ဢွၵ်ႇၵႂႃႇ 16
16
ၶဝ်ႈမုၼ်းမၼ်ႇၼႃႉဢိၵ်ႇတင်းၼူၵ်ႉၶုမ်ႈ
1ၵမ်းၼၼ်ႉ ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် သမ်ႉဢွၼ်ၵၼ်ဢွၵ်ႇသေၵႃႈတီႈဢေးလိမ်း ၵႂႃႇတၢင်းပႆတၢင်းလႄႈ၊ ႁွတ်ႈထိုင်ၵႃႈတီႈထိူၼ်ႇသိၼ်းဢၼ်မီးၵႃႈတီႈ ဝူင်ႈၵၢင်တီႈဢေးလိမ်း တင်းလွႆသီႉၼႃႉၼၼ်ႉ ၼႂ်းလိူၼ်တူႉတီႉယႃႉ သိပ်းႁႃႈဝၼ်း လိုၼ်းသေဢၼ် လုၵ်ႉသေၵႃႈၼႂ်းမိူင်းဢေႇၵိပ်ႉတူႉဢွၵ်ႇၵႂႃႇၼၼ်ႉဢေႃႈ။- 2ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်ၼၼ်ႉ ဢွၼ်ၵၼ်တၢင်ႇဢပႅတ်ႈတီႈမူဝ်းသေႇ ဢိၵ်ႇတင်းဢႃႇရုၼ်ႇ ၵႃႈတီႈၼႂ်းထိူၼ်ႇၼၼ်ႉလႄႈ ပွင်ႉၶၢင်းပွင်ႉမိူၼ်ႇဢေႃႈ။- 3ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်လၢတ်ႈတီႈၶဝ်လႄႈဝႃႈ၊ သင်ႁဝ်းလႆႈတၢႆသေလူၺ်ႈမိုဝ်းထႃႇဝရႃႉၽြႃး ယၢမ်းမိူဝ်ႈဢၼ်ႁဝ်းလႆႈ ၼင်ႈယူႇၵႃႈႁိမ်းမေႃႈၼိူဝ်ႉသေလႄႈ ၵိၼ်ဢိမ်ႇၵိၼ်တဵမ်ယူႇ ၵႃႈၼႂ်းမိူင်းဢေႇၵိပ်ႉတူႉၼၼ်ႉယဝ်ႉၸိုင်၊ ယဵင်ႈၶႅၼ်းတၵ်းလီဢေႃႈ။ လွင်ႈမၼ်းၸမ်ႉ သူဢဝ်မုၵ်ႉၵူၼ်းၸိူဝ်းၵူၼ်းတင်းသဵင်ႈတင်းလူင်ၸိူဝ်းၼႆႉ မႃးၵႃႈတီႈထိူၼ်ႇၼႆႉ ႁႂ်ႈလႆႈတၢႆၵွပ်ႈပိူဝ်ႈတၢင်းဢၼ်ဢိုပ်းယၢၵ်ႈလူင်ပႄႇ၊ ဝႃႈၼင်ႇၼႆဢေႃႈ။- 4မိူဝ်ႈၼၼ်ႉ ထႃႇဝရႃႉၽြႃးလၢတ်ႈတီႈမူဝ်းသေႇလႄႈဝႃႈ၊ တူၺ်းလူး၊ ၵဝ်တၵ်းႁႂ်ႈၽူၼ်ၶဝ်ႈမုၼ်းတူၵ်းသေၵႃႈၼိူဝ်ၵၢင်ႁၢဝ်မႃး ပုၼ်ႈသူဢေႃႈ။ ၵူၼ်းတင်းလၢႆတၵ်းလႆႈဢွၼ်ၵၼ် ဢွၵ်ႇလႄႈသိမ်းဢဝ်ၵူႈဝၼ်းၵူႈဝၼ်း ပုၼ်ႈဢၼ်တၵ်းၵုမ်ႇၵိၼ် ယေႈဝၼ်းယေႈဝၼ်း ႁႂ်ႈလႆႈၸၢမ်းတူၺ်းၶဝ် လွင်ႈဢၼ်ၶဝ်တၵ်းၵႂႃႇမႃးၸွမ်းၼင်ႇတြႃးၵဝ်ႁိုဝ်။ တၵ်းဢမ်ႇၵႂႃႇမႃးႁိုဝ်ၼၼ်ႉဢေႃႈ။- 5ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉ ၶဝ်တၵ်းလႆႈမႄးႁႅၼ်း ဢၼ်ၶဝ်သိမ်းဢဝ်ၼၼ်ႉဝႆႉလႄႈ ဢၼ်ၶဝ်သိမ်းဢဝ်ၼၼ်ႉ တၵ်းလႆႈလိူဝ်တွၼ်းသေ ဢၼ်ၶဝ်သိမ်းဢဝ်ယူႇၵူႈဝၼ်းၵူႈဝၼ်းၼၼ်ႉ သွင်ပုၼ်ႈဢေႃႈ၊ ဝႃႈၼင်ႇၼႆဢေႃႈ။
6 မူဝ်းသေႇတင်းဢႃႇရုၼ်ႇၵေႃႈလၢတ်ႈတီႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်လႄႈဝႃႈ၊ ၶိင်ႇႁူဝ်ၶမ်ႈဝၼ်းမိူဝ်ႈၼႆႉ သူတၵ်းႁူႉလွင်ႈဢၼ် ထႃႇဝရႃႉၽြႃးၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉဢေႃႈ။- 7ၶိင်ႇႁူဝ်ၼႂ်ၵေႃႈ သူတၵ်းလႆႈႁၼ် မုၼ်ၽုင်းထႃႇဝရႃႉၽြႃးဢေႃႈ။ မၼ်းၸဝ်ႈငိၼ်းသဵင်တၢင်းဢၼ်သူတၢင်ႇဢပႅတ်ႈတီႈထႃႇဝရႃႉၽြႃးလႄႈ ပွင်ႉၶၢင်းပွင်ႉမိူၼ်ႇယူႇၼၼ်ႉယဝ်ႉ။ လွင်ႈၼင်ႇႁိုဝ် သူတၵ်းတၢင်ႇဢပႅတ်ႈတီႈႁဝ်းလႄႈ ပွင်ႉၶၢင်းပွင်ႉမိူၼ်ႇၸိုင်၊ ႁဝ်းၼႆႉ ပဵၼ်ၵူၼ်းၸိူဝ်ႉၼင်ႇႁိုဝ်ၼၼ်ႉ၊ ဝႃႈၼင်ႇၼႆဢေႃႈ။
8ၵမ်းၼၼ်ႉ မူဝ်းသေႇသမ်ႉလၢတ်ႈထႅင်ႈလႄႈဝႃႈ၊ မိူဝ်ႈဢၼ်ထႃႇဝရႃႉၽြႃး ပၼ်ၼိူဝ်ႉပုၼ်ႈဢၼ်သူတၵ်းၵိၼ် ၼႂ်းၶိင်ႇႁူဝ်ၶမ်ႈဢိၵ်ႇတင်း ၶဝ်ႈမုၼ်းႁႂ်ႈလႆႈပေႃးဢိမ်ႇၼႂ်းၶိင်ႇႁူဝ်ၼႂ်ၼၼ်ႉၸိုင်၊ ၵႂၢမ်းၼႆႉတၵ်းပျေႉၸုမ်ႇဢေႃႈ။ ထႃႇဝရႃႉၽြႃးငိၼ်းသဵင် ဢၼ်သူတၢင်ႇဢပႅတ်ႈတီႈမၼ်းၸဝ်ႈလႄႈ ပွင်ႉၶၢင်းပွင်ႉမိူၼ်ႇၼၼ်ႉယဝ်ႉ။ ႁဝ်းၼႆႉ ပဵၼ်ၵူၼ်းၸိူဝ်ႉၼင်ႇႁိုဝ်။ ၵႂၢမ်းဢၼ်သူတၢင်ႇဢပႅတ်ႈလႄႈ ပွင်ႉၶၢင်းပွင်ႉမိူၼ်ႇၼၼ်ႉ ဢမ်ႇတိူဝ်ႉဢမ်ႇထုၵ်ႇတီႈႁဝ်း၊ တိူဝ်ႉထုၵ်ႇတီႈထႃႇဝရႃႉၽြႃးယဝ်ႉ၊ ဝႃႈၼင်ႇၼႆဢေႃႈ။
