ဢွၵ်ႇၵႂႃႇ 14
14
လွင်ႈၶၢမ်ႈပၢင်ႇလၢႆႇလႅင်
1ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊- 2သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉႁႂ်ႈၶဝ်ဝၢႆႇၶိုၼ်းလႄႈ ၶျႃးတပ်ႉၵႃႈတီႈ ၽၢႆႇၼႃႈဝဵင်းပီႉႁႁီႉရုတ်ႉ၊ ၵႄႈဝူင်ႈၵၢင်ဝဵင်းမီႉၵတေႃးလႃႉ ဢိၵ်ႇတင်းပၢင်ႇလၢႆႇၵႃႈတီႈၽၢႆႇၼႃႈပႃႇလႃႇၸေႇၽုၼ်ႇၼၼ်ႉတႃႉ။ သူတၵ်းလႆႈၶျႃးတပ်ႉၵႃႈတီႈၽၢႆႇၼႃႈ ဝၼ်းဢွၵ်ႇဝဵင်းၼၼ်ႉ ၵႃႈႁိမ်းပၢင်ႇလၢႆႇၼၼ်ႉဢေႃႈ။- 3လွင်ႈမၼ်းၸမ်ႉ ၶုၼ်ႁေႃၶမ်းၽႃႇရေႃး တၵ်းလၢတ်ႈလူၺ်ႈလွင်ႈ ၵူၼ်းမဵဝ်းဢီႉသရေႇလႃႉလႄႈဝႃႈ၊ ၶဝ်ႁွတ်ႈထိုင်ၵႃႈတီႈၵိတ်ႇတီႈၵိၼ်းယဝ်ႉ။ ထိူၼ်ႇၵေႃႈႁႄႉၶဝ်ဢိုတ်းၶဝ်ဝႆႉယဝ်ႉ၊ ဝႃႈၼင်ႇၼႆဢေႃႈ။- 4ၵဝ်တၵ်းႁႂ်ႈႁူဝ်ၸႂ် ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈ မၼ်းတၵ်းလိုပ်ႈၸွမ်းလမ်းၸွမ်းၶဝ်ဢေႃႈ။ လွင်ႈၼင်ႇႁိုဝ်ၵူၼ်းဢေႇၵိပ်ႉတူႉတင်းလၢႆ တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉၸိုင်၊ မုၼ်ၽုင်းၵဝ်တၵ်းပေႃႇဢွၵ်ႇမႃး ၵွပ်ႈပိူဝ်ႈၶုၼ်ႁေႃၶမ်းၽႃႇရေႃးဢိၵ်ႇတင်းၵူၼ်းသိုၵ်းမၼ်းတင်းလၢႆၼၼ်ႉဢေႃႈ၊ ဝႃႈၼင်ႇၼႆဢေႃႈ။ ၶဝ်ၵေႃႈဢွၼ်ၵၼ်ႁဵတ်း ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉဢေႃႈ။
5ပိူၼ်ႈလဝ်ႊလၢတ်ႈလွင်ႈဢၼ်ၵူၼ်းၸိူဝ်းၼၼ်ႉ ဢွၵ်ႇပၢႆႈၵႂႃႇၼၼ်ႉ တီႈၶုၼ်ႁေႃၶမ်းမိူင်းဢေႇၵိပ်ႉတူႉလႄႈ၊ ၸႃႉၸဵမ်ၸႂ်ၶုၼ်ႁေႃၶမ်းၽႃႇရေႃးလႄႈ ၶႃႈမၼ်းၸိူဝ်းၼၼ်ႉပိၼ်ႈပိၼ်ႈႁၢႆႁၢႆတေႃႇၵူၼ်းၸိူဝ်းၼၼ်ႉသေလႄႈလၢတ်ႈဝႃႈ၊ ႁဵတ်းႁိုဝ်လႄႈႁဝ်းလႆႈႁဵတ်းၸိူဝ်ႉၼင်ႇၼႆလႄႈ ပွႆႇၵူၼ်းမဵဝ်းဢီႉသရေႇလႃႉၵႂႃႇသေ ၵႃႈၼႂ်းတၢင်းဢၼ်ႁဝ်းၸႂ်ႉၵိၼ်သွႆၵိၼ်ယူႇၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 6မိူဝ်ႈၼၼ်ႉ ၶုၼ်ႁေႃၶမ်းၽႃႇရေႃး မႄးႁၢင်ႈမႄးႁႅၼ်းလေႃႉရထႃးမၼ်းလႄႈ ႁွင်ႉဢဝ်ၵူၼ်းမၼ်းတင်းသဵင်ႈတင်းလူင်ဢေႃႈ။- 7မၼ်းဢဝ်လေႃႉရထႃး ဢၼ်လိူၵ်ႈၵဵပ်းဢဝ်ႁူၵ်းပၢၵ်ႇဢိၵ်ႇတင်းလေႃႉရထႃးဢၼ်မီးၵႃႈၼႂ်းမိူင်းဢေႇၵိပ်ႉတူႉတင်းသဵင်ႈတင်းလူင်ၼၼ်ႉလႄႈ ႁွင်ႉဢဝ်ၶုၼ်ပူဝ်ႇၶီႇၼိူဝ်လေႃႉရထႃးႁင်းၽႂ်ႁင်းမၼ်းဢေႃႈ။- 8ထႃႇဝရႃႉၽြႃးႁႂ်ႈႁူဝ်ၸႂ်ၽႃႇရေႃးၶုၼ်ႁေႃၶမ်းဢေႇၵိပ်ႉတူႉၵႅၼ်ႇၶႅင်လႄႈ မၼ်းလိုပ်ႈၸွမ်းလမ်းၸွမ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢေႃႈ။ ၵူၺ်းၵႃႈ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢဝ်တင်းမိုဝ်းဢၼ်သုင်ၼႃႇသေလႄႈဢွၵ်ႇၵႂႃႇဢေႃႈ။- 9ၼင်ႇၼၼ်လႄႈ ၵူၼ်းဢေႇၵိပ်ႉတူႉတင်းသဵင်ႈတင်းလူင်ဢၼ်ဝႃႈမႃႉ ဢိၵ်ႇတင်းရထႃးၶုၼ်ႁေႃၶမ်းၽႃႇရေႃး၊ ၵူၼ်းသိုၵ်းၶီႇမႃႉမၼ်း၊ ပူဝ်ႇပႃႇမၼ်းၸိူဝ်းၼၼ်ႉဢွၼ်ၵၼ်လိုပ်ႈၸွမ်းလမ်းၸွမ်းလႄႈၶိုတ်းၶဝ် ဢၼ်ၶျႃးတပ်ႉယူႇၵႃႈတီႈႁိမ်းပၢင်ႇလၢႆႇႁိမ်းဝဵင်းပီႉႁႁီႉရုတ်ႉ ၵႃႈတီႈၼႃႈဝၼ်းဢွၵ်ႇပႃႇလႃႇၸေႇၽုၼ်ႇၼၼ်ႉဢေႃႈ။
10မိူဝ်ႈဢၼ်ၶုၼ်ႁေႃၶမ်းၽႃႇရေႃး သုတ်ႉၸမ်မႃးၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ မုင်ႈတူၺ်းလႄႈႁၼ်လွင်ႈဢၼ်ၵူၼ်းဢေႇၵိပ်ႉတူႉတင်းလၢႆၶီႇတပ်ႉၶီႇသိုၵ်းမႃးၼၼ်ႉသေယဝ်ႉ၊ ၶဝ်ၵူဝ်ၼႃႇလူင်လၢင်လႄႈ ဢွၼ်ၵၼ်ႁွင်ႉသႅၼ်ႇတီႈ ထႃႇဝရႃႉၽြႃးဢေႃႈ။- 11တီႈမူဝ်းသေႇၵေႃႈၶဝ်လၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၶုမ်ပႃႇႁဵဝ်ႈဢမ်ႇမီးၵႃႈၼႂ်းမိူင်းဢေႇၵိပ်ႉတူႉၼၼ်ႉလႄႈ၊ မႂ်းၸင်ႇဢဝ်ႁဝ်းမႃးႁႂ်ႈႁဝ်းလႆႈတၢႆ ၵႃႈတီႈထိူၼ်ႇၼႆႉႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁဵတ်းၸိူဝ်ႉၼင်ႇၼႆတီႈႁဝ်းလႄႈ ဢဝ်ႁဝ်းဢွၵ်ႇသေၵႃႈၼႂ်း မိူင်းဢေႇၵိပ်ႉတူႉမႃးၼင်ႇႁိုဝ်။- 12ဢၼ်ၼႆႉယဝ်ႉ ပဵၼ်ဢၼ်ႁဝ်းလၢတ်ႈတီႈမႂ်း ၵႃႈၼႂ်းမိူင်းဢေႇၵိပ်ႉတူႉလႄႈဝႃႈ၊ ယႃႇႁဝ်းတႃႉ။ ႁႂ်ႈႁဝ်းလႆႈၶၢမ်ႇႁဵတ်းၶႃႈယူႇ တီႈၵူၼ်းဢေႇၵိပ်ႉတူႉတင်းလၢႆၼႆႉသေၵမ်းလူၺ်ႈ၊ ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်။ တၢင်းဢၼ်ႁဝ်းၶၢမ်ႇႁဵတ်းၶႃႈ တီႈၵူၼ်းဢေႇၵိပ်ႉတူႉၸိူဝ်ႉၼၼ်ၼၼ်ႉ ယဵင်ႈၶႅၼ်းလီသေတၢင်းဢၼ်ႁဝ်းတၵ်းလႆႈတၢႆ ၵႃႈၼႂ်းထိူၼ်ႇၼႆႉဢေႃႈ၊ ဝႃႈၼင်ႇၼႆဢေႃႈ။
13 မူဝ်းသေႇၵေႃႈ ၶိုၼ်းလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ ယႃႇပေမႆႈၸႂ်။ ဢွၼ်ၵၼ်ၸုၵ်းယူႇၼိမ်ၼိမ်လီလီလႄႈ တူၺ်းတၢင်းဢၼ်ၵႄႇၶျွတ်ႈဢဝ် ဢၼ်ထႃႇဝရႃႉၽြႃးတၵ်းႁဵတ်းပုၼ်ႈသူဝၼ်းမိူဝ်ႈၼႆႉၼၼ်ႉတႃႉ။ ၵူၼ်းဢေႇၵိပ်ႉတူႉဢၼ်သူႁၼ်ဝၼ်းမိူဝ်ႈၼႆႉၸိူဝ်းၼၼ်ႉၸိုင်၊ ၵမ်းလိုၼ်းသူတၵ်းဢမ်ႇလႆႈၶိုၼ်းႁၼ်သေပွၵ်ႈ။- 14ထႃႇဝရႃႉၽြႃးတၵ်းယူႇၽၢႆႇသူလႄႈတိုၵ်းသိုၵ်းဢေႃႈ။ သူတၵ်းလႆႈဢွၼ်ၵၼ်ယူႇၼိမ်ၼိမ်လီလီဢေႃႈ၊ ဝႃႈၼင်ႇၼႆဢေႃႈ။- 15ထႃႇဝရႃႉၽြႃးၵေႃႈလၢတ်ႈတီႈမူဝ်းသေႇလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁွင်ႉသႅၼ်ႇတီႈၵဝ်ၼင်ႇႁိုဝ်။ သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉ ႁႂ်ႈၶဝ်ၵႂႃႇမိူဝ်းၼႃႈတိၵ်းတိၵ်းတႃႉ။- 16မႂ်းၸမ်ႉ၊ ယုၵ်ႉၶွၼ်ႉတဝ်ႉမႂ်းသေလႄႈ ယိုၼ်းမိုဝ်းမႂ်းၶိုၼ်ႈၵႃႈၼိူဝ်ပၢင်ႇလၢႆႇလႄႈၽႃႇၼမ်ႉပၢင်ႇလၢႆႇတႃႉ။ ၵူၼ်းမဵဝ်းဢီႉသရေႇလႃႉ ၸိူဝ်းၼႆႉတၵ်းလႆႈပႆၵႃႈၼိူဝ်လိၼ်ၵႃႈၼႂ်းၵၢင်ပၢင်ႇလၢႆႇၵႂႃႇဢေႃႈ။- 17ၵဝ်ၵေႃႈတၵ်းႁႂ်ႈႁူဝ်ၸႂ်ၵူၼ်းဢေႇၵိပ်ႉတူႉတင်းလၢႆၵႅၼ်ႇၶႅင်လႄႈ ၶဝ်တၵ်းဢွၼ်ၵၼ်ၶဝ်ႈၵႂႃႇၸွမ်းလင်ၶဝ်ဢေႃႈ။ မုၼ်ၽုင်းၵဝ်တၵ်းပေႃႇဢွၵ်ႇမႃးၵွပ်ႈပိူဝ်ႈ ၶုၼ်ႁေႃၶမ်းၽႃႇရေႃးဢိၵ်ႇတင်းပူဝ်ႇပႃႇမၼ်းတင်းသဵင်ႈတင်းလူင် တင်းရထႃးမၼ်းတင်းၵူၼ်းသိုၵ်းၶီႇမႃႉၸိူဝ်းၼၼ်ႉဢေႃႈ။- 18မိူဝ်ႈဢၼ်မုၼ်ၽုင်းၵဝ်ပေႃႇဢွၵ်ႇမႃးၵွပ်ႈပိူဝ်ႈ ၶုၼ်ႁေႃၶမ်းၽႃႇရေႃးဢိၵ်ႇတင်းရထႃးမၼ်း တင်းၵူၼ်းသိုၵ်းၶီႇမႃႉမၼ်း ၸိူဝ်းၼၼ်ၼၼ်ႉၸိုင်၊ ၵူၼ်းဢေႇၵိပ်ႉတူႉတင်းလၢႆ တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။
19မိူဝ်ႈၼၼ်ႉ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ ဢၼ်ၵႂႃႇဢွၼ်တၢင်းတပ်ႉၵူၼ်းမဵဝ်းဢီႉသရေႇလႃႉၼၼ်ႉ ၶၢႆႉတီႈသေလႄႈ ၶိုၼ်းမႃးၸွမ်းၵႃႈတီႈၽၢႆႇလင်ၶဝ်လႄႈ သဝ်မွၵ်ႇၵုမ်ႈၵေႃႈ ၶၢႆႉသေၵႃႈတီႈၽၢႆႇၼႃႈၶဝ်မႃးၸုၵ်းယူႇၵႃႈတီႈ ၽၢႆႇလင်ၶဝ်ဢေႃႈ။- 20ႁွတ်ႈထိုင်ၵႃႈတီႈၵႄႈဝူင်ႈၵၢင်တပ်ႉ ၵူၼ်းဢေႇၵိပ်ႉတူႉ ဢိၵ်ႇတင်းတပ်ႉၵူၼ်းမဵဝ်းဢီႉသရေႇလႃႉၸိူဝ်ႉၼင်ႇၼၼ်ၼၼ်ႉသေယဝ်ႉ၊ ပဵၼ်မွၵ်ႇၵုမ်ႈဢၼ်လပ်းသိင်ႇတီႈၵူၼ်းဢေႇၵိပ်ႉတူႉတင်းလၢႆ၊ ပၼ်တၢင်းဢၼ်လႅင်းတီႈၵူၼ်းမဵဝ်းဢီႉသရေႇလႃႉတင်းလၢႆၶိင်ႇၵၢင်ၶိုၼ်းလႄႈ၊ တင်းၶိုၼ်း တပ်ႉၼိုင်ႈလႄႈတပ်ႉၼိုင်ႈဢမ်ႇမႃးၵႂ်ႈမႃးၸမ်ၵၼ်လႆႈ။- 21မူဝ်းသေႇယိုၼ်းမိုဝ်းမၼ်းၶိုၼ်ႈၵႃႈၼိူဝ်ပၢင်ႇလၢႆႇလႄႈ ထႃႇဝရႃႉၽြႃးဢဝ်တင်းလူမ်းတၢင်းဢွၵ်ႇဢၼ်ႁႅင်းယႂ်ႇၼႃႇ ထူဝ်းထိပ်ႇၼမ်ႉပၢင်ႇလၢႆႇတင်းၶိုၼ်းလႄႈ ႁႂ်ႈလိၼ်ပေႃႇဢွၵ်ႇမႃး