ဢွၵ်ႇၵႂႃႇ 17
17
ၼမ်ႉလႆဢွၵ်ႇမၢၵ်ႇႁိၼ်မႃး
(တူၺ်း၊ ထိူၼ်ႇ 20:1-13)
1ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် ဢွၼ်ၵၼ်ဢွၵ်ႇသေၵႃႈတီႈထိူၼ်ႇသိၼ်းၼၼ်ႉ ၶဝ်တၢမ်းၶဝ်ၸွမ်းတၢင်းၵႂႃႇ ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉလႄႈ၊ ၶျႃးပၢင်ၵႃႈတီႈရေႇၽီႉတိမ်ႇဢေႃႈ။ ၵႃႈတီႈၼၼ်ႈၼၼ်ႉ ဢမ်ႇမီးၼမ်ႉပုၼ်ႈဢၼ် ၵူၼ်းတင်းလၢႆတၵ်းၵိၼ်။- 2ပိူဝ်ႈၼႆလႄႈ ၵူၼ်းတင်းလၢႆ ၽိတ်းမူဝ်းသေႇလႄႈဝႃႈ၊ ပၼ်ၼမ်ႉပုၼ်ႈဢၼ်ႁဝ်းတၵ်းၵိၼ်သေၵမ်း၊ ဝႃႈၼင်ႇၼႆဢေႃႈ။ မူဝ်းသေႇၵေႃႈလၢတ်ႈလႄႈဝႃႈ၊ ႁဵတ်းသင်လႄႈသူၽိတ်းၵဝ်ၼင်ႇႁိုဝ်။ ႁဵတ်းသင်လႄႈသူၸၢမ်းတူၺ်းထႃႇဝရႃႉၽြႃးၼင်ႇႁိုဝ်။ ဝႃႈၼင်ႇၼႆဢေႃႈ။- 3ၵူၼ်းတင်းလၢႆၼၼ်ႉ ယၢၵ်ႇၼမ်ႉလႄႈ ဢွၼ်ၵၼ်တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈမူဝ်းသေႇလႄႈဝႃႈ၊ ႁဵတ်းသင်လႄႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးႁႂ်ႈလႆႈဢဝ် ၸႃႉၸဵမ်ႁဝ်းလႄႈလုၵ်ႈလၢင်းႁဝ်း ဢိၵ်ႇတင်းတရိၵ်ႈသၢၼ်ႇႁဝ်း ယၢၵ်ႇၼမ်ႉသေလႄႈတၢႆၼင်ႇႁိုဝ်။ ဝႃႈၼင်ႇၼႆဢေႃႈ။- 4မိူဝ်ႈၼၼ်ႉ မူဝ်းသေႇႁွင်ႉသႅၼ်ႇတီႈထႃႇဝရႃႉၽြႃးလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းလႆႈႁဵတ်းတီႈၵူၼ်းၸိူဝ်းၼႆႉ ၸိူဝ်ႉၼင်ႇႁိုဝ်တီႈၶႃႈ၊ ၶဝ်ၸမ်တၵ်းဢဝ်မၢၵ်ႇႁိၼ်ထိမ်ႈၶႃႈၸဝ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 5ထႃႇဝရႃႉၽြႃးၵေႃႈ မီးဢမိင်ႉတီႈမူဝ်းသေႇလႄႈဝႃႈ၊ ၵႂႃႇဢွၼ်တၢင်းၵူၼ်းတင်းလၢႆလႄႈ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၸွမ်းတႃႉ။ ယိပ်းၵမ်ဢဝ်ၶွၼ်ႉတဝ်ႉမႂ်းဢၼ်မႂ်းဢဝ်ပေႃႉယႅၼ်ႉၼမ်ႉႁွင်ႈၼၼ်ႉလႄႈၵႂႃႇတႃႉ။- 6တူၺ်းလူး၊ ၵဝ်တၵ်းၸုၵ်းယူႇၵႃႈတီႈၽၢႆႇၼႃႈမႂ်း ၵႃႈၼိူဝ်မၢၵ်ႇႁိၼ် ဢၼ်မီးၵႃႈတီႈႁေႃးရပ်ႉၼၼ်ႉလႄႈ မႂ်းတၵ်းလႆႈပေႃႉယႅၼ်ႉမၢၵ်ႇႁိၼ်ၼၼ်ႉဢေႃႈ။ ၼမ်ႉတၵ်းဢွၵ်ႇၵႃႈၼႂ်းမၢၵ်ႇႁိၼ်ၼၼ်ႉမႃးပုၼ်ႈဢၼ်ၵူၼ်းတင်းလၢႆတၵ်းၵိၼ်ဢေႃႈ၊ ဝႃႈၼင်ႇၼႆဢေႃႈ။ မူဝ်းသေႇၵေႃႈႁဵတ်းၸိူဝ်ႉၼင်ႇၼၼ် ၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢေႃႈ။- 7မၼ်းႁွင်ႉႁဵၵ်ႈၸိုဝ်ႈတီႈၼၼ်ႈ မတ်ႉသႃႇ တင်းမေႇရီႉပႃႉ ၵွပ်ႈပိူဝ်ႈလွင်ႈဢၼ် ၵူၼ်းမဵဝ်းဢီႉသရေႇလႃႉႁဵတ်းတၢင်းၽိတ်း ဢိၵ်ႇတင်း ၵွပ်ႈပိူဝ်ႈလွင်ႈဢၼ်ၶဝ်ၸၢမ်းတူၺ်းထႃႇဝရႃႉၽြႃးလႄႈဝႃႈ၊ ၵႃႈၼႂ်းႁဝ်းၼႆႉထႃႇဝရႃႉၽြႃးမီးႁိုဝ်ဢမ်ႇမီးႁိုဝ်။ ဝႃႈၼင်ႇၼႆၼၼ်ႉဢေႃႈ။
တၢင်းဢၼ်တိုၵ်းၵၼ်တင်းၵူၼ်းမဵဝ်းဢႃႇမလႅၵ်ႉ
8မိူဝ်ႈၼၼ်ႉ ၵူၼ်းဢႃႇမလႅၵ်ႉတင်းလၢႆဢွၼ်ၵၼ်မႃးလႄႈ တိုၵ်းတေႃးၵူၼ်းမဵဝ်းဢီႉသရေႇလႃႉၶဝ်ၵႃႈတီႈရေႇၽီႉတိမ်ႇဢေႃႈ။- 9မူဝ်းသေႇၵေႃႈလၢတ်ႈတီႈယေႃးသူႉလႄႈဝႃႈ၊ လိူၵ်ႈၵဵပ်းဢဝ်ၵူၼ်းလႄႈ ဢွၵ်ႇၵႂႃႇႁႂ်ႈလႆႈတိုၵ်းတေႃးၵူၼ်းဢႃႇမလႅၵ်ႉၸိူဝ်းၼၼ်ႉတႃႉ။ ဝၼ်းမိူဝ်ႈၽုၵ်ႈၵဝ်တၵ်းယိပ်းၵမ်ဢဝ်ၶွၼ်ႉတဝ်ႉၽြႃးပဵၼ်ၸဝ်ႈသေလႄႈ ၸုၵ်းယူႇၵႃႈၼိူဝ်ပၢႆလွႆဢေႃႈ၊ ဝႃႈၼင်ႇၼႆဢေႃႈ။- 10ယေႃးသူႉႁဵတ်းၸွမ်းၵႃႈၼင်ႇဢၼ်မူဝ်းသေႇသင်ႇလၢတ်ႈဝႆႉၼၼ်ႉလႄႈ တိုၵ်းတေႃးၵူၼ်းဢႃႇမလႅၵ်ႉၸိူဝ်းၼၼ်ႉဢေႃႈ။ မူဝ်းသေႇ၊ ဢႃႇရုၼ်ႇတင်းႁူႉရႃႉ ၶိုၼ်ႈၵႂႃႇၵႃႈတီႈၼိူဝ်ပၢႆလွႆဢေႃႈ။- 