၼၼ်ႉပဵၼ်တုမ်ႇၸဵပ်း ၵႃႈၼႂ်းၼိူဝ်ႉဢၼ်ဢွၵ်ႇမႃး ပႃးတင်း တၢင်းဢၼ်ပဵၼ်ၶိုၼ်လိုၼ်ၶၢၼ်လၢၼ် ၵႃႈတီႈၵူၼ်းဢိၵ်ႇတင်း တရိၵ်ႈသၢၼ်ႇတင်းလၢႆဢေႃႈ။- 11သြႃႇဝိၵ်ႉၸႃႇတင်းလၢႆ ဢမ်ႇၸုၵ်းယူႇၵႃႈတီႈၽၢႆႇၼႃႈမူဝ်းသေႇလႆႈ ၵွပ်ႈပိူဝ်ႈတုမ်ႇၸဵပ်းၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ တုမ်ႇၸဵပ်းၸိူဝ်းၼၼ်ႉ ၸပ်းတီႈသြႃႇဝိၵ်ႉၸႃႇတင်းလၢႆ ဢိၵ်ႇတင်းၵူၼ်းဢေႇၵိပ်ႉတူႉတင်းသဵင်ႈတင်းလူင်ဢေႃႈ။- 12ထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈ မၼ်းၵေႃႈယင်းဢမ်ႇထွမ်ႇဢမ်ႇဢဝ်ၵႂၢမ်းသွင်ၶႃၼၼ်ႉလႄႈ ယူႇမႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးဝႃႈဝႆႉတီႈမူဝ်းသေႇၼၼ်ႉဢေႃႈ။
(7) ၽေးမၢၵ်ႇႁဵပ်း
13ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈ၊ မႂ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးလႄႈ လၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ ၵူၼ်းမဵဝ်းႁေႇပြႄးလၢတ်ႈလႄႈဝႃႈၸမ်ႉ၊ ပွႆႇၵူၼ်းၵဝ်တင်းလၢႆ ႁႂ်ႈၶဝ်လႆႈၵႂႃႇႁဵတ်းဝၢတ်ႈတီႈၵဝ်တႃႉ။- 14ပေႃးဢမ်ႇၼၼ် ၵဝ်တၵ်းႁႂ်ႈၽေးတၢမ်ႇၵဝ်တင်းသဵင်ႈတင်းလူင် ႁွတ်ႈထိုင်ၵႃႈၼိူဝ်ႁူဝ်ၸႂ်မႂ်း၊ ၵႃႈၼိူဝ်ၶႃႈမႂ်း၊ ၵႃႈၼိူဝ်ၵူၼ်းဝၢၼ်ႈၵူၼ်းမိူင်းမႂ်းၼႂ်းၶိင်ႇၵႃႇလႃႉမိူဝ်ႈလဵဝ်ၼႆႉဢေႃႈ။ မႂ်းတၵ်းလႆႈႁူႉလွင်ႈဢၼ်ၵႃႈၼိူဝ်လိၼ်မိူင်းၵူႈတီႈၵူႈလႅၼ် ဢမ်ႇမီးၽူႈလႂ် ဢၼ်မိူၼ်ၵၼ်တင်းၵဝ်ၼႆႉၼၼ်ႉဢေႃႈ။- 