ဢွၵ်ႇၵႂႃႇ 8
8
(2) ၽေးၶဵတ်ႇ
1ထႃႇဝရႃႉၽြႃးသမ်ႉ မီးဢမိင်ႉတီႈမူဝ်းသေႇလႄႈဝႃႈ၊ ၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးသေလႄႈလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃးလၢတ်ႈလႄႈဝႃႈၸမ်ႉ၊ ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။- 2ပေႃးမႂ်းထဵင်ပႅတ်ႈလႄႈဝႃႈ၊ ဢမ်ႇပွႆႇၵႂႃႇၵူၺ်ႉ၊ ဝႃႈၼင်ႇၼႆၸိုင်၊ ၵဝ်တၵ်းဢဝ်တင်းၶဵတ်ႇတင်းလၢႆ ပၼ်တၢမ်ႇၵႃႈၼႂ်းမိူင်းမႂ်း ၵူႈတီႈၵူႈလႅၼ်ဢေႃႈ။- 3ၼမ်ႉႁွင်ႈတၵ်းၵိူတ်ႇလဵင်ႉၶဵတ်ႇမႃးၼမ်ၼႃႇလႄႈၶဝ်တၵ်းဢွၼ်ၵၼ်ၶိုၼ်ႈလႄႈၶဝ်ႈယူႇၵႃႈၼႂ်းႁိူၼ်းမႂ်း၊ ၵႃႈၼႂ်းလုၵ်းတီႈၼွၼ်းမႂ်း၊ ၵႃႈၼိူဝ်ၵူႇတီႈၼွၼ်းမႂ်း၊ ၵႃႈၼႂ်းႁိူၼ်းၶႃႈမႂ်း၊ ၵႃႈၼိူဝ်ၵူၼ်းဝၢၼ်ႈၵူၼ်းမိူင်းမႂ်း၊ ၵႃႈၼႂ်းၽီးၽႆးမႂ်း၊ ၵႃႈၼႂ်းၵွၵ်းဝၢၼ်ႇဢၼ် ၼူတ်ႈၶဝ်ႈမုၼ်းမႂ်း ၸိူဝ်းၼၼ်ႉဢေႃႈ။- 4ၶဵတ်ႇၸိူဝ်းၼၼ်ႉတၵ်းဢွၼ်ၵၼ်ၶိုၼ်ႈယူႇ ၵႃႈၼိူဝ်ၸႃႉၸဵမ်မႂ်းလႄႈ ၵူၼ်းဝၢၼ်ႈၵူၼ်းမိူင်းမႂ်းဢိၵ်ႇတင်းၶႃႈမႂ်း ၵႃႈမီးတင်းသဵင်ႈတင်းလူင်ဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဝႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
5ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ လၢတ်ႈတီႈဢႃႇရုၼ်ႇလႄႈဝႃႈ၊ ဢဝ်တင်းၶွၼ်ႉတဝ်ႉမႂ်းယိုၼ်းမိုဝ်းမႂ်း ၵႃႈၼိူဝ်ၼမ်ႉႁွင်ႈၼမ်ႉၵႄး တင်းၼမ်ႉၼွင်ၸိူဝ်းၼၼ်ႉလႄႈ ႁႂ်ႈၶဵတ်ႇတင်းလၢႆၶိုၼ်ႈမႃး ၵႃႈၼိူဝ်မိူင်းဢေႇၵိပ်ႉတူႉၼႆႉတႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 6ဢႃႇရုၼ်ႇၼၼ်ႉယိုၼ်းမိုဝ်းမၼ်း ၵႃႈၼိူဝ်ၼမ်ႉဢၼ်မီးၵႃႈၼႂ်းမိူင်းဢေႇၵိပ်ႉတူႉလႄႈ ၶဵတ်ႇဢွၼ်ၵၼ်ၶိုၼ်ႈမႃးႁူမ်ႇသုမ်ႇမိူင်းဢေႇၵိပ်ႉတူႉဝႆႉဢေႃႈ။- 7သြႃႇဝိၵ်ႉၸႃႇတင်းလၢႆၵေႃႈ ဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇႁဵတ်းမိူၼ်ၸိူဝ်ႉၼင်ႇၼၼ်လႄႈ ႁႂ်ႈၶဵတ်ႇတင်းလၢႆၶိုၼ်ႈမႃးၵႃႈၼိူဝ်မိူင်းဢေႇၵိပ်ႉတူႉဢေႃႈ။
8မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃးႁွင်ႉဢဝ်မူဝ်းသေႇတင်းဢႃႇရုၼ်ႇလႄႈလၢတ်ႈဝႃႈ၊ တွင်းပၢၼ်ႇႁႂ်ႈထႃႇဝရႃႉၽြႃးႁေႃႈၶဵတ်ႇၸိူဝ်းၼႆႉဢွၵ်ႇသေၵႃႈတီႈၵဝ်ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵဝ်တင်းလၢႆတႃႉ။ ၵဝ်တၵ်းပၼ်ႁႂ်ႈၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၵႂႃႇႁႂ်ႈလႆႈပုၵ်ႈၸေႃႇယိတ်ႈတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။- 9မူဝ်းသေႇၵေႃႈ လဝ်ႊလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊ လွင်ႈၼင်ႇႁိုဝ်ၶဵတ်ႇၸိူဝ်းၼႆႉတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈသေ ၵႃႈတီႈၸဝ်ႈႁဝ်းဢိၵ်ႇတင်းႁိူၼ်းၸဝ်ႈႁဝ်းတင်းလၢႆလႄႈ ႁႂ်ႈၶဝ်ယူႇၵႃႈၼႂ်းၼမ်ႉႁွင်ႈၵူၺ်းၸိုင်၊ ၶႅၼ်းတေႃႈမၵ်းၶၢၼ်းဝႆႉၶိင်ႇဢၼ်ၶႃႈၸဝ်ႈတၵ်းလႆႈတွင်းပၢၼ်ႇပုၼ်ႈၸဝ်ႈႁဝ်းဢိၵ်ႇတင်းၶႃႈၸဝ်ႈႁဝ်းတင်းၵူၼ်းဝၢၼ်ႈၵူၼ်းမိူင်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 10မၼ်းၸဝ်ႈၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၽုၵ်ႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းလဝ်ႊလၢတ်ႈလႄႈဝႃႈ၊ လွင်ႈၼင်ႇႁိုဝ် ၸဝ်ႈႁဝ်းတၵ်းလႆႈႁူႉလွင်ႈဢၼ်ၽြႃးပဵၼ်ၸဝ်ႈဢၼ်မိူၼ်ၸိူဝ်ႉၼင်ႇထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁဝ်းၼႆႉ ဢမ်ႇမီးၼၼ်ႉၸိုင်၊ တၵ်းပဵၼ်ၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉလႄႈ၊- 11ၶဵတ်ႇၸိူဝ်းၼႆႉတၵ်းဢွၵ်ႇသေၵႃႈတီႈၸဝ်ႈႁဝ်း၊ ဢိၵ်ႇတင်းႁိူၼ်းၸဝ်ႈႁဝ်း၊ တင်းၶႃႈၸဝ်ႈႁဝ်း၊ တင်းၵူၼ်းဝၢၼ်ႈၵူၼ်းမိူင်းၸဝ်ႈႁဝ်းတင်းလၢႆၵႂႃႇလႄႈ ယူႇၵႃႈၼႂ်းၼမ်ႉႁွင်ႈၵူၺ်းတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 12မူဝ်းသေႇတင်းဢႃႇရုၼ်ႇဢွၵ်ႇသေၵႃႈတီႈ ၶုၼ်ႁေႃၶမ်းၽႃႇရေႃးၵႂႃႇလႄႈ မူဝ်းသေႇႁဵတ်းသူးတွင်းပထၼႃႇတီႈထႃႇဝရႃႉၽြႃး၊ ၵွပ်ႈပိူဝ်ႈၶဵတ်ႇ ဢၼ်မၼ်းၸဝ်ႈဢဝ်မႃးၵႃႈၼိူဝ်ၶုၼ်ႁေႃၶမ်းၽႃႇရေႃးၸိူဝ်းၼၼ်ႉဢေႃႈ။- 13ထႃႇဝရႃႉၽြႃး ႁဵတ်းၸွမ်းၵႃႈၼင်ႇၵႂၢမ်းဢၼ်မူဝ်းသေႇလဝ်ႊလၢတ်ႈသူးတွင်းၼၼ်ႉလႄႈ ၶဵတ်ႇၸိူဝ်းၼၼ်ႉတၢႆၵႃႈၼႂ်းႁိူၼ်း၊ ၵႃႈၼႂ်းဝၢၼ်ႈ၊ ၵႃႈၼႂ်းတူင်ႈၼႃးၸိူဝ်းၼၼ်ႉဢေႃႈ။- 14ၶဝ်ၵဵပ်းဢဝ်တူဝ်တၢႆၸူႉဝႆႉၵွင်ဝႆႉလႄႈမဵၼ်တူႇၵႂႃႇတင်းမိူင်းဢေႃႈ။- 15ၶုၼ်ႁေႃၶမ်းၽႃႇရေႃးၵေႃႈ မိူဝ်ႈဢၼ်ႁူႉႁၼ် လွင်ႈဢၼ်လႆႈသၢၵ်ႈသႃႇမႃးၼၼ်ႉၸိုင်၊ ႁူဝ်ၸႂ်ၵႅၼ်ႇၶႅင်လႄႈ ယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈ ယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။
(3) ၽေးႁိၼ်ႉ
16ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ လၢတ်ႈတီႈဢႃႇရုၼ်ႇလႄႈဝႃႈ၊ ဢဝ်ၶွၼ်ႉတဝ်ႉမႂ်းယိုၼ်းမိုဝ်းလႄႈ ပေႃႉယႅၼ်ႉမုၼ်ႈလိၼ်ႁႂ်ႈပဵၼ်ႁိၼ်ႉၵႂႃႇၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်တႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊- 17ၶဝ်ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉလႄႈ ဢႃႇရုၼ်ႇဢဝ်ၶွၼ်ႉတဝ်ႉယိုၼ်းမိုဝ်းမၼ်းလႄႈ ပေႃႉယႅၼ်ႉမုၼ်ႈလိၼ်သေယဝ်ႉ၊ ပဵၼ်ႁိၼ်ႉၵႂႃႇၵႃႈတီႈၵူၼ်း ဢိၵ်ႇတင်းၵႃႈတီႈတရိၵ်ႈသၢၼ်ႇတင်းလၢႆဢေႃႈ။ မုၼ်ႈလိၼ်ၵႃႈမီးတင်းသဵင်ႈတင်းလူင် ပဵၼ်ႁိၼ်ႉၵႂႃႇၵႃႈၼႂ်းမိူင်းဢေႇၵိပ်ႉတူႉ ၵူႈတီႈၵူႈလႅၼ်ၼၼ်ႉဢေႃႈ။- 18သြႃႇဝိၵ်ႉၸႃႇၸိူဝ်းၼၼ်ႉၵေႃႈ ဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇႁဵတ်းမိူၼ်ၸိူဝ်ႉၼင်ႇၼၼ် ႁႂ်ႈပဵၼ်ႁိၼ်ႉမႃးလႄႈ ဢမ်ႇတၢတ်ႈၼိူင်ႇလႆႈ။ ၼင်ႇၼၼ်လႄႈ ႁိၼ်ႉမီးယူႇၵႃႈတီႈၵူၼ်း ဢိၵ်ႇတင်းတရိၵ်ႈသၢၼ်ႇတင်းလၢႆဢေႃႈ။- 19သြႃႇဝိၵ်ႉၸႃႇၸိူဝ်းၼၼ်ႉၵေႃႈ ဢွၼ်ၵၼ်လဝ်ႊလၢတ်ႈတီႈ ၶုၼ်ႁေႃၶမ်းၽႃႇရေႃးလႄႈဝႃႈ၊ လွင်ႈတၢင်းၼႆႉၸိုင်၊ ပဵၼ်ၼိဝ်ႉမိုဝ်းၽြႃးပဵၼ်ၸဝ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။ ၵူၺ်းၵႃႈ ၶုၼ်ႁေႃၶမ်းၽႃႇရေႃး ႁူဝ်ၸႂ်ၵႅၼ်ႇၶႅင်လႄႈ ယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈ ယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။
(4) ၽေးလိူၵ်ႇ
20ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ မႂ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၵႂႃႇၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃး ၼႂ်းမိူဝ်ႈဢၼ်မၼ်းၵႂႃႇၵႃႈတီႈတိုဝ်ႉၼမ်ႉၼၼ်ႉသေလႄႈလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။- 21ပေႃးဢမ်ႇပွႆႇၵူၼ်းၵဝ်တင်းလၢႆၵႂႃႇလႄႈယူႇၸိုင်၊ ၵဝ်တၵ်းပွႆႇၸႂ်ႉလိူၵ်ႇၼမ်ၼႃႇမႃးၵႃႈတီႈမႂ်း ဢိၵ်ႇတင်းၶႃႈမႂ်းတင်းၵူၼ်းဝၢၼ်ႈၵူၼ်းမိူင်းမႂ်း တင်းႁိူၼ်းမႂ်းၸိူဝ်းၼၼ်ႉလႄႈ ႁိူၼ်းၵူၼ်းဢေႇၵိပ်ႉတူႉတင်းလၢႆ ဢိၵ်ႇတင်းလိၼ်တီႈဢၼ်ၶဝ်ယူႇၼၼ်ႉ တၵ်းလႆႈမီးတဵမ်ဝႆႉတင်းလိူၵ်ႇဢေႃႈ။- 22ၼင်ႇႁိုဝ်မႂ်းတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼႂ်းၶိုင်ႈၵၢင်လိၼ်မိူင်းၼႆႉၸိုင်၊ ၼႂ်းဝၼ်းၼၼ်ႉ ၵဝ်တၵ်းႁႂ်ႈမိူင်း ၵေႃးသိၼ်ႇ တီႈယူႇၵူၼ်းၵဝ်ၸိူဝ်းၼၼ်ႉ ပႅၵ်ႇပိူင်ႈသေလႄႈ လိူၵ်ႇဢမ်ႇလႆႈမီးၵႃႈၼႂ်းမိူင်းၼၼ်ႉ။- 23ၼင်ႇၼၼ်လႄႈ ၵဝ်တၵ်းႁႂ်ႈၵူၼ်းၵဝ်တင်းၵူၼ်းမႂ်း ပႅၵ်ႇပိူင်ႈၵၼ်ဢေႃႈ။ ၼႂ်းဝၼ်းမိူဝ်ႈၽုၵ်ႈ ၼီႉမိၵ်ႈလၢၵ်ႈၶၼႃႇၼၼ်ႉတၵ်းပေႃႇမႃးဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 24ထႃႇဝရႃႉၽြႃးႁဵတ်းၸွမ်း ၸိူဝ်ႉၼင်ႇၼၼ်လႄႈ လိူၵ်ႇဢၼ်ၵျၢမ်းၼႃႇတင်းလၢႆႁွတ်ႈမႃးၵႃႈတီႈၸႃႉၸဵမ်ႁေႃၶုၼ်ႁေႃၶမ်းၽႃႇရေႃးလႄႈ ႁိူၼ်းၶႃႈမၼ်းၵူၼ်းမၼ်း ၵႃႈၼႂ်းမိူင်းဢေႇၵိပ်ႉတူႉၵူႈတီႈၵူႈလႅၼ်လႄႈ မိူင်းလူႉလႅဝ်ၵႂႃႇၵွပ်ႈပိူဝ်ႈလိူၵ်ႇၸိူဝ်းၼၼ်ႉဢေႃႈ။
25မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃး ႁွင်ႉဢဝ်မူဝ်းသေႇတင်းဢႃႇရုၼ်ႇလႄႈ မီးဢမိင်ႉလႄႈဝႃႈ၊ သူၵႂႃႇပုၵ်ႈၸေႃႇယိတ်ႈတီႈ ၽြႃးပဵၼ်ၸဝ်ႈသူၵႃႈတီႈၼႂ်းမိူင်းၼႆႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 26မူဝ်းသေႇၵေႃႈလဝ်ႊလၢတ်ႈလႄႈဝႃႈ၊ ဢမ်ႇထုၵ်ႇလီႁဵတ်းၸိူဝ်ႉၼင်ႇၼၼ်တီႈၶႃႈ၊ ပေႃးႁဵတ်းၸိုင်၊ ၶႃႈၸဝ်ႈႁဝ်းၶဝ် တၵ်းလႆႈပုၵ်ႈၸေႃႇယိတ်ႈလွင်ႈတၢင်းဢၼ် ၵူၼ်းဢေႇၵိပ်ႉတူႉ လီႁၢင်ႈၼၼ်ႉတီႈထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ ပေႃးပုၵ်ႈၸေႃႇယိတ်ႈလွင်ႈတၢင်းဢၼ် ၵူၼ်းဢေႇၵိပ်ႉတူႉလီႁင်ႈၼၼ်ႉ ၵႃႈတီႈသိုဝ်ႈၼႃႈတႂ်ႈတႃၶဝ်ၸိုင်၊ ၶဝ်တၵ်းဢဝ်တင်း မၢၵ်ႇႁိၼ်ထိမ်ႈၶႃႈၸဝ်ႈႁဝ်းၶဝ်၊ ဢမ်ႇၸႂ်ႈတီႈၶႃႈႁိုဝ်။- 27ပိူဝ်ႈၼႆလႄႈ ၶႃႈၸဝ်ႈႁဝ်းၶဝ်တၵ်းလႆႈ ၵႂႃႇၵႃႈတီႈၼႂ်းထိူၼ်ႇပုၼ်ႉ ၶၢဝ်းတၢင်းသေသၢမ်ဝၼ်းၼိုင်ႈလႄႈ ပုၵ်ႈၸေႃႇယိတ်ႈ တီႈထႃႇဝရႃႉၽြႃး ၽြႃးပဵၼ်ၸဝ်ႈ ၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ် မၼ်းၸဝ်ႈတၵ်းမီးဢမိင်ႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 28ၶုၼ်ႁေႃၶမ်းၽႃႇရေႃးၵေႃႈလၢတ်ႈလႄႈဝႃႈ၊ ၵဝ်တၵ်းပွႆႇသူၵႂႃႇ ႁႂ်ႈသူလႆႈပုၵ်ႈၸေႃႇယိတ်ႈၵႃႈၼႂ်းထိူၼ်ႇပုၼ်ႉတီႈထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။ ၼႂ်းဝႃႈၼၼ်သေၵေႃႈ သူဢမ်ႇလႆႈၵႂႃႇၵႆၼႃႇလူင်လၢင်။ တွင်းပၢၼ်ႇပုၼ်ႈၵဝ်တႃႉ၊ ဝႃႈၼင်ႇၼႆဢေႃႈ။- 29မူဝ်းသေႇၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈၼႆႉတၵ်းဢွၵ်ႇသေ ၵႃႈတီႈၸဝ်ႈႁဝ်းၵႂႃႇလႄႈ တွင်းပၢၼ်ႇတီႈထႃႇဝရႃႉၽြႃး ႁႂ်ႈလိူၵ်ႇၸိူဝ်းၼႆႉ ၽၢတ်ႇယၢၼ်သေၶုၼ်ႁေႃၶမ်းၽႃႇရေႃး ဢိၵ်ႇတင်းၶႃႈမၼ်းၸဝ်ႈ တင်းၵူၼ်းဝၢၼ်ႈၵူၼ်းမိူင်းမၼ်းၸဝ်ႈတင်းလၢႆ ၼႂ်းဝၼ်းမိူဝ်ႈၽုၵ်ႈတီႈၶႃႈဢေႃႈ။ ၵူၺ်းၵႃႈ လိုၼ်းၼႆႉ ယႃႇပေပႅတ်ႉလႅၼ်လႄႈ ႁႄႉၶႅၼ်ႁႂ်ႈၵူၼ်းမဵဝ်းဢီႉသရေႇလႃႉတင်းလၢႆ ဢမ်ႇလႆႈၵႂႃႇပုၵ်ႈၸေႃႇယိတ်ႈ တီႈထႃႇဝရႃႉၽြႃးသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊- 30မူဝ်းသေႇဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃးၵႂႃႇလႄႈ တွင်းပၢၼ်ႇတီႈထႃႇဝရႃႉၽြႃးဢေႃႈ။- 31ထႃႇဝရႃႉၽြႃးၵေႃႈႁဵတ်းၸွမ်းၵႂၢမ်းမူဝ်းသေႇလႄႈ ပႄႇၽဵဝ်ႈလိူၵ်ႇတင်းလၢႆပႅတ်ႈသေၵႃႈတီႈၶုၼ်ႁေႃၶမ်းၽႃႇရေႃး ဢိၵ်ႇတင်းၶႃႈမၼ်းတင်းၵူၼ်းဝၢၼ်ႈၵူၼ်းမိူင်းမၼ်းၸိူဝ်းၼၼ်ႉလႄႈ ဢမ်ႇၵိုတ်းဢမ်ႇၵျၢၼ်ႇဝႆႉသေတူဝ်။- 32မိူဝ်ႈၼၼ်ႉၵေႃႈ ၶုၼ်ႁေႃၶမ်းၽႃႇရေႃး ႁူဝ်ၸႂ်သမ်ႉၵႅၼ်ႇၶႅင်ထႅင်ႈလႄႈ ယင်းဢမ်ႇပွႆႇၵူၼ်းမဵဝ်းဢီႉသရေႇလႃႉတင်းလၢႆၵႂႃႇလႄႈ ယူႇဢေႃႈ။
Currently Selected:
ဢွၵ်ႇၵႂႃႇ 8: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