9ၵမ်းၼၼ်ႉ မူဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊ သင်ႇလၢတ်ႈတီႈပရဵၵ်ႈသၢတ်ႈ ၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်လႄႈဝႃႈ၊ ပိူဝ်ႈဢၼ်ထႃႇဝရႃႉၽြႃးငိၼ်းသဵင်ဢၼ်သူတၢင်ႇဢပႅတ်ႈလႄႈပွင်ႉၶၢင်းပွင်ႉမိူၼ်ႇၼၼ်ႉလႄႈ၊ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈတႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 10မိူဝ်ႈဢၼ်ဢႃႇရုၼ်ႇသင်ႇလၢတ်ႈတီႈပရဵၵ်ႈသၢတ်ႈ ၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်ၸိူဝ်ႉၼင်ႇၼၼ်ၼၼ်ႉၸိုင်၊ ၶဝ်ၼၼ်ႉမုင်ႈတူၺ်းၵႃႈတီႈထိူၼ်ႇလႄႈ မုၼ်ၽုင်းထႃႇဝရႃႉၽြႃးၼၼ်ႉပေႃႇမႃးၵႃႈၼႂ်းမွၵ်ႇၵုမ်ႈဢေႃႈ။
11ထႃႇဝရႃႉၽြႃးၵေႃႈလၢတ်ႈတီႈမူဝ်းသေႇလႄႈဝႃႈ၊- 12ၵဝ်လႆႈငိၼ်းသဵင်ဢၼ် ၵူၼ်းမဵဝ်းဢီႉသရေႇလႃႉတင်းလၢႆတၢင်ႇဢပႅတ်ႈလႄႈ ပွင်ႉၶၢင်းပွင်ႉမိူၼ်ႇၼၼ်ႉယဝ်ႉ။ သင်ႇလၢတ်ႈတီႈၶဝ်လႄႈဝႃႈ၊ ၶိင်ႇႁူဝ်ၶမ်ႈသူတၵ်းလႆႈၵိၼ်ၼိူဝ်ႉဢေႃႈ။ ၶိင်ႇႁူဝ်ၼႂ်ၵေႃႈ သူတၵ်းလႆႈၵိၼ်ဢိမ်ႇၵိၼ်တဵမ်ဝႆႉတင်းၶဝ်ႈမုၼ်းဢေႃႈ။ သူတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
13ၶိင်ႇႁူဝ်ၶမ်ႈၼၼ်ႉ ၼူၵ်ႉၶုမ်ႈဢွၼ်ၵၼ်ၶိုၼ်ႈမႃးလႄႈ ႁူမ်ႇသုမ်ႇတပ်ႉၶဝ်ၵူႈတီႈၵူႈလႅၼ်ဝႆႉဢေႃႈ။ ၶိင်ႇႁူဝ်ၼႂ်ၵေႃႈ ၼမ်ႉၼၢႆးတူၵ်းႁွပ်ႈၵႃႈတီႈႁိမ်းႁွမ်းတပ်ႉၼၼ်ႉယူႇဢေႃႈ။- 14မိူဝ်ႈဢၼ်ၼမ်ႉၼၢႆး ဢၼ်တူၵ်းႁွပ်ႈၼၼ်ႉ ၶိုၼ်းၶိုၼ်ႈယဝ်ႉၼၼ်ႉၸိုင်၊ ၶိူင်ႈပိူင်ဢၼ်ပဵၼ်သေးသေးဢွၼ်ႇမူၼ်းဝႆႉမိူၼ်ၸိူဝ်ႉၼင်ႇ ၵွၼ်ႈမူၺ်ၵႃႈၼိူဝ်လိၼ်ၼၼ်ႉၵိုတ်းဝႆႉမီးယူႇ ၵႃႈၼိူဝ်ၼႃႈထိူၼ်ႇၼႃႈၶိူဝ်းဢေႃႈ။- 15မိူဝ်ႈဢၼ်ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ႁၼ်ၶိူင်ႈပိူင်ဢၼ်ၼၼ်ႉၸိုင်၊ ၵွပ်ႈပိူဝ်ႈဢၼ်ၶဝ်ဢမ်ႇႁူႉလွင်ႈဢၼ်ၶိူင်ႈပိူင်ၼၼ်ႉ ပဵၼ်ၵႃႈသင်ၼၼ်ႉလႄႈ ၵေႃႉၼိုင်ႈလႄႈၵေႃႉၼိုင်ႈထၢမ်ၵၼ်လႄႈဝႃႈ၊ ဢၼ်ၼႆႉပဵၼ်ၵႃႈသင်၊ ဝႃႈၼင်ႇၼႆဢေႃႈ။ မူဝ်းသေႇမွၵ်ႇလၢတ်ႈတီႈၶဝ်လႄႈဝႃႈ၊ ဢၼ်ၼႆႉပဵၼ်ၶဝ်ႈမုၼ်း ဢၼ်ထႃႇဝရႃႉၽြႃးဢဵတ်းလူပၼ်ပုၼ်ႈဢၼ်သူတၵ်းၵိၼ်ဢေႃႈ။- 16ထႃႇဝရႃႉၽြႃးမီးဢမိင်ႉလူၺ်ႈလွင်ႈဢၼ်ၼႆႉလႄႈဝႃႈၸမ်ႉ၊ ဢွၼ်ၵၼ်သိမ်းဢဝ်ႁႂ်ႈပေႃးၵုမ်ႇၵိၼ်ႁင်းၽႂ်ႁင်းမၼ်းၵူႈၵေႃႉၵူႈၵူၼ်းတႃႉ။ သူတၵ်းလႆႈၸွမ်းၵႃႈၼင်ႇဢၼ်ၼပ်ႉဢၼ်ဢၢၼ်ႇၵူၼ်းႁိူၼ်းၵူၼ်းယေးသူၼၼ်ႉသေလႄႈ ဢွၼ်ၵၼ်သိမ်းဢဝ်ယေႈၵေႃႉယေႈဢေႃးမေႇ ဝႆႉပုၼ်ႈၶဝ်ၸိူဝ်းဢၼ် မီးၵႃႈၼႂ်းမူဝ်းၵႃႇသူႁင်းၽႂ်ႁင်းမၼ်း ၵူႈၵေႃႉၵူႈၵူၼ်းဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။
17ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်ႁဵတ်းၸွမ်းၸိူဝ်ႉၼင်ႇၼၼ်လႄႈ ၵမ်ႈၽွင်ႈသိမ်းဢဝ်ၼမ်ၼမ် ၵမ်ႈၽွင်ႈသိမ်းဢဝ်ၵေႇၵေႇဢေႃႈ။- 18မိူဝ်ႈဢၼ်ၶဝ်ဢဝ်ၵွၵ်းဢေႃးမေႇတူင်တူၺ်းၸိုင်၊ ၵေႃႉဢၼ်လႆႈၼမ်ၼမ်ၼၼ်ႉ ဢမ်ႇလိူဝ်ၵႂႃႇ၊ ၵေႃႉဢၼ်လႆႈၵေႇၵေႇၼၼ်ႉဢမ်ႇလူဝ်ႇထႅင်ႈ။ ၶဝ်ဢွၼ်ၵၼ်သိမ်းဢဝ်ပုၼ်ႈဢၼ်တၵ်းၵုမ်ႇၵိၼ်ဝႆႉ ႁင်းၽႂ်ႁင်းမၼ်းၵူႈၵေႃႉၵူႈၵူၼ်းဢေႃႈ။- 19မူဝ်းသေႇၵေႃႈလၢတ်ႈတီႈၶဝ်လႄႈဝႃႈ၊ ၽူႈလႂ်ယႃႇပေႁႂ်ႈမၼ်းၵိုတ်းၵျၢၼ်ႇဝႆႉတေႃႇထိုင်ႁွတ်ႈ ၶိင်ႇၵၢင်ၼႂ်၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 