ဢိၵ်ႇတင်းၼမ်ႉတႅၵ်ႇဢႃႈၽၢတ်ႇယၢၼ်ၵၼ်ယူႇဢေႃႈ။- 22ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢွၼ်ၵၼ်ပႆၵႃႈၼိူဝ်လိၼ် ၶဝ်ႈၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇလႄႈ ၼမ်ႉၼၼ်ႉပဵၼ်ၸိူဝ်ႉၼင်ႇၽႃမၢၵ်ႇႁိၼ်ဝႆႉ ၵႃႈတီႈၽၢႆႇၶႂႃၶဝ် ဢိၵ်ႇတင်းၵႃႈတီႈၽၢႆႇသၢႆႉၶဝ်ယူႇဢေႃႈ။- 23ၵူၼ်းဢေႇၵိပ်ႉတူႉတင်းလၢႆ ဢိၵ်ႇတင်းမႃႉၶုၼ်ႁေႃၶမ်းၽႃႇရေႃး၊ လေႃႉရထႃးမၼ်း၊ ၵူၼ်းသိုၵ်းၶီႇမႃႉမၼ်းတင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်လိုပ်ႈၸွမ်းလမ်းၸွမ်းလႄႈ ၶဝ်ႈၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၸွမ်းလင်ၶဝ်ၵႂႃႇဢေႃႈ။- 24ၶိင်ႇႁူဝ်ၼႂ် ထႃႇဝရႃႉၽြႃးဢဝ်တင်းသဝ်ၽႆးမွၵ်ႇၵုမ်ႈၼၼ်ႉလူတူၺ်း တပ်ႉၵူၼ်းဢေႇၵိပ်ႉတူႉတင်းလၢႆလႄႈ ယႃႉယူၵ်ႉၶဝ်ဢေႃႈ။- 25မၼ်းၸဝ်ႈ ႁၵ်းမၢၵ်ႇလေႃႉၶဝ်ပႅတ်ႈ ႁႂ်ႈၶဝ်လႆႈႁေႃႈလေႃႉရထႃးၶဝ်ယၢပ်ႇၼႃႇထၼ်ႈပေႃး ႁႂ်ႈၵူၼ်းဢေႇၵိပ်ႉတူႉၸိူဝ်းၼၼ်ႉ လၢတ်ႈၵၼ်လႄႈဝႃႈ၊ ဢွၼ်ၵၼ်ဢွၵ်ႇပၢႆႈသေၵႃႈတီႈၵူၼ်းမဵဝ်းဢီႉသရေႇလႃႉတႃႉႁဝ်း။ ထႃႇဝရႃႉၽြႃးယူႇၽၢႆႇၶဝ်လႄႈတိုၵ်းတေႃး ၵူၼ်းဢေႇၵိပ်ႉတူႉတင်းလၢႆယဝ်ႉဢေႃႈ၊ ဝႃႈၼင်ႇၼႆဢေႃႈ။
26ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ ယိုၼ်းမိုဝ်းမႂ်းၶိုၼ်ႈ ၵႃႈၼိူဝ်ပၢင်ႇလၢႆႇ ႁႂ်ႈၼမ်ႉပၢင်ႇလၢႆႇၶိုၼ်းမႃးၵႃႈၼိူဝ်ၵူၼ်းဢေႇၵိပ်ႉတူႉတင်းလၢႆ ဢိၵ်ႇတင်းလေႃႉရထႃးၶဝ်တင်းၵူၼ်းသိုၵ်းၶီႇမႃႉၶဝ်ၸိူဝ်းၼၼ်ႉတႃႉ၊ ဝႃႈၼင်ႇၼႆလႄႈ၊- 27မူဝ်းသေႇယိုၼ်းမိုဝ်းမၼ်းၶိုၼ်ႈၵႃႈၼိူဝ်ပၢင်ႇလၢႆႇလႄႈ၊ မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ ၼမ်ႉပၢင်ႇလၢႆႇၶိုၼ်းမႃး မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇလႄႈ၊ ပိၵ်ႉသမ်ႉၵူၼ်းဢေႇၵိပ်ႉတူႉၸိူဝ်းၼၼ်ႉဢွၼ်ၵၼ်လႅၼ်ႈပၢႆႈသေၵေႃႈ၊ ထႃႇဝရႃႉၽြႃးဢဝ်ၶဝ်လူမ်ႉပႅတ်ႈ ၵႃႈၼႂ်းၶိုင်ႈၵၢင်ပၢင်ႇလၢႆႇဢေႃႈ။- 28ၼင်ႇၼၼ်လႄႈ ၼမ်ႉပၢင်ႇလၢႆႇၶိုၼ်းမႃးလႄႈထူမ်ႈလေႃႉရထႃးဢိၵ်ႇတင်း ၵူၼ်းသိုၵ်းၶီႇမႃႉ ဢၼ်ဝႃႈပူဝ်ႇပႃႇၶုၼ်ႁေႃၶမ်းၽႃႇရေႃးၵႃႈဢၼ်ၶဝ်ႈၵႃႈၼႂ်းပၢင်ႇလၢႆႇၸွမ်းၶဝ်ၼၼ်ႉတင်းသဵင်ႈတင်းလူင်ၼၼ်ႉပႅတ်ႈလႄႈ၊ ဢမ်ႇလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်း။- 29ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၸမ်ႉ၊ ဢွၼ်ၵၼ်ပႆၵႃႈၼိူဝ်လိၼ်ၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၵႂႃႇလႄႈ ၼမ်ႉၼၼ်ႉ ပဵၼ်ၸိူဝ်ႉၼင်ႇၽႃမၢၵ်ႇႁိၼ်ဝႆႉ ၵႃႈတီႈၽၢႆႇၶႂႃၶဝ်၊ ၵႃႈတီႈၽၢႆႇသၢႆႉၶဝ်ယူႇဢေႃႈ။- 30ၼင်ႇၼၼ်လႄႈ ထႃႇဝရႃႉၽြႃး ၼႂ်းဝၼ်းၼၼ်ႉၵႄႇသႄႇၶျွတ်ႈဢဝ် ၵူၼ်းမဵဝ်းဢီႉသရေႇလႃႉလွတ်ႈသေၵႃႈၼႂ်းမိုဝ်း ၵူၼ်းဢေႇၵိပ်ႉတူႉတင်းလၢႆလႄႈ၊ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ လႆႈႁၼ်တူဝ်တၢႆ ၵူၼ်းဢေႇၵိပ်ႉတူႉတင်းလၢႆၵႃႈတီႈႁိမ်းၽင်ႇပၢင်ႇလၢႆႇဢေႃႈ။- 31ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ႁၼ်ဢမူႉလူင် ဢၼ်ထႃႇဝရႃႉၽြႃးႁဵတ်းတီႈ ၵူၼ်းဢေႇၵိပ်ႉတူႉတင်းလၢႆၸိူဝ်ႉၼင်ႇၼၼ်ၼၼ်ႉလႄႈ ဢွၼ်ၵၼ်ၵူဝ်ႁႄထႃႇဝရႃႉၽြႃးဢေႃႈ။ ၶဝ်ယုမ်ႇမၢတ်ႈထႃႇဝရႃႉၽြႃး ဢိၵ်ႇတင်းမူဝ်းသေႇ ၶႃႈမၼ်းၸဝ်ႈၼၼ်ႉဢေႃႈ။
Currently Selected:
ဢွၵ်ႇၵႂႃႇ 14: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
