ဢွၵ်ႇၵႂႃႇ 15
15
မူဝ်းသေႇႁဵတ်းၵႂၢမ်းယွင်ႈယေႃး
1မိူဝ်ႈၼၼ်ႉ မူဝ်းသေႇ ဢိၵ်ႇတင်းၵူၼ်းမဵဝ်းဢီႉသရေႇလႃႉတင်းလၢႆဢွၼ်ၵၼ်ႁဵတ်းၵႂၢမ်းတီႈထႃႇဝရႃႉၽြႃးလႄႈဝႃႈၸမ်ႉ၊ ပိူဝ်ႈဢၼ်ထႃႇဝရႃႉၽြႃးမီးတၢင်းဢၼ်မုၼ်ယႂ်ႇမုၼ်သုင်လႄႈ၊ ၵဝ်ၶႃႈတၵ်းႁဵတ်းၵႂၢမ်းတီႈထႃႇဝရႃႉၽြႃးတီႈၶႃႈဢေႃႈ။ မၼ်းၸဝ်ႈ ဢဝ်မႃႉ ဢိၵ်ႇတင်း ၵူၼ်းဢၼ်ၶီႇမၼ်းၸိူဝ်းၼၼ်ႉ လူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉတီႈၶႃႈယဝ်ႉ။- 2ထႃႇဝရႃႉၽြႃးၼၼ်ႉ ပဵၼ်ႁႅင်းတၼ်းၶူဝ်းၵဝ် ဢိၵ်ႇတင်းတီႈဢၼ်ၵဝ်ႁဵတ်းၵႂၢမ်းဢေႃႈ။ ပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၵဝ်ဢေႃႈ။ မၼ်းၸဝ်ႈပဵၼ်ၽြႃးပဵၼ်ၸဝ်ႈၵဝ်လႄႈ၊ ၵဝ်တၵ်းႁဵတ်းထေႃးပၼႃႇတီႈမၼ်းၸဝ်ႈဢေႃႈ။ မၼ်းၸဝ်ႈပဵၼ်ၽြႃးပဵၼ်ၸဝ်ႈပူႇမွၼ်ႇၵဝ်လႄႈ၊ ၵဝ်တၵ်းယွင်ႈယေႃးမၼ်းၸဝ်ႈဢေႃႈ။
3ထႃႇဝရႃႉၽြႃးၼၼ်ႉပဵၼ်ႁူဝ်ႁၢၼ်တိုၵ်းသိုၵ်းဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈပဵၼ်ထႃႇဝရႃႉၽြႃးဢေႃႈ။- 4လေႃႉရထႃးၶုၼ်ႁေႃၶမ်းၽႃႇရေႃး ဢိၵ်ႇတင်းပူဝ်ႇပႃႇမၼ်းၸိူဝ်းၼၼ်ႉၸိုင်၊ မၼ်းၸဝ်ႈဢဝ်လူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉယဝ်ႉ။ ၶုၼ်ပူဝ်ႇဢၼ်လိူၵ်ႈၵဵပ်းဢဝ်ၸိူဝ်းၼၼ်ႉ ၸူမ်ပႅတ်ႈၵႃႈၼႂ်းပၢင်ႇလၢႆႇဢေႇတုမ်ႇယဝ်ႉယဝ်ႉ။- 5တီႈဢၼ်လိုၵ်ႉဢၼ်လမ်ႇၼႃႇၸိူဝ်းၼၼ်ႉ ထူမ်ႈၶဝ်ပႅတ်ႈယဝ်ႉယဝ်ႉ။ ၶဝ်လႆႈလူင်းၵႂႃႇၵႃႈတႂ်ႈမိူၼ်ၸိူဝ်ႉၼင်ႇမၢၵ်ႇႁိၼ်ယဝ်ႉယဝ်ႉ။- 6ဢူဝ်းထႃႇဝရႃႉၽြႃး၊ မိုဝ်းၶွၼ်ၶႂႃၸဝ်ႈႁဝ်းၼၼ်ႉ၊ ၵွပ်ႈပိူဝ်ႈႁႅင်းတၼ်းၶူဝ်းလႄႈ မုၼ်ၽုင်းယႂ်ႇၼႃႇလူင်လၢင်တီႈၶႃႈဢေႃႈ။ ဢူဝ်းထႃႇဝရႃႉၽြႃး၊ မိုဝ်းၶွၼ်ၶႂႃၸဝ်ႈႁဝ်းၼၼ်ႉ ဢဝ်ရၢၼ်ႇသူႇတင်းလၢႆ ႁၵ်းႁဵၵ်းယႃႉလႅဝ်ပႅတ်ႈတီႈၶႃႈဢေႃႈ။- 7ၸဝ်ႈႁဝ်းဢဝ်တင်းမုၼ်တၼ်းၶူဝ်းဢႃႇၼူႉၽေႃႇၸဝ်ႈႁဝ်းဢဝ်ၶဝ်ၸိူဝ်းဢၼ်ယူႇၽၢႆႇၼိုင်ႈ တင်းၸဝ်ႈႁဝ်းလႄႈ ၶတ်းၶႅင်ႁႅင်းတႃႉ ၸဝ်ႈႁဝ်းယူႇၸိူဝ်းၼၼ်ႉလူမ်ႉပႅတ်ႈတီႈၶႃႈဢေႃႈ။ ၸဝ်ႈႁဝ်းပွႆႇတၢင်းၸႂ်မႆႈၶႆႈၸႃႉၸဝ်ႈႁဝ်းလႄႈ ႁႂ်ႈၽႆးမႆႈၶဝ်ၼၼ်ႉ သုတ်းပႅတ်ႈ မိူၼ်ၸိူဝ်ႉၼင်ႇၽိူင်းၼၼ်ႉတီႈၶႃႈဢေႃႈ။- 8ၼမ်ႉၸိူဝ်းၼၼ်ႉ ၸူႉတုမ်ၵွင်ၵၼ်ဝႆႉ ၵွပ်ႈပိူဝ်ႈလူမ်းၶူႈလင်ၸဝ်ႈႁဝ်းလႄႈ ၼမ်ႉဢၼ်လႆၵႂႃႇယူႇၸိူဝ်းၼၼ်ႉ သုတ်ႉၶိုၼ်ႈႁုၼ်ႈၶိုၼ်ႈ ပဵၼ်ၸွၼ်ပဵၼ်ၸႅၼ်ဝႆႉလႄႈ၊ ၼမ်ႉဢၼ်လိုၵ်ႉဢၼ်လမ်ႇၼႃႇၸိူဝ်းၼၼ်ႉ ၵႅၼ်ႇမႃးၶႅင်မႃးၵႃႈၼႂ်းပၢင်ႇလၢႆႇတီႈၶႃႈဢေႃႈ။- 9ရၢၼ်ႇသူႇဝႃႈ၊ ၵဝ်တၵ်းလိုပ်ႈၸွမ်းလမ်းၸွမ်းဢေႃႈ။ ၵဝ်တၵ်းၸမ်တၵ်းၶိုတ်းဢေႃႈ။ ၵဝ်တၵ်းဢဝ်ဢုၵ်ႉၸႃႇဢၼ်ႁိမ်ႁူင်ႇဢဝ်လႄႈ လႆႈၼၼ်ႉ ၽႄမႅင်ႇလႄႈ ႁႂ်ႈႁူဝ်ၸႂ်ၵဝ်ပျေႉၸုမ်ႇ ဢိမ်ႇၸႂ်ၵႃႈတီႈၶဝ်ၼၼ်ႉဢေႃႈ။ ၵဝ်တၵ်းၸၵ်ႉထွတ်ႇဢဝ်လၢပ်ႇဢွၵ်ႇသေၵႃႈတီႈၵပ်းလႄႈ ဢဝ်တင်းမိုဝ်းၵဝ်ယႃႉၽဵဝ်ႈၶဝ်ပႅတ်ႈဢေႃႈ၊ ဝႃႈၼင်ႇၼႆတီႈၶႃႈဢေႃႈ။- 