15တေႃႈလဵဝ်ၼႆႉ သင်ၵဝ်လႆႈယိုၼ်းမိုဝ်းၵဝ်လႄႈ ဢဝ်တင်းတၢင်းဢၼ်ပဵၼ်ၵႃႇလႃႉႁႃႈလႅင်မိူင်း ပၼ်တၢမ်ႇတီႈမႂ်းဢိၵ်ႇတင်းၵူၼ်းမႂ်းတင်းလၢႆယဝ်ႉၸိုင်၊ ၵဝ်လႆႈယႃႉၽဵဝ်ႈမႂ်းပႅတ်ႈသေ ၵႃႈတီႈလိၼ်မိူင်းယဝ်ႉဢေႃႈ။- 16ၵူၺ်းၵႃႈ လွင်ႈၼင်ႇႁိုဝ်ၵဝ်တၵ်းၼႄပျႃးတၼ်းၶူဝ်းၵဝ်တီႈမႂ်း ဢိၵ်ႇတင်းလွင်ႈၼင်ႇႁိုဝ် တၵ်းႁႂ်ႈၼႃႇမႃႉၸိုဝ်ႈသဵင်ၵဝ်ၸွတ်ႇသႃႈႁူင်ႁၢင်းၵႃႈၼိူဝ်လိၼ်မိူင်းၼႆႉ ၵူႈတီႈၵူႈလႅၼ်ၸိုင်၊ ၵဝ်လႆႈယုၵ်ႉယွင်ႈမႂ်းဝႆႉဢမၢၼ်ႇၶၼ်ပဵၼ်ယဝ်ႉ။- 17မႂ်းယင်းဢမ်ႇပွႆႇၵူၼ်းၵဝ်တင်းလၢႆၵႂႃႇလႄႈ ႁဵတ်းၶတ်းၶႅင်ႁႅင်းတႃႉၶဝ်ယူႇလူးၵွၼ်ႇႁိုဝ်။- 18တူၺ်းလူး၊ ၵဝ်တၵ်းႁႂ်ႈၽူၼ်မၢၵ်ႇႁဵပ်းဢၼ်ႁၢႆႉၵျၢမ်းၼႃႇ၊ ဢၼ်ၸႃႉၸဵမ်ၶိင်ႇၵႃႇလႃႉမိူဝ်ႈဢၼ်ၸႃႉတႄႇမိူင်းဢေႇၵိပ်ႉတူႉၼၼ်ႉ ႁၢၼ်ႉတေႃႇမိူဝ်ႈလဵဝ်ၼႆႉ ဢမ်ႇတွၼ်ႉတူၵ်းသေပွၵ်ႈၼၼ်ႉ ပဵၼ်ၼႂ်းဝၼ်းမိူဝ်ႈၽုၵ်ႈမိူဝ်ႈၶိင်ႇၼႆႉၼၼ်ႉဢေႃႈ။- 19ပိူဝ်ႈၼႆလႄႈ တေႃႈလဵဝ်ၼႆႉပွႆႇၸႂ်ႉၵႂႃႇလႄႈ သိမ်းဢဝ်တရိၵ်ႈသၢၼ်ႇဢိၵ်ႇတင်းၵႃႈဢၼ်မႂ်းမီးဝႆႉ ၵႃႈၼႂ်းတီႈပၢင်ႇတီႈပဵင်းၸိူဝ်းၼၼ်ႉမႃးတႃႉ။ ၵႃႈၼိူဝ်ၵူၼ်းဢိၵ်ႇတင်းတရိၵ်ႈသၢၼ်ႇ ၵႃႈဢၼ်လႆႈထူပ်းႁၼ် ၵႃႈၼႂ်းတီႈပၢင်ႇတီႈပဵင်းလႄႈ ဢမ်ႇဢဝ်မႃးၵႃႈတီႈႁိူၼ်းတင်းသဵင်ႈတင်းလူင်ၸိူဝ်းၼၼ်ႉ၊ ၽူၼ်မၢၵ်ႇႁဵပ်း တၵ်းတူၵ်းသႂ်ႇလႄႈ ၶဝ်ၼၼ်ႉတၵ်းတၢႆဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 20ၼႂ်းၶႃႈၶုၼ်ႁေႃၶမ်းၽႃႇရေႃးၸိူဝ်းၼၼ်ႉ ၵေႃႉဢၼ်ၵူဝ်ႁႄၼုၵ်ႈၵပၢတ်ႈထႃႇဝရႃႉၽြႃးၼၼ်ႉၸိုင်၊ ႁႂ်ႈၶႃႈမၼ်းဢိၵ်ႇတင်း တရိၵ်ႈသၢၼ်ႇမၼ်းတင်းလၢႆ ပၢႆႈမိူဝ်းၵႂႃႇၸူးၵႃႈတီႈႁိူၼ်းသေဢေႃႈ။- 21ၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်တီႈၼုၵ်ႈၵပၢတ်ႈထႃႇဝရႃႉၽြႃးၼၼ်ႉၸမ်ႉ ဝႆႉၶႃႈမၼ်းဢိၵ်ႇတင်းတရိၵ်ႈသၢၼ်ႇမၼ်းတင်းလၢႆယူႇၵႃႈၼႂ်းတီႈပၢင်ႇတီႈပဵင်းယူႇဢေႃႈ။
22ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ ယိုၼ်ႈမိုဝ်းမႂ်းၶိုၼ်ႈၵႃႈၼိူဝ်ၽႃႉၵၢင်ႁၢဝ် ႁႂ်ႈၽူၼ်မၢၵ်ႇႁဵပ်း တူၵ်းလူင်းၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ် သႂ်ႇၵႃႈၼိူဝ်ၵူၼ်းလႂ်၊ ၵႃႈၼိူဝ်တရိၵ်ႈသၢၼ်ႇလႂ်၊ ၵႃႈၼိူဝ်တူၼ်ႈၵႃႈဢၼ်မီးၵႃႈတီႈပၢင်ႇတီႈပဵင်းလႂ် ၵႃႈတီႈမိူင်းဢေႇၵိပ်ႉတူႉၼႆႉတႃႉ၊ ဝႃႈၼင်ႇၼႆဢေႃႈ။- 23မူဝ်းသေႇဢဝ်ၶွၼ်ႉတဝ်ႉမၼ်း ယိုၼ်ႈၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈ ထႃႇဝရႃႉၽြႃးပွႆႇၶႂၢၼ်ဢိၵ်ႇတင်းမၢၵ်ႇႁဵပ်းတူၵ်းလူင်းလႄႈ၊ပဵဝ်ၽႆးၵေႃႈလႅၼ်ႈယူႇၵႃႈၼိူဝ်လိၼ်မိူင်းဢေႃႈ။ ၼင်ႇၼၼ်လႄႈ ထႃႇဝရႃႉၽြႃးႁႂ်ႈၽူၼ်မၢၵ်ႇႁဵပ်း တူၵ်းလူင်းသႂ်ႇၵႃႈၼိူဝ်မိူင်းဢေႇၵိပ်ႉတူႉလႄႈ၊- 24ပဵၼ်မၢၵ်ႇႁဵပ်း၊ မၢၵ်ႇႁဵပ်းဢၼ်လေႃးလူၺ်ႈၵၼ်တင်းၽႆးလႄႈ ႁၢႆႉၵျၢမ်းၼႃႇ၊ ဢၼ်ၸႃႉၸဵမ်ၶိင်ႇၵႃႇလႃႉမိူဝ်ႈဢၼ်ၸႃႉတႄႇ မိူင်းဢေႇၵိပ်ႉတူႉၼၼ်ႉလႄႈ ဢမ်ႇတွၼ်ႉပဵၼ်သေပွၵ်ႈၼၼ်ႉဢေႃႈ။- 25မၢၵ်ႇႁဵပ်းၼၼ်ႉတူၵ်းၽတ်ႉသႂ်ႇၵႃႈဢၼ်မီးၵႃႈၼႂ်းတီႈပၢင်ႇတီႈပဵင်း