20ၶဝ်ဢမ်ႇထွမ်ႇဢမ်ႇဢဝ်ၵႂၢမ်းမူဝ်းသေႇလႄႈ ၵူၼ်းၵမ်ႈၽွင်ႈႁႂ်ႈၵိုတ်းၵျၢၼ်ႇဝႆႉတေႃႇထိုင်ႁွတ်ႈ ၶိင်ႇၵၢင်ၼႂ်သေယဝ်ႉ၊ ဢၼ်ၼၼ်ႉပဵၼ်မူင်ႈ ပဵၼ်မႅင်းမဵၼ်သူမ်ႈၵႂႃႇၼၼ်ႉလႄႈ၊ မူဝ်းသေႇၸႂ်မႆႈၶႆႈၸႃႉတီႈၶဝ်ဢေႃႈ။- 21ၶဝ်ၼၼ်ႉဢွၼ်ၵၼ်သိမ်းဢဝ်ပုၼ်ႈဢၼ်တူဝ်ၸဝ်ႈၵဝ်ႇ တၵ်းၵုမ်ႇၵိၼ်ၼၼ်ႉၵူႈၼႂ်ၵူႈၼႂ်ႁင်းၽႂ်ႁင်းမၼ်းဢေႃႈ။ မိူဝ်ႈဢၼ်လႅတ်ႇမႆႈမႃးၸိုင်၊ ၸိူမ်ႈႁၢႆလၢႆၵႂႃႇသေဢေႃႈ။- 22ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉ ၶဝ်လႆႈသိမ်းဢဝ်ၶဝ်ႈမုၼ်းသွင်ပုၼ်ႈဢၼ်ဝႃႈယေႈၵေႃႉယေႈသွင်ဢေႃးမေႇဢေႃႈ။ လွင်ႈတၢင်းၼၼ်ႉၸိုင်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ဢွၼ်ၵၼ်မႃးလႄႈ မွၵ်ႇလၢတ်ႈ တီႈမူဝ်းသေႇဢေႃႈ။- 23မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃးမီးဢမိင်ႉလူၺ်ႈလွင်ႈဢၼ်ၼႆႉလႄႈဝႃႈၸမ်ႉ၊ ဝၼ်းမိူဝ်ႈၽုၵ်ႈပဵၼ်ဝၼ်းဢၼ်တၵ်းလႆႈယူႇၼိမ်ၼိမ်လီလီဝၼ်းၵမ်သိၼ် ဢၼ်မူတ်းၸၢင်ႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ဢွၼ်ၵၼ်ၼိုင်ႈ ဢၼ်သူၶႂ်ႈၼိုင်ႈၼၼ်ႉတႃႉ။ ဢွၼ်ၵၼ်တူမ်ႈဢၼ်သူၶႂ်ႈတူမ်ႈၼၼ်ႉတႃႉ။ ဢွၼ်ၵၼ်ဢဝ်ဢၼ်ၵိုတ်းဢၼ်ၵျၢၼ်ႇၼၼ်ႉသိမ်းဝႆႉလႄႈ ပႂ်ႉတေႃႇထိုင်ႁွတ်ႈၶိင်ႇၵၢင်ၼႂ်တႃႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။- 24ၸွမ်းၵႃႈၼင်ႇဢၼ်မူဝ်းသေႇသင်ႇလၢတ်ႈဝႆႉၼၼ်ႉသေလႄႈ၊ ၶဝ်ဢွၼ်ၵၼ်သိမ်းဝႆႉတေႃႇထိုင်ႁွတ်ႈၶိင်ႇၵၢင်ၼႂ်ဢေႃႈ။ ဢၼ်ၼၼ်ႉၵၢင်းလွတ်ႈတင်းတၢင်းဢၼ်မဵၼ်သူမ်ႈလႄႈ ဢမ်ႇမီးမူင်ႈမီးမႅင်း။- 25မူဝ်းသေႇၵေႃႈလၢတ်ႈလႄႈဝႃႈ၊ ဢွၼ်ၵၼ်ဢဝ်ဢၼ်ၼၼ်ႉၵိၼ်ဝၼ်းမိူဝ်ႈၼႆႉတႃႉ။ ဝၼ်းမိူဝ်ႈၼႆႉပဵၼ်ဝၼ်းၵမ်သိၼ်ထႃႇဝရႃႉၽြႃးဢေႃႈ။ ၼႂ်းဝၼ်းမိူဝ်ႈၼႆႉ ဢမ်ႇလႆႈထူပ်းလႆႈႁၼ်ဢၼ်ၼၼ်ႉ ၵႃႈတီႈထိူၼ်ႇ။ ႁူၵ်းဝၼ်းတဵမ်တဵမ်သူတၵ်းလႆႈဢွၼ်ၵၼ်သိမ်းဢဝ်ဢေႃႈ။- 26ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းဢၼ်ဝႃႈ ဝၼ်းၵမ်သိၼ်ၼၼ်ႉၸိုင်၊ ဢၼ်ၼၼ်ႉဢမ်ႇမီးလႃးလႃး၊ ဝႃႈၼင်ႇၼႆဢေႃႈ။
27ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ ၵူၼ်းၵမ်ႈၽွင်ႈဢွၵ်ႇၵႂႃႇႁႂ်ႈလႆႈသိမ်းဢဝ်လႄႈ ဢမ်ႇထူပ်းဢမ်ႇႁၼ်လႃးလႃး။- 28ထႃႇဝရႃႉၽြႃးၵေႃႈလၢတ်ႈတီႈမူဝ်းသေႇလႄႈဝႃႈ၊ သူတၵ်းထဵင်ပႅတ်ႈပိင်းၺၢပ်ႈၵဝ် ဢိၵ်ႇတင်းတြႃးၵဝ်ၸိူဝ်းၼၼ်ႉလႄႈ ယူႇလၢႆၶိင်ႇလၢႆမိူဝ်ႈ။- 29ထႃႇဝရႃႉၽြႃးပၼ်ဝၼ်းၵမ်သိၼ်တီႈသူယဝ်ႉ။ ပိူဝ်ႈၼႆလႄႈ ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉ မၼ်းၸဝ်ႈပၼ်ၶဝ်ႈမုၼ်း ပုၼ်ႈသွင်ဝၼ်းဢေႃႈ။ ႁႂ်ႈၵူႈၵေႃႉၵူႈၵူၼ်းယူႇတီႈၽႂ်တီႈမၼ်းယူႇတႃႉ။ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ ယႃႇပေႁႂ်ႈၽူႈလႂ်ဢွၵ်ႇသေၵႃႈၼႂ်းတီႈဢၼ်တူဝ်ၸဝ်ႈၵဝ်ႇယူႇၼၼ်ႉ၊ ဝႃႈၼင်ႇၼႆဢေႃႈ။- 30ပိူဝ်ႈၼႆလႄႈ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ ၵူၼ်းတင်းလၢႆဢွၼ်ၵၼ်ယူႇၼိမ်ၼိမ်လီလီဢေႃႈ။- 31ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ႁွင်ႉႁဵၵ်ႈၸိုဝ်ႈဢၼ်ၼၼ်ႉလႄႈဝႃႈ၊ မၼ်ႇၼႃႉ၊ ဝႃႈၼင်ႇၼႆဢေႃႈ။ ပဵၼ်ၸိူဝ်ႉၼင်ႇ မဵတ်ႉၽၵ်းၵီးလႄႈ မီးငဝ်းဢၼ်ၶၢဝ်ဝႆႉဢေႃႈ။ ဢရႃႉသႃႇတၢင်းဝၢၼ်မၼ်းမိူၼ်ၸိူဝ်ႉၼင်ႇ ၶဝ်ႈမုၼ်းၶွပ်ႈဢၼ်လေႃးတင်းၼမ်ႉၽိုင်ႈၼၼ်ႉဢေႃႈ။