10ပိူဝ်ႈဢၼ်ၸဝ်ႈႁဝ်းဢဝ်လူမ်းပဝ်ႇၼၼ်ႉလႄႈ၊ ၼမ်ႉပၢင်ႇလၢႆႇၼၼ်ႉ ထူမ်ႈၶဝ်ပႅတ်ႈလႄႈ၊ ၶဝ်လူင်းၵႂႃႇၵႃႈတႂ်ႈမိူၼ်ၸိူဝ်ႉၼင်ႇ ၸိုၼ်းၵႃႈၼႂ်းၼမ်ႉ ဢၼ်ႁႅင်းယႂ်ႇၼႃႇၼၼ်ႉတီႈၶႃႈဢေႃႈ။- 11ဢူဝ်းထႃႇဝရႃႉၽြႃး၊ ၼႂ်းၽြႃးတင်းလၢႆ၊ ၽြႃးဢၼ်လႂ်တၵ်းမိူၼ်ၸိူဝ်ႉၼင်ႇၸဝ်ႈႁဝ်းတီႈၶႃႈ၊ ၽြႃးဢၼ်လႂ်တၵ်းမိူၼ်ၸိူဝ်ႉၼင်ႇၸဝ်ႈႁဝ်း ဢၼ်ပဵၼ်ၸဝ်ႈဢၼ်မုၼ်ယႂ်ႇၼႃႇ ၵွပ်ႈပိူဝ်ႈတၢင်းဢၼ်မူတ်းၸၢင်ႇ၊ ဢၼ်ပဵၼ်ၸဝ်ႈဢၼ်လီၵူဝ်ၼႂ်းမိူဝ်ႈဢၼ်ၶၢမ်ႇတၢင်းဢၼ်ယွင်ႈယေႃးယူႇၼၼ်ႉ ဢၼ်ပဵၼ်ၸဝ်ႈဢၼ်ၸၢင်ႈႁဵတ်းလွင်ႈတၢင်းဢၼ်လီဢၢမ်းတင်းလၢႆၼၼ်ႉတီႈၶႃႈ။- 12ၸဝ်ႈႁဝ်းယိုၼ်းမိုဝ်းၶွၼ်ၶႂႃၸဝ်ႈႁဝ်းလႄႈ၊ လိၼ်မိူင်းဢိုၼ်ၶဝ်ပႅတ်ႈတီႈၶႃႈဢေႃႈ။- 13ၸဝ်ႈႁဝ်းဢဝ်တင်းၵရူႉၼႃႇၸဝ်ႈႁဝ်းသေလႄႈ၊ ဢဝ်ၵူၼ်းမဵဝ်းဢၼ်ၸဝ်ႈႁဝ်းထုတ်ႇဢဝ်ၼၼ်ႉ ၵႂႃႇသူင်ႇပၼ်တီႈၶႃႈဢေႃႈ။ ၸဝ်ႈႁဝ်းဢဝ်တင်းတၼ်းၶူဝ်းၸဝ်ႈႁဝ်းသေလႄႈ ဢဝ်ၶဝ်ၼႄပၼ်သဵၼ်ႈတၢင်းဢၼ်ၵႂႃႇၸူးၵႃႈတီႈၸဝ်ႈႁဝ်းယူႇလႄႈ မူတ်းၸၢင်ႇၼၼ်ႉတီႈၶႃႈဢေႃႈ။- 14ၵူၼ်းမဵဝ်းတင်းလၢႆ ငိၼ်းသတၢင်းသဵင်ၶၢဝ်ႇလႄႈ တူၵ်းၸႂ်တီႈၶႃႈဢေႃႈ။ တၢင်းဢၼ်ၵူဝ်ဢၼ်သၼ်ႇ တၵ်းတီႉၵမ်ဢဝ် ၵူၼ်းမိူင်းၽီႉလိတ်ႉတီႉတင်းလၢႆတီႈၶႃႈဢေႃႈ။- 15ပူဝ်ႇဢေႇတုမ်ႇတင်းလၢႆ ႁွတ်ႈထိုင်တၢင်းဢၼ် ၵႂင်ၸႂ်ယုင်ႈၸႂ်လႄႈ တၢင်းဢၼ်ၵူဝ်ဢၼ်သၼ်ႇ တီႉၵမ်ဢဝ်ႁူဝ်ႁၢၼ်ၵူၼ်းသိုၵ်းမေႃႇၽႃႉတင်းလၢႆ တီႈၶႃႈဢေႃႈ။ ၵူၼ်းမိူင်းၶႃႇၼၢၼ်ႇတင်းသဵင်ႈတင်းလူင် ႁွတ်ႈထိုင်တၢင်းဢၼ် ၸိူမ်ႈယၢႆႈၵႂႃႇတီႈၶႃႈဢေႃႈ။- 16တၢင်းဢၼ်ၵူဝ်ဢၼ်ႁႄ၊ တၢင်းဢၼ်တူၵ်းၸႂ်လႂ်တိုၼ်ႇတူၵ်းႁွတ်ႈၵႃႈၼိူဝ်ၶဝ်လႄႈ၊ ၵွပ်ႈပိူဝ်ႈႁႅင်းတၼ်းၶူဝ်းမိုဝ်းၸဝ်ႈႁဝ်းၼၼ်ႉလႄႈ ၶဝ်ဢွၼ်ၵၼ်ယူႇၼိမ်ၼိမ်မိူၼ်ၸိူဝ်ႉၼင်ႇ မၢၵ်ႇႁိၼ်ၼၼ်ႉယူႇတေႃႇထိုင်ႁွတ်ႈ ၸူဝ်ႈဢၼ်ၵူၼ်းၸဝ်ႈႁဝ်းၸိူဝ်းၼႆႉ ဢမ်ႇပႆႇပူၼ်ႉၵႂႃႇၼၼ်ႉ၊ ဢူဝ်းထႃႇဝရႃႉၽြႃး၊ တေႃႇထိုင်ႁွတ်ႈၸူဝ်ႈဢၼ်ၵူၼ်းဢၼ် ၸဝ်ႈႁဝ်းသိုဝ်ႉဢဝ်ၸိူဝ်းၼႆႉ ဢမ်ႇပႆႇပူၼ်ႉၵႂႃႇၼၼ်ႉ တီႈၶႃႈဢေႃႈ။- 17ဢူဝ်းထႃႇဝရႃႉၽြႃးတီႈၶႃႈ၊ ၸဝ်ႈႁဝ်းတၵ်းဢဝ် ၵူၼ်းၸဝ်ႈႁဝ်းတင်းလၢႆ သႂၢင်းသႂ်ႇဝႆႉလႄႈ ၶျႃးတီႈယူႇပၼ်ၵႃႈၼႂ်းလွႆ၊ တီႈဢၼ်ၸဝ်ႈႁဝ်း ၶၢမ်ႇဢမူၺ်ႇၸဝ်ႈ၊ တီႈဢၼ်ၸဝ်ႈႁဝ်းမႄးႁဵတ်းဝႆႉပုၼ်ႈဢၼ်ၸဝ်ႈႁဝ်းတၵ်းၵိင်းဝၢပ်ႈယူႇ။ ဢူဝ်းထႃႇဝရႃႉၽြႃးတီႈၶႃႈ၊ ထႃႇၼႃႉတီႈဢၼ်မူတ်းၸၢင်ႇဢၼ်ၸဝ်ႈႁဝ်းဢဝ်မိုဝ်းၸဝ်ႈႁဝ်းတႄႇဝႆႉၼၼ်ႉတီႈၶႃႈဢေႃႈ။- 18ထႃႇဝရႃႉၽြႃး တၵ်းလႆႈဢုပ်ႉပိူင်ႇၸၢမ်ႇၸႃးၶိင်ႇၵႃႇလႃႉယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။
19လွင်ႈမၼ်းၸမ်ႉ မႃႉၶုၼ်ႁေႃၶမ်းၽႃႇရေႃး ဢိၵ်ႇတင်းလေႃႉရထႃးမၼ်းတင်းၵူၼ်းသိုၵ်းၶီႇမႃႉမၼ်းၸိူဝ်းၼၼ်ႉ ၶဝ်ႈၵႂႃႇၵႃႈၼႂ်းပၢင်ႇလၢႆႇလႄႈထႃႇဝရႃႉၽြႃးႁႂ်ႈၼမ်ႉပၢင်ႇလၢႆႇ ထူမ်ႈႁူမ်ႇၵႃႈၼိူဝ်ၶဝ်ပႅတ်ႈသေဢေႃႈ။ ၵူၼ်းမဵဝ်းဢီႉသရေႇလႃႉတင်းလၢႆၸမ်ႉ၊ ပႆၵႃႈၼိူဝ်လိၼ် ၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၵႂႃႇဢေႃႈ။- 20မီႉရီႉဢၢမ်ႇပရေႃးၽႅတ်ႈမႄႈယိင်းဢၼ်ပဵၼ်ပီႈၼၢင်းဢႃႇရုၼ်ႇၼၼ်ႉ ယိပ်းၵမ်ဢဝ်ၵွင်ၶဵတ်ႇလႄႈ၊ မႄႈယိင်းတင်းသဵင်ႈတင်းလူင်ၵေႃႈႁႆႇၵွင်ၶဵတ်ႇယူႇ၊ ၵႃႈယူႇသေလႄႈ ဢွၼ်ၵၼ်ၸွမ်းမၼ်းၵႂႃႇဢေႃႈ။- 21မီႉရီႉဢၢမ်ႇၼၼ်ႉ ၶႄႉသဵင်ၵၼ်တင်းၶဝ်လႄႈဝႃႈ၊ ပိူဝ်ႈဢၼ်ထႃႇဝရႃႉၽြႃးမီးတၢင်းဢၼ်မုၼ်ယႂ်ႇမုၼ်သုင်လႄႈ၊ ၵဝ်ၶႃႈတၵ်းႁဵတ်းၵႂၢမ်းတီႈထႃႇဝရႃႉၽြႃးတီႈၶႃႈဢေႃႈ။ မၼ်းၸဝ်ႈဢဝ်မႃႉ ဢိၵ်ႇတင်းၵူၼ်းဢၼ်ၶီႇမႃႉၸိူဝ်းၼၼ်ႉ၊ လူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
လွင်ႈၼမ်ႉၶူမ်
22လိုၼ်းၼၼ်ႉ မူဝ်းသေႇဢဝ်ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢွၵ်ႇသေၵႃႈတီႈပၢင်ႇလၢႆႇဢေႇတုမ်ႇၵႂႃႇလႄႈ၊ ၶဝ်ဢွၼ်ၵၼ်ၵႂႃႇႁွတ်ႈၵႂႃႇထိုင် ၵႃႈတီႈထိူၼ်ႇသူႉရႃႉဢေႃႈ။ ၶဝ်ၵႂႃႇၵႃႈၼႂ်းထိူၼ်ႇၼၼ်ႉ ၶၢဝ်းတၢင်းသၢမ်ဝၼ်းလႄႈ ဢမ်ႇထူပ်းဢမ်ႇႁၼ်ၼမ်ႉ။- 23မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမႃႇရႃႉၸိုင်၊ ပိူဝ်ႈဢၼ်ၼမ်ႉတီႈမႃႇရႃႉၼၼ်ႉၶူမ်လႄႈ ၶဝ်ဢမ်ႇၵိၼ်လႆႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈၸိုဝ်ႈတီႈၼၼ်ႈမႃႇရႃႉဢေႃႈ။- 24ၵူၼ်းတင်းလၢႆၼၼ်ႉဢွၼ်ၵၼ်တၢင်ႇဢပႅတ်ႈတီႈမူဝ်းသေႇလႄႈပွင်ႉၶၢင်းပွင်ႉမိူၼ်ႇလႄႈဝႃႈ၊ ႁဝ်းတၵ်းလႆႈၵိၼ်ၵႃႈသင်ဢဝ်၊ ဝႃႈၼင်ႇၼႆဢေႃႈ။- 25မၼ်းၵေႃႈႁွင်ႉသႅၼ်ႇတီႈထႃႇဝရႃႉၽြႃးလႄႈ၊ ထႃႇဝရႃႉၽြႃးၼႄပျႃးတူၼ်ႈမႆႉတူၼ်ႈၼိုင်ႈတီႈမၼ်းဢေႃႈ။ မၼ်းဢဝ်တူၼ်ႈမႆႉၼၼ်ႉ ၶျႃးသႂ်ႇၵႃႈၼႂ်းၼမ်ႉသေယဝ်ႉ၊ ၼမ်ႉၼၼ်ႉဝၢၼ်မႃးဢေႃႈ။ ၵႃႈတီႈၼၼ်ႈ မၼ်းၸဝ်ႈၸီႇယၢင်ႇႁဵတ်းႁႂ်ႈပဵၼ်ထုင်းပဵၼ်ၽိင်ႈဝႆႉလႄႈ ၸၢမ်းတူၺ်းၶဝ်လႄႈဝႃႈၸမ်ႉ၊- 26ပေႃးမႂ်းတၵ်းၸွမ်းဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်း ၸေးၸေးၸွတ်ႇၸွတ်ႇလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ထုၵ်ႇတႃမၼ်းၸဝ်ႈၼၼ်ႉ၊ ပေႃးမႂ်းတၵ်းထွမ်ႇဢဝ် ပိင်းၺၢပ်ႈၸဝ်ႈလႄႈ ပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးမၼ်းၸဝ်ႈတင်းသဵင်ႈတင်းလူင်ၼၼ်ႉၸိုင်၊ ၵဝ်တၵ်းဢမ်ႇႁႂ်ႈတၢင်းၶႆႈတၢင်းပဵၼ် ဢၼ်ၵဝ်ႁႂ်ႈၸပ်းတီႈၵူၼ်းဢေႇၵိပ်ႉတူႉၸိူဝ်းၼၼ်ႉ ၸပ်းတီႈမႂ်းသေၸိူဝ်ႉသေပိူင်။ ၵဝ်ၼႆႉပဵၼ်ထႃႇဝရႃႉၽြႃးဢၼ်ႁႂ်ႈတၢင်းၶႆႈတၢင်းပဵၼ်မႂ်းႁၢႆၼၼ်ႉဢေႃႈ၊ ဝႃႈၼင်ႇၼႆဢေႃႈ။
27လိုၼ်းၼၼ်ႉ ၶဝ်ႁွတ်ႈထိုင်ၵႃႈတီႈဢေးလိမ်းဢၼ်မီးၼမ်ႉမေႃႇ သိပ်းသွင်ၶုမ် ဢိၵ်ႇတင်းတူၼ်ႈထၢၼ်ၸဵတ်းသိပ်းတူၼ်ႈၼၼ်ႉလႄႈ ၶျႃးတပ်ႉၼႂ်းတီႈၼၼ်ႈ ၵႃႈတီႈႁိမ်းတီႈဢၼ်ၼမ်ႉၸိူဝ်းၼၼ်ႉမီးၼၼ်ႉဢေႃႈ။
Currently Selected:
ဢွၵ်ႇၵႂႃႇ 15: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