ဢၼ်ဝႃႈၵူၼ်းလႂ်၊ ဢိၵ်ႇတင်းတရိၵ်ႈသၢၼ်ႇလႂ်၊ ၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်ဢေႃႈ။ တူၼ်ႈယိူဝ်ႈတူၼ်ႈယႃႈၵေႃႈ မၢၵ်ႇႁဵပ်းတူၵ်းၽတ်ႉသႂ်ႇလႄႈ ႁၵ်းႁဵၵ်းတူၼ်ႈမႆႉ ၵႃႈၼႂ်းတီႈပၢင်ႇတီႈပဵင်းၵူႈတူၼ်ႈပႅတ်ႈဢေႃႈ။- 26ၵႃႈၼႂ်းမိူင်းၵေႃးသိၼ်ႇ၊ တီႈဢၼ်ၵူၼ်းမဵဝ်းဢီႉသရေႇလႃႉယူႇၼၼ်ႉၸမ်ႉ၊ ၽူၼ်မၢၵ်ႇႁဵပ်းဢမ်ႇတူၵ်း။
27မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃး ပွႆႇၸႂ်ႉၵူၼ်းၵႂႃႇလႄႈႁွင်ႉဢဝ်မူဝ်းသေႇတင်းဢႃႇရုၼ်ႇသေယဝ်ႉ လၢတ်ႈလႄႈဝႃႈ၊ ပွၵ်ႈၼႆႉၵဝ်ၽိတ်းပိူင်ႈယဝ်ႉ။ ထႃႇဝရႃႉၽြႃးသိုဝ်ႈတေႃႇဢေႃႈ။ ၵဝ်ဢိၵ်ႇတင်းၵူၼ်းၵဝ်တင်းလၢႆ ဢပႅတ်ႈၼမ်ၼႃႇဢေႃႈ။- 28တွင်းပၢၼ်ႇထႃႇဝရႃႉၽြႃးပုၼ်ႈၵဝ်သေၵမ်းတႃႉ။ သဵင်ၽြႃးပဵၼ်ၸဝ်ႈၸိူဝ်းၼႆႉ ဢိၵ်ႇတင်းမၢၵ်ႇႁဵပ်းၼႆႉၸိုင်၊ ပေႃးယဝ်ႉ။ ၵဝ်တၵ်းပွႆႇသူၵႂႃႇလႄႈ သူဢမ်ႇလႆႈၵိုတ်းသဝ်းယူႇသေၸူဝ်ႈသေယၢမ်းၵူၺ်ႉ၊ ဝႃႈၼင်ႇၼႆဢေႃႈ။- 29မူဝ်းသေႇၵေႃႈလဝ်ႊလၢတ်ႈလႄႈဝႃႈ၊ မိူဝ်ႈဢၼ်ၶႃႈၸဝ်ႈဢွၵ်ႇၵႃႈၼႂ်းဝဵင်းၼႆႉၼၼ်ႉၸိုင်၊ ၶႃႈၸဝ်ႈတၵ်းဢႃႈၽႃႇမိုဝ်းၶႃႈၸဝ်ႈ ၵႃႈတီႈၽၢႆႇၼႃႈထႃႇဝရႃႉၽြႃးတီႈၶႃႈဢေႃႈ။ လွင်ႈၼင်ႇႁိုဝ်ၸဝ်ႈႁဝ်းတၵ်းႁူႉလွင်ႈဢၼ် ထႃႇဝရႃႉၽြႃးဢုပ်ႉပိူင်ႇလိၼ်မိူင်းၼႆႉၼၼ်ႉၸိုင် ၶႂၢၼ်တင်းလၢႆ တၵ်းထၢတ်ႇယဵၼ်လႄႈ လိုၼ်းၼၼ်ႉၽူၼ်မၢၵ်ႇႁဵပ်းဢမ်ႇလႆႈတူၵ်း။- 30ၼႂ်းဝႃႈၼၼ်သေၵေႃႈ ၶႃႈၸဝ်ႈႁူႉလွင်ႈဢၼ်ၸဝ်ႈႁဝ်း ဢိၵ်ႇတင်းၶႃႈၸဝ်ႈႁဝ်းတင်းလၢႆ တၵ်းဢမ်ႇပႆႇၵူဝ်ပႆႇႁႄထႃႇဝရႃႉၽြႃးၼၼ်ႉယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 31မၢၵ်ႇႁဵပ်းတူၵ်းၽတ်ႉသႂ်ႇတူၼ်ႈပၢၼ်ႇလႂ် ဢိၵ်ႇတင်းတူၼ်ႈၶဝ်ႈမူႉယေႃးလႂ်ဢေႃႈ။ လွင်ႈမၼ်းၸမ်ႉ တူၼ်ႈၶဝ်ႈမူႉယေႃးမီးတဵမ်ဝႆႉတင်းမၢၵ်ႇမၼ်းႁူင်းမၼ်းယဝ်ႉယဝ်ႉ။ တူၼ်ႈပၢၼ်ႇၵေႃႈမွၵ်ႇမွၵ်ႇမၼ်းယဝ်ႉယဝ်ႉ။- 32တူၼ်ႈၶဝ်ႈၵျုင်ႇ ဢိၵ်ႇတင်းတူၼ်ႈၶဝ်ႈၸမ်ႉ၊ ဢမ်ႇလႆႈၶၢမ်ႇတၢင်းဢၼ်ၽတ်ႉသႂ်ႇ။ လွင်ႈမၼ်းၸမ်ႉ တူၼ်ႈၸိူဝ်းၼၼ်ႉဢမ်ႇပႆႇယႂ်ႇပႆႇထူၼ်ႈ။- 33မူဝ်းသေႇၼၼ်ႉ ဢွၵ်ႇသေၵႃႈတီႈ ၶုၼ်ႁေႃၶမ်းၽႃႇရေႃးလႄႈ ၵႂႃႇၵႃႈၼွၵ်ႈဝဵင်းသေယဝ်ႉ၊ ဢႃႈၽႃႇမိုဝ်းမၼ်းၵႃႈတီႈၽၢႆႇၼႃႈထႃႇဝရႃႉၽြႃးလႄႈ ၶႂၢၼ်တင်းလၢႆတင်းမၢၵ်ႇႁဵပ်းၼၼ်ႉႁိူတ်ႇၵႂႃႇႁၢႆၵႂႃႇဢေႃႈ။ ၵႃႈၼိူဝ်လိၼ်ၵေႃႈ ၽူၼ်ဢမ်ႇတူၵ်းဢမ်ႇမႃး။- 34မိူဝ်ႈဢၼ်ၶုၼ်ႁေႃၶမ်းၽႃႇရေႃး ႁၼ်လွင်ႈဢၼ်ၽူၼ်ဢိၵ်ႇတင်းမၢၵ်ႇႁဵပ်းတင်းၶႂၢၼ်ၸိူဝ်းၼၼ်ႉ ႁိူတ်ႇၵႂႃႇႁၢႆၵႂႃႇၸိူဝ်ႉၼင်ႇၼၼ်ၼၼ်ႉၸိုင်၊ မၼ်းသမ်ႉၶိုၼ်းၽိတ်းပိူင်ႈထႅင်ႈလႄႈ ဢိၵ်ႇလူၺ်ႈၵၼ်တင်းၶႃႈမၼ်းၵူၼ်းမၼ်းတင်းလၢႆ ႁူဝ်ၸႂ်ၵႅၼ်ႇၶႅင်ယူႇဢေႃႈ။- 35ၶုၼ်ႁေႃၶမ်းၽႃႇရေႃး ႁူဝ်ၸႂ်ၵႅၼ်ႇၶႅင်လႄႈ ယင်းဢမ်ႇပွႆႇၵူၼ်းမဵဝ်းဢီႉသရေႇလႃႉၵႂႃႇ မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃးလၢတ်ႈဝႆႉတီႈမူဝ်းသေႇၼၼ်ႉဢေႃႈ။
Currently Selected:
ဢွၵ်ႇၵႂႃႇ 9: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