32 မူဝ်းသေႇၵေႃႈလၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ဢဝ်ႁႂ်ႈတဵမ်ဢေႃးမေႇၼိုင်ႈလႄႈ သိမ်းဝႆႉပုၼ်ႈၸိူဝ်ႉၶိူဝ်းသူ သိုပ်ႇသိုပ်ႇတၢမ်းတၢမ်း ႁႂ်ႈၶဝ်လႆႈႁၼ် ၶဝ်ႈမုၼ်းဢၼ်ၵဝ်လဵင်ႉသူ ၵႃႈတီႈထိူၼ်ႇၼႂ်းမိူဝ်ႈဢၼ်ၵဝ်ၼုၵ်ႈဢဝ်သူဢွၵ်ႇသေၵႃႈၼႂ်း မိူင်းဢေႇၵိပ်ႉတူႉမႃးၼၼ်ႉတႃႉ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 33ၵမ်းၼၼ်ႉ မူဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊ ဢဝ်မေႃႈႁူၺ်ႇၼိုင်ႈလႄႈသႂ်ႇမၼ်ႇၼႃႉ ႁႂ်ႈတဵမ်ဢေႃးမေႇၼိုင်ႈသေယဝ်ႉ၊ သိမ်းဝႆႉၵႃႈတီႈ ၽၢႆႇၼႃႈထႃႇဝရႃႉၽြႃး ႁႂ်ႈပႂ်ႉဝႆႉပုၼ်ႈၸိူဝ်ႉၶိူဝ်းသူ သိုပ်ႇသိုပ်ႇတၢမ်းတၢမ်းၼၼ်ႉတႃႉ၊ ဝႃႈၼင်ႇၼႆလႄႈ၊- 34ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉသေလႄႈ ဢႃႇရုၼ်ႇသိမ်းဢဝ် မၼ်ႇၼႃႉၼၼ်ႉ ဝႆႉၵႃႈတီႈၽၢႆႇၼႃႈၶိူင်ႈဢၼ်ၶၢမ်ႇသၢၵ်ႈသေႇၸဝ်ႈႁႂ်ႈလႆႈပႂ်ႉဝႆႉဢေႃႈ။- 35ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်ၵိၼ်မၼ်ႇၼႃႉၼၼ်ႉ သီႇသိပ်းပီႊတဵမ်တဵမ်ယူႇတေႃႇထိုင်ႁွတ်ႈထၼ်ႈပေႃး ၶဝ်ႁွတ်ႈၽႅဝ်ၵႃႈတီႈမိူင်းတီႈဢၼ် ၵူၼ်းယူႇၼၼ်ႉဢေႃႈ။ ၶဝ်ဢွၼ်ၵၼ်ၵိၼ်မၼ်ႇၼႃႉၼၼ်ႉ တေႃႇထိုင်ႁွတ်ႈထၼ်ႈပေႃးၶဝ် ႁွတ်ႈၽႅဝ်ၵႃႈတီႈလႅၼ်လိၼ် မိူင်းၶႃႇၼၢၼ်ႇၼၼ်ႉဢေႃႈ။- 36ဢေႃးမေႇၸမ်ႉ၊ ပဵၼ်ဢေးၽႃႇသိပ်းပုၼ်ႈဢဝ်ပုၼ်ႈၼိုင်ႈဢေႃႈ။
Currently Selected:
ဢွၵ်ႇၵႂႃႇ 16: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