11မိူဝ်ႈဢၼ်မူဝ်းသေႇယုၵ်ႉမိုဝ်းမၼ်းၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉပႄႉၼႅင်ႇဢေႃႈ။ မိူဝ်ႈဢၼ်မၼ်းၶျႃးမိုဝ်းမၼ်းၼၼ်ႉၸိုင်၊ ၵူၼ်းဢႃႇမလႅၵ်ႉၼၼ်ႉပႄႉၼႅင်ႇဢေႃႈ။- 12ၵူၺ်းၵႃႈ ပိူဝ်ႈဢၼ်မိုဝ်းမူဝ်းသေႇ ၵူၼ်ႉၼႃႇလႄႈ၊ ၶဝ်ဢဝ်မၢၵ်ႇႁိၼ်မွၼ် ၵႃႈတီႈတႂ်ႈမၼ်းဝႆႉလႄႈ မၼ်းၼင်ႈသေယဝ်ႉ၊ ဢႃႇရုၼ်ႇ တင်းႁူႉရႃႉယူႇယေႈၵေႃႉယေႈၽၢႆႇလႄႈ ၵမ်ႉထွၵ်ႈမိုဝ်းမၼ်းဝႆႉဢေႃႈ။ ၼင်ႇၼၼ်လႄႈ မိုဝ်းမၼ်းၼၼ်ႉၼိမ်ယူႇတေႃႇထိုင်ႁွတ်ႈ ၵၢင်ဝၼ်းထၼ်ႈပေႃးတူၵ်းဢေႃႈ။- 13ယေႃးသူႉၵေႃႈဢဝ်တင်းလၢပ်ႇတင်းလႅဝ်းသေလႄႈႁဵတ်းတီႈၶုၼ်ဢႃႇမလႅၵ်ႉ ဢိၵ်ႇတင်းၵူၼ်းမၼ်းၸိူဝ်းၼၼ်ႉဢေႃႈ။- 14ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ တႅမ်ႈလိၵ်ႈပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းၼႆႉဝႆႉလႄႈၽတ်းရွတ်ႈထိုင်ႁူယေႃးသူႉတႃႉ။ လွင်ႈမၼ်းၸမ်ႉ ၵဝ်တၵ်းၽဵဝ်ႈတီႈမၢတ်ႈတီႈတွင်း ဢႃႇမလႅၵ်ႉၶဝ်ပႅတ်ႈသေ ၵႃႈတႂ်ႈၽႃႉၵၢင်ႁၢဝ် မူတ်းမူတ်းသဵင်ႈသဵင်ႈဢေႃႈ၊ ဝႃႈၼင်ႇၼႆဢေႃႈ။- 15မူဝ်းသေႇၵေႃႈ ႁဵတ်းယိတ်ႈပလၢင်ႇလႄႈ ႁွင်ႉႁဵၵ်ႈၸိုဝ်ႈမၼ်း ယေႇႁေႃးဝႃႇၼိတ်ႉသီႉဢေႃႈ။- 16လွင်ႈမၼ်းၸမ်ႉ မၼ်းဝႃႈ၊ မိုဝ်းမီးဝႆႉၵႃႈၼိူဝ်ရႃႇၸႃႉပလၢင်ႇထႃႇဝရႃႉၽြႃးလႄႈ ထႃႇဝရႃႉၽြႃးတၵ်းတိုၵ်းတေႃး ၵူၼ်းဢႃႇမလႅၵ်ႉ တင်းလၢႆ ယူႇၶိင်ႇၵႃႇလႃႉ သိုပ်ႇသိုပ်ႇတၢမ်းတၢမ်းဢေႃႈ၊ ဝႃႈၼင်ႇၼႆဢေႃႈ။
Currently Selected:
ဢွၵ်ႇၵႂႃႇ 17